ၥၫ့ခိၪဒိၪ ခၠဲၩဆိၫဘၭၡွ့ၫ ဒိၭန့ထၪ့ ၥၫ့ခိၪဒိၪလဂၩအလးအလၩ

နံၪ့ ၂၀၂၃နံၪ့ လၩယူၫ၂၉ၥၫ့နီၪ ၦၡၩမၩလၩမၩဖၩ့ဘၪ ဆၧဒိၭန့ၥၫ့ခိၪဒိၪ အဆၧကဲၪအီၪဝ့ၫဒၪလၧ လွိုင်ကော် ဆၧအီၪကီၪ့နီၪလီၫႉ ၦလၧအကဲၪထၪ့ဘၪ ၥၫ့ခိၪဒိၪလဂၩနီၪ မွဲဝ့ၫဒၪလၧ Fr.ချဲလ်ဆိုဘရွှေနီၪလီၫႉ ၦလၧအဘၪလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ကၫဒံၫနဲၫ ခၠၩဘိၫနီၪလီၫႉ လၧမံဆၩဆၧလုထၪ့ ဖၧၩ့ ကၫဒံၫနဲၫလီၩလၩ့လါလၩ့ဝ့ၫဒၪ “ပၥၫ့ခိၪဒိၪအၥၫ့ယီၩနီၪ လၧအဝ့ၫအၥိၪဖိၪၥံၪကၠၧၫ့ကၠၧၫ့ ဂၬဖၭထၪ့ထုၪ့စူၪယၫ အဖၧၩ့ၥၭယူၭနီၪလီၫႉ ယွၩလၧအဖ့ၪလၫ့ပၧၩ ၥၫ့ခိၪဒိၪဘၭၡွ့ၫယီၩနီၪဆ့ မွဲပစံၭခိးစံၭတၩဘၪဝ့ၫနီၪလီၫႉ ၥၫ့ဎွၩလီၩယံၩ ယါဝ့ၫ ၦအယူၬၥိၪလဂၩနီၪ ဘၪအီၪလၧ အၥိၪကၠၧၫ့ကၠၧၫ့အကၠီၩ့ အဝ့ၫယီနီၪ မွဲၥိၪအစီၩ့ကနၧၫ့ဝ့ၫဒၪနီၪလီၫႉ ပၥၫ့ခိၪ ဒိၪအၥၫ့ယီၩနီၪ ကၠၧၩ့ဒၪ အၥိၪလဖၪအစီၩလကၭဘၪ အမ့ၬထံၫမ့ၬနီၫ့ ဒဲ အဆၧကၪဆၧဂဲၩလဖၪနီၪ မွဲအၪ့နၩ့ယိၭဆၧၫ့ အ့ၪဝ့ၫဒၪနီၪလီၫႉ ကဆါယွၩရွံထၪ့အဝ့ၫနီၪ လမွဲဘၪလၧလီၩလၩ့လါလၩ့ဆၧၥ့ၪ မၩလံၬၥံၪလဲၥံၪဘၪနီၪ လမွဲဘၪတၭ မွဲဒၪလၧ အဝ့ၫယီၩလၧအၥိၪဖိၪၥံၪကၠၧၫ့ကၠၧၫ့ ထိးနိၫ့ထိးနၭအၥၭအကၠီၩ့ အဝ့ၫယီၩယွၩရွံထၪ့ဝ့ၫဒၪနီၪလီၫႉ မွဲလၧအဝ့ၫနီၪ ကဆါယွၩကၥိၫ့စိၩထဲၩ့ပၧၩလၧ ဆၧဎူၫဆၧဎၩ့အီၪအဂဲး ယနဲၩဝ့ၫဒၪလီၫႉ လွိုင်ကော် ဆၧအီၪ ကီၪ့ယီၩနီၪ လၩ့ဂၬဝ့ၫဒၪဘဲၫ ဝံးအအီၪလၧခိၪလီၩ့ခိၪနီၪလီၫႉ ဝံးယီၩအဆၧပျၩ့နီၪ မွဲဖၩ့ဝ့ၫဒၪလၧ လၩ့ဆၫ့လၩ့မဲၩဖၧၩ့ အၪမၬနီၪလီၫႉ ဆၧအီၪကီၪ့ယီၩအဆၧဆူနဲၩနီၪ အီၪဂုးခၧၫ့ဝ့ၫဒၪလၧလိးဖၫ့ခိၪဂီၩ့ ဘၪထိးဆၧအၧၩ့ဆၧၥၫ့နၬနၬလ့ၬဒဲ ဘၪဒၪဆၧၫ့ယၫလၧဆၧမၩဂၭဂီၩ့ဂၭစၪနီၪလီၫႉ ဆၧအီၪကီၪ့ၥၭဘၪ့ဖိၪလဖၪနီၪ ဖ့ၪဆၧၫ့လၩ့ထၬအၥၭဘဲၫၥၫ့မုၥၫ့ခၫလ ဖၪဂီၩ့ လီၩ့လီၩလၩ့လါလၩ့ ယွၩအလူအထၫလၧ အလးဎံၩ့ဎီၩ့နီၪလီၫႉ ၥၫ့ခိၪဒိၪယီၩဂဲၫထဲၩ့အီၪမၧၫ့အၥၭဘဲၫၥ့ၪလဲၪနီၪ မွဲနၥံၪၥ့ၪယၫဝ့ၫလီၫႉ လၧအဖီၩ့ခွံၬ ၃နံၪ့အထးဖၧၩ့အိၩ ဖၧၩ့ၥၭ မုလဖၪနီၪ မွဲကဲၪထၪ့အဝ့ၫအဆၧလုဂံၪ့နီၪလီၫႉ ၦလၧအီၪဝံအီၪဆံၩ့လဖၪအဂး အဝ့ၫယီၩဂဲၫထဲၩ့အၪ့နၩ့လၩ့ ဆၫအၪ့ ဆၫအီၩလဖၪနီၪလီၫႉ ဆၧနီၪအကၠီၩ့ၥၫ့ဎွၩဖရၫ့စံၭနီၪရွံထၪ့အဝ့ၫဘဲၫ လွိုင်ကော်ဆၧအီၪကီၪ့ၥၫ့ခိၪဒိၪကဂၩၥိၭနီၪလီၫႉ စၭထၪ့လၧမုကနံၩယီၩ လၧထီလၧယၫအိၩ ဆၧအီၪခိၭထၬအဝ့ၫနီၪ ပၥ့ၪလဲၪ မနီၪလဲၪနီၪ ကနံၩယီၩ ဆၧၥၭထိၬပရၧၫ့ ဖၧၩ့ ပဒၪဘၪလၧၥၫ့ခိၪဒိၪယီၩကဘၪဂၭဖၬဝ့ၫဒၪဘဲၫၥ့ၪလဲၪအဂဲးနီၪလီၫႉ မိဆၧအီၪကီၪ့ယီၩ လီၩဖျီၪထၪ့ထၬ ၥၫ့ခိၪဒိၪ လဂၩအမူၩဒၩအဂဲး ယိၩယိၩဖိၪနီၪလီၫႉ ဆၧအီၪကီၪ့ကဘံၪ့အဂးၥၫ့ခိၪဒိၪနီၪ လၧဆၧအီၪကီၪ့အဖၧၩ့ ဆၧယံၩဆၧၡီၩ့ ကအီၪအဂး မွဲအကၧၩ့ဒိၪထုၬ ၦလဂၩနီၪလီၫႉ ၥၫ့ခိၪဒိၪနီၪ ကဘၪမွဲၦလၧအၥီၪ့ၥၫ့ယွၩလူယွၩထၫႇ လၧဆၧလုထၪ့မံ ဆၩဖၧၩ့ ကဘၪမွဲဝ့ၫၥၫ့ခၫ ဒဲ လၧဆၧပၧၩ့ဆၧဖၧၩ့ ကဘၪဂဲၩဝၭဝ့ၫဒၪ”အဂဲး ကၫဒံၫနဲၫလီၩဝ့ၫဒၪနီၪလီၫႉ ၥၫ့ခိၪဒိၪအၥၫ့ ခၠဲၩဆိၫဘၭၡွ့ၫယီၩစံၭဘၪဝ့ၫ ယဘၪထိးရွံထၪ့ယၥၭလၧၥၫ့ခိၪဒိၪကဂၩအခၫ ယၥၭမဲၪဆၧနီၪ လီၫႉ လါနၫ့ယနၪ့ထၪ့ထဲၩ့ ယွၩလၧအရွံထၪ့ယၧၩနီၪ မွဲယွၩလၧအၥ့ၪဆၧထီးလူၬလီၫ ဘဲၫနီၪအခၫ ယဂဲးထၪ့ထဲၩ့နီၪ လီၫႉ ယကဲၪထၪ့ၥၫ့ခိၪကဂၩဂီၩ့ ယအၪ့န့ထၬ ဆၧထိထီၫနီၪ မွဲဝ့ၫလၧ “မွဲယထီၩ့ဘၪလၧမူၭခိၪဘၩ့မုးနီၪဆံၭ” နီၪ လီၫႉ ဆၧၫ့ထီဘဲၫယီၩနီၪ ပထံၪခးဖၧၩ့ ၦၡၩအနိၭဖၧၩ့စံၭဝ့ၫဒၪ ကမိမၩန့ထဲၩ့ ထံၪခးလၧဆၧဎူၫဆၧဎၩ့အီၪဝ့ၫဒၪ က ဘံၪ့အဂဲးနီၪလီၫႉ ၦလၧအဖ့ၪလၫ့ပၧၩ ဆၧဎူၫဆၧဎၩ့တၡါ ဆၧဘၪလိၬဎွ့ၪဎီၩ့တၡါန့နီၪ အီၪဒၪလၧယွၩလဂၩဎး နီၪ လီၫႉ ဆၧနီၪအကၠီၩ့ ယရွံထၪ့ဘၪ လံၬဆံၫ့ဎံၪ“မွဲယထီၩ့ဘၪလၧမူၭခိၪဘၩ့မုးနီၪဆံၭ” နီၪလီၫႉ ယအၪ့န့ထၬၥၫ့ခိၪဒိၪ လိၫဂိၫအခီၫပယီၫလဖၪနီၪဘိၭ အလွ့အလၫနီၪမွဲလၧဆၧဎူၫဆၧဎၩ့ ဒဲ မိမၫရံၫအလွ့တၭ ယလုထၪ့ထၬကၥၭလၧ မိမၫရံၫ အီၪအခီၫပယီၫနီၪလီၫႉ အဝီၩနီၪဘိၭ မွဲလၧဆၧဒူၩဆၧယၪ့ဒဲ ၥၭမုဆံၫ့ဎံၪယွၩနီၪလီၫႉ အဘွၩနီၪဘိၭ မွဲလၧ ဆၧဆံၫ့ဆၧဎံၪနီၪလီၫႉ ၥံၫ့ထံၭလၧအၥၪနီၪဘိၭ မွဲလၧဆၧၥၭမၧၫ့ၥၭၡီၩ့ၥံၪ့ထံၭနီၪလီၫႉ လၧလွိုင်ကော်ဆၧအီၪကီၪ့ဖၧၩ့ လကၭဘၪ လၧမိဆၧအီၪကီၪ့ထၧၫ့ဘံၪ့ယၫဖၧၩ့ အ့ၪမွဲပကၥုၪ့လၩ့ထၬ ပဆၧဆူနဲၩလၧယွၩအဖၫ့ခိၪမၬ ပၥၭမၧၫ့ၥၭၡီၩ့ ယီၩနီၪ မွဲကဎံၫလၩဝ့ၫဒၪအချံၫအၥၪကအီၪထၪ့ဒဲ ၦၡၩဂဲၫဒိၭနဲၩ့အၥၭကန့ဝ့ၫဒၪ ဆၧအီၪကီၪ့ကဘံၪ့လီၫအဂဲး လီၩပျၩ့ဖ့ၪနဲၪဝ့ၫဒၪ လကၭဘၪ လွိုင်ကော်ဆၧအီၪကီၪ့ယီၩနီၪ မွဲဘၪဒၪဆၧၫ့ယၫလၧ ဆၧဒုၭဆၧခၬလဖၪအၪမၬ အ ကၠီၩ့ အၪ့ကံၩ့ဘၩဆိၪဖ့ၪအ့ၪအဝ့ၫၥံၪအဂးလါဆံၭနီၪဆ့ အဝ့ၫယီၩလီၩဝ့ၫဒၪလၧ interview ဖၧၩ့နီၪလီၫႉ ဆၧဖ့ၪလၫ့အ့ၪအဝ့ၫ ဆၧကဲၪဒိၪၥၫ့ခိၪဒိၪလဂၩအလးအလၩဘိၪ့မုနံၩယီၩ ဘၪဆၧမၩဝ့ၫဒၪလၧ လွိုင်ကော် ယေဇူးဘုရင်ၥရိၬဖၧၩ့ဒဲ အဝ့ၫယီၩထိးဆၧၫ့ဒိၭန့ဘၪ ၥၫ့ခိၪဒိၪအလးအလၩနီၪလၧ တောင်ကြီးကၭၥလံၬၥၫ့ခိၪဒိၪ Bp.ဘာစီးလျှိုအားသိုင် အစူၪဖၧၩ့အဂဲး ပန့ဘၪ ဆၧပရၧၫ့ဘဲၫယီၩအၥိၭနီၪလီၫႉ နးအဲၪဖီၫဘွၩ