ဝံးမၫ့တၨၭကၭၥလံၬဆၧအီၪကီၪ့ ကခၠၫ့ဆၨၩဖိၪလဖၪ မၩလၩမၩဖၩ့ကခၠၫ့ဆၧအီၪကီၪ့ဆရၫအဂဲး

လၩအိၭတိၫဘၧၫ၃၀ၥၫ့အိၩ မၫ့တၨၭကၭၥလံၬဆၧအီၪကီၪ့ ကခၠၫ့ဆၨၩဖိၪလဖၪ မၩလၩမၩဖၩ့ ကခၠၫ့ဆၨၩဆၧအီၪ ကီၪ့ဆရၫ Michael Malang Zau Seng နီၪလီၫႉ ဆၧမၩလၩမၩဖၩ့နီၪ စၭထၪ့ဝ့ၫဒၪလၧ Fr.Hkum Myat လ့ၩခိၪလ့ၩ နါဝ့ၫဒၪ မံဆၩဆၧလုထၪ့ ဒဲ မၩဝ့ၫဒၪအလးနီၪ လၧမၫ့တၨၭကၭၥလံၬ S.F.X Broလဖၪ အကၠီးဝးဖၧၩ့နီၪလီၫႉ
လၧ၂၀၁၄နံၪ့အိၩ ဆရၫယီၩဂဲၫထီၩ့စိၩလၧ ဝံးမၫ့တၨၭဂီၩ့ ကခၠၫ့ဆၨၩဆၬဖိၪၥံၪအနးၥၭဂဲးဘၭအဂး လၧၥၫ့မုၥၫ့ခၫ ကၠၧၫ့ကၠၧၫ့ ဂဲၫထဲၩ့ခိးဂဲးခိးဘၭထၪ့ဝ့ၫဒၪ ထီးမုကနံၩယီၩနီၪလီၫႉ Fr.Hkum Myat စံၭဝ့ၫဒၪ “ကနံၩယီၩ ပမၩလၩမၩဖၩ့အ့ၪ ဆရၫယီၩနီၪ မွဲလၧဆၧမၩအဂ့ၩကမံၩ့နီၪလီၫႉ ပဝ့ၫၥံၪယီၩ ပကဘၪကဲၪဝ့ၫဒၪ ၦလၧအၥ့ၪယၫနၪၥ့ၪၦဂူၫဂၩ အခိးအတၩနီၪ လီၫႉ မွဲလၧဂဲးဘၭလဖၪယီၩအကၠီၩ့ ဆရၫဆ့ မွဲဖီၪ့ထၪ့ဖံၭထၪ့ကဆါယွၩ အဆၧဖံၭဆၧမၩဒံၩ့န့အၪထၪ့ဒၪဝ့ၫႉ ပဆၧဆူနဲၩ ပဆၧးဎံၪဆၧးလၩလဖၪနီၪ ထံၪယဲၩ့ခးယဲၩ့ဖိၪၥံၪလဖၪ အီၪက့ၪလူဒိၪဎွ့ၩဒိၪဝ့ၫလီၫႉ ဆၧနီၪအကၠီၩ့ပၧၩဆ့ မွဲပကဘၪ အီၪက့ၪလူဒိၪဎွ့ၩဒိၪလီၫႉ လၧယၫခီၫဆ့ ဆၧအီၪကီၪ့အဂး ဆရၫဒဲၦဆူနဲၩဖိၪၥံၪကၠၧၫ့ကၠၧၫ့ ကဘၪမၩဎိၭလၩ့ဆၧကလိၪဝ့ၫ ဒၪလီၫႉ”
“ထီးမုဆၫကနံၩယီၩ လၧယမၩန့ဝ့ၫအလးလဖၪနီၪ ကဆါယွၩအဂးယမၩဘၪအကၠီၩ့ ယစံၭခိးစံၭတၩကဆါယွၩ နီၪလီၫႉ ယစံၭခိးစံၭတၩဘၪ ယမိဖါဒဲ ယဆရၫဆရၫမုၪလၧအဂဲၫထဲၩ့ ၥီၪ့ၥၫ့အ့ၪယၧၩ ဆၧကိၪ့ဘၪကိၪ့ၥ့ၪလဖၪ ၦအဂဲၫ ထဲၩ့မၩဆၧၩ့ယၧၩလဖၪ ကိၭဒံၭကိၭဂၩနီၪလီၫႉ ယကမၩထၪ့ကဆါယွၩအဆၧဖံၭဆၧမၩအဂး ဖ့ၪဂဲးဖ့ၪဘၭယၧၩအဘူၭထုၬ ယမၫၥၭဘီၩ့နီၪဆ့ မွဲယစံၭခိးစံၭတၩဘၪနီၪလီၫႉ ပကဲၪဆၧအီၪကီၪ့ဆရၫ ဆရၫမုၪလဖၪယီၩနီၪ မွဲပဆၧကိၪ့ဘၪကိၪ့ၥ့ၪ အီၪအၪမၬအကၠီၩ့ ပဖီၪ့ထၪ့ဖံၭထၪ့ကဆါယွၩ အဆၧဖံၭဆၧမၩလမွဲဘၪလီၫႉ လၧပဂံၪ့ဒီၪ့ကကဲၩ့ ပဘၪဖီၪ့ထၪ့ဖံၭထၪ့ယွၩ အဆၧဖံၭဆၧမၩအကၠီၩ့ ပဆၧကၪဆၧဂဲၩလဖၪနီၪ ကဂၩဒဲကဂၩမွဲလမီၪ့ဎီၩ့ဘၪလီၫႉ လါနၫ့ထီးမုဆၫကနံၩယီၩ ပဖီၪ့ထၪ့ဖံၭ ထၪ့ယွၩအဆၧဖံၭဆၧမၩန့နီၪ မွဲလၧၦဆူနဲၩဖိၪၥံၪအဆၧမၩဆၧၩ့အကၠီၩ့နီၪလီၫႉ မွဲယၥ့ၪယဘၪအကၠီၩ့ ယဂဲၫထီၩ့စိၩလၧ မၫ့တၨၭယီၩအ့ၬ မွဲလၧ ယကဂဲၫမၩဆၧၩ့ ၦဆူနဲၩဖိၪၥံၪအဆၧလိၪလဖၪအကၠီၩ့ ယဂဲၫထီၩ့လၧယီၩလီၫႉ ဆၧနီၪအကၠီၩ့ ဆုးထဲၩ့ဖ့ၪကိၪ့ယၧၩဂီၩ့ ပကဆုးထဲၩ့ဖီၪ့ထၪ့ဖံၭထၪ့ဎိၭလၩ့ ယွၩအဆၧဖံၭဆၧမၩလဖၪကၠၧၫ့ကၠၧၫ့လါဆံၭႉ” အဂဲး ဆရၫ Michel ယီၩစံၭဝ့ၫဒၪလီၫႉ
မံဆၩဆၧလုထၪ့ဂီၩ့ဝၫ့ကကၠၪ ၦၡၩဆုးထဲၩ့ မၩလၩမၩဖၩ့ဘၪလၧ ဆၧၥုၪ့အွံၪၥၭဆၧၫ့လဖၪအကၠီၩ့ ၥၭဘၪ့လဖၪဒဲ မိဖါလဖၪနီၪ ယၧၩ့ဘၪဆၧၥၭအွံၪဂီၩ့ ဖ့ၪလၫ့အ့ၪဆရၫလၬဆီၪ့ ဒဲ ကခၠၫ့ၦၥၭအွံၪဆၧဖိၪလဂၩမွဲဝ့ၫ Nkoi Tu Hkawng နီၪ ၥၭအွံၪဘၪဆၧၥၭအွံၪကယွ့နီၪလီၫႉ ဂီၩ့ ဖျါပထုၬထဲၩ့ဆၧထံၪလၩ့ဒီၪလၩ့လၧ Fr.Hkun Myat အဆၧဆိၪဂ့ၩဆိၪဘွၩဒဲ အၪ့လၩ့ဎိၭကၠၭမုဆၫဆၧအၪ့နီၪလီၫႉ