Claretian Missionary အခရၧၫ့ဖၧၩ့ အဆိၪထုၬ ခးပယၩ့ ဘိၪ့ခိၪၥၫ့ခၫ ဒဲ Decon အီၪထၪ့အဂဲး

လၧ၂၀၂၂နံၪ့ လၩယူၫလဲၫ့၁၆ၥၫ့ဒၪအိၩ အီၪလၧဖံလံပဲၫ့ထံၪခးႇ မနံၫလၫဝံးဒီၪ့ႇ Immaculate Heart of Mary ဆၧအီၪကီၪ့ဖၧၩ့ Claretian Missionary အခရၧၫ့ ဘၪဆၧကဲၪထၪ့ဘိၪ့ခိၪၥၫ့ခၫ ဒဲ Decon အဆၧကဲၪဖၧၩ့ ခးပယၩ့ဖိၪ ပၫ ဝ့ၫဒၪ၂ဂၩအဂဲးပၥ့ၪယၫဘၪလီၫႉ

အဝ့ၫၥံၪနီၪမွဲလၧ ခးပယၩ့ဖၧၩ့ ၦလၧအကဲၪထၪ့ Claretian Missionary ခရၧၫ့ဖိၪအဆိၪထုၬလဂၩမွဲဝ့ၫ ဘိၪ့ခိၪ ၥၫ့ခၫ Fr.Francisco Saw Jimmy Htwe & Decon အက်ဒွက်နိုင်လင်းထွန်း နီၪလီၫႉ 

Fr.Francisco Saw Jimmy Htwe နီၪ စံၭဘၪဝ့ၫ “အဝ့ၫယီၩနီၪ မွဲအ့ၫယၫဝတံၫခးဒီၪ့ႇ ကၠီၩ့ကိၩ့ဝံးဖိၪကဂၩအဂဲးႇ အဝ့ၫယီၩအဂုအိၩမွဲလၧ ဘၧၩ့ထံၫဆၧဘိၪ့ဆၧဘၩဖိၪကဂၩဂီၩ့ ထၪ့ဆၧမၩလိၪထီၩ့စိၩလၧ ၉ဖၨၪအခၫနီၪ လ့ၩထၪ့ကၠီးလၧ ဝံးပၥံၫ့ ဒဲ ဘၪအီၪလၧ စံၫ့ပံတၧၫ့ကၥံၫဒရဲၫလးဝၩ့ဖၧၩ့ ဦးကျော်ဘော်ဒါ နီၪအခၫ အဝ့ၫယီၩအၥၭဆုးလီၩ့လၧ ကဲၬၥလ့ၬဆၧဘိၪ့ဆၧ ဘၩဂီၩ့ နုၬလၩ့ထဲၩ့လၧ ကဲၬၥလ့ၬဖၧၩ့အဂဲးႇ အဝ့ၫကမိကဲၪဘိၪ့ခိၪၥၫ့ခၫလဂၩအၥၭလုနီၪ အီၪစၭထၪ့လၧ ထၪ့၉ဖၨၪဂီၩ့အခံၫ့နီၪ အဂဲးႇ ဘၪန့လဲၪနီၪ အဝ့ၫထၪ့ကၠီးအထီ ကွ့ၭၥဲၪဘၪႇ ၥီၪ့ဘၪလံၬႇ ချဲၩ့နံချဲၩ့ကွ့ၭဘၪလၧ ၥၫ့မုၥၫ့ခၫလဖၪအကၠီၩ့ အဝ့ၫယီၩ ကမိကဲၪထၪ့ဘၪၥၫ့ခၫအဂဲးႇ ထၪ့၁၀ဖၨၪဂီၩ့အခၫနီၪ ကျ့ၭစၨၭနုၬလၩ့လၧ ဆံၫမ့ၫနရံၫအဘျၩ့ဘျၩ့လါနၫ့ မွဲလကဲၪထၪ့ဘၪ အဂဲးႇ လၧ၂၀၀၈နံၪ့ အဝ့ၫစံၭဆၧၫ့Claretian Missionary အဆၧစံၭဆၧၫ့နီၪအခၫ မွဲလၧကဆါယွၩအခိးအတၩအကၠီၩ့ အဝ့ၫဖျီၪ့ထၪ့အဂဲးႇ လၧ၂၀၀၉နံၪ့နီၪ အဝ့ၫယီၩလ့ၩစိၩလၧ ခးဖံလံပဲၫ့ဂီၩ့ လ့ၩနုၬလၩ့စိၩလၧ Claretian Missionary ဖၧၩ့အဂဲးႇ စၭထၪ့လၧအခံၫ့နီၪ ထီးကနံၪ့ယီၩ ဘၪဂဲၫထဲၩ့ကျ့ၭစၨၭဝ့ၫအဆၫ့ဆၫ့ဂီၩ့ ကဲၪထၪ့ဘၪကဲၬၥလ့ၬဘိၪ့ခိၪၥၫ့ခၫကဂၩအဂဲးႇ ကဲၪထၪ့ၥၫ့ခၫဂီၩ့အခၫ တခၩကဘၪလ့ၩဆၧအလးနးစီၪ့ မွဲကလ့ၩဖီၪ့ထၪ့ဖံၭထၪ့ ကဆါယွၩအဆၧဖံၭဆၧမၩအဂဲးႇ ကယဲဒၪ ဆၧအလးနးစီၪ့နီၪ မွဲလၧကဆါယွၩအဆၧအီၪကီၪ့အဂဲး” စံၭဝ့ၫဒၪနီၪလီၫႉ

ဂီၩ့ Decon အက်ဒွက်နိုင်လင်းထွန်းနီၪ “စံၭဘၪဝ့ၫ အဝ့ၫၥံၪအခရၧၫ့ယီၩနီၪ ဂဲၫထီၩ့စိၩလၧ ခးပယၩ့ယီၩ ကအီၪဖိၭ ဘိၭ ၅နံၪ့ယူၭအဂဲးႇ အဝ့ၫၥံၪယီၩ အကၠီးအီၪလၧ ပြင်ဦးလွင်ဝံးအဂဲးႇ ခရၧၫ့ယီၩ အဆၧမၩအကၧၩ့ဒိၪထုၬကမံၩ့နီၪ မွဲထုၬထၪ့ လံၬဆံၫ့ဎံၪလၧ ပယၩ့ခီၫအဂဲးႇ အ့ၪမွဲၥၭဘၪ့လဖၪ အၥၭဆုးလီၩ့ အဝ့ၫၥံၪအခရၧၫ့ယီၩစွါဘဲၫ လ့ၩဆုးကျိၭလၧအဝ့ၫ အGamil account ([email protected]) ဒဲ Be a Claretian Missionary facebook page နီၪ န့ဝ့ၫဒၪအဂဲး” စံၭဝ့ၫဒၪနီၪလီၫႉ

Claretian Missionary ခရၧၫ့ယီၩနီၪ ထီးမုဆၫကနံၩယီၩ ဂဲၫထဲၩ့ဖီၪ့ထၪ့ဖံၭထၪ့ကဆါယွၩအဆၧဖံၭဆၧမၩလၧ ထံၪခး ၆၅ထံၪခးဂီၩ့ ခရၧၫ့ဖိၪအီၪဝ့ၫဒၪထီးလူၬအဂၩ ၃၀၀၀ဘျဲၪအဂဲးႇ အဝ့ၫၥံၪအခရၧၫ့ယီၩနီၪ ထၧၫ့ကကဲၪထၪ့ဘၪ ဘိၪ့ခိၪ ၥၫ့ခၫကဂၩအဂး အခံၫ့ယံၭဝ့ၫ ဖိၭဘိၭ၁၂နံၪ့အဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ

၁၉ႉ၇ႉ၂၀၂၂