ၥၫ့ဎွၩဖရၫ့စံ ၥိၫ့စိၩဘၪဆၧမၩဆၧၩ့လၧ တူရကီ ဒဲ ဆီးရီးယား ထံၫခးလဖၪအဂဲး

လၧအဖီၩ့ခွံၬ လၩဖ့ၫဘြူၫအ့ၫရံၫ၆ၥၫ့ဒၪအိၩ ထံၫခးလၧ ဘၪထိးဖူၫဆံၫဂူ တူရကီ ဒဲ ဆီးရီးယား လဖၪအဂး ၥၫ့ဎွၩၥိၫ့စိၩ ဆၧမၩ ဆၧၩ့လဖၪဒဲ ဘဲၫၦၡၩကဝၩ့ယိၬဆၧၩ့ကၠၭအ့ၪ အဝ့ၫၥံၪအဆၧကၪဆၧဂဲၩလဖၪဂီၩ့ ပကမၩ့ဆၧၩ့ထၪ့ကၠၭအဝ့ၫၥံၪအဂး ထီးၥၭနၪ့ဘၪလဂ့ၩနီၪ ၥၫ့ဎွၩစံၭဝ့ၫဒၪလီၫႉ

ဖံၫဆၧဂူ ဂံၫဂူဂီၩ့ အီၪ၉နၩရံၫအထီနီၪ ၦအၥံၫလဖၪအဆၧဝံဆၧနၬအီၪဝ့ၫဒၪ ၄၁၀၀၀အဂဲး ၦၡၩထုၬထၪ့ ဘိၭဘၪၥ့ၪယၫဒဲ ၦၡၩ အၪဒၪဆၧ ဘၪကဲၪထၪ့ ဂံၪ့ဎၪ့လအီၪဘၪဒဲ ဘၪအီၪဝံအီၪဆံၩ့ကၠၭနီၪလီၫႉ ၥၫ့ဎွၩနးဆ့ အနၫ့ဆါအၪ့ယၫထၪ့ဆၧယီၩ ထီးလကဲၪထၪ့ဘၪ ဆၧ အၪ့ယၫပျီၩပျီၩအဂးနီၪ အၪ့ကံၩ့စိၩဆၧမၩဆၧၩ့လၧ ဆၧစီၪဒီၩ့ဘၪဎီၩ့ၡၩခရၧၫ့ရိၩ့နီၪဂီၩ့တၭ နံၫၥၫ့အထးဖၧၩ့ မွဲကၥိၫ့စိၩဆၧမၩဆၧၩ့လဖၪ ထၧၫ့အ ထီၩ့နီၪလီၫႉ

ပလူၭအလၧၩ့လဖၪနီၪ ကၥိၫ့စိၩဝ့ၫလၧ တူၫရကံၫထံၫခးKilisဝံးဂီၩ့ ကလီၩ့အၪ့နၩ့ ဆၧပိၭဆၧလၫ့ အဂူၫဂၩလဖၪအဂးနီၪဘိၭ ဖ့ၪ လၫ့ထၬ Rava foundation မူၩဒၩနီၪလီၫႉ ခရၧၫ့အယီၩနီၪ မွဲအီၪထၬဝဲၩလၧအလးနီၪဂီၩ့ ၦၡၩအဂၩအထီၫ့အဂး လိၪဝ့ၫဒၪ ဆၫအၪ့ဆၫအီၩ လဖၪ ဒဲ ကအီၪအလးလဖၪနီၪ အဝ့ၫၥံၪအခရၧၫ့ယီၩ မၩဆၧၩ့ဝ့ၫဒၪနီၪလီၫႉ

ဆီးရီးယား ထံၫခးဖၧၩ့ ဆၧဒုၭၥုၭကဲၪထၪ့ဂီၩ့အထီ ၦဘၪကၪဘၪဂဲၩဖိၪၥံၪ အဂၩ၆၀၀၀၀အဂး ၦၡၩဘၪၥုၪ့ထၪ့ဆၧအီၪဒုၩၥၭလး နီၪလီၫႉ လါနၫ့အလးလဖၪနီၪ လလၧၫ့ဒံၭဘၪအကၠီၩ့တၭ ၦၡၩဘၪဆ့ၭလၫ့ ဆၧဆၧၩ့ဒၩ့ဆၧလဖၪဂီၩ့ ဘၪအီၪကၠၭဝ့ၫ မွဲအီၪကနၩ့ဆ့နီၪလီၫႉ န့ၫအနီၪလကၭဘၪ လၧလယံၬလမီးဒံၭဘၪအထီအိၩ မွဲလၧဖံၫဆၧဂူ ဂူအကၠီၩ့ ၦဘၪကၪဘၪဂဲၩဖိၪၥံၪလဖၪဂဲၫအၪထၪ့ဝ့ၫအၪမၬဒ့ၭနီၪလီၫႉ

ၥၫ့ဎွၩကၥိၫ့စိၩဆၧမၩဆၧၩ့နီၪ မွဲလၧကျိၪစ့ၩဆၧမၩဆၧၩ့အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ