ၦၡၩမၩလၩမၩဖၩ့ International SSVP Youth day လၧမီၫလမၠဲၫ့ဆၧအီၪကီၪ့အဂဲး

မွဲလၧခးၥဲၫ့ထၧၫ့ဘံၪ့ယၫ စိန်ဗင်းဆင်းၥၭဘၪ့လဖၪ အဘိၪ့မုနံၩဆၧနဲၪ့အဂး နံၪ့၂၀၂၂နံၪ့ လၩယူၫလဲၫ့၄ၥၫ့ဒၪအိၩ မီၫလမၠဲၫ့ဆၧအီၪကီၪ့ၥၭဘၪ့လဖၪနီၪ မးၥံၫကၠၭဝ့ၫဒၪလၧ စိန်ပက်ထရစ်ကက်သလစ်ၥရိၬဖၧၩ့ ကနံၩတွၭနီၪလီၫႉ

လၧမံဆၩဆၧလုထၪ့ဖၧၩ့ ဘိၪ့ခိၪၥၫ့ခၫ၃ဂၩဒဲ Deconၥဂၩ လ့ၩခိၪလ့ၩနါမံဆၩဆၧလုထၪ့ဂီၩ့ ၦလၧအဂဲၫထၪ့မံဆၩ ဆၧလုထၪ့လဖၪနီၪ ဗင်းဆင်းရှင်း ၥၭဘၪ့ဖိၪလဖၪဘုၪလၩ့ဝ့ၫကီၫဖံၫဒဲကိၪႇ  ဂီၩ့နီၪဖိၪဒံၪဖိၪၥၪလၧကဘၪထၪ့ဆၧမၩလိၪ အဂၩ ၄၀အဂး ဖ့ၪလၫ့ဝ့ၫဆၧမၩလိၪအဂးလိၪဝ့ၫဒၪလဖၪႇ ၥၭဘၪ့ဖိၪၥံၪယီၩ ဘိၪ့ထၪ့ဘၩထၪ့ၡီၩ့ကိၪဘိၪ့ဆံၫ့ဎံၪႇ ခးပယၩ့ကဒိၭန့ ထၪ့ထဲၩ့ဘၪ ဆၧဎူၫဆၧဎၩ့အဂး ဝံကၠၭဖဲၫ့ဆံၫ့ဎံၪနီၪလီၫႉ

မၩထၪ့ မးၥံၫယီၩအဆၧထိစိၩနီၪ ဗင်းဆင်းရှင်းၥၭဘၪ့လဖၪ ကအီၪဝ့ၫဒၪလဖျိၪ့ဎးဂီၩ့ လယိလၩ့ဘၪအဂးဒဲ ဆုးထဲၩ့ မၩဆၧအီၪကီၪ့အဆၧဖံၭဆၧမၩလဖၪဂီၩ့တၭ လၧၦဂူၪဂၩအဖၫ့ခိၪ ဘဲၫဖ့ၪဆၧၫ့လၩ့ၥၭကၥ့ၪအဂး ထိစိၩဝ့ၫဒၪအဂဲး မီၫလမၠဲၫ့ ဆၧအီၪကီၪ့ SSVP ခိၪနါ Anna နီၪ လီၩဘၪRVA ဘဲၫနီၪလီၫႉ

အဝ့ၫယီၩဆုးထဲၩ့စံၭဝ့ၫဒၪ နုၬလၩ့ပၫဘၪလၧ ၥၭဘၪ့ခရၧၫ့ဖၧၩ့ယီၩအကၠီၩ့ အဝ့ၫဆၧမုၬဘၪအၥၭအဂဲးႇ ဘဲၫခရၧၫ့ယီၩ ကကဲၪထၪ့အဂး ၦလၧအမၩဆၧၩ့အဝ့ၫၥံၪလဖၪနီၪ စံၭခိးစံၭတၩဝ့ၫအဂဲးႇ ဆၧအီၪကီၪ့ဆၧဖံၭဆၧမၩအဂးမွဲဂ့ၩႇ ကရုနၫ ဆၧဖံၭဆၧမၩလဖၪမွဲဂ့ၩ အဝ့ၫယီၩကနုၬလၩ့ဂဲၩဝၭဝ့ၫလၧ ဆၧၥုၪ့ဎွံၪၥၭယီၫဖၧၩ့အဂဲး စံၭဘၪဝ့ၫနီၪလီၫႉ

အဝ့ၫၥံၪအခရၧၫ့ယီၩနီၪ လၩကဘံၪ့ကကၠၪအီၪကီၪ့လၩ့ဎိၭကၠၭဝ့ၫဒၪအဂဲးႇ ဆၧအီၪကီၪ့လဖၪ အ့ၪမွဲဆၧမၩဆၧၩ့လိၪ စွါဘဲၫ အဝ့ၫၥံၪယီၩလ့ၩလီၩ့မၩဆၧၩ့အ့ၪဝ့ၫဒၪကိၭဒီၪ့ဒ့ၭအဂဲးႇ ဆၧၥံၫဆၧဆၫအဂးလဖၪဆ့ အဝ့ၫၥံၪယီၩလီၩမၩဆၧၩ့ဝ့ၫဒၪအဂဲးႇ ကနံၪ့ယီၩခရၧၫ့အခိၪတၩ့နီၪ မွဲလၧ ဆၧကိၪ့ဘၪကိၪ့ၥ့ၪ အကၠီၩ့တၭ ဆၧမၩလိၪလဖၪအဂး ပၥၭဘၪ့လဖၪ ပဖ့ၪလၫ့အ့ၪ ဆၧမၩ လိၪအဂးလိၪဝ့ၫဒၪ ဆၧပိၬဆၧလၫ့လဖၪအဂဲးႇ အဝ့ၫၥံၪယီၩ လၧအဝ့ၫၥံၪအကိၪဎွ့ၩဖၧၩ့ ဂဲၫစူၭထၬထီးလၧခရၧၫ့ဖၧၩ့ယီၩ လၩက ဘံၪ့ကဘျၩ့အကၠီၩ့ အခရၧၫ့ယီၩဆၧမၩဘိၪ့အီၪဝ့ၫဒၪအဂဲးႇ ဆၧနီၪအကၠီၩ့ အဝ့ၫၥံၪယီၩ လီၩ့မၩဘိၪ့ၦၡၩလဖၪ န့ဝ့ၫဒၪအဂဲးႇ Annaယီၩ စံၭဘၪဝ့ၫလီၫႉ

 ဗင်းဆင်းရှင်းခရၧၫ့ယီၩ စၭထၪ့ၥုၪ့ထၪ့ဝ့ၫအီၪထၪ့ဘၭ လၩ၇ဘံၪ့ယူၭဒဲ ဖီၪ့ထၪ့ဖံၭထၪ့ ခရၧၫ့ဆၧဖံၭဆၧမၩလဖၪ လၧၥၭဘၪ့2၅ဂၩနီၪလီၫႉ ခးပယၩ့ ထၧၫ့ဒီၪ့ယၫအဖၧၩ့ ဗင်းဆင်းရှင်း ၥၭဘၪ့ခရၧၫ့ အီၪထၪ့ဝ့ၫဒၪလၧ ဆၧအီၪကီၪ့၁၂ဒီၪ့ယူၭဂီၩ့ အဝ့ၫၥံၪယီၩနီၪ ဘဲၫစိန်ဗင်းဆင်းဒီပေါလ် ဒဲ ၦဆံၫ့ဎံၪ ဖရက်ဒရစ်အိုဇာနာမ် အဆၧဖံၭဆၧမၩအၥိၭ ကျ့ၭစၨၭမၩဆၧၩ့ထၪ့ ၦၡၪ့ဖိၪယၬဖိၪလဖၪနီၪလီၫႉ

နးအဲၪဖီၫဘွၩ

5.7.2022