ၥၫ့ဎွၩဖရၫ့စံၭ စံၭဝ့ၫဒၪ ဆူဒန်ထံၫခးဖၧၩ့ ကဲၪထၪ့ဝ့ၫဒၪ ဆၧမၩဆီၪ့မၩနီၩ့လဖၪနီၪ မၩပျၩ့ထၪ့ဒၪလၧ ဆၧဎူၫဆၧဎၩ့ဖၧၩ့အဂး

လၧဆူဒန်ထံၫခးဖၧၩ့ ဆူဒန်ၥုၭဖိၪလဖၪဒဲ (Rapid Support Forces) ၦဖီၪ့စူၪဝဲၩလဖၪအကျၩ အၪ့ဂူၬလိၬၥၭ ကမိ ပၧၩ့ထၬထံၫခးအကၠီၩ့ ဆၧမၩဆီၪ့မၩနီၩ့လဖၪ ကဲၪထၪ့ဝ့ၫဒၪအကၠီၩ့ ၦၡၩဘၪၥံၫဝ့ၫဒၪ ဖိၭဘိၭအဂၩ၁၀၀ဘျဲၪဂီၩ့ ၦၡၩဘၪထံၭဘၪ ဆၫအီၪဝ့ၫဒၪ ဖိၭဘိၭအဂၩအထီၫ့နီၪလီၫႉ

ၦဖီၪ့စူၪဝဲၩနံၫဖၨၪယီၩအၪ့ဂူၬလိၬၥၭစီၩ့မၩ့နီၪ ထဲၩ့ဘၪလၩ့လၧထံၫခးဖၧၩ့နီၪလီၫႉ ဘၪထွ့ၪလၧဆၧအထၧးအလၧးယီၩ ၥၫ့ဎွၩစံၭဝ့ၫဒၪ တခၩကမွဲဆၧမၩဆီၪ့မၩနီၩ့နးမံၩ့ မၩပျၩ့ထဲၩ့ဒၪလၧ ဆၧဎူၫဆၧဎၩ့ဆၧချဲၩ့ကၠီၪ့ဖျီၩ့ဖၧၩ့အဂးနီၪလီၫႉ မွဲလၧဆၧဒုၭၥုၭ အကၠီၩ့ Khartoum လးဝၩ့ဖၧၩ့ ၡၩခမျၧးလဖၪ ဘၪစဲၪမံၩ့ဂၭဖျိၭအီၪထၪ့ဝ့ၫဒၪအၪအၪဒ့ၭနီၪလီၫႉ

ၦအမၩဆၧမၩလၧထံၫခးအၥီၫ့ရိၩ့ဖၧၩ့ အီၪဂဲၫဝ့ၫဒၪလၧထံၫခးဂူၫဂၩလဖၪနီၪဆ့ ထဲၩ့ထဲၩ့လၧအထံၫအခးလဖၪယူၭ နီၪလီၫႉ အမ့ၫရံကၫ့ခးဒိၪဂျိုးဘိုင်ဒန်ဆ့ ထုၬထၪ့လံၬဘၪထွ့ၫလၧ နံၫခီၫနံၫကဲၩ့ၦဖီၪ့စူၪဝဲၩလဖၪ ဘဲၫကအီၪပထုၬခွံၬဆၧမၩ ဆီၪ့မၩနီၩ့လဖၪအဂးႇ ဘၪထွ့ၪလၧဆၧမၩဆီၪ့မၩနီၩ့ယီၩနီၪ ၡၩခမျၧးလဖၪ ဘၪၥံၫဂီၩ့ၥံၫစၪနီၪ မွဲပကွဲၪဖျါလန့ဘၪဆၧမၩအဂဲးႇ ၦဘၪကၪဘၪဂဲၩဖိၪလဖၪအဂး ခရၧၫ့လၧအလ့ၩဖ့ၪလၫ့မၩဆၧၩ့ဆၧလဖၪနီၪ လီၩ့မၩထီၩ့ထၪလဂ့ၩအဂးႇ ယူၭယၪ့ဘၪဆူဒန် ထံၪခးဖိၪၥံၪအဂး ခးဒိၪယီၩထံၭလၩ့လီၩထၬဝ့ၫနီၪလီၫႉ

ၦၡၩအဂၩ၁၅၀ဘျဲၪနီၪဆ့ ၥိၫ့စိၩဝ့ၫထီၩ့လၧဆော်ဒီအာရေဗျ , အီဂျစ်, ပါကစ္စတန် ဒဲ ကနေဒါထံၪခးလဖၪနီၪလီၫႉ Khartoum ဝံးနီၪ ၦၡၩအီၪဝ့ၫဒၪဖိၭဘိၭ အဂၩ၆ခွးဂီၩ့ ဘဲၫယီၩ ဘၪထိးဖ့ၬထ့ၬထၬinternetနီၪလီၫႉ ဆၧနီၪအကၠီၩ့ လၧဖံၭဖၫ့ခိၪနီၪ ကဲၪပၥ့ၪလဲၪအဂဲး ၦၡၩလၥ့ၪယၫဘၪနးမံၩ့ဒဲ ၦၡၩကလ့ၩမၩဆၧၩ့အဝ့ၫၥံၪလဖၪဆ့ လ့ၩမၩဆၧၩ့ဝ့ၫလန့ဘၪ ဂ့ၩဂ့ၩဘၪဘၪနီၪလီၫႉ

ထီးမုကနံၩယီၩ ၦလၧအၥံၫအီၪဝ့ၫဒၪအဂၩ၄၀၀ဘျဲၪယူၭဒဲ ၦအဘၪထံၭဘၪဆၫအီၪဝ့ၫဒၪ အၪမၬဒ့ၭအဂဲးႇ ၦလၧ အဘၪၥံၫအဆၧဝံဆၧနၬနီၪ ကဂဲၫအၪထၪ့ဒံၭအဂဲးႇ ၦလၧအဘၪထံၭဘၪဆၫလဖၪနီၪဆ့ လ့ၩထၪ့ဘၠၩ့အၥၭလၧ ဆၧဆၫဂံၪ့ လန့ဘၪအဂဲးႇ အီၪလၧဝံးဖၭဒိၪဖၧၩ့ ဆၧဆၫဂံၪ့လဖၪဆ့ မွဲလၧဆၧဒုၭၥုၭအကၠီၩ့ ဘၪဖိၭဘံၭထၬဝ့ၫဒၪနီၪလီၫႉ

နးအဲၪဖီၫဘွၩ