Florida ထံၪခးဖၧၩ့ ဆၧၥုၪ့ဆၧဒီၩ့ကဖျိၪ့ လၩ့ဎီးအကၠီၩ့ ၦဘၪထံၭဘၪနဲၪ့လဖၪအဂး ၥၫ့ဎွၩဖရၫ့စံၭအၪ့ကံၩ့ဘၩဆိၪဖၪအ့ၪဝ့ၫအဂဲး

Wednesday, June 30, 2021

၂၀၂၁နံၪ့ဖၧၩ့ လၧအဖီၩ့ခွံၬလၩဂၠိၫ့ ၂၄ၥၫ့အိၩ Floridaထံၪခးဖၧၩ့ အထၧၫ့အီၪဝ့ၫဒၪ ၁၂ ထၧၫ့ ဆၧၥုၪ့ဆၧဒီၩ့ကဖျိၪ့နီၪ လၩ့ဎီးဝ့ၫဒၪအကၠီၩ့ ၦၡၩၥံၫဝ့ၫဒၪ၁၂၇ဂၩဒဲ ၦၡၩလၩ့မါအဂၩ ၁၅၉ဂၩ အဂဲး Miami-Dade ဝံးဒိၪခိၪ Daniella Levine Cava အဆၧလီၩၥ့ၪယၫအဖၧၩ့ ပၥ့ၪယၫဘၪနီၪလီၫႉ

ၦအၥံၫလဖၪအနးၥၭ ဘဲၫၥိၭကထဲၩ့အီၪဘၪလၧ ဆၧမုၬဆၧၡူၪဖၧၩ့အဂး ႇ ၦအဘၪထံၭ ဘၪဆၫလဖၪ အဆၧခိဆၧဝီၩလဖၪအဂး ဘဲၫကန့ဘၪကဆါယွၩ အဆၧဖ့ၪဂဲးဖ့ၪဘၭအဂး ၥၫ့ဎွၩဖရၫ့စံၭ အၪ့ကံၩ့ဘၩဆိၪဖၪအ့ၪဝ့ၫအဂဲးႇ လကၭဘၪၥၫ့ဎွၩယီၩ စံၭခိးစံၭတၩထၪ့ဘၪ ၦမၩ ဆၧဖိၪထီးလူၬ လၧအလီၩ့မၩဆၧၩ့ထၪ့ ၦအဂံၪ့ဎၫ့ဂၭဂီၩ့ဆိၫ့ခွံၬလဖၪဒံၭအဂဲး ဘၫတံၫကၫ့ ဆၧပ ရၧၫ့ ဘိၭဘၪၥ့ၪယၫထၬဝ့ၫနီၪလီၫႉ

ၦအလၩ့မါလဖၪအကျၩ အီၪလၧစံၫ့ဂၠိၩဇဲၭဆၧအီၪကီၪ့ဖၧၩ့ ကဲၬၥလံၬဖိၪ၉ဂၩနီၪပၫထဲးဒဲ ထီးမုဆၫကနံၩယီၩ မွဲၦၡၩလဒၪထဲၩ့ဒံၭဘၪနီၪလီၫႉ ဘၪထွ့ၪလၧ ဟၫရံၫကံၩ့အဂဲး ၦလၧအဂဲၫ ထဲၩ့ဖီၪ့ထၪ့ဖံၭထၪ့ဆၧဖံၭဆၧမၩယံၬခိၬယူၬ ၦလဂၩမွဲဝ့ၫ ကရုနၫၦမၩဆၧဖိၪ Jackie Carrion နီၪ စံၭဘၪဝ့ၫ ဘၪထွ့ၪလၧဟၫရံၫကံၩ့အဂဲး အဝ့ၫဂဲၫထဲၩ့ဖီၪ့ထၪ့ဖံၭထၪ့ဆၧဖံၭဆၧမၩ ယံၬယူၭ လါနၫ့ အဂဲးဆီၪ့ဝ့ၫဘဲၫယီၩၥိၭနီၪ လဒၪယံၩယါဘၪဝ့ၫနးကၠၪအဂဲးႇ ၦကိၭဂၩဒ့ၭအမ့ၬၥၪဖၧၩ့နီၪ ဎွ့ၩလၩ့ဒၪလၧ ဆၧၥၭအုၭလဖၪနီၪ ဒၪဘၪဝ့ၫအဂဲး စံၭဘၪဝ့ၫနီၪလီၫႉ

နးအဲၪဖီၫဘွၩ