Bp.Maurice Nyut Wai ဂဲၫထဲၩ့ အီၪကွ့ၩဒိၫ့ပၥံၫ့ဆၧအီၪကီၪ့ၥိၪဖိၪလဖၪအဂဲး

နံၪ့၂၀၂၂နံၪ့လၩယူၫ၅ၥၫ့နီၪမၠီၫလမၠဲၫ့ဆၧအီၪကီၪ့ၥၫ့ခိၪဒိၪ Bp.Maurice Nyut Wai ဂဲၫထဲၩ့အီၪကွ့ၩဒိၩ့ပၥံၫ့ဆၧအီၪ ကီၪ့ၥိၪဖိၪလဖၪဂီၩ့ ဂဲၫထဲၩ့လုထၪ့မံဆၩလၧ ၦဆူနဲၩဖိၪကၠၧၫ့ကၠၧၫ့အဆိၪထုၬကဘျၩ့နီၪလီၫႉ

ၥၫ့ခိၪဒိၪယီၩလၧလၩယူၫ၄ၥၫ့နီၪ ဂဲၫထီၩ့စိၩလၧဒိၩ့ပၥံၫဆၧအီၪကီၪ စံၫ့ပံတၧၫ့ကၥံၫဒြဲၫၥရိၬလးဝၩ့ဖၩ့နီၪလီၫႉ ၦဆူၩနဲၩ ဖိၪလဖၪဆ့ အၪ့ဂၬထိးဆၧၫ့ အဝ့ၫလၧဆၧအူၪဆၧဒံၩ့လဖၪနီၪလီၫႉ

လၧလၩယူၫ ၅ၥၫ့လဂီၫခီၫ ၇နၩရံၫအခံၫ့နီၪၥၫ့ခိၪဒိၪယီၩ လုထၪ့လၩ့ဎိၭမံဆၩဆၧလုထၪ့လၧ အၥိၪဖိၪၥံၪလဖၪနီၪလီၫ ဂီၩ့နီၪ အဝ့ၫယီၩစံၭဘၪဝ့ၫ  “ယဂဲၫထဲၩ့ထီၩ့လၧဒိၩ့ပၥံၫ့ဆၧအီၪကီၪ့ယီၩဂီၩ့ ယဒၪစိၩ BpႉJohn   ဂဲၫထဲၩ့အီၪထၬတၨၭအိၩအခၫ ယၥၭမုၬနးဆံၭအ့ၬႉ ကဲၫထၪ့ခိၭ ယနၪ့ထၪ့အဝ့ၫၥိၭ အယီၩ လၧလၩယူၫလဲၫ့ ၂၂ၥၫ့ကိ ပၥၫ့ခိၪဒိၪJohn မၩ့ဆံၫ့ဎံၪၥံၫဖီၩ့ခွံၬဒၪပၧၩ ကအီၪထၪ့ဘၭဝ့ၫဒၪ ၁ နံၪ့ယူၭအကၠီၩ့ အကနံၩကိနီၪ ပကဂဲၫထဲၩ့ထံၭလၫ့ထၬ ပၥၫ့ခိၪဒိၪ အလိးဂၩ့လၧၥၫ့ခိၪဒိၪ အတၨၭ ဝးဖၧၩ့အိၩနီၪလီၫႉ  ဆၧနီၪအကၠီၩ့ ကနံၩကိနီၪ နၥံၪဆ့ဂဲၫထၪ့မၩလၩမၩဖၩ့ကၠၭဘၪအဂး ယဖံၭၥိၭနၥံၪနီလီၫႉ ၦၡၩဒဲဂၪ့ခိၪနီၪ ဆုးကျိၭလိၬၥၭဘူၭဘူၭထံးထံးလီၫႉ ၦၡၩၥံၪအၥၭအ့ၪဂ့ၩဘွၩမၬဂၪ့ခိၪကဎံၫလၩမၬဆံၭႉ ၦၡၩအၥၭဆံၫ့ဎံၪမၬဂၪ့ခိၪဆ့ကဆံၫ့ဎံၪ ကန့မၬဆံၭႉ အ့ၪမွဲပယိထၪ့ဂၪ့ခိၪအမ့ၬနီၪ ပကဒၪထၪ့ဘၪ ၥၭအမ့ၬနီၪလီၫႉ ဖံၫ့ချၪဒဲဆၧဘၧၩ့လၩ့ၦၡၩအ့ၪမွဲအီၪ အၪထၪ့နီၪ အနီၪမွဲဒၪလၧ ပၥၭဖၧၩ့အဒီၪ့ဆီၪ့ဝ့ၫဘိၩ့ဒံၭဒဲ မွဲလဖုၬဘၪအကၠီၫ့လီၫႉ”

မံဆၩဆၧလုထၪ့ဂီၩ့ဝ့ၫဒၪကကၠၪ ၦၡၩအၪ့ဂၬထိးဆၧၫ့ထဲၩ့ၥၫ့ခိၪဒိၪ BpႉMauriceညန့်‌ဝေလၧ ဆၧဎိၭထံၪဎိၭဒီၪ နီၪလီၫႉ ဒိၩ့ပၥံၫ့ဆၧအီၪကီၪ ဆၧအီၪကီၪ့ ကလ့ၩထၪ့လ့ၩထီၫအဂး ခရၧၫ့ခိၪနါလဂၩနီၪစံၭဝ့ၫဒၪ “ကနံၩယီၩ မွဲလၧပဒိၭန့ဘၪ ၥၫ့ခိၪဒိၪBpႉMauriceအဆၧဆိၪဂ့ၩဆိၪဘွၩဒဲမွဲဒံၭလၧဆၧအီၪကီၪ့ဆရၫ/မုၪလဖၪ အဘိၪ့မုနံၩအကၠီၩ့ ကနံၩယီၩနီၪ မွဲလၩ့ဆၫ့ လၫ့မဲၩ့အၪမၬလီၫႉ လၧအခီၩ့အိၩၥၫ့ခိၪဒိၪအယီၩ ဂဲၫထဲၩလ့ၩခိၪလ့ၩနါဒိၩပၥံၫ့ဆၧအီၪကီၪ့ယီၩ အၪနံၪ့ဒံၭအကၠီၩ့ အဝ့ၫဒဲပၧၩနီၪ မွဲလၧဖိၪဒံၪလဖၪဒဲဖါကဂၩအၥိၭနီၪလီၫႉ

ၥၫ့ခိၪဒိၪယီၩလီၩ့လၩ့လၬလၩ့တရၩ ထၧၩ့အထီၩ့စိၩလၧပၥၭခံဖၧၩ့န့ဝ့ၫဒၪနီၪဆ့ မွဲဆၧၥ့ၪဆၧဘၪအလၩ့ဆၫ့နီၪလီၫႉ နာဂစ်အထီအိဆ့ လ့ၩမၩဆၧၩ့ၦဘၪနိၪ့ဘၪနၬဖိၪလဖၪဒံၭလီၫႉ ဘဲၫယီၩလၧဒိၩ့ပၥံၫ့ဆၧအီၪကီၪဖၧၩ့ မွဲၥံၫခိၪဒိၪလအီၪဘၪတၭ နဂဲၫထဲၩ့အီၪကွ့ၭပၧၩဘဲၫယီၩနီၪပ စံၭခိးစံၭတၩဘၪနၧၩဒိၪဒိၪဒ့ၭလီၫႉ ဘဲၫၥိၭပကန့ထဲၩ့ဘၪၥၫ့ခိၪဒိၪအဂးဆ့ အၪ့ကံၩ့ဘၩဆိၪဖၪ အ့ၪပၧၩခလူၬနီၪ ယမိအၪ့ယၪဘၪနၧၩလီၫႉ”

လၧဆၧလုထၪ့လၩ့ဎိၭ မံဆၩဆၧလုထၪ့လၧ BpႉMaurice Nyut Wai ကၠၧၫ့ကၠၧၫ့ကဘျၩ့ယီၩအဖၧၩ့ ၦဆၧၩနဲၩဖိၪ ထီး အလူၬ ဂဲၫထၪ့ဝ့ၫဒၪ ကအီၪဖိၭဘိၪအဂၩ ၅၀၀ အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

စအဲၪၡီၩ့ႇ နးအဲၪဖီၫဘွၩ