၂၀၂၃ နံၪ့ စိန်ဗင်းဆင်းဒီပေါလ်ခရၧၫ့ဖိၪၥံၪ ဆၧအီၪကီၪ့ဎိၭလၩ့ဒဲ ၥဖၠးအီၪဝ့ၫဒၪအဂဲး

၂၀၂၃နံၪ့လၩမၫၡၭ၂၅ၥၫ့ဒဲ ထီၩ့စိၩလၧ၂၈ၥၫ့အထီနီၪ စိန်ဗင်းဆင်းဒီပေါလ်ခရၧၫ့ဖိၪၥံၪ ဆၧအီၪကီၪ့ဎိၭလၩ့ဒဲ ၥဖၠးအီၪဝ့ၫဒၪလၧဒိၩ့ပၥံၫ့ဆၧအီၪကီၪ့ မယၩ့ခၠီၩ့ ယ့ၫၡူၬအၥၭဆံၫ့ဎံၫၥရိၬလးဝၩ့ဖၧၩ့နီၪလီၫႉ

            ကဘျၩ့ယီၩ ဆၧအီၪကီၪ့ဎိၭလၩ့ဒဲ ၥဖၠးဖၧၩ့ ဘၪဆၧၥီၪ့လိၪဝ့ၫဒၪအဂဲးလဖၪနီၪ မွဲဝ့ၫဒၪ ခရၧၫ့အဖးဖီၩ့အဂဲးႇ ဗင်းဆင်းရှင်းၥုၪ့ၥၭ အဘၪထွ့ၫလၧနးၥၭအဂဲးႇ ကၭၥလံၬဆၧဘိၪ့ဆၧဘၩ ဆၧဆီၫ့မီၪ့ဂဲးဖျီၩ့အခၪ့ထံၭခၪ့ဎၧၩ့အဂဲးႇ ဗင်းဆင်းရှင်း အဆၧယံၩၡီၩ့အဂဲးႇ စိန်ဗင်းဆင်းဒီပေါလ်ခရၧၫ့ဖၧၩ့ ခိးတၩလၩ့ဘၪဆၧအဲၪဆၧကွံၩအဂဲးႇ ပနၫ့ဆါၥံၪပအုၩ့လၩ့ထၬဆၧအုၩ့လၩ့လဖၪကလၧၫ့ဎွ့ၩထၪ့အဂဲးႇ လ့ၩအီၪကွ့ၩစိၩလၧ ပၡၪ့ပယၬဖိၪၥံၪအအီၪအဂဲးႇ ဆၧၡၪ့ဆၧယၬဒဲအကၠီၪ့အဖျီၩ့ဘၪဘၪအဖၧၩ့ ဆၧအၪ့လဲၩထၪ့ၥၭအဂဲးႇ ကွန်းဖရင့်အၥၭအဂဲးႇ ကွန်းဖရင့်ဒဲ ခရၧၫ့ဖၧၩ့ ဆၧမၩဖိၬထွ့ၫလၧအတီၩအဘၪအဂဲး ဆၧလဖၪယီၩနီၪလီၫႉ

ၦလၧအလ့ၩခိၪလ့ၩနါဆၧအီၪကီၪ့ဎိၭလၩ့ယီၩဒဲၥဖၠးယီၩနီၪမွဲလၧ စိန်ဗင်းဆင်းဒီပေါလ်ခရၧၫ့ခိၪနါဒိၪ Alphonse ဦးကျော်မင်း ဒဲ အထံၩၥိၭလဖၪနီၪလီၫႉ ဆၧအီၪကီၪ့ဎိၭလၩ့ကဘျၩ့ယီၩအဖၧၩ့ ဝံးတခိၩ့ဆၧအီၪကီၪ့ႇ ဝံးမၫ့တၨၭဆၧအီၪကီၪ့ႇ ပြည်ဆၧအီၪကီၪ့ႇ ‌တောင်ငူ ဆၧအီၪကီၪ့ႇ ပုသိမ်ဆၧအီၪကီၪ့ႇ မြစ်ကြီးနားဆၧအီၪကီၪ့ႇ ဗန်းမော်ဆၧအီၪကီၪ့ႇ လားရှိုးဆၧအီၪကီၪ့ႇ မော်လမြိုင်ဆၧအီၪကီၪ့ ဒဲ  ဘားအံ ဆၧအီၪကီၪ့လဖၪဂဲၫထၪ့ကၠၭဝ့ၫဒၪဖိၭဘိၭ၁၃၉ဂၩနီၪလီၫႉ

“လၧခီၩ့အိၩစိန်ဗင်းဆင်းဒီပေါလ်ခရၧၫ့ အီၪလၧခးပယၩ့ဖၧၩ့၁၉၁ခရၧၫ့ ဘဲၫယီၩနီၪဘိၭ ၥၭၡါခရၧၫ့နီၪအီၪဝ့ၫဒၪ ၂၃၀ ခရၧၫ့ လၧအခီၩ့အိၩ စိန်ဗင်းဆင်းဒီပေါလ်ၥၭဘၪ့ခရၧၫ့နီၪအီၪအ့ၬ ထီးလၧယစူၪဖၧၩ့နီၪ လၧမိဆၧအီၪကီၪ့၁၂ဒီၪ့အဖၧၩ့ ယကၧၩ့ဖျိၪ့ထၪ့အခၫ ၥၭဘၪခရၧၫ့ အီၪထၪ့ဝ့ၫဒၪ ၁၂ ခရၧၫ့ဒဲ လးမိထုၪ့အဂးအီၪဝ့ၫဒၪ ၁ခရၧၫ့ ထီးလူၬအီၪ ၁၃ခရၧၫ့ယူၭလီၫႉ ဘဲၫယီၩ ၥၭဘၪ့ၥၭၡါ စိန်ဗင်းဆင်းဒီပေါလ်ခရၧၫ့ ထီးလူၬအီၪဝ့ၫဒၪလၧ ခးပယၩ့ဖၧၩ့ယီၩ ၂၄၃ခရၧၫ့ယူၭႉ စိန်ဗင်းဆင်းဒီပေါလ်ခရၧၫ့ယီၩနီၪ မွဲလီၩ့မၩဆၧၩ့ၦၡၪ့ၦယၬဖိၪလဖၪတၭ ပဘၪ လီၩ့ဎွါကျိၪစ့ၩဆၧမၩဘိၪ့လဖၪနီၪလီၫႉ ၦလၧအဖ့ၪလၫ့မၩဆၧၩ့ပၧၩဆၧမၩဘိၪ့နီၪမွဲလၧ Austriliaထံၪခးနီၪလီၫႉ စိန်ဗင်းဆင်းဒီပေါလ်နီၪ စံၭထၬဝ့ၫ ၦအၡၪ့အယၬဖိၪလဖၪနီၪ မွဲလၧ ၦအဂဲၫလၩ့ထိးဆၧနိၫ့ဆၧနၬလၧဂၪ့ခိၪချိၪ့ဖၧၩ့ ပကဆါယ့ၫၡူၬလီၫဘဲၫနီၪတၭ ပၧၩဝ့ၫပကဘၪ ယူၭယၪ့အဝ့ၫၥံၪ ပကဘၪမၩဆၧၩ့အဝ့ၫၥံၪအဂး ၦမူၩဒၩအီၪနီၪလီၫႉ ဆၧနီၪအကၠီၩ့လၧအဝ့ၫၥံၪလိၪလဖၪနီၪ ပမၩဆၧၩ့အဝ့ၫၥံၪနီၪလီၫႉ ကနၩ့နၩ့နီၪ အၪ့န့ဆၧမၩဆၧၩ့လၧပအီၪ ကနံၪ့နံၫနံၪ့လီၫဂီၩ့ အဝ့ၫၥံၪအဆၧၥၭမၧၫ့လ့ၩထၪ့လ့ၩထီၫလၫ့တၭ လဆုးထဲၩ့အၪ့န့ဘၪဆၧမၩဆၧၩ့ဒဲ လၧအဝ့ၫၥံၪအလးနီၪ အၪ့မၧၫ့ပၧၩ မၩဆၧၩ့ထဲၩ့ၦအၡၪ့အယၬဖိၪအဂူၫဂၩနီၪလီၫႉ အအၪထုၬနီၪဘိၭ ၦအအီၪလၧခိၪလီၩ့ဒၩ့ခိၪလဖၪအဂးနီၪ မွဲဆၧလ့ၩထၪ့လ့ၩထီၫအီၪအၪနီၪပဒၪဘၪလီၫႉ အ့ၪမွဲပကယိဆူၭကီၪ့ထီးလူၬနီၪဘိၭ ပဖ့ၪလၫ့မၩဆၧၩ့အဝ့ၫၥံၪကျိၪစ့ၩအကၠီၩ့ ၦၡၪ့ပယၬဖိၪ ၃ပိၩ့၁ပိၩ့နီၪ မွဲဖီၩ့ဖျ့ၭထၪ့ထဲၩ့လၧ ဆၧၡၪ့ဆၧယၬဖၧၩ့နီၪပဒၪဘၪလီၫႉ ဘၪထွ့ၫလၧ ပကၧၩ့ဖျိၪ့ထၪ့ထဲၩ့ ဗင်းဆင်းရှင်းၥၭဘၪ့ခရၧၫ့နီၪ ၥၭဘၪ့ လဖၪယီၩ မုကနံၩယီၩမွဲခိၪနါလဖၪ လကၭဘၪလၧခဲၫ့ကိ ကဆုးထဲၩ့မွဲဒၪ ခိၪနါလဖၪနီၪလီၫႉ ဂီၩ့နီၪ ၥၭဘၪ့ဒဲၥၭၡါလဖၪနီၪ မွဲဆၧဒၪ လမီၪ့ဎီၩ့ဘၪအီၪဝ့ၫဒၪ အနီၪအခၫ ဘၪမၩဆၧမၩကၠၧၫ့ကၠၧၫ့အခၫ ဆၧကၪဆၧဂဲၩအီၪထၪ့ ဆၧနီၪအကၠီၩ့ ပကၧၩ့ဖျိၪ့ထၪ့ထဲၩ့ၥၭဘၪ့ခရၧၫ့ယီၩ နီၪလီၫႉ ယၧၩဝ့ၫ ယၥီၪ့လံၬအကၠီၩ့ ယၥီၪ့အ့ၪအဝ့ၫၥံၪခိၪလၩဘွၩ Grammer ဒဲ ဘၪထွ့ၫလၧ ၥနိၫ့လဖၪအဂဲး အကၠီၩ့” ခးပယၩ့ ထၧၫ့ဘံၪ့ယၫ စိန်ဗင်းဆင်းဒီပေါလ်ခရၧၫ့ခိၪနါဒိၪ Alphonse ဦးကျော်မင်း နီၪစံၭဝ့ၫဒၪလီၫႉ

ဂီၩ့နီၪအီၪလၧ ပၩ့တနီၫ နးထရေဇားနီၪစံၭဘၪဝ့ၫ “ပပၩ့တနီၫ စိန်ဗင်းဆင်းဒီပေါလ်ခရၧၫ့နီၪ ပအၪ့ဎွ့ၩအၪ့ဆၫချီၫလဖၪဂီၩ့ ပမၩဆၧၩ့ထဲၩ့တဝၫ့ဖၧၩ့ၦၡၪ့ၦယၬဖိၪၥံၪနီၪလီၫႉ တဝၫ့ဖၧၩ့ၦလၧဘၪဖိၭလိၭအၪ့ဆၫချီၫလဖၪအအီၪပဎွ့ၩထဲၩ့အကၠီၩ့ အဝ့ၫၥံၪယီၩ ဘၪလ့ၩထၪ့ အၪ့ဆၫဝ့ၫလၧဝံးလိၫလၧၩ့အ့ၬ ပၧၩဝ့ၫ ပအၪ့ဎွ့ၩထဲၩ့လၧအဝ့ၫၥံၪအအီၪနီၪ ပဖ့ၪလၫ့အ့ၪအဝ့ၫၥံၪအနံၪ့ မီၪ့ဎီၩ့လ့ၩအၪ့ဆၫဝ့ၫ လၧဝံးအိၩအကၠီၩ့ အဝ့ၫၥံၪအဂး အဂးအီၪထးအၪႇ ပဎွ့ၩထၬချီၫလဖၪနီၪ ပလီၩ့အၪ့ဆၫထဲၩ့ ပအၪ့ဆၫထဲၩ့န့ အမျၭလဖၪနီၪ ပမၩဆၧၩ့ထဲၩ့ ၦၡၪ့ၦယၬဖိၪၥံၪ နီၪလီၫႉ ၦလၧအဘၪထၪ့ဆၧဆၫဂံၪ့လဖၪနီၪ ပၥံၭလဖၪပလ့ၩအီၪကွ့ၩဂီၩ့ ပဖ့ၪလၫ့မၩဆၧၩ့အ့ၪၥံၪ့ဎွံၪဎွ့ၩႇ လၧတဝၫ့နဲၩ့ဎီၩ့ ၦလၧအဘၪအီၪလၩ့ ထးလဂၩဎးလဖၪနီၪ ပဖ့ၪလၫ့မၩဆၧၩ့အ့ၪ ဆၧအၪ့ဆၧအီၩလဖၪဒဲ ၥံၪ့ဎွံၪဖၭစၧၩ့လဖၪနီၪလီၫႉ ဂံၪ့ဒီၪ၅ဒီၪ့နီၪဘိၭ ပထုၭလၫ့ထၬအ့ၪ စ့ၩဂီၩ့ ပအၪ့မၧၫ့မၩချီၫအဆၧမၩနီၪလီၫႉ အဝ့ၫၥံၪယီၩဎွ့ၩ ချီၫအလီးလဖၪဂီၩ့ မၩကဲၪထၪ့ထဲၩ့ ချီၫအဖျ့ၪဂီၩ့ အၪ့ဆၫလၩ့ဝ့ၫအခၫ အဝ့ၫၥံၪအဂး  အဂးအီၪထးအၪအကၠီၩ့ ဂဲၫစံၭခိးစံၭတၩထဲၩ့ပၧၩဘနီၪမွဲအီၪဆ့ႉ”အဂဲး စံၭဝ့ၫဒၪလီၫႉ

လကၭဒံၭဘၪ ဟားခါးဆၧအီၪကီၪ့ဒဲဖလမ်းဆၧအီၪကီၪ့ စိန်ဗင်းဆင်းဒီပေါလ်ခရၧၫ့ခိၪနါဒိၪ မွဲဝ့ၫ ”မမေရီဂျာနီၪ စံၭဝ့ၫဒၪ “အကၧၩ့ဒိၪထုၬ ပလီၩ့မၩဆၧၩ့ၦၡၩအၡၪ့အယၬဖိၪၥံၪနီၪ မွဲလၧဆၫအၪ့ဆၫအီၩဒဲ ဆၧကီၩ့ဆၧၥိၭနီၪလီၫႉ ကနံၩယီၩပဂဲၫထၪ့ၥဖၠးယီၩ ပန့ထဲၩ့ ဆၧကိၪ့ၥ့ၪကိၪ့ဘၪဒဲဂဲးဘၭအၪမၬနီၪလီၫႉ ပၥ့ၪယၫထဲၩ့ဘၪပခရၧၫ့အဂဲးအဖးလၩ့ထံးလၩ့ဆ့ၭ ပကဘၪအီၪက့ၪထၬ ပၥၭဘဲၫ စိန်ဗင်းဆင်း ဒီပေါလ် အၥုၪ့အၥၭ ဒဲ ပကဘၪအီၪ ဘဲၫၥိၭထၧၫ့ဖုဝဲၥိၭအဂဲး ပၥ့ၪယၫထၪ့ဘၪနီၪလီၫႉ ဘိၪ့ခိၪၥၫ့ခၫလဖၪ အဆၧလီၩလၩ့လၬလၩ့လဖၪဆ့ မွဲပန့ဘၪနးၥၭဂဲးဘၭအၪမၬနီၪလီၫႉ လၧခၠၩ့ဆၨၩခးဒီၪ့ဖၧၩ့နီၪ အီၪန့ၫၦဎြံၬဖိၪလဖၪလီၫ ကၭၥလံၬဒဲ ဎြံၬဆၧဘိၪ့ဆၧဘၩဂူၫဂၩအီၪဝ့ၫဒၪနီၪလီၫႉ လါနၫ့ပလီၩ့ဖ့ၪလၫ့ဆၧမၩဆၧၩ့အခၫနီၪ ပဖ့ၪလၫ့န့ၫပကၭၥလံၬလီၫ လမွဲဘၪတၭ ပဖ့ၪလၫ့ထဲးဆၧဘိၪ့ဆၧဘၩအဂူၫဂၩဆ့နီၪလီၫႉ အၪ့လအီၪ ဘၪ ၥိၭကီၩ့လအီၪဘၪဂံၪ့ဒီၪ့ဖိၪၥံၪ ၉၀၀အဂးပမၩဆၧၩ့န့ဝ့ၫအဂဲး” မမေရီဂျာနီၪစံၭဘၪဝ့ၫလီၫႉ

စိန်ဗင်းဆင်းဒီပေါလ်ခရၧၫ့ယီၩနီၪ မွဲခရၧၫ့လၧ အလီၩ့မၩဆၧၩ့ ၦၡၪ့ၦယၬဖိၪလဖၪနီၪလီၫႉ ဆၧအီၪကီၪ့ဎိၭလၩ့ဒဲ ၥဖၠးနီၪဂီၩ့ခွံၬဝ့ၫဒၪ လၧ လၩမၫၡၭ၂၈ၥၫ့ မုဎဲးလၩ့အခံၫ့နီၪလီၫႉ

နးအဲၪဖီၫဘွၩ