ၥၫ့ဎွၩဖရၫ့စံ စံၭဝ့ၫဒၪ ကိၫရံၩယၩကျိၩ့ အဆၧဎူၫဆၧဎၩ့အဂဲးနီၪ အီၪလၧအဝ့ၫအဆၧအၪ့ဎၬ ဖၧၩ့ အီၪလၧအဝ့ၫအဆၧဘၩဆိၪဖၪဖၧၩ့နီၪလီၫႉ

ၦဆံၫ့ဎံၪစိန်အန်ဒရူးကင်းမ်တေဂွန်နီၪ ကိၫရံၩယၩထံၪခးဖၧၩ့ မွဲအဆိၪထုၬကၭၥလံၬဘိၪ့ ခိၪၥၫ့ခၫကဂၩဂီၩ့ မွဲဒံၭလၧဆၧဘိၪ့ဆၧဘၩအမၫတူၩရၫလဂၩဒံၭနီၪလီၫႉ လၧ၂၀၁၄နံၪ့အထီၥၫ့ဎွၩ လ့ၩထီၩ့စိၩလၧ တောင်ကိုရီးယားထံၪခးအခၫနီၪ လ့ၩစိၩလၧၦဆံၫ့ဎံၪ စိန်အန်ဒရူးကင်းမ်တေဂွန် ဂဲၫထဲၩ့အီၪဖျဲၪထၪ့ထၬအလးအိၩဂီၩ့ လ့ၩအၪ့ကံၩ့ဘၩဆိၪဖၪအ့ၪဝ့ၫဒၪဒံၭနီၪလီၫႉ

ၥၫ့ဎွၩအဆၧၥၭထိၬပရၧၫ့ဖၧၩ့ လီၩလၩ့ဝ့ၫဒၪ ၦလၧအဘၪလီၩ့လီၩလၩ့လါလၩ့ ဆၧၥၭထိၬ ပရၧၫ့လဖၪနီၪ မွဲကဘၪအၪ့န့ဆၧဒီၩ့ဆၧထ့ၬလၧ ၦဆံၫ့ဎံၪအန်ဒရူးအအီၪနီၪလီၫႉ ဘဲၫယီၩနီၪ မွဲလၧဆၧဖ့ၪလၩဖ့ၪဖၩ့ၦဆံၫ့ဎံၪဒဲ ၦဆူၩနဲၩဖိၪလဖၪဂဲၫယူၭယၪ့ဘိၪ့ထၪ့ဘၩထၪ့အဝ့ၫကန့အဂး  ၦၡၩဘီၩ့ထၪ့အဝ့ၫအဂၩ့အဖၫ့(ဆင်းတုတော်) လၧဘၫတံၫကၫ့လး St.Peterၥရိၬအချိၫ့နီၪလီၫႉ 

လၧဘိၪ့မုနံၩနီၪအဖၧၩ့ အီၪလၧခးကိၫရံၩယၩ ကၭၥလံၬဆၧဘိၪ့ဆၧဘၩဖိၪၥံၪဂဲၫဝ့ၫဒၪ အဂၩ ၃၀၀နီၪလီၫႉ ၥၫ့ဎွၩဒၪခီၩ့လိၬၥၭလၧ ကိၫရံၩယၩထံၪခးဖိၪၥံၪအထီ စံၭဝ့ၫဒၪ ၦဆံၫ့ဎံၪအန်ဒရူးယီၩ ဘၪဂဲၫထဲၩ့ဎိၩဒိၪထၪ့လၧ ဆၧဒုၭၥုၭကျၩလါနၫ့ အဝ့ၫယီၩ မွဲလလၩ့ဘၧၩ့ဘၪလၧ ဆၧမ့ၬလဲၩၥၭဂဲၫ့ဖၧၩ့ တၭ လီၩ့ဎွံၪလၩ့ဆၧဎူၫဆၧဎၩ့အချံၫန့ဝ့ၫဒၪနီၪလီၫႉ

အဝ့ၫအဆၧၥၭမၧၫ့ဒီၩ့ထ့ၬဂ့ၩဘွၩလဖၪနီၪ လၧကိၫရံၩယၩကျိၩ့အဂးမွဲဂ့ၩႇ ဂၪ့ခိၪထၧၫ့ဘံၪ့ယၫ အဂးမွဲဂ့ၩ ကဲၪထၪ့ဆၧလီၩဆိၫကမံၩ့နီၪလီၫႉ ပကဲၪထၪ့ဆၧလ့ၩဎုၬဖိၪလၧအဝ့ၫႇ အုၩ့လၩ့ထဲၩ့အၥၭ လၧ ဆၧဘၪလိၬဎွ့ၪဎီၩ့အီၪထဲၩ့လဖၪနီၪ ဖျီၪလၩ့အဲၪဒိၭဒိၪမၬလီၫႉ

လၥုၪ့ထၪ့ဘၪထီလၧယၫလၧစူၪဝဲၩလဖၪဒဲ အီၪအၪ့ဘဲၫထံၪခးနဲၩ့ဎီၩ့ဖိၪအဂ့ၩဒိၪထုၬလဂၩအ ၥိၭဂီၩ့ ဂဲၫထဲၩ့ၥုၪ့ထၪ့ဆၧဎူၫဆၧဎၩ့နီၪ လၩ့ဆၫ့လၩ့မဲၩဝ့ၫဒၪဒိၪမၬလီၫႉ Koreaကျိၩ့ကန့ထဲၩ့ ဆၧဎူၫ ဆၧဎၩ့အဂး ပကအၪ့ကံၩ့ဘၩဆိၪဖၪလၧ ၦဆံၫ့ဎံၪအန်ဒရူး အအီၪလါဆံၭႉ Koreaကျိၩ့ ဆၧဎူၫ ဆၧဎၩ့ကန့ထၪ့အဂးနီၪ မွဲအီၪလၧယဆၧအၪ့ဎၬဖၧၩ့ ယဆၧဘၩဆိၪဖၪဖၧၩ့အဂဲး ၥၫ့ဎွၩဖရၫ့စံလီၩ ဘၪဝ့ၫလီၫႉ

တောင်ကိုရီးယား ကၭၥလံၬၥၫ့ခိၪဒိၪလဖၪခရၧၫ့ ဘၪအီၪက့ၪထၬ ၦဆံၫ့ဎံၪစိန်အန်ဒရူး ကင်းမ်တေဂွန်အဆၧဂၩ့ဆၧဖၫ့ လၧစံၫ့ပံတၧၫ ဘၫစံၩလံၫကၫလးဝၩ့ဖၧၩ့ ဆၧနဲၪ့နီၪ မွဲၦဆံၫ့ဎံၪအန် ဒရူးအီၪဖျဲၪထၪ့ အနံၫ့ထၪ့ဘၭ၂၀၀ဆၧနဲၪ့နီၪလီၫႉ

နးအဲၪဖီၫဘွၩ