ၥၫ့ဎွၩဖရၫ့စံၭ ဘၪထိးဖံၭခိယၪခိဆၧဆၫအဂဲး

ၥၫ့ဎွၩဖရၫ့စံၭနီၪ အ့ၪမွဲအီၪလၧဘၫတံၫကၫ့အဖၧၩ့စွါဘဲၫ မုကိနွ့ၫဒ့ၭ လၧအတုၬမုနံၩ မုမ့ၬ ထုၪ့အခံၫ့ လီၩလၩ့လါလၩ့အ့ၪၦအဂဲၫစူၭကီၪ့အၥၭလၧ ဘၫတံၫကၫ့လးဒၩအဖၧၩ့လဖၪ ဘၪထွ့ၫလၧ လံၬဆံၫ့ဎံၪအဂဲးႇ ဆၧထုၪ့ၥုၪ့ထုၪ့ၥၭအဂဲးလဖၪနီၪလီၫႉ

လၧအဖီၩ့ခွံၬအတုၬမုနံၩအိၩနီၪအဝ့ၫယီၩ လီၩလၩ့လါလၩ့ ဆၧၥၭထိၬပရၧၫ့လါနၫ့ အီၪလီၩလၩ ့ဝ့ၫဒၪလၧ အဝ့ၫအီၪအလး စံၫ့မၫတၩကၠီး တရၫ့လံၩအလးနီၪလီၫႉ ဘၪန့လဲၪနီၪအဝ့ၫယီၩ မွဲဘၪ ထိးဖံၭခိယၪခိဆၧဆၫကဆံၭနီၪလီၫႉ ဝံးရိမၫနီၪကချံၫ့ဝ့ၫဒၪ ထၧၩ့အထီၩ့၄၈ဒံၫကရံၫအဂဲးထယါ ထၬဝ့ၫလီၫႉ လၧအဖီၩ့ခွံၬ လၩနိဝံၩဘၧၫ့၂၅ၥၫ့ဒၪအိၩ ၥၫ့ဎွၩဖရၫ့စံၭနီၪ မွဲလၧအဝ့ၫ အဆၧဆီၪ့ဆၧချဲၫ့ အကၠီၩ့ အဂုအိၩထိးဆၧၫ့ထၬဆၧဎိၭထံၪဎိၭဒီၪကနၩ့နၩ့နီၪ ဘၪၥုၭထဲၩ့ဝ့ၫအခံၫ့အဂဲး ဘိၭဘၪၥ့ၪယၫ ထၪ့ဝ့ၫလီၫႉ ဂီၩ့နီၪအဝ့ၫယီၩ လ့ၩမၩခွါယိအဆၧဆၫလၧ အဝ့ၫလ့ၩယံၩယါဆၧဆၫဂံၪ့ Gemelli နီၪ လီၫႉ ဆၧဆၫအဆၧစံၭဆၧၫ့လဖၪ ဂ့ၩဝ့ၫဒၪအကၠီၩ့ ၥၫ့ဎွၩယီၩဂဲၫထဲၩ့ထဲၩ့လၧ အဝ့ၫအီၪအလးနီၪလီၫႉ

လၧလယံၬလမီးလၧၩ့ဘၪအထီနီၪ ၥၫ့ဎွၩယီၩအၥၭကထၪ့ဘၭဝ့ၫဒၪ ၈၇နံၪ့နီၪလီၫႉ လၧအ ဖီၩ့ခွံၬ ၡၩနံၪ့ဖိၪအဖၧၩ့ၥၫ့ဎွၩယီၩ အဆၧဆီၪ့ဆၧချဲၫ့လမိဂ့ၩနၬလၧၩ့ဘၪလီၫႉ လၧဒူဘိုင်းထံၪခးဖၧၩ့ ၦၡၩမၩထၪ့ ဂၪ့ခိၪအဆၧခိဂဲၫအၪထၪ့ဒဲ ဘၪထွ့ၫလၧဂၪ့ခိၪနဲၩ့ဎီၩ့အဂဲး ဆၧအီၪကီၪ့ဖၭဒိၪ COP28 အ ဖၧၩ့ ၥၫ့ဎွၩယီၩလ့ၩထၪ့စိၩဝ့ၫဒၪဒံၭနီၪလီၫႉ အနီၪနီၪမွဲၥၫ့ဎွၩလ့ၩစဲၪ့ထၪ့လၧ ထံၪခးဂူၫဂၩအဘျၩ့၄၅ ဘျၩ့လဘျၩ့နီၪလီၫႉ

ၥၫ့ဎွၩနီၪဘဲၫယီၩ မွဲလၧအဆၧဆီၪ့ဆၧချဲၫ့အကၠီၩ့ ကဘၪအီၪပွံၩၥ့ၪဒဲ အဝ့ၫထိးဆၧၫ့ထၬဆၧ ထံၪလၩ့ဒီၪလၩ့လဖၪဆ့ ကဘၪၥုၭထဲၩ့ဝ့ၫၥ့ၪဆ့လီၫႉ လါနၫ့ဆၧဘိၭဘၪၥ့ၪယၫထၪ့ဆၧ မွဲလစဲၪ့ ထၪ့ဒံၭဘၪနးမံၩ့နီၪလီၫႉ

ၥၫ့ဎွၩယီၩနီၪ အပိၭၥိၭအီၪထးဒၪကကဲၩ့လီၫဂီၩ့ လၧကနံၪ့ယီၩအဖၧၩ့ အပိၭၥိၭဖၧၩ့နီၪၥံၭနုၬ ဝ့ၫဒၪအကၠီၩ့ ဘၪၥၪအဂး ဆၧကၪဆၧဂဲၩအီၪဝ့ၫဒၪနီၪလီၫႉ လၧအနီၪဒၪအိၩ အဝ့ၫယီၩ လ့ၩထၪ့ဘၠၩ့ အၥၭလၧဆၧဆၫဂံၪ့ဂီၩ့ လၩအ့ၫဖြ့ၫ၁ၥၫ့နီၪ ဂဲၫထဲၩ့စဲၪ့လၩ့ထဲၩ့လၧဆၧဆၫဂံၪ့နီၪလီၫႉ ၥၫ့ဎွၩယီၩ လၧအဝ့ၫအၥၭအီၪဒၪ ၂၁နံၪ့အထီဒၪအိၩ ဘၪဖ့ၬထ့ၬခွံၬအပိၭၥိၭကကဲၩ့နီၪလီၫႉ

ဘဲၫၥိၭၥၫ့ဎွၩယီၩ ကအီၪမုၬဆီၪ့ချဲၫ့ထၪ့အဂး ပကအၪ့ကံၩ့ဘၩဆိၪဖၪအ့ၪအဝ့ၫအဂး ကိၭဒံၩ ကိၭဂၩဒ့ၭလါဆံၭႉ

နးအဲၪဖီၫဘွၩ