Fr.Joachim Naing Moe အဂဲး

Fr.Joachim Naing Moe ယီၩအီၪဖျဲၪထၪ့လၧ ၁၉၅၈နံၪ့ လၩစဲတံၫဘၧၫ့ ၁၁ ၥၫ့နီၪလီၫႉ  အဝ့ၫအဖါနီၪမွဲလၧ ဂၠိၩဇဲၭမၩ့နံၫကီၩ ဒဲ အမိနီၪမွဲဝ့ၫလၧ ကလၫရၫဂါၡၫ့ဆ့နီၪလီၫႉ

အထၧၫ့ဖုဝဲအီၪ၁၀ဂၩအဖၧၩ့ မွဲလၧအဆံၭထုၬဒဲ အဝ့ၫၥံၪအဂံၪ့ဒီၪ့နီၪ ၡၪ့ယၬဝ့ၫနၭမၬနီၪလီၫႉ စၭထၪ့လၧ ၁ဖၨၪထီၩ့စိၩလၧ ၉ဖၨၪနီၪ ထၪ့ဆၧမၩလိၪလၧ ကၠိၫ့မင့ၩ အထက ၁ ႇ ထီၩ့လၧ၁၀ဖၨၪ က ကၠၪလ့ၩထၪ့ဝ့ၫလၧ အထက လၭၥၫ ဝံးတခိၩ့ဂီၩ့ ၁၀ဖၨၪ ဖျီၪ့ဝ့ၫဒၪနီၪလီၫႉ

 ၁၉၇၆နံၪ့နီၪ လ့ၩနုၬလၩ့လၧ ဝံးတခိၩ့ ၦကကဲၪထၪ့ဘိၪ့ခိၪၥၫ့ခၫဘျၪ့ကိၪ့ဒိၪဖၧၩ့ဂီၩ့ ၁၉၈၀ နံၪ့နီၪ ဒိၭန့ထၪ့ဘၪ B.Sc Chemistryဆၧနဲၪ့လၩဖၩ့နီၪလီၫႉ ၁၉၈၆နံၪ့အထီနီၪ ကဲၪထၪ့ဘၪ ဘိၪ့ခိၪၥၫ့ခၫလဂၩဒဲ ၁၉၈၆-၈၇နီၪ အလးလၩ့ဝ့ၫဒၪလၧ ဝံးမၠီၩ့မၠၭႇ ၁၉၈၇-၈၈နီၪ လၧ Fr.John Su ကၠၧၫ့ကၠၧၫ့ အလးလၩ့ဝ့ၫဒၪလၧ St.Teresa ၥရိၬလးဝၩ့ဖၧၩ့နီၪလီၫႉ ၁၉၈၈နီၪ လ့ၩထၪ့ဆၧမၩ လိၪလၧ ခးပၠံၫၥ့ၭ ဒဲ ၁၉၈၉နီၪ လ့ၩထၪ့ဆၧမၩလိၪလၧ ဝံးရီၩမၭအိၩဂီၩ့န့ဘၪ Biblical theology and Spirituality ဆၧနဲၪ့လၩဖၩ့ ၂မံၩ့နီၪလီၫႉ

အဝ့ၫထၪ့ဆၧမၩလိၪဂီၩ့ကကၠၪ လဂဲၫထဲၩ့လၧၩ့ဘၪ ခးပယၩ့ဂီၩ့ လၧၥၫ့ခိၪဒိၪအဆၧဖျါအဖၧၩ့ စၭထၪ့လၧ၁၉၉၂-၂၀၁၉နံၪ့နီၪ ဖီၪ့ထၪ့ဖံၭထၪ့ထဲၩ့ ကဆါယွၩအဆၧဖံၭဆၧမၩလၧ ခးအံၫတလံၫ Sicily ကျိၩ့ဖၧၩ့ဒဲ လၧPalermo ဆၧအီၪကီၪ့ဖၧၩ့နီၪလီၫႉ

အဝ့ၫယီၩနီၪ မွဲအထံၩအၥိၭအၪဝ့ၫဒဲ လၧၡၩခမျၧးအဂးဂဲၫထဲၩ့ဖ့ၪလၫ့လၩ့ၥၭဂီၩ့ ဖိၪၥၪဆံၭ လဖၪအဂး ကၠီးအၪဒၪဆၧအဝ့ၫဂဲၫထဲၩ့ခိးဂဲးခိးဘၭအဂဲး ပၥ့ၪယၫဘၪနီၪလီၫႉ လၧ၂၀၂၁နံၪ့ လၩမ့ၫ၂၀ၥၫ့နီၪ အဝ့ၫယီၩအခိၪနူၬၥွံၫထီၫ့ထ့ၬအကၠီၩ့ မံၫမၫထဲၩ့လၧ ကဆါဎြံၬနီၪလီၫႉ

နးအဲၪဖီၫဘွၩ