ၦကမိမၩလၩ့ဎွံၪအဖိၪလဖၪဘဲၫအၥၭကအၪ့လဲၩ့ထၪ့ထဲၩ့အဂး ဆၧမၩလိၪဖိၪလဖၪ အၪ့ကံၩ့ဘၩဆိၪဖၪအ့ၪဝ့ၫဒၪ

ဆၧမၩလိၪဖိၪလၧအထၪ့၇ဖၨၪ အမံၩ့မွဲဝ့ၫဒၪ CeCe & Abby လၩကဘံၪ့ကဘျၩ့ လဂီၩနၪခုၬ ကိၭဂဲထုၪ့ အထံၭၥိၭလဖၪဂီၩ့ ဂဲၫထုၪ့ဝံဖဲၫ့ဆံၫ့ဎံၪနီၪလီၫႉ အဝ့ၫၥံၪဂဲထုၪ့ဝံဖဲၫ့ဆံၫ့ဎံၪဂီၩ့ အၪ့ကံၩ့ဘၩဆိၪဖၪအ့ၪ ၦမုၪလၧကမိမၩ လၩ့ဎွံၪအဖိၪလဖၪ ဘဲၫအၥၭကအၪ့လဲၩထၪ့ထဲၩ့ၥၭအဂးနီၪလီၫႉ

အဝ့ၫၥံၪယီၩဆ့ ယိလါဝ့ၫဒၪလၧ အဆၧဘၩဆိၪဖၪလဖၪ ကလၧၫ့ဎွ့ၩထၪ့အဂး ဒဲ ၦကိၭဂၩဒ့ၭနီၪ ဘဲၫအီၪ က့ၪဒိၪ ၦၡၩအဆၧၥၭမၧၫ့လဖၪကၥ့ၪအဂးနီၪလီၫႉ ဖိၪၥၪလဖၪယီၩနီၪ ထၪ့ဆၧမၩလိၪလၧ စံၫ့ၥီၩမၬမိၩကဲၬၥလံၬ ဆၧမၩလိၪလးဖၧၩ့နီၪလီၫႉ ဆၧမၩလိၪလးနီၪအီၪဝ့ၫဒၪလၧ Colorado ဆၨၩခးဒီၪ့ႇ Centennial ဂီၩ့ ဆၧမၩလိၪဖိၪ အီၪဝ့ၫဒၪ အဂၩ (၃၀၀) ဘျဲၪနီၪလီၫႉ ဝဲထၪ့ထၬ ဆၧမၩလိၪလး အဆၧထိစိၩနီၪဘိၭ ဘဲၫၥိၫ့ထၪ့ ၦၡၩအနးခီၫ့ ဒဲ နးၥၭ လၧကဆါဎြံၬအီၪကန့အဂးႇ ဆၧမၩလိၪဖိၪလဖၪနီၪ လၧဆၧအီၪကီၪ့အဂးမွဲဂ့ၩႇ လၧၡၩခံးဂးမွဲဂ့ၩ ဘဲၫကဖ့ၪ ခိးဖ့ၪတၩထဲၩ့ဆၧကန့အဂးမွဲဂ့ၩ ထိစိၩထၬဝ့ၫနီၪလီၫႉ

ဆၧမၩလိၪလးနီၪ ၥီၪ့လံၬအလးလမွဲဘၪဒဲ ခရၧၫ့ဂူၫဂၩအဆၧဖံၭဆၧမၩလဖၪအဖၧၩ့ ဘၪလီၩ့မၩဆၧၩ့ဝ့ၫ ဘၪလီၩ့ပၫဝ့ၫဒၪနီၪလီၫႉ ဆၧမၩလိၪဖိၪလဖၪ ပၫဝ့ၫဒၪခရၧၫ့လဖၪအကျၩ ခရၧၫ့အမံၩ့လၧ ‘The lions for life’ ခရၧၫ့နီၪ လၩကဘံၪ့ကဘျၩ့ဒၪဎိၭလၩ့လိၬၥၭဂီၩ့ ဝံကၠၭဖဲၫ့ဆံၫ့ဎံၪဂီၩ့ အၪ့ကံၩ့ဘၩဆိၪဖၪကၠၭဆၧနီၪလီၫႉ

အဝ့ၫၥံၪဘၪအၪ့ကံၩ့ဘၩဆိၪဖၪဆၧ ဆၧထိစိၩနီၪဘိၭ မွဲ ၦမုၪအဒၧၩ့ လၧကမိမၩလၩ့ထ့ၬဎွံၪဖိၪၥၪလဖၪ  ဘဲၫၥိၭအၥုၪ့အၥၭကအၪ့လဲၩ့ထၪ့အၥၭဂီၩ့ ကအီၪဖျဲၪန့ထဲၩ့ အဖိၪအဒံၪလဖၪဂ့ၩဂ့ၩဘၪဘၪအဂးနီၪလီၫႉ ဘၪထွ့ၪလၧ ဆၧအဂဲးယီၩ ခရၧၫ့ခိၪနါWeiland စံၭဝ့ၫ ဆၧဂဲၩဝၭအယီၩနီၪ ဖ့ၪခိးဖ့ၪတၩခရၧၫ့န့ဒိၪဒိၪဒ့ၭအဂဲးႇ အဝ့ၫၥံၪယီၩ ဂဲထုၪ့ လဂီၩနၪခုၬနီၪ မွဲမိယိထဲၩ့ခွါထဲၩ့ အီၪလၧဂၪ့ခိၪချိၫ့ဖၧၩ့ ဖိၪၥၪလဖၪအဂဲးႇ အဝ့ၫၥံၪထုၬဖျီၪထၪ့ အဝ့ၫၥံၪအဆၧဆူၩနဲၩ န့ဝ့ၫဒၪအဂဲး ႇ ဒၪဘၪဆၧမၩလိၪဖိၪလဖၪ နုၬလၩ့ဂဲၩဝၭမုၬမုၬလၩလၩနီၪ အၥၭဎွံၪဝ့ၫအဂဲး စံၭဝ့ၫဒၪနီၪလီၫႉ

ဆၧမၩလိၪဖိၪအထၪ့၇ဖၨၪ ဂျော်နသန်နီၪ စံၭဘၪဝ့ၫ ကနုၬလၩ့ပၫလၧခရၧၫ့ဖၧၩ့ယီၩအဂး လၩကဘံၪ့နီၪ က ဂီၩ ဘၪဂဲထုၪ့လဂီၩနၪခုၬနီၪ အခိးအတၩအီၪဝ့ၫအဂဲးႇ ဘၪန့လဲၪနီၪဘိၭ လၧဆၧဘၩဆိၪဖၪအဖၧၩ့ မွဲအၪ့အုၭထၪ့ ဘၪကဆါယွၩအဂဲး အဝ့ၫစံၭဘၪဝ့ၫနီၪလီၫႉ

လကၭဒံၭဘၪ ဆရၫမုၪ Katherine Abarနီၪစံၭဝ့ၫဒၪ ဆၧမၩလိၪဖိၪလဖၪအဆၧဘၩဆိၪဖၪနီၪ ကပဒၩ့ထၬ အ့ၪဖိၪၥၪလၧ လအီၪဖျဲၪထၪ့ဒံၭဘၪလဖၪ ဆၧၥံၫကန့အဂး မွဲအစီၩ့အမၩ့ဎိၩဝ့ၫဒၪအဂဲး စံၭဘၪဝ့ၫနီၪလီၫႉ ဘၪထွ့ၪ လၧ ပကဘၪအီၪက့ၪဒိၪ ၡၩအဆၧၥၭမၧၫ့အဂးနီၪ စၭထၪ့လၧဖိၪၥၪဆံၭအထီ မွဲပကဘၪၥီၪ့ၥၫ့ထၬအဂဲးႇ ၦအအီၪ ဘူၭထံးလၧပၧၩလဖၪနီၪ ပကဘၪအဲၪဝ့ၫ ဘဲၫပအဲၪလၩ့ပၥၭအၥိၭနီၪ လၧအဝ့ၫၥံၪ ဆံၭဒံၭအထီ အ့ၪမွဲအဝ့ၫၥံၪကၥ့ၪ ယၫထၬစွါဘဲၫ အဝ့ၫၥံၪအဆၧၥၭမၧၫ့လၧယၫနီၪ မွဲကမုၬၡူၪဝ့ၫနီၪလီၫႉ

နးအဲၪဖီၫဘွၩ

15.2.22