ၥၫ့ဎွၩဖရၫ့စံဖ့ၪဂဲးဖ့ၪဘၭ အမ့ၫရံကၫ့ၦကမိကဲၪထၪ့ၥၫ့မုၥၫ့ခၫဆၧမၩလိၪဖိၪလဖၪ ဘဲၫၥိၭကခိၭနၪကဆါယွၩအလူအဂးအဂဲး

လၧအဖီၩ့ခွံၬလၩမၫၡၭ၆ၥၫ့ အစီၩ့မုနံၩအိၩ ၦၡၩမၩလၩမၩဖၩ့ စံၫ့မ့ၫရံၫဆၧကဲၪထၪ့ဘိၪ့ခိၪၥၫ့ခၫဆၧမၩလိၪလး ဂဲၫထဲၩ့အီၪၥုၪ့လၩ့ထၬအၥၭ အနံၪ့အီၪထၪ့ဘၭ၁၇၅နံၪ့ဘိၪ့မုနံၩလၧ Ohio ဆၨၩခးဒီၪ့ Cleveland ဝံးနီၪလီၫႉ

လၧဘိၪ့မုနံၩနီၪၥၫ့ဎွၩဖရၫ့စံၭဒၪဎိၭလၩ့ လၧၥၫ့မုၥၫ့ခၫလဖၪႇ ၦလၧကမိကဲၪထၪ့ၥၫ့မုၥၫ့ခၫ ဆၧမၩလိၪဖိၪ လဖၪ ဒဲ ၦလအၥီၪ့လံၬလဖၪနီၪလီၫႉ “ဆၧခိၭနၪနီၪ မွဲလိၪဝ့ၫဒၪတၡါအဂဲးႇ လၧကိၪဘိၪ့ဆံၫ့ဎံၪအမ့ၬယၫ လ့ၩထွံၩ လၩ့ခၪ့ဂီၩ့ လၧဆၧကယူကစုၩဖၧၩ့ ထီးယွၩအဆၧၥၭထိၬပရၧၫ့လဖၪအဂးႇ အၪ့ကံၩ့ဘၩဆိၪဖၪဆၧ ဒဲ အၪ့န့နးၥၭဂဲး ဘၭ လၧကဆါယွၩအီၪအဂး” ၥၫ့ဎွၩဖရၫ့စံၭ ဖ့ၪဂဲးဖ့ၪဘၭအဝ့ၫၥံၪနီၪလီၫႉ

“ကဆါယွၩမိလီၩနၥံၪနီၪ ဘဲၫၥိၭနၥံၪကနါဂၧၫ့အဂး နၥံၪကဘၪလ့ၩလၧအဝ့ၫအမ့ၬယၫဂီၩ့ နၥံၪလ့ၩခိၭနၪ ကၥ့ၪအဂးနီၪ မွဲအရ့ၩဒိၪဝ့ၫလီၫႉ လၧပဆၧၥၭမၧၫ့ကၪဂဲၩဝ့ၫဒၪအခံၫ့နီၪ ပခိၭနၪယွၩအလူလၧပၥၭထၧၫ့ဖျိၪ့ယၪနီၪ ပနးၥၭဂဲးဘၭကန့ဝ့ၫနီၪလီၫႉ ပလချုၭကဲၪထၪ့ဒံၭဘၪ ၥၫ့မုၥၫ့ခၫအဆၧၥၭမၧၫ့နီၪ ဘဲၫပအၪ့ကံၩ့ဘၩဆိၪဖၪဆၧ ဆၧယံၩယါကအီၪအဂး မၩဆၧၩ့ပၧၩဒဲ ပခိၭနၪကဆါယွၩအလူၥ့ၪနီၪဆ့ လၧဆၧၥုၪ့ဎွံၪၥၭယီၫအဖၧၩ့ပကမၩဂၧၫ့ထၪ့ ၥၩလၩ့ ကဆါယွၩအဆၧၥၭထိၬပရၧၫ့အဂး ဖ့ၪလၫ့ပၧၩ ဆၧမၩဆၧၩ့န့နီၪလီၫႉ ပခိၭနၪကဆါယွၩဒဲပလ့ၩဎုၬဆၧ ကၠၧၫ့ ကၠၧၫ့နီၪ မွဲပဖ့ၪနဲၪထၪ့ ပဆၧဆူနဲၩအဂဲးႇ မံၭထၭခွၫလဖၪယီၩလၧဆၧအဲၪဆၧကွံၩဆံၫ့ဆံၫ့ဖျ့ၪဖျ့ၪဖၧၩ့ လုထၪ့အၥၭ လၧကဆါယွၩအဂးဒဲ ကဆါယွၩအဆၨၩဖိၪၥံၪအဂး ကန့ဝ့ၫအဂဲးႇ ဆၧအထၧးအလၧးကိၭမံၩ့ဒ့ၭအဖၧၩ့ ယွၩနီၪ အီၪလၧပၧၩကၠၧၫ့ကၠၧၫ့အဂဲး ဘဲၫပဖ့ၪနဲၪၦဂူၫဂၩကန့အဂး နၥံၪအဆၧၥုၪ့ဆီၪ့ၥၭဆီၪ့နီၪ မိဆၧအီၪကီၪ့ယီၩလိၪဝ့ၫဒၪ အဂဲးႇ လၧၦဘၪကၪဘၪဂဲၩဖိၪၥံၪ ၦၡၪ့ၦယၬဖိၪၥံၪအကျၩ နၥံၪယီၩဖ့ၪနဲၪထၪ့ကဆါယွၩအဆၧယၫ့ၥၭကန့အဂး မွဲၦလၧအဘၪဆၧဖျါလၩ့လဖၪနီၪလီၫႉ လၧယၩနံၪ့၂ဒုၩအဖၧၩ့ ကဆါယွၩအဆၨၩဆၬအဂး ဂဲၫထဲၩ့အီၪၥုၪ့လၩ့ထၬ အၥၭဒဲ ဂဲၫထဲၩ့အီၪဖျဲၪထၪ့ ၥၫ့မုၥၫ့ခၫလဖၪဆၧမၩလိၪလးယီၩ ဂဲၫထဲၩ့အီၪထၪ့ဒဲ ဂုးဆၧၫ့ထီးဘဲၫယီၩကကၠၪအကၠီၩ့ ဆ့ ယစံၭခိးစံၭတၩဘၪနီၪလီၫႉ” ၥၫ့ဎွၩစံၭဝ့ၫဒၪ ဘဲၫယီၩအၥိၭနီၪလီၫႉ

ၦလၧအဂဲၫထဲၩ့ၥုၪ့လၩ့ထၬ စံၫ့မ့ၫရံၫဆၧကဲၪထၪ့ဘိၪ့ခိၪၥၫ့ခၫဆၧမၩလိၪလးယီၩနီၪ မွဲလၧ Cleveland ဆၧအီၪကီၪ့ အဆိၪထုၬၥၫ့ခိၪဒိၪ Bp.Amadeus Rappe ဂီၩ့ ၁၈၄၈နံၪ့နီၪ ဂဲၫထဲၩ့ၥုၪ့လၩ့ထၬဝ့ၫအဂဲး ပန့ဘၪ ဆၧပရၧၫ့ ဘဲၫယီၩအၥိၭနီၪလီၫႉ