၂ဘျၩ့လဘျၩ့ဂၪ့ခိၪဆၧတုၩ့ထၪ့တုၩ့လၩ့အထီ ၥၫ့ခၫလၧအမၩဖီၩ့ဖျ့ၭၡၩအၪဂၩအၥၭလၧ ဆၧၥံၪဖၧၩ့လဂၩနီၪ ဆၧဘိၭဘၪၥ့ၪယၫထၪ့လၧ ၦဘၪဆၧယူၭယၪ့လဂၩအလးအလၩအဂဲး

၂ဘျၩ့လဘျၩ့ဂၪ့ခိၪဆၧတုၩ့ထၪ့တုၩ့လၩ့အထီ ၥၫ့ခၫလၧအမၩဖီၩ့ဖျ့ၭၡၩအၪဂၩအၥၭလၧ   ဆၧၥံၪဖၧၩ့လဂၩနီၪ ဆၧဘိၭဘၪၥ့ၪယၫထၪ့လၧ ၦဘၪဆၧယူၭယၪ့လဂၩအလးအလၩအဂဲး

နးအဲၪဖီၫဘွၩ မိကဲၭ၁လံၬဆၧအီၪကီၪ့ယီၩနီၪ ကထံၭလၫ့ၦဆံၫ့ဎံၫကဂၩအဂး အဆၫ့အီၪဝ့ၫ (၄)ဆၫ့နီၪလီၫႉ အဆိၪထုၬအဆၫ့နီၪ ၦကဲၪထၪ့ကဆါယွၩအခ့ၫအၡၩအဆၫ့ႇ နံၫဆၫ့လဆၫ့နီၪ ၦအဘၪ ဆၧယူၭယၪ့အဆၫ့ႇ ၃ဆၫ့လဆၫ့နီၪၦအဂ့ၩအဘွၩအဆၫ့ဒဲ ၄ဆၫ့လဆၫ့နီၪ ၦဆံၫ့ဎံၫ အဆၫ့နီၪလီၫႉ

လၧလယံၭလမီးဒံၭဘၪအထီအိၩ ၦလၧအဘၪထိးဘိၭဘၪၥ့ၪယၫလၩ့အ၁ၭ လၧၦဘၪဆၧ ယူၭယၪ့အဆၫ့လဂၩနီၪ မွဲဝ့ၫဒၪလၧ ဘိၪ့ခိၪၥၫ့ခၫ Bernnard of the Mother of Beautiful နီၪ လီၫႉ အဝ့ၫယီၩနီၪ လၧ၂ဘျၩ့လဘျၩ့ဂၪ့ခိၪဆၧတုၩ့ထၪ့တုၩ့လၩ့အဖၧၩ့ ၦလၧအထိးဆၧၫ့န့ဘၪ ၦဒူၩပယၫ့လဖၪအဖၧၩ့ မွဲၦလဂၩနီၪလီၫႉ

အဝ့ၫမံၪမၫထဲၩ့လၧကဆါဎြံၬအခံၫ့နီၪ အၥၭအီၪဝ့ၫဒၪ(၃၀)ဒံၭနီၪလီၫႉ အဝ့ၫနီၪမွဲလၧ The Passion ခရၧၫ့ ဘိၪ့ခိၪၥၫ့ခၫကဂၩနီၪလီၫႉ ၦၡၩကထံၭလၫ့အဝ့ၫလၧ ၦဆံၫ့ဎံၫလဂၩအလးအလၩ ကန့အဂးနီၪ ၦၡၩမၩခွါယိထဲၩ့အဝ့ၫအဂဲးအဖးနီၪလီၫႉ လၧဆၧအဂဲးအဖးလဖၪအဖၧၩ့ ဘိၪ့ခိၪ ၥၫ့ခၫအယီၩနီၪ ၂ဘျၩ့လဘျၩ့ဂၪ့ခိၪထၧၫ့ဘံၪ့ယၫဆၧတုၩ့ထၪ့တုၩ့လၩ့အထီ မွဲလၧကျီၩ့ၥၪႇယၩ့ဖီးၥၪ ထဲၩ့လၩ့ထ့ၬအကၠီၩ့ ဆၧၥုၪ့ဆၧဒီၩ့လဖၪလၩ့ဎီးဂီၩ့ လၧဆၧၥုၪ့ဆၧဒီၩ့လဖၪအကျၩ ၦအလၩ့ဘၧၩ့လဖၪ နီၪ အဝ့ၫယီၩလၩ့ဖၧးလၫ့ထဲၩ့လၧ အစူၪပျီၩပျ့ၭအဂဲးႇ ၦအဘၪၥံၪလဖၪနီၪဆ့ အဝ့ၫယီၩ လုထၪ့အ့ၪ ဝ့ၫ မံဆၩဆၧလုထၪ့ဒဲ ဘၧၩ့လၩ့အ့ၪဝ့ၫဂ့ၩဂ့ၩဘၪဘၪအဂဲးႇ ၦလၥံၫဘၪဒဲဘၪထံၭဘၪဆၫထၬ လဖၪနီၪ အဝ့ၫယီၩလ့ၩယိၭၥိၫ့ဝ့ၫလၧ ဆၧဆၫဂံၪ့အဂဲးႇ လကၭဒံၭဘၪ လၧအဝ့ၫအၥရိၬလးဝၩ့နဲၩ့ ထံၭဆၧဆၫဂံၪ့လဖၪ ဘၪထိးဆၧမၩဖီးဖၭအထီ အဝ့ၫယီၩမၩထၪ့ထဲၩ့အကၠီးနီၪ ဘဲၫၥိၭဆၧဆၫဂံၪ့ဂီၩ့   ဘၠၩ့ထဲၩ့ဆၧဆၫလဖၪဒဲ ယိထဲၩ့ခွါထဲၩ့ဝ့ၫ ဂ့ၩဘၪစဲၪ့အဂဲး ဒၪဘၪဝ့ၫနီၪလီၫႉ

အဝ့ၫယီၩ ကိၭနံၩဒ့ၭနီၪ မွဲကွ့ၭလံၬအဖၨၪခိၬဖိၪလဖၪဂီၩ့ လ့ၩအီၪက့ၪထၬဝ့ၫလၧ ကဆါယွၩ အဆၧလုဂံၪ့အခၪ့ထံၭနီၪလီၫႉ လၩ့ဆၫ့ဝ့ၫလမံၩ့နီၪ ၦလၧအလ့ၩဒၪဘၪ အဝ့ၫအလံၬလဖၪအဂး မီၪ့ဎီၩ့ဒၪအဝ့ၫယီၩ ကွ့ၭလၩ့ထၬအ့ၪဝ့ၫအၥိၭ ဆၧဘၪဆုးအီၪဝ့ၫလၧ ၦအဒၪလံၬလဖၪနီၪလီၫႉ အဝ့ၫယီၩနီၪ လၧပိၫလၫ့ထံၫခး Passionists’ဘိၪ့ခိၪၥၫ့ခၫခရၧၫ့ဖၧၩ့ မွဲဝ့ၫလၧအဆိၪထုၬ ၦဆံၫ့ဎံၫ လဂၩဂီၩ့ အဝ့ၫၥံၪအခရၧၫ့ဖၧၩ့မွဲဝ့ၫဒံၭလၧ(၂၄)ဂၩလဂၩၦဘၪဆၧယူၭယၪ့နီၪလီၫႉ လၧPassionists’  ဘိၪ့ခိၪၥၫ့ခၫခရၧၫ့ဖၧၩ့ ၦကဲၪထၪ့ၦဆံၫ့ဎံၫအီၪဝ့ၫ(၇)ဂၩႇ ၦဘၪဆၧယူၭယၪ့အီၪဝ့ၫ(၂၄)ဂၩဒဲ ၦကဲၪ ထၪ့ကဆါယွၩအခ့ၫအၡၩအီၪဝ့ၫ(၉)ဂၩယူၭအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ