ၦၥၭအွံၪဆၧလဂၩအဆၧၥၭမၧၫ့ဒဲ ကဲၪထၪ့ထဲၩ့စစ္စတာရ်လဂၩအဆၧၥၭမၧၫ့

       နံၪ့၂၀၂၂နံၪ့အထးဖၧၩ့ အီၪလၧဒိၩ့ပၥံၫ့ဆၧအီၪကီၪ့ SFX စစ္စတာရ်လဖၪအခိၪနါဒိၪထုၬ Mother Ann Teresa နီၪ လၧအဝ့ၫလကဲၪထၪ့ဒံၭဘၪ စစ္စတာရ်အထီအိၩ အဝ့ၫယီၩနီၪ မွဲၦအၥၭအွံၪဆၧလၧ Studio လဂၩနီၪလီၫႉ

      စၭထၪ့လၧ ၁၉၈၂နံၪ့ အဝ့ၫအၥၭအီၪ၁၈နံၪ့အထီအိၩနီၪ အဝ့ၫယီၩၥၭအွံၪဆၧဂီၩ့ ထုၬထၪ့ဆၧၥၭအွံၪအခွၩ့န့ ၄ခွၩ့နီၪလီၫႉ အဝ့ၫအဆၧၥၭအွံၪခွၩ့အမံၩ့လဖၪနီၪ မွဲဝ့ၫဒၪ ရေခဲချစ်၊ တစ်ကမ္ဘာလုံးချစ်၊ သူရိယနေမင်း  ဒဲ ရွှေအတောင်ပံ လဖၪနီၪ လီၫႉ ၦလၧအကွ့ၭအ့ၪအဝ့ၫဆၧၥၭအွံၪလဖၪနီၪ မွဲလၧဆရၫသုခမိန်လိုင် ဂီၩ့ အဝ့ၫလ့ၩထံၭလၩ့အလူ Studioနီၪ မွဲဝ့ၫဒၪလၧ The Aces Studioနီၪလီၫႉ မိဆၧအီၪကီၪ့ ဆၧၥၭအွံၪလနၩ့နၩ့နီၪဆ့ မွဲအဝ့ၫဂဲၫထဲၩ့ၥၭအွံၪထၬ အီၪဆ့အီၪနီၪလီၫႉ

      အဝ့ၫယီၩ အၥၭအီၪ၁၈နံၪ့ဒဲထီၩ့စိၩလၧ၂၅နံၪ့အထီနီၪ ၥၭအွံၪဆၧ၇နံၪ့နီၪလီၫႉ လါနၫ့အဝ့ၫယီၩ မွဲလကဲၪထၪ့ဘၪ ၦအမံၩ့ ဎိၩဝ့ၫလဂၩနီၪလီၫႉ အဝ့ၫယီၩအဂံၪ့ဒီၪ့ဖိၪၥံၪလဖၪနီၪဆ့ မွဲအၥၭဆုးလီၩ့ အီၪဝ့ၫဒၪလၧၥၭအွံၪဆၧကိၭဂၩအဂဲး ပၥ့ၪယၫဘၪ နီၪလီၫႉ အဝ့ၫအမိဖါဘူၭထံး ထၧၫ့ဖုဝဲလဖၪနီၪဆ့ ဖ့ၪဂဲးဖ့ၪဘၭအဝ့ၫဂ့ၩဂ့ၩဘၪဘၪနီၪလီၫႉ အဝ့ၫယီၩ ၥၭအွံၪဘၪဆၧၥၭအွံၪ လါနၫ့ လၧအဝ့ၫအၥၭဖၧၩ့နီၪ မွဲလန့ဘၪ ဆၧလၧၫ့ဆၧဎွ့ၩဂီၩ့ ကဲၪထၪ့ဘဲၫဆၧလိၪကမံၩ့မံၩ့ အၥိၭနီၪ အဝ့ၫၥ့ၪယၫလၩ့အၥၭ နီၪလီၫႉ အဝ့ၫၥံၪအဂံၪ့ဒီၪ့ဖိၪၥံၪနီၪ အီၪလၧကၠဲၬလူကၠဲၬထၫ အဆၧဆူၩနဲၩဎိၩလၧကဆါယွၩ ဂံၪ့ဒီၪ့ကဖျိၪ့နီၪလီၫႉ လၧအခံၫ့နီၪ ဒၪအိၩ အဝ့ၫယီၩအီၪက့ၪထၬ အဆၧအဲၪတၩ့လါနၫ့ လခဲၫ့နီၪမွဲလၧဆၧအဂဲးအမံၩ့မံၩ့အကၠီၩ့ ဘၪလၩ့ဖၭခွံၬလိၬၥၭနီၪလီၫႉ

       အဝ့ၫယီၩအၥၭအီၪ ၂၀ဘျဲၪအခၫ အဝ့ၫအဂးအ့ၪမွဲဆၧမၩအဂုးအခၧၫ့ကအီၪကမံၩ့မံၩ့စွါဘဲၫ ကအီၪဘၪအဂဲး ထိၪတွၭ အၪ့ဎၬဝ့ၫဂီၩ့ မၩထၪ့ဆၧမၩလဖၪလါနၫ့ မွဲလအီၪဘၪဘၪအကၠီၩ့ အဝ့ၫယီၩၥ့ၪယၫထၪ့ဝ့ၫလၧ အဝ့ၫအဂးကဆါယွၩ အဆၧကိၪ့ ဆၧတဲၩ့ကအီၪကမံၩ့မံၩ့အဂဲးနီၪလီၫႉ ၥ့ၪယၫလၩ့အၥၭလၧ ၦၥၭအွံၪဆၧဖၧၩ့ၥၭယီၩ လမွဲဘၪအဝ့ၫအဂးအခၫ အဝ့ၫအၥၭ အီၪ ထၪ့ဘၭ၂၅နံၪ့အထီ ခွံၬလၩ့အၥၭခၧၫ့ခၧၫ့ကမံၩ့ မွဲလၧကမိကဲၪထၪ့ SFX စစ္စတာရ် ကဂၩအဂဲးနီၪလီၫႉ ဘဲၫယီၩအဝ့ၫနီၪ ကဲၪထၪ့ဘၪ SFX စစ္စတာရ် ကဂၩ လကၭဘၪ ကဲၪထၪ့ဘၪ SFX စစ္စတာရ် ခရၧၫ့ခိၪနါဒိၪထုၬ ကဂၩယူၭနီၪလီၫႉ

       Mother Ann Teresa ယီၩနီၪ မွဲၦအလၧကဲၪဒိၪကဲၪမုကဂၩ မွဲဝံးတခိၩ့ဖိၪကဂၩလါနၫ့ အီၪက့ၪထၪ့ထီၫအၥၭ လအီၪ ဘၪဒဲ လၧၦကိၭဂၩအဖၫ့ခိၪ အၥုၪ့ဆၧၩ့ၥၭဆၧၩ့ဝ့ၫဒၪ အၪမၬဒ့ၭ အၥုၪ့ဂ့ၩၥၭဘွၩအီၪဒဲ ဆၧဆၫ့လၩ့ၥုၪ့ဆၫ့လၩ့ၥၭ အီၪဝ့ၫဒၪ အၪမၬ ဒ့ၭနီၪလီၫႉ

နးအဲၪဖီၫဘွၩ