၂၀၂၃-၂၀၂၆ အထီနီၪ ခးပယၩ့ကၭၥလံၬဆၧအီၪကီၪ့ ကဆုးထဲၩ့လ့ၩလၧယၫ ဘဲၫၥ့ၪလဲၪအဂဲး ဘၪဆၧမၩဝ့ၫဒၪဆၧအီၪကီၪ့

နံၪ့၂၀၂၃နံၪ့ လၩစဲၭတံၫ့ဘၫ ၃၀ၥၫ့နီၪ ဘၪဆၧမၩဝ့ၫဒၪ ဆၧအီၪကီၪ့လၧ ဒိၩ့ပၥံၫ့ စံၫ့ပံတၧၫကၥံၫဒရဲၫၥရိၬ လးဝၩ့ဖၧၩ့နီၪလီၫႉ ဆၧအီၪကီၪ့နီၪ လၧ၂၀၂၃-၂၀၂၆အထီ ခးပယၩ့ကၭၥလံၬဆၧအီၪကီၪ့ယီၩ ဘၪထွ့ၪလၧ ၡၩခံးဂး ဒဲ နးခီၫ့နးၥၭနံၫမံၩ့လူၬ ကလ့ၩထၪ့လ့ၩထီၫအဂး ကဆုးထဲၩ့လ့ၩလၧယၫ ဘဲၫၥ့ၪလဲၪအဂဲးနီၪ ကၠူၭစဲၪ့ထၪ့ဆၧဎိၭထံၪ ဎိၭဒီၪလဖၪနီၪလီၫႉ

လၧဆၧအီၪကီၪ့ဖၧၩ့ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪBp.Henry မၩ့အဲၪချံၫ့လီၩဝ့ၫဒၪ “ဆၧအီၪကီၪ့အလ့ၩဆၧ (Myanmar catholic church’s synodal journey socio pastoral strategic plan 2023-2026)ယီၩ ဘၪကဲၪထၪ့နီၪ မွဲလၧၥၫ့ဎွၩဖရၫ့စံၭအဆၧဆၪ့ထွ့ၫအကၠီးႇ ပမိဆၧအီၪကီၪ့ယီၩနီၪ မွဲလၧစကရမဲၪ့တူၩအကၠီၩ့ႇ မိကၭၥလံၬဆၧအီၪကီၪ့ယီၩ အီၪလၧခးပယၩ့ဖၧၩ့နီၪ မွဲလၧကဘၪပြံၭထဲၩ့ထံၪခးယီၩအဂးအကၠီးႇ လၧထီဂၭဂီၩ့အခံၫ့ ယီၩ ပကဘၪမၩထၪ့ ဆၧပြံၭထဲၩ့ဒဲပကဘၪ မၩဂ့ၩထၪ့ဘၪထၪ့ထဲၩ့ဆၧအဂဲး” စံၭဝ့ၫနီၪလီၫႉ

လကၭဘၪ “ပမၩထၪ့ဆၧပြံၭထဲၩ့ဒဲ ဆၧမၩဂ့ၩထၪ့ဘၪထၪ့ထဲၩ့ဆၧအခၫ ပကဘၪအၪ့လဲၩ့ထၪ့ဝ့ၫဒၪ ဆၧအီၪ နံၫမံၩ့အဂဲးႇ ဆၧနံၫမံၩ့နီၪမွဲလၧအချိၫ့ဒဲ အဖၧၩ့အဂဲးႇ ဆၧအချိၫ့နီၪဘိၭ မွဲလၧၡၩခမျၧးလဖၪအဂး လိၪဝ့ၫဒၪဆၧမၩ ဆၧၩ့လဖၪ ပကဖ့ၪလၫ့အ့ၪဒဲ ဆၧအဖၧၩ့နီၪဘိၭ ပၧၩဒၪပၧၩပကဘၪအၪ့လဲၩ့ထၪ့ဂုပၥုၪ့ပၥၭအဂဲးႇ ပကမၩထၪ့ဆၧမၩ လဖၪယီၩအဂး အဆိၪထုၬလိၪဝ့ၫဒၪနီၪ မွဲလၧဆၧၥုၪ့အီၪၥၭအီၪအဂဲးႇ အ့ၪမွဲပၥုၪ့ပၥၭအီၪပကမိမၩမၬ ပမၩထၪ့ ဆၧမၩလဖၪယီၩကန့အဂဲးႇ အ့ၪပမိမၩပၥၭလအီၪဘၪနီၪ မွဲပမၩကဲၪထၪ့ဆၧန့နးမံၩ့အ့ၬအဂဲးႇ ပၥုၪ့ပၥၭအဂဲးက ဘၪဆီၪ့ဝ့ၫဒၪအဂဲး” ၥၫ့ခၫဖလော့ရင့်အောင်ကျော်ဉီး နီၪ ဆုးထဲၩ့စံၭဝ့ၫဒၪနီၪလီၫႉ

လၧဆၧအီၪကီၪ့ဎိၭလၩ့ဖၧၩ့ ကၩ့ကၩဎိၭလၩ့ဝ့ၫဒၪ လၧယၫ၃နံၪ့အထးဖၧၩ့ ခးပယၩ့မိဆၧအီၪကီၪ့ယီၩ လၧခး ပယၩ့ထံၪခးဖိၪၥံၪအဂး ကမၩထၪ့အ့ၪဝ့ၫဒၪဆၧဖံၭဆၧမၩအဂဲးလဖၪနီၪလီၫႉ ဆၧဖံၭဆၧမၩလဖၪနီၪ ဘၪထွ့ၫလၧ “ဆၧကိၪ့ဘၪကိၪ့ၥ့ၪအဂးႇ ဆၧဆီၪ့ဆၧချဲၫ့အဂးႇ ၡၩခမျၧးၥံၪလဖၪကအီၪဘၪလၧ ဆၧဒူၭဆၧယးဖၧၩ့အဂးႇ ၦလၧအ ဘၪလီၩ့မၩ ၦၡၩအဆၧမၩလဖၪ ဘဲၫကဖီၩ့ဖျ့ၭလၧဆၧအၪ့လံၩ့အၪ့လီၫ့ဒဲ ဆၧအၪ့ဆၫအၪ့အဂးႇ ၦဆူၩနဲၩဖိၪလဖၪ ဘဲၫအနးၥၭအဂဲးကဆီၪ့ထၪ့ဒဲ အတခ့ၭဖဝၭကဂ့ၩထၪ့အဂးႇ ဂၪ့ခိၪနဲၩ့ဎီၩ့ဘဲၫကဎံၪလၩထၪ့အဂးႇ မိဆၧအီၪကီၪ့ဖၧၩ့ ခရၧၫ့လဖၪဘဲၫဆုးဘုၭလိၬၥၭကန့ဂ့ၩဂ့ၩအဂး” ကမၩထၪ့ကၠၭဝ့ၫဘဲၫၥ့ၪလဲၪအဂဲး ဘၪဆၧကၩ့ကၩဎိၭလၩ့ဝ့ၫဒၪနီၪ လီၫႉ

လၧဆၧအီၪကီၪ့ဎိၭလၩ့ကဘျၩ့ယီၩအဖၧၩ့ လၧၥၫ့ခိၪဒိၪကၠၧၫ့ကၠၧၫ့ ၥၫ့မုၥၫ့ခၫႇ Bro, Sisterလဖၪဒဲ ၦလဖၪ ဂဲၫထၪ့ဝ့ၫဒၪ ကအီၪဖိၭဘိၭအဂၩ ၃၀အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ (၃၀ႉ၉ႉ၂၀၂၃)