ၥၭဆွံခီၫ့တဝၫ့ဖၧၩ့ ၦလၧလၫ့ဖျါၥံၫလဂၩအဂဲးအတီၩ

နံၪ့၂၀၂၂နံၪ့ လၩမ့ၫ၂၅ၥၫ့ အဂၫလၩ့ ၅နၩရံၫဘျဲၪအခံၫ့နီၪ အီၪလၧအ့ၫယၫဝတံၫခးဒီၪ့ႇ ဝါးခယ်မဝံးႇ ၥၭဆွံခီၫ့တ ဝၫ့ဖၧၩ့ အမံၩ့မွဲဝ့ၫ ပံၫတၧၫထိၩ (ခ) ဂၩလ့ၩ နီၪ လၫ့ဖျါၥံၫဝ့ၫနီၪလီၫႉ

ဂၩလ့ၩအဖါဖါ မၩ့မီၫ့ထိၩကၠဲၫ့ႇ မၩ့ကၠီၫကၠီၫႇ ဖိုးသောကြာ ဒဲ ဂၩလ့ၩအၥိၭလံဂၩယီၩနီၪ ခုၪ့ဆူၭပနါအခံၫ့ ဆၧ ဆၧၩ့ဂီၩ့ လၫ့ဖျါဆၧအကၠီၩ့ မၩ့ထိၩကၠဲၫ့ဒဲ မၩ့ကၠီၫကၠီၫ နီၪ ထဲၩ့နုၬလၩ့အီၪပွံၭလၧ ကၠၩ့ဖၧၩ့နီၪလီၫႉ အဂၫလၩ့ ၅နၩရံၫဘျဲၪ အခံၫ့နီၪ လံၩဂဲၫဆီၪ့နၬလ့ၬအကၠီၩ့ အဝ့ၫၥံၪကိၭစိၩ ဂၩလ့ၩဒဲဖိုးသောကြာ ဘဲၫၥိၭကဂဲၫထဲၩ့အီၪပွံၭလၧကၠၩ့ဖၧၩ့နီၪလီၫႉ လါနၫ့ ဂၩလ့ၩနီၪ စံၭဆၧၫ့ထဲၩ့ဆၧ “ယကမၩဂီၩ့ဒိၭအယီၩဒံၭ ယဂဲၫထဲၩ့အီၪပွံၭဒံၭအ့ၬ” ဘဲၫနီၪဂီၩ့ ဆုးမၩထဲၩ့ဆၧမၩနီၪလီၫႉ

“ဂၩလ့ၩဒဲ ဖိုးသောကြာနီၪ ကဂၩဒဲကဂၩ မၩဆၧမၩယဲၩဝ့ၫဒၪ ဖိၭဘိၭကဂျဲၫ့ဆၭဆၭနီၪလီၫႉ လၫ့ဖျါဆၧအခၫနီၪ ဖိုးသောကြာဝ့ၫ လၫ့ဖျါဘၪထွ့ၪအမ့ၬအကၠီၩ့ အမ့ၬအနၪထၪ့ဝီၩထၪ့ၡးဝ့ၫဒၪဂီၩ့ ဂၩလ့ၩနီၪဘိၭ လၫ့ဖျါဘၪလၧအချိၫ့ဆၫဒဲ အခိၭဘံၭထံၭအကၠီၩ့ လၩ့ထံၩဖါဒဲအၥၭစဲၪ့ထၪ့ခွံၬကကၠၪလီၫလါနၫ့ ၦၡၩလၥ့ၪယၫထွ့ၪဘၪအဂဲး” နးမၫရံၫနီၪ စံၭဘၪဝ့ၫ နီၪလီၫႉ

အနီၪအခၫ အဝ့ၫအဖါနီၪ စဲၪ့ထၪ့လ့ၩယိအဖိၪခွၫဂီၩ့ လီၩ့ကိၭၦၡၩအကၠီၩ့ ၦလဖၪဂဲၫထီၩ့အခၫ ဖီၪ့ယိဝ့ၫအမိဎွါ အခၫ အလီၩ့ခိလၧၩ့လၧၩ့ဒံၭအကၠီၩ့ ဆီၫ့မီၪ့ဝ့ၫလၧမၧၫ့ဒၪဆၧဂီၩ့တၭ ထဲၩ့ယိၭန့ဝ့ၫလၧအဂံၪ့နီၪလီၫႉ ထီၩ့လၧဂံၪ့ကကၠၪ ကိၭစိၩAmbulanceဂီၩ့ ၦၡၩလ့ၩၥိၫ့စိၩလၧ ဝံးဒီၪ့ဆၧဆၫဂံၪ့နီၪလီၫႉ

ထီၩ့လၧဆၧဆၫဂံၪ့အခၫ ၦၡၩအီၪက့ၪထၬ ကနၩခၧၩ့နၩဂီၩ့ ၦၡၩဎွ့ခွံၬနီၪလီၫႉ အဝ့ၫယီၩနီၪၥံၫယူၭအကၠီၩ့ ဆၧဖၩ့ လၫ့အခၫ ၦၡၩဂဲၫထဲၩ့ဆိၭန့ထဲၩ့လၧ အဂံၪ့အဂဲး အဝ့ၫအတခွၫမုၪ နးမၫရံၫနီၪဆုးထဲၩ့စံၭဘၪဝ့ၫနီၪလီၫႉ

လၫ့ဖျါၥံၫဝ့ၫဒၪ ပံၫတၧၫထိၩ (ခ)  ဂၩလ့ၩယီၩနီၪ အၥၭအီၪ၂၅နံၪ့ဒံၭလီၫဂီၩ့ ထၪ့ဘၪဆၧမၩလိၪထၧၩ့၈ဖၨၪအဂဲးႇ အဝ့ၫယီၩအၥၭဆံၭဂီၩ့ အၪ့အီၩဆၧထံၫဆၧနီၫ့လၥ့ၪဘၪဒဲ မွဲၥၭဘၪ့လၧအၥ့ၪယၫနၪၥ့ၪဆၧကဂၩအကၠီၩ့ လၩ့လီၫ့ကီၩ့အၪ မၬအဂဲးဆုးထဲၩ့စံၭဘၪဝ့ၫနီၪလီၫႉ ဂၩလ့ၩအဖါနီၪဘိၭ ဆုးထဲၩ့စံၭဘၪဝ့ၫ အဖိၪခွၫကဲၪခွံၬဘယီၩအကၠီၩ့ အၥၭဘၪထံၭဆၫ အဂဲး စံၭဝ့ၫဒၪနီၪလီၫႉ အမိမိနီၪဘိၭ ၥံၫဖီၩ့ခွံၬကအီၪကနံၪ့ဘျဲၪယူၭနီၪလီၫႉ

လၧAyeyarwaddy Times page ထံၭလၫ့ထၬဝ့ၫ ဘၪထွ့ၪလၧ ဆၧအဂဲးယီၩနီၪ ထီးလူၬလမွဲဘၪအဂဲးႇ လဘၪထွ့ၪဘၪလၧ ထံၪဂဲးခးဂဲးနးဆံၭအဂဲးႇ ဆၧပရၧၫ့လၧအဘၪမၪလဖၪနီၪ ထီၩ့အၪ့နၩ့ထဲၩ့လိၬၥၭလဂ့ၩအဂး နးစံၩၡး နီၪ ဆုးထဲၩ့အၪ့ယၫဘၪဝ့ၫနီၪလီၫႉ

ဆၧပရၧၫ့ - ရ့ၫမိၫမၩ့ကၠီၫ

နးအဲၪဖီၫဘွၩ

30.5.2022