အ့ၪယၫဝတံၫခးဒီၪ့ ထံၫထၪကျိၩ့ ဖျိၩ့ၥၭဘၪ့လဖၪ အဆၧဒၪလၩ့ဎိၭ

         နံၪ့၂၀၂၂နံၪ့ လၩစဲၭတံၫ့ဘၧၫ၁၉ၥၫ့နီၪ အ့ၫယၫဝတံၫခးဒီၪ့ ထံၫထၪကျိၩ့ဖျိၩ့ၥၭဘၪ့လဖၪ အဆၧဒၪဎိၭလၩ့အီၪဝ့ၫဒၪလၧ ဒိၩ့ပၥံၫ့ စံၫ့ပံတၧၫ့ကၥံၫဒရဲၫၥရိၬလးဝၩ့နီၪလီၫႉ

       လၧဆၧဒၪလၩ့ဎိၭ ကဘျၩ့ယီၩအဖၧၩ့ ၥၭဘၪ့လၧအဂဲၫထၪ့ဝ့ၫဒၪလဖၪနီၪ အီၪလၧ အံၫ့မဲႇ ကၠီၩ့ကိၩ့ႇ ညီၫ့တိၩ့ႇ ပၩ့တနီၫႇ ဝံးမီၠၩ့မၠၭ ဒဲ လၭပိၭတၫ လဖၪနီၪလီၫႉ  ဆၧအီၪ့ကီၪ့ယီၩနီၪစၭထၪ့ဝ့ၫဒၪလၧ အ့ၫယၫဝတံၫခးဒီၪ့ ၦဖျိၩ့ဆၨၩလံၬလဲဒဲ ဆၧဆၧး ဎံၪဆၧးလၩခမံတံၫခိၪနါဒိၪ Fr.Henry မၩ့အဲၪချံၫ့အဆၧချဲၩ့ဝဲထၪ့နီၪလီၫႉ

        လၧဆၧမၩလိၪလးဖၧၩ့ ပၥီၪ့လံၬဖျိၩ့လဖၪယီၩလန့ဒံၭဘၪအခံၫ့အိၩ ပဘၪလီၩ့ၥီၪ့လံၬဖျိၩ့လၧ ၥံၪ့ခၪ့ထံၭ ဝၪခၪ့ထံၭႇ လၧၥၫ့ ခၫကၠီး လါနၫ့ဘဲၫယီၩနီၪ ပၥီၪ့ထၪ့ဖျိၩ့လံၬလဲလၧ ဆၧမၩလိၪလးဖၧၩ့န့ယူၭႉ ကနံၪ့နံၫနံၪ့အထးဖၧၩ့ယီၩနီၪ မွဲလၧထံၪဂဲးခးဂဲး အကၠီၩ့ ဆၧကၪဆၧဂဲၩနီၪအီၪဝ့ၫဒၪႉ တခၩကကဲၪဆၧနးမံၩ့  ပဒၪဘၪနၥံၪလၧဆၨၩဆၬအဂး အၥုၪ့အီၪၥၭအီၪအကၠီၩ့ ယစံၭခိး စံၭတၩဘၪနၥံၪအၪမၬအဂဲး Fr.Henry မၩ့အဲၪချံၫ့ စံၭဝ့ၫဒၪနီၪလီၫႉ

       လၧအံၩ့မဲဖၧၩ့ ၦၡၩလီၩ့ၥီၪ့ လံၬဖျိၩ့ဆရၫႇမုၪလနၩ့နၩ့နီၪ ဘၪဒၪဆၧကၪဆၧဂဲၩအၪမၬအဂဲးႇ ကၠီးခိၪကနၩ့နၩ့နီၪ ကဘၪထိး ၥၭအ့ၪဆရၫလဖၪၥီၪ့လံၬတၡါအဂဲးမၬ လမိမၩအ့ၪဘၪဝ့ၫအဂဲး နးဖၠူၫဖၠူၫဝ့ၩစံၭဘၪဝ့ၫနီၪလီၫႉ

        ကၠီၩ့ကိၩ့ဝံးဒီၪ့ဖၧၩ့နီၪ လၧဆၧကၪဆၧဂဲၩအကျၩ ကိၭနံၪ့ဒ့ၭမၩကဲၪထၪ့ ၦဖျိၩ့နံၪ့ထၪ့ၥၫ့အဂဲးႇ လၧအဖီၩ့ခွံၬကနံၪ့နံၫနံၪ့အိၩနီၪ မွဲလၧထံၪဂဲးခးဂဲးအကၠီၩ့ မၩကဲၪထၪ့ဝ့ၫလကဲၪလၧၩ့ဘၪအဂဲးႇ ကနံၪ့ယီၩနီၪ ကမၩကဲၪထၪ့ထဲၩ့ ဖျိၩ့နံၪ့ထၪ့ၥၫ့ထၧၫ့အဘၭအဂဲးႇ လၧဝံးဒီၪ့ဖၧၩ့ ဖျိၩ့အၥုၪ့ၥၭလၩ့မါဝ့ၫဒၪတဝၫ့လဖၪအဖၧၩ့ လ့ၩမၩထၪ့ဝ့ၫဒၪ လၩ့ခူၭခဲးစူၪဂီၩ့ မၩအီၪထၪ့ထဲၩ့ဖျိၩ့ၥုၭၥၭအဂဲးႇ လၧၦ ဖျိၩ့အမံၩ့အမ့ၬယၫနီၪ နး စ မၩ့ ဂါစီၩ နီၫ  လဖၪဘၪထိးမၩလၩ့မါခွံၬၥၭအီၪထၪ့ဝ့ၫဒၪအကၠီၩ့ ပကဘၪမၩထၪ့ဖျီၪထဲၩ့အဂဲးႇ ၦဖျိၩ့ဆၨၩဖိၪၥံၪအဆၧအီၪမၧၫ့ၥၭ ဘဲၫကလ့ၩထၪ့လ့ၩထီၫအၥိၭ ပကဝၩ့မၩဆၧၩ့ကၠၭဘဲၫၥ့ၪလဲၪႇ ၦဖျိၩ့ဆၨၩဖိၪၥံၪ အဆၧၥ့ၪယၫ နၪၥ့ၪဘဲၫကလ့ၩထၪ့လ့ၩထီၫအဂးဆ့ မွဲအရ့ၩဒိၪဝ့ၫဒၪအဂဲးႇ မွဲလၧထံၪခးအဂဲးယီၩနီၪ ဆၧကဒၨၭလၩ့ထဲၩ့ ဖျိၩ့ဆၨၩလဖၪ ကဂဲၫအီၪထၪ့ထဲၩ့ဒံၭဧၪနီၪ ပကဘၪထိၪတွၭထၬအဂဲး ကၠီၩ့ကိၩ့ဖျိၩ့ၥၭဘၪ့ ၦမူၩဒၩအီၪၥၭဘၪ့ခွၫလဂၩ စံၭဝ့ၫဒၪနီၪလီၫႉ

           လၧညီၫ့တိၩ့ဝံးဒီၪ့ဖၧၩ့ အဖီၩ့ခွံၬ၂၀၁၅နံၪ့ဒၪအိၩ ဂဲၫထဲၩ့ဖိၬလိၬထၪ့ Karen Youth Development Association (KYDA)ခရၧၫ့အဂဲးႇ ခရၧၫ့ယီၩနီၪ ဂဲၫထဲၩ့မၩကဲၪထၪ့အ့ၪၥၭဘၪ့အဂဲးဘၭၥဖၠးလဖၪအဂဲးႇ ဖိၬလိၬထၪ့ ၦဖျိၩ့ဆၨၩလံၬလဲဒဲ ဆၧဆၧးဎံၪဆၧးလၩခရၧၫ့အဂဲးႇ လၧညီၫ့တိၩ့ဝံးဒီၪ့အဖၧၩ့ ၦလီၩ့ၥီၪ့လံၬဖျိၩ့ဆရၫႇမုၪလဖၪထီးလူၬအီၪဝ့ၫဒၪအဂၩ ၉၀ဘျဲၪအဂဲးႇ လၩကဘံၪ့ကဘျၩ့မၩထၪ့ဆၧအီၪကီၪ့လၧဆရၫႇမုၪၥံၪအဂဲး ညီၫ့တိၩ့ဖျိၩ့ၥၭဘၪ့ခွၫလဂၩနီၪ စံၭဝ့ၫဒၪနီၪလီၫႉ

        လၧပၩ့တနီၫဝံးဒီၪ့ဖၧၩ့ Pantanaw Karen Youth (PKY)ခရၧၫ့အဖၧၩ့ ၥၭၡါၥံၪအဆၧဖ့ၪကိၪ့ဖ့ၪတဲၩ့အဖၧၩ့ ၥၭဘၪ့လဖၪနီၪ မၩကဲၪထၪ့ၦဖျိၩ့ဆၨၩအဘိၪ့မုနံၩလၩ့ဆၫ့လဖၪအဂဲးႇ လၧကိၫဘံဆၧဆၫကဲၪထၪ့အထီအိၩဆ့ ဆၧဆီၪ့ဆၧချဲၫ့အဂး လိၪဝ့ၫဒၪ ဆၧမၩဆၧၩ့လဖၪနီၪ ၥၭဘၪ့လဖၪလီၩ့မၩဆၧၩ့ဝ့ၫဒၪအဂဲးႇ ကနံၪ့ယီၩလၩခူၭခဲးစူၪဆ့ မၩကဲၪထၪ့ဝ့ၫဒၪအဂဲးႇ လၧပၩ့တနီၫဝံးဒီၪ့ အဖၧၩ့ ဆရၫႇမုၪ အၥီၪ့လံၬဖျိၩ့အီၪဝ့ၫဒၪ အဂၩ၂၈၆ဂၩအဂဲးႇ ထီလၧယၫဆၧဎိၭထံၪဎိၭဒီၪနီၪဘိၭ ကစူၭထီးလၧပဂဲးပဘၭဒၪပၧၩ အဂး အီၪဝ့ၫဒၪအဂဲး ၦမူၩဒၩအီၪဝ့ၫဒၪၦလဂၩနီၪစံၭဘၪဝ့ၫလီၫႉ

       ဂီၩ့နီၪ Ayeyarwady Karen Youth (AKY)ခရၧၫ့ ၦမူၩဒၩအီၪလဂၩနီၪလီၩပျၩ့ဖ့ၪနဲၪဘၪ ခရၧၫ့အဆၧဖံၭဆၧမၩလဖၪႇ ခရၧၫ့အဆၧထိစိၩလဖၪနီၪလီၫႉ အ့ၫယၫဝတံၫၦဖျိၩ့ၥၭဘၪ့လဖၪယီၩနီၪ လံၬလဲဒဲဆၧဆၧးဎံၪဆၧးလၩကလ့ၩထၪ့လ့ၩထီၫအဂး လၧအဝ့ၫၥံၪမၩဝ့ၫန့မၩဝ့ၫနၧၩ့အလးနီၪ ကျ့ၭစၨၭမၩထၪ့ကၠၭဝ့ၫဒၪအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

     နးအဲၪဖီၫဘွၩ

      

Add new comment

7 + 5 =