ၦၡၩကထံၭလၫ့ ၥၫ့ခိၪဒိၪ Fulton Sheen နီၪ လၧၦဆံၫ့ဎံၫအလးအလၩအဂး ၦၡၩကျ့ၭစၨၭထၪ့ဝ့ၫဒၪ

ၦၡၩလၧအယူၭယၪ့အဲၪကွံၩ အီၪလၧခးအမ့ၫရံကၫ့ အီလီနွိုင်း ဆၨၩခးဒီၪ့ဖၧၩ့ Fulton Sheen လဖၪနီၪ ဘၪထွ့ၫလၧကထံၭလၫ့ ၥၫ့ခိၪဒိၪယီၩ ဘဲၫၦဆံၫ့ဎံၫလဂၩအၥိၭအဂး အဖီၩ့ခွံၬ လၩယူၫလဲၫ၉ၥၫ့ဒၪအိၩ အဝ့ၫၥံၪယီၩ မၩထၪ့ဘၪ ဆၧဂဲၩဝၭဖၭဒိၪကမံၩ့လၧ အီလီနွိုင်းဆၨၩခးဒီၪ့ႇ Homer Glen ဝံးဖၧၩ့ အီၪဝ့ၫဒၪ အမံၩ့မွဲဝ့ၫ “မူၭခိၪအၥီၫ့ လီၩဘၪမိနးမၫရံၫယၩ” ၥရိၬဖၧၩ့နီၪလီၫႉ

မုကနံၩနီၪအထးဖၧၩ့ အၪ့ကံၩ့ဘၩဆိၪဖၪဆၧႇ ဘၪဒုၪအၪ့ဒုၩအီၩဆၧအၪ့အီၩလဖၪဒဲ ဘၪနုၬလၩ့ပၫလၧ ၦၡၩကထံၭလၫ့ အမ့ၫရံကၫ့ၥၫ့ခိၪဒိၪယီၩ ဘဲၫၦဆံၫ့ဎံၫလဂၩအၥိၭ ဆၧဂဲၩဆၧဝၭဖၧၩ့နီၪနီၪလီၫႉ ၥၫ့ခိၪဒိၪယီၩအၥၭ မၧၫ့ဒံၭအထီအိၩ မွဲၦၡၩၥ့ၪယၫအဝ့ၫ အီၪအၪအၪဒ့ၭနီၪလီၫႉ

ၦလၧအလ့ၩခိၪလ့ၩနါ ဆၧထံၪလၩ့ဒီၪလၩ့ယီၩလဖၪနီၪ ကဝဲလၫ့ဖ့ၪနဲၪအ့ၪ ၦလၧအဂဲၫပၫဝ့ၫဒၪလဖၪ ၥၫ့ခိၪ ယီၩအဆၧၥၭထိၬပရၧၫ့လဖၪနီၪလီၫႉ ဆၧထံၪလၩ့ဒီၪလၩ့ယီၩအဖၧၩ့ ဘဲၫဂံၪ့ဒီၪ့ဖိၪၥံၪအၥိၭ  ကအီၪလၧဂံၪ့အၥုၭအလး န့လဖၪဖၧၩ့ဂီၩ့ ကဘၪအၪ့ထံးအၪ့ဖီၪ့အၪ့ ဆၧအၪ့ဆၧအီၩလဖၪနီၪလီၫႉ ကၥုၪ့ထၬကၠၩ့ဖိၪလဖၪဂီၩ့ ကၠၩ့လဖၪနီၪ ကဖ့ၪလၫ့ထၬအ့ၪဝ့ၫအမံၩ့ ဘဲၫၥၫ့ခိၪဒိၪအဆၧလီၩလၩ့လါလၩ့ဖၧၩ့လဖၪတၭ အဝ့ၫၥံၪယီၩ ကဘၪထီးနဲၪ့ အၪ့ဎၬထဲၩ့ ဝ့ၫဒၪနီၪလီၫႉ လကၭဘၪၥၫ့ခိၪဒိၪဂဲၫထဲၩ့ဖိၭလိၭထၬဆၧဂၩ့လၧၥွၫထီးနီၪ ကဖ့ၪထးၦၡၩလၧစၭခုၪနီၪဂီၩ့ ကအၪ့ထုၫ့ ဆၧမၩဘိၪ့နီၪလီၫႉ န့ဝ့ၫဒၪဆၧမၩဘိၪ့လဖၪနီၪ ကဖ့ၪလၫ့ထဲၩ့ ခရၧၫ့လၧအဘၪထံၭလၫ့ၦဆံၫ့ဎံၫနီၪလီၫႉ လကၭဒံၭ ဘၪ မုကနံၩနီၪ မွဲကလီၩ့ဂၬဖၭဝ့ၫဒၪလၧဝံးဖၧၩ့ဒံၭနီၪလီၫႉ

ၦလၧအနုၬလၩ့ပၫဝ့ၫဒၪလဖၪယီၩ ဘဲၫၥၫ့ခိၪဒိၪကကဲၪထၪ့ဘၪၦဆံၫ့ဎံၫအဂး ကအၪ့ကံၩ့ဘၩဆိၪဖၪဆၧနီၪ ယိလါဝ့ၫဒၪအဂဲး ၦအလ့ၩခိၪလ့ၩနါဆၧထံၪလၩ့ဒီၪလၩ့ယီၩလဖၪနီၪစံၭဝ့ၫလီၫႉ ၥၫ့ခိၪဒိၪယီၩ အ့ၪမွဲကဘၪထိးရွံအၥၭ ၦဆံၫ့ဎံၫစွါဘဲၫ ခးအမ့ၫရံကၫ့အဂး မွဲဆၧဆိၪဂ့ၩဆိၪဘွၩကန့ဝ့ၫဒၪအၪမၬအဂဲးဆူနဲၩဝ့ၫဒၪနီၪလီၫႉ

ၥၫ့ခိၪဒိၪယီၩအမံၩ့အလၧၫ့အဎွ့ၩနီၪ မွဲဝ့ၫဒၪလၧ Peter John Sheen  နီၪလီၫႉ အဝ့ၫယီၩမၧၫ့ဒံၭအထီအိၩ လီၩလၩ့လါလၩ့ယွၩလူယွၩထၫလၧ လၫ့ခွ့ၩလူဖၧၩ့ဂီၩ့ အမံၩ့ဂဲၫဎိၩထၪ့ဝ့ၫဒၪကဆံၭဒဲဆံၭနီၪလီၫႉ လခဲၫ့လၧ NBC လူ ၥီၫဂၩ့ဖျီၪဖၧၩ့ ‘Life is Worth Living ’ ဆၧၥၭမၧၫ့ယီၩ ကြၨၭပအီၪမၧၫ့ဝ့ၫလီၫအဂဲးနီၪ အဝ့ၫယီၩအၪ့န့မူၩဒၩဒဲ ရၩလၩ့ ဝ့ၫဒၪနီၪလီၫႉ  

ၥၫ့ခိၪယီၩကဆါယွၩထဲၩ့ကိၭထဲၩ့လၧ လၩဒံၫစဲၩ့ဘၧၫ ၉ၥၫ့ ၁၉၇၉နီၪဒဲ ၂၀၀၂နံၪ့အထီနီၪ ၦၡၩကထံၭလၫ့ အဝ့ၫဘဲၫၦဆံၫ့ဎံၫၥိၭအဂး ၦၡၩစၭထၪ့ဝ့ၫဒၪနီၪလီၫႉ ၂၀၁၂နံၪ့လၩယူၫအထီနီၪ ၥၫ့ဎွၩ ဘေနေဒစ် (၁၆) နီၪဖ့ၪလၫ့ အဝ့ၫဘဲၫ ၦဘၪဆၧယူၭယၪ့ အဆၫ့နီၪလီၫႉ

နးအဲၪဖီၫဘွၩ