ၦလၧအဘၪထိးခဲၩ့ဆၧၫ့လခဲၫ့ထုၬအဆၫ့ Deacon လဂၩနီၪ ၦၡၩဖ့ၪလၫ့အ့ၪဘိၪ့ခိၪၥၫ့ခၫအဆၧကဲၪလၧ မနံၫလၫဆၧဆၫဂံၪ့ဖၫ့ခိၪအဂဲး

နံၪ့၂၀၂၂နံၪ့ လၩယူၫ၁၃ၥၫ့ဒၪအိၩ ၥၫ့ခိၪဒိၪ ရိုလန်းဒိုစန်တော့စ်နီၪ ဖ့ၪလၫ့အ့ၪ Deacon Khamsan Mim Khountichakလဂၩ ဘိၪ့ခိၪၥၫ့ခၫအဆၧကဲၪလၧ မနံၫလၫဆၧဆၫဂံၪ့အဖၫ့ခိၪနီၪလီၫႉ ဘိၪ့ခိၪၥၫ့ခၫယီၩနီၪ မွဲလၧ လၫအိၫ ထံၪခးဖိၪလဂၩနီၪလီၫႉ

အဝ့ၫထိးဆၧၫ့ဒိၭန့ဘၪ ကဆါယွၩအဆၧရွံထၪ့ယီၩနီၪ မွဲလၧလၫအိၫကဲၬၥလံၬဆၧအီၪကီၪ့အဂးမွဲဂ့ၩႇ အဝ့ၫအဆၧ အီၪကီၪ့အဂးမွဲဂ့ၩ လၩ့ဆၫ့လၩ့မဲၩဝ့ၫဒဲ မွဲၡၩဝ့ၫဒၪဆၧရွံထၪ့ကမံၩ့အဂဲး အဝ့ၫအထံၩၥိၭလဂၩမွဲဂ့ၩ ဗီယက်နမ်ၥၫ့ခၫ Fr.ထရီ ဖန်းမင်းနီၪ ကွ့ၭထံၭလၫ့ထၬဝ့ၫလၧ အဆိၫၡဲၫမံၫဒံၫယၫဖၫ့ခိၪနီၪလီၫႉ

ၥၫ့ခၫခၫ့စၫ့ယီၩနီၪ လၧအဝ့ၫလဂဲၫနုၬလၩ့ဒံၭဘၪလၧ ဘိၪ့ခိၪၥၫ့ခၫအဆၧကဲၪကၠီးဖၧၩ့အထီအိၩ အဝ့ၫအဆၧအီၪကီၪ့ အဂး မွဲအဝ့ၫကဲၪထၪ့ထၬ ၥၭဘၪ့ခိၪနါကဂၩဂီၩ့ ၦအအီၪလၧထံၪခးအထုၬ ၦၡၪ့ၦယၬဖိၪလဖၪဒဲ ၦလၧအဘၪထိးပဲၩ့ခွံၬထၬၥၭ လဖၪအဂး ဂဲၫထဲၩ့ဖ့ၪလၫ့လၩ့ၥၭနီၪလီၫႉ လါနၫ့ ကွန်မြူနစ်ခိၪနါလဖၪနီၪ ဆၧဘၪလိၬအိၭလိၬ လအီၪဘၪလၧအဝ့ၫအကၠီၩ့ အဝ့ၫယီၩဘၪလၩ့လၧ ဖီၩ့ဖၧၩ့ချုၭနံၫဘျၩ့နီၪလီၫႉ

၂၀၁၈နံၪ့နီၪ ကဆါယွၩကိၭအဝ့ၫလၧဘိၪ့ခိၪၥၫ့ခၫအဆၧကဲၪဖၧၩ့ဂီၩ့ ကမၩလိၪဘၪ ဆၧအီၪကီၪ့ဆၧကိၪ့ၥ့ၪကိၪ့ဘၪ လဖၪအဂး ဂဲၫစိၩလၧ ခးမနံၫလၫ စိန်ဗင်းဆင်းသီအိုလော်ဂျီ ဆၧမၩလိၪလးနီၪလီၫႉ အဝ့ၫယီၩဘၪထိး ချိၫ့ဎွံၪခဲၩ့ဆၧၫ့ လခဲၫ့ထုၬအဆၫ့အဂဲးနီၪ လၧအဖီၩ့ခွံၬလၩကဘံၪ့အိၩမၬ ၥ့ၪယၫဘၪဝ့ၫနီၪလီၫႉ အဝ့ၫယီၩ ဘၪထိးဘၠၩ့အၥၭလၧ ဆၧဆၫဂံၪ့ဒၪ လါနၫ့ ကမိကဲၪထၪ့ၥၫ့ခၫအၥၭလုအီၪအၪမၬအကၠီၩ့ ၥၫ့ခိၪဒိၪယီၩၥ့ၪယၫဘၪဝ့ၫအခၫ ကဖ့ၪလၫ့အ့ၪအဝ့ၫ ဘိၪ့ခိၪၥၫ့ခၫလဂၩ အဆၧကဲၪအဂး အၥၭဘၪလၩ့ဎိၭတၭ ဖ့ၪလၫ့အ့ၪဝ့ၫဒၪနီၪလီၫႉ

လၫအိၫထံၪခးနီၪ ၡၩခမျၧးအဆၧဝံဆၧနၬအီၪဝ့ၫဒၪ၇ခွးဂီၩ့ ၆၆၀၀၀နီၪဘိၭ မွဲလၧကဲၬၥလံၬ ဆၧအီၪကီၪ့ဖိၪလဖၪ အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ