ၥၫ့ခိၪဒိၪလဖၪ အဆၧအီၪကီၪ့ဖၭဒိၪ ၁၆ဘျၩ့လဘျၩ့ အဆိၪထုၬကဆၫ့ စၭထၪ့အဂဲး

နံၪ့၂၀၂၃နံၪ့ လၩအီၭတိၫဘၧၫ ၄ၥၫ့ လဂၩခီၫ ၄နၩရံၫဘျဲၪအခံၫ့နီၪ ၥၫ့ဎွၩဖရၫ့စံၭ လ့ၩခိၪလ့ၩနါဂီၩ့ ဝဲထၪ့ဘၪ ၥၫ့ခိၪဒိၪလဖၪ အဆၧအီၪ့ကီၪ့ဖၭဒိၪ ၁၆ဘျၩ့လဘျၩ့ အဆိၪထုၬလဆၫ့ လၧ Paul VI နီၪလီၫႉ

ဆၧအီၪကီၪ့ဖၭဒိၪကဘျၩ့ယီၩ အဆၧထိစိၩနီၪ မိဆၧအီၪကီၪ့ထၧၫ့ဘံၪ့ယၫ ကအီၪလၥွံၪဎးလယၫဎးႇ ကစူၭ ကီၪ့မၩဎိၭလၩ့ဆၧ ဒဲ ကဖီၪ့ထၪ့ဖံၭထၪ့ မိဆၧအီၪကီၪ့အဆၧဖံၭဆၧမၩလဖၪဂီၩ့ ကကဲၪထၪ့ မိဆၧအီၪကီၪ့လၧအလ့ၩ ဆၧလၧယၫအဂး နီၪလီၫႉ မိကၭၥလံၬၥၫ့ခိၪဒိၪလဖၪ အဆၧအီၪကီၪ့ဖၭဒိၪကဲၪထၪ့ အီၪထၪ့ဘၭအနံၪ့၅၀ လၧနံၪ့ ၂၀၁၅နံၪ့ လၩအီၭတိၫဘၧၫ၁၇ၥၫ့အထီ ၥၫ့ဎွၩဖရၫ့စံၭ စံၭဝ့ၫဒၪ မိဆၧအီၪကီၪ့လၧအလ့ၩဆၧလၧယၫ ဆၧချဲၩ့နီၪ ၥၫ့ခိၪဒိၪလဖၪအခရၧၫ့ နဲၩရွဲၩကၫဒံၫနဲၫ မားရီယိုဂရက်နီၪ အၪ့န့ဝ့ၫအဒီၩ့ဂီၩ့ အဝ့ၫယီၩစံၭဝ့ၫဒၪ မိဆၧအီၪကီၪ့ ထၧၫ့ဘံၪ့ယၫဒဲ ၦဆူနဲၩဖိၪကိၭဂၩဒ့ၭနီၪ မွဲလၧကဆါယ့ၩၡူၬဎြံၬ အဆၧဆိၪဂ့ၩဆိၪဘွၩအကၠီၩ့ နုၬလၩ့ပၫလၧ ဆၧအီၪ ကီၪ့ဖၭဒိၪဖၧၩ့ယီၩ န့ဝ့ၫကိၭဂၩနီၪလီၫႉ

အီၪလၧခးအီဂျစ် Coptic ကၭၥလံၬဆၧအီၪကီၪ့ခိၪနါ၊ အလက်ဇန္ဒြီးယားအၥၫ့ခိၪဒိၪ အီဘရာဟင်အိုင် ဇက်ဆေဒရပ်နီၪဆ့ စံၭဝ့ၫဒၪ ကဆါယွၩနီၪ ဘဲၫပမိဆၧအီၪကီၪ့ယီၩ ကအီၪလဖျိၪ့ဎးအဂးႇ ကစူၭကီၪ့မၩဎိၭလၩ့ ဆၧကၠၧၫ့ကၠၧၫ့အဂး ဒဲ ကဖီၪ့ထၪ့ဖံၭထၪ့ မိဆၧအီၪကီၪ့အဆၧဖံၭဆၧမၩဂီၩ့ ကလ့ၩဆၧလၧယၫကၠၧၫ့ကၠၧၫ့ကန့အဂး ကၧၩ့ဖျိၪ့ထၪ့အ့ၪပၧၩ ဆၧအီၪကီၪ့ဖၭဒိၪယီၩဂီၩ့ လၧဆၧအဲၪကွံၩဎိၩဒိၪဖၧၩ့ ဖ့ၪနဲၪအ့ၪပၧၩဖၧၩ့ၥၭ ဂ့ၩဘၪစဲၪအဂဲးႇ ဆၧအီၪ ကီၪ့ဖၭဒိၪဖၧၩ့ယီၩ ဘဲၫၥိၭကဆါယွၩ ကနုၬလၩ့ပၫလၧပဆူၭပကျၩဂီၩ့ ပဝ့ၫၥံၪလိၪဝ့ၫဒၪ ၥၭမုဆံၫ့ဎံၪယွၩ အစီၩ့အမၩ့ လဖၪ ဘဲၫအဝ့ၫၥံၪကန့ဘၪအဂး အဝ့ၫယီၩ အၪ့ကံၩ့ဘၩဆိၪဖၪဝ့ၫဆ့လီၫႉ

ဖ့ၪလၫ့ဆၧအဒီၩ့ လၧဆၧအီၪကီၪ့ဒူၭဖၧၩ့ ၦၡၩၥီၩ့လၩ့ထၬ စပွဲလဖၪနီၪဂီၩ့  လၧဆၧအီၪကီၪ့ဖၭဒိၪဖၧၩ့ ပဝ့ၫၥံၪ လဖၪယီၩ မွဲပမီၪ့ဎီၩ့လိၬၥၭလီၫအဂဲး စပွဲလဖၪယီၩ ဖ့ၪပၧၩဆၧထုၪ့ၥုၪ့ထုၪ့ၥၭအဂဲးႇ ၦလၧအကၧၩ့ဒိၪထုၬနီၪ မွဲလၧ ၥၭမုဆံၫ့ဎံၪယွၩဂီၩ့ ၥၭမုဆံၫ့ဎံၪယွၩဖ့ၪနဲၪပၧၩလဖၪနီၪ ပထိးဆၧၫ့ဝဲထၪ့ထၬ ပၥုၪ့ပၥၭအလၧၫ့အဎွ့ၩမၬ ပဖ့ၪဆၧၫ့ထဲၩ့ ဆၧအီၪကီၪ့ဖၭဒိၪယီၩကန့အဂဲး လူဇင်ဘတ်ထံၪခး ကာဒီနယ် ဂျွန်ကလောက်ဟော်လောရစ် စံၭဝ့ၫနီၪလီၫႉ

လကၭဘၪ ပကိၭထၪ့ၥၭမုဆံၫ့ဎံၪယွၩအမံၩ့နီၪ ပၥၭနၪ့ခွံၬကဆါယ့ၫၡူၬလမွဲဘၪတၭ လၧမံဆၩဆၧလုထၪ့ ဖၧၩ့ ဖါကဆါ ဖိၪခွၫကဆါဒဲ ၥၭမုဆံၫ့ဎံၪကဆါနီၪ အီၪလၧပဆူၭပကျၩဒဲ ပအီၪဘၪလၧအဝ့ၫၥံၪ လၥွံၪဎးလယၫဎး အဂဲး အဝ့ၫယီၩ ဆုးထဲၩ့စံၭဝ့ၫဒံၭလီၫႉ

လၧဆၧအီၪကီၪ့ဖၭဒိၪယီၩအဖၧၩ့ ခးအ့ၩၡၩၥၪ့ခိၪဒိၪခရၧၫ့ ခိၪနါဒိၪထုၬႇ ခးပယၩ့ကၭၥလံၬၥၫ့ခိၪဒိၪခရၧၫ့ ခိၪနါဒိၪထုၬႇ ကၫဒံၫနဲၫ ချားစ်ဘို၊ ကျိုင်းတုံကၭၥလံၬၥၫ့ခိၪဒိၪ ဂျွန်စော‌ယောဟန် ဒဲ ဒေါ်ရိုစားလီယားချိုချို တင် ၥံၪလဖၪလ့ၩထၪ့ဝ့ၫဒၪနီၪလီၫႉ

ဆၧအီၪကီၪ့ဖၭဒိၪယီၩ ကမၩဝ့ၫဒၪလၧလၩအီၭတိၫဘၧၫ၄ၥၫ့ ဒဲ ထီၩ့စိၩလၧ၂၉ၥၫ့အဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ