England ထံၪခး နးဎွၩမုၪ ဧလိဇဘက် မံၫမၫထဲၩ့လၧ ကဆါဎြံၬအဂဲး

လၧ၂၀၂၂နံၪ့လၩ စဲၭတံၫ့ဘၧၫ၈ၥၫ့ဒၪအိၩ England ထံၪခး နးဎွၩမုၪ ဧလိဇဘက် မံၫမၫထဲၩ့လၧ ကဆါဎြံၬအဂဲး ပၥ့ၪ ယၫဘၪလီၫႉ အဝ့ၫယီၩအၥၭအီၪဝ့ၫဒၪ၉၆နံၪ့အထီနီၪ အၥၭစဲၪ့ထၪ့ခွံၬလၧ အဝ့ၫအီၪအလး ဘဲလ်မိုရယ် ဂံၪ့ဒိၪနီၪလီၫႉ အဝ့ၫယီၩနီၪမွဲလၧ အင်္ဂလီကန်ဆၧဘိၪ့ဆၧဘၩဖိၪကဂၩဒဲ အဝ့ၫလအီၪဘၪဆၧပရၧၫ့ယီၩနီၪ ထံၪခးအၪခးအဖၧၩ့ ၦခမျၧးလဖၪ အဂး မွဲကဲၪထၪ့ ဆၧၥၭအုၭဒိၪဒိၪဒ့ၭနီၪလီၫႉ
အဝ့ၫလအီၪလၧၩ့ဘၪအကၠီၩ့ ဘဲၫခးအမ့ၫရံကၫ့အၥိၭ ထံၪခးဖၭဒိၪလဖၪဒဲ ထံၪခးဂူၫဂၩအဖၧၩ့ ထံၪခးခိၪနါလဖၪ ၥိၫ့စိၩ ဘၪဆၧၥၭအုၭလံၬဘျံၭလဖၪအဂဲး ပၥ့ၪယၫဘၪနီၪလီၫႉ ခးအမ့ၫရံကၫ့ခးဒိၪ ဂျိုးဘိုင်ဒန်နီၪ စံၭဘၪဝ့ၫ နးဎွၩမုၪယီၩနီၪ ဆၧလၩ ဆၧဖၩ့အီၪလမီၪ့ဎီၩ့ဘၪၦဂူၫဂၩဒဲ လၧၫ့ဎွ့ၩဝ့ၫဒၪလၧၥီၪကၠဲၪ ခိၪနါလဂၩအဂဲးႇ လကၭဒံၭဘၪအဝ့ၫယီၩ အၪနဲၪ့နးဎွၩမုၪလဂၩ အမူၩဒၩအဖၧၩ့ ဆၧၫ့ထီအဆၧအၪ့လဲၩ့ထၪ့ၥၭလဖၪအဂး ဘၪမၩဝ့ၫဒၪလဖၪနီၪ လၧဆၧဂုးဂုးၡၪၡါအဖၧၩ့ ဂဲၫထဲၩ့လ့ၩခိၪလ့ၩနါ ဝ့ၫန့ဂ့ၩဘၪစဲၪအဂဲး ခးဒိၪဂျိုးဘိုင်ဒန် ဒဲ အမၫၥၭဘီၩ့နီၪ ဆုးထဲၩ့စံၭဘၪဝ့ၫနီၪလီၫႉ ခးဒိၪအလံၩလဂၩမွဲဝ့ၫ အိုဘားမား ဒဲ အမၫၥၭဘီၩ့ မီရှဲအိုဘားမားနီၪဆ့ စံၭထၪ့အၪ့အူၭဘၪ နးဎွၩမုၪဂဲၫထဲၩ့ဖ့ၪလၫ့လၩ့အၥၭလၧ အထံၪခးဖိၪၥံၪအဂးအဂဲးနီၪလီၫႉ ဂၠပၫ့ခၩ့ခိၪဒိၪ ဖူမီယိုကီရှီဒါနီၪ စံၭဝ့ၫဒၪ နးဎွၩမုၪၥံၫဖီၩ့ခွံၬဒၪပၧၩနီၪ မွဲဆၧၥၭအုၭတၡါလ့ၬႉ ခၫ့ဂၬခွံၬဆၧကၪဆၧဂဲၩဆၧၫ့ထီဂီၩ့ ဂဲၫထဲၩ့လ့ၩခိၪလ့ၩနါဗြိတိန်ႇ အဝ့ၫလအီၪလၧၩ့ဘၪယီၩနီၪ ကၠၧၩ့ဒၪဗြိတိန်အဂးလကၭဘၪ ခးၥဲၫထၧၫ့ဘံၪ့ယၪအဂး မွဲဆၧဆိၫ့ ခွံၬ အဎိၩဒိၪထုၬကမံၩ့အဂဲး စံၭဝ့ၫနီၪလီၫႉ
မွဲလၧ Englangထံၪခး နးဎွၩမုၪ ဧလိဇဘက် မံၫမၫထဲၩ့လၧကဆါဎြံၬအကၠီၩ့ ဝံးတခိၩ့ ဗြိတိသျှထံၪခးအၥီၫ့ရိၩ့နီၪ ထုၬထၪ့ဘိၭဘၪၥ့ၪယၫထၬဝ့ၫ ၦၡၩလ့ၩကွ့ၭဆၧၥၭအုၭလံၬန့အဂဲးနီၪလီၫႉ ဆၧၥၭအုၭလံၬပရၧၫ့နီၪ ပလ့ၩကွ့ၭစိၩလၧ အဝ့ၫၥံၪ အရိၩ့န့ဝ့ၫဒၪ စၭထၪ့လၧ လၩစဲၭတံၫ့ဘၧၫ၁၂ၥၫ့ဒဲ၁၅ၥၫ့ လဂီၩ၉နၩရံၫဒဲထီၩ့စိၩလၧလဂၫ၅နၩရံၫအခံၫ့နီၪလီၫႉ ၦၡၩကမိကွ့ၭ ၥိၫ့စိၩလံၬလၧ အိၫလဲၩ့ဖၫ့ခိၪအဂးဆ့ ဖ့ၪလၫ့ထၬအ့ၪဝ့ၫ ခၩ့ဒိၩ့လးကျဲၩ့နီၪလီၫႉ
နးအဲၪဖီၫဘွၩ