အီဂျစ်ဆၧစ့ၩရၫ့လးနီၪ ခွံၬလၩ့ ကော့ပ်တစ် ဎြံၬဖိၪလဂၩ လၧဖီၩ့ဖၧၩ့ ၃နံၪ့အဂဲး

ခးအီဂျစ်ဆၧစ့ၩရၫ့လးနီၪ ခွံၬလၩ့ ကော့ပ်တစ် ဎြံၬဖိၪလဂၩ လၧဖီၩ့ဖၧၩ့ ၃နံၪ့အဂဲး ပၥ့ၪယၫ ဘၪနီၪလီၫႉ ၦလၧအဘၪ ထိးခွံၬလၩ့ၥၭလၧဖီၩ့ဖၧၩ့နီၪ အမံၩ့မွဲဝ့ၫဒၪလၧ Patrick George Zaki နီၪလီၫႉ ဘၪခွံၬလၩ့အဝ့ၫလၧဖီၩ့ဖၧၩ့နီၪ ဘၪန့လဲၪစွါဘဲၫ လၧအဖီၩ့ခွံၬ၂၀၁၉နံၪ့အထီအိၩ အဝ့ၫယီၩကွ့ၭထံၭလၫ့ဘၪလံၬလဘံၪ့ လၧDaraj ဆိၫၡဲၫမံၫဒံၫယၫ အဖၫ့ခိၪ အကၠီၩ့နီၪလီၫႉ

 အဝ့ၫယီၩ လၧလံၬဖၧၩ့နီၪ ကွ့ၭထၬဝ့ၫဒၪ ကော့ပ်တစ်ၦဎြံၬဖိၪခရၧၫ့လဖၪ ဘၪထိးလုၫခၫ့ဖၬအခွးအယၬ ဒဲ  ဘၪထိး စၪၥၭအဂဲး လဖၪနီၪလီၫႉ မွဲလၧအဝ့ၫအလံၬယီၩအကၠီၩ့ လၧအဖီၩ့ခွံၬလၩယူၫလဲၫ့၁၈ၥၫ့အထီအိၩ ၦၡၩခွံၬလၩ့ခွံၬအဝ့ၫ လၧဖီၩ့ ဖၧၩ့နီၪလီၫႉ အဝ့ၫယီၩနီၪ ဂဲၫထဲၩ့ထၪ့ထၬဆၧမၩလိၪလၧ အီတလီထံၪခး ဘိုလိုးညှာဘျၪ့ကိၪ့ဒိၪ နီၪလီၫႉ လၧအဖီၩ့ခွံၬ၃နံၪ့အိၩ ၦၡၩဖီၪ့ချူၭန့အဝ့ၫလၧ အီဂျစ်ထံၪခး ကိုင်ရိုနီၪလီၫႉ အဝ့ၫယီၩဘၪထိးလီၩန့အၥၭလၧ လီၩ့အၪ့နၩ့လၩ့ ဆၧပရၧၫ့အဘၪမၪ လဖၪ ထံၪခးဖၧၩ့ဂီၩ့ မၩတုၩ့ထၪ့တုၩ့လၩ့ထံၪခးဖိၪၥံၪနီၪလီၫႉ

လချုၭၦၡၩခွံၬလၩ့ဒံၭဘၪအဝ့ၫလၧဖီၩ့ဖၧၩ့အထီ ၦၡၩဖီၪ့ထၬအဝ့ၫ မုနွ့ၫ၂၂နွ့ၫဖၧၩ့နီၪ အဝ့ၫယီၩ ဘၪထိးမၩနၧၩ့မၩစၪ အၥၭ ကဖျဲၩ့ဎးနီၪလီၫႉ ဘၪထွ့ၫလၧ လၩယူၫလဲၫ့၁၈ၥၫ့ ၦၡၩခွံၬလၩ့အဝ့ၫလၧဖီၩ့ဖၧၩ့အကၠီၩ့ အီၪလၧထံၪခးဖၧၩ့ ၡၩခရၧၫ့လဖၪဒဲ ထံၪယဲၩ့ခးယဲၩ့ ၡၩအခွးအယၬခရၧၫ့လဖၪနီၪ ဆၧစ့ၩရၫ့တီၩဆၧယီၩ ဆၧတီၩလီၩ့လအီၪဘၪအဂဲး စံၭကၠၭဝ့ၫဒၪနီၪလီၫႉ ခရၧၫ့ လဖၪထုၬထၪ့ဘိၭဘၪၥ့ၪယၫထၬလံၬဖၧၩ့  ဖျါလၩ့ထဲၩ့ Patrick  Zaki အဂဲးႇ ဆၧလီၩန့ချဲၩ့န့လဖၪနီၪ ထူၬၥံၫခွံၬထဲၩ့အဂဲး ဒဲ ဆၧပဒၩ့ထၬအဝ့ၫ ၥနိၫ့လဖၪနီၪဆ့ မၩလၩ့ၡၩထဲၩ့အဂဲး ကွ့ၭလၩ့ထၬဝ့ၫဒၪအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

 နးအဲၪဖီၫဘွၩ