အင်ဒိုနီးရှား ကဲၬၥလံၬၥၭဘၪ့မုၪလဂၩ ဒိၭန့ဘၪ ၦမုၪၥံၪအခံးဂ့ၩဂၩ့ဘၪခိၪဖၭၥရဖူၩအဂဲး

အီၪလၧအင်ဒိုနီးရှား Sulawesi လံၩခံၫကကဲၩ့ခီၫ Manado ဆၧအီၪကီၪ့ဖၧၩ့ ကဲၬၥလံၬၥၭဘၪ့မုၪလဂၩနီၪ နုၬလၩ့ပြၧၩ့ ၦမုၪၥံၪအခံးဂၩ့ဂ့ၩဘၪဆၧပြၧၩ့ဂီၩ့ ဒိၭန့ထၪ့ဘၪ ခိၪဖၭၥရဖူၩနီၪလီၫႉ အဝ့ၫယီၩနီၪအၥၭအီၪဝ့ၫဒၪ ၂၂နံၪ့ဂီၩ့ အမံၩ့မွဲဝ့ၫလၧ Audrey Vanessa Susilo နီၪလီၫႉ

လၧဆၧပြၧၩ့ဖၧၩ့နီၪၦမုၪၥံၪထီးလူၬ နုၬလၩ့ပြၧၩ့ဝ့ၫဒၪ၃၆ဂၩဒဲ ဆၧပြၧၩ့နီၪ ၦၡၩမၩဝ့ၫဒၪလၧလၩစဲၭတံၫ့ဘၧၫ ၁၅ ၥၫ့အိၩနီၪလီၫႉ လၧၦမုၪ၃၆ဂၩအကျၩ Auderyယီၩန့ဘၪဆၧအနၧၩ့နီၪလီၫႉ Audery ယီၩနီၪ ဖ့ၪလၫ့လၩ့အၥၭလၧ နၫ့ ဆါၥၧၫ့ဂၩယွၩလဂၩ ဆၧအီၪကီၪ့လးဝၩ့ဖၧၩ့ဂီၩ့ မွဲဒံၭလၧ ကဲၬၥလံၬဆၧအီၪကီၪ့ၥၭမုဆံၫ့ဎံၫအခရၧၫ့ဖိၪကဂၩဒံၭနီၪလီၫႉ

“ကဲၬၥလံၬဖိၪၥံၪအီၪလၧထံၪခးဖၧၩ့ယီၩၡၩဝ့ၫဒၪလါနၫ့ အ့ၪမွဲလၧဆၧၥ့ၪဆၧဘၪခီၫနီၪ နုၬလၩ့ပြၧၩ့ၦၡၩန့ဝ့ၫ အဂဲးႇ ဆၧနၧၩ့အယီၩနီၪ လၧထံၪခးဂးမွဲဂ့ၩ လၧဆၧအီၪကီၪ့အဂးမွဲဂ့ၩ အဝ့ၫဖ့ၪလၫ့န့ ဆၧအုၩ့လၩ့အီၪလၩ့ အဂ့ၩထုၬ ကမံၩ့အဂဲးႇ Mother Teresa အဆၧစံၭဝဲၩအီၪထၬဝ့ၫ ပဝ့ၫၥံၪကိၭဂၩဒ့ၭနီၪ ပမၩထၪ့ဆၧဎိၩဎိၩဒိၪဒိၪလန့ဘၪလီၫႉ လါနၫ့ ဆၧမၩအဆံၭခိၬဖိၪလဖၪနီၪ ပမၩထၪ့လၧပၥၭဎိၩဎိၩဒိၪဒိၪဖၧၩ့န့ဝ့ၫလီၫႉ ဆၧချဲၩ့ယီၩ အဝ့ၫအဂးမွဲကဲၪထၪ့ ဂဲးဘၭအဂဲး” လၧအဝ့ၫအၪ့န့ၥရဖူၩအခၫနီၪ Audery ယီၩစံၭဘၪလီၫႉ

အဝ့ၫယီၩနီၪ မွဲအဲၪကွံၩဂၪ့ခိၪနဲၩ့ဎီၩ့အၪမၬအဂဲးႇ လၧၥရိၬဖၧၩ့ဆ့ မွဲဖ့ၪဆၧမၩဆၧၩ့ကိၭမံၩ့အဂဲးႇ လၧအဝ့ၫ အဆၧၥၭမၧၫ့ဖၧၩ့ အဝ့ၫယီၩန့ထၬဆၧအနၧၩ့အီၪဝ့ၫဒၪအၪမံၩ့အကျၩ န့ဘၪၥရဖူၩယီၩဆ့ မွဲပၫထဲးဎုၬဝ့ၫဒၪကမံၩ့ ဆ့လီၫႉ အဝ့ၫယီၩ ကလ့ၩထၪ့ဆၧမၩလိၪလၧ Australia, Monashဘျၪ့ကိၪ့ဒိၪအဂးဆ့ ဒိၭန့ဘၪ ဆၧမၩလိၪစ့ၩ ဆၧမၩဆၧၩ့ (ပညာသင်ထောက်ပံ့ကြေး)အလၧၫ့အဎွ့ၩနီၪလီၫႉ အဝ့ၫမိဖါလဖၪနီၪဆ့ ဂဲၩဝၭလၧဆၧအီၪကီၪ့ဖၧၩ့ အၪမၬဒ့ၭဂီၩ့တၭ အဝ့ၫအဖါဖါနီၪ မွဲဝ့ၫဒၪလၧ ခးရ့ၫခိၪနါလဂၩနီၪလီၫႉ

၂၀၂၂နံၪ့ဖၧၩ့အဝ့ၫယီၩဘၪထိးရွံထၪ့ၥၭလၧ အင်ဒိုနီးရှားၦမုၪဎံၪလၩကဂၩအကၠီၩ့ ၂၀၂၃နံၪ့ ခးၥဲၫထၧၫ့ဘံၪ့ ယၫၦမုၪၥံၪအခံးဂၩ့ဂ့ၩဘၪဆၧပြၧၩ့ကိနီၪ အဝ့ၫယီၩမွဲကဘၪဆုးထဲၩ့လ့ၩပြၧၩ့ဝ့ၫဒၪနီၪလီၫႉ အဝ့ၫန့ဘၪၥရဖူၩယီၩ အကၠီၩ့ အကၧၩ့ဒိၪထုၬ အင်ဒိုနီးရှားကဲၬၥလံၬၥၭဘၪ့လဖၪအဂး လၧဆၧအၪ့ထၩလဖၪအဖၧၩ့ ပအီၪက့ၪထၬ ဆၧဆူၩ နဲၩဂုးဂုးခၧၫ့ခၧၫ့စွါဘဲၫ ကနံၩကိနီၪလၧပမိဆၧအီၪကီၪ့အဂး လၧပထံၪခးအဂး ပဖ့ၪဆၧၫ့ထဲၩ့ဆၧန့ဂ့ၩဘၪစဲၪအဂဲး နီၪလီၫႉ

လၧအင်ဒိုနီးရှားထံၪခးဖၧၩ့နီၪ ၡၩအဆၧဝံဆၧနၬအီၪဝ့ၫဒၪအခွး ၂၇၀ဂီၩ့ ကဲၬၥလံၬဆၧအီၪကီၪ့ ဆၧဘိၪ့ ဆၧဘၩအဆၧဝံဆၧနၬနီၪ အီၪဒၪ ၁၀ယၩဒုၩလီၫအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ