လၧ အရှေ့တောင်အာရှထံၪခးလဖၪအဖၧၩ့ ဂျက်ဆွီစ်ခရၧၫ့ဖိၪၥံၪ ၥုၪ့ထၪ့ၥံၪ့ အထံၭ၄၀၀၀၀အဂဲး

အမံၩ့မွဲဝ့ၫ The Jesuit Refugee Service (ဂျက်ဆွိစ်ခရၧၫ့ အဆၧဖံၭဆၧမၩလၧ အလီၩ့မၩဆၧၩ့ၦဘၪကၪဘၪဂဲၩဖိၪ)  ကဲၪထၪ့ အနံၪ့ အီၪထၪ့ဘၭ နံၪ့၄၀ဆၧထီးနဲၪ့အဂး လီၩ့ၥုၪ့ထၪ့ ၥံၪ့အထံၭ၄၀၀၀၀နီၪ လၧ ကမ္ဘောဒီးယား၊ အင်ဒိုနီးရှား၊ ဖိလစ်ပိုင် ဒဲ ထိုင်းထံၪခးလဖၪ နီၪ လီၫႉ အဝ့ၫၥံၪယီၩနီၪ ဆီၪ့မီၫ့ဝ့ၫလၧ ဂၪ့ခိၪနဲၩ့ဎီၩ့ကၠီၪ့ဖျီၩ့ကဘၪလိၬဎွ့ၪဎီၩ့အဂးဂီၩ့ လီၩ့ၥုၪ့ထၪ့ၥံၪ့ထံၭလဖၪယီၩနီၪလီၫႉ

ဆၧကိၪ့တဲၩ့ဒိၪအယီၩနီၪမွဲလၧ ကလုၬဘံၭၥၭလၧၥံၪ့ထံၭလဖၪဒဲ ၡၩခရၧၫ့လဖၪကလ့ၩထၪ့လ့ၩထီၫအဂးနီၪလီၫႉ ကပဒၩ့ထၬ ဆၧၡၪ့ဆၧ ယၬ ဒဲဂၪ့ခိၪနဲၩ့ဎီၩ့ ဂၭဂီၩ့ဆိၫ့ခွံၬလဖၪ လၧဆၧမၩဒၪမ့ၬအဖၧၩ့နီၪလီၫႉ မၩကဲၪထၪ့ ဆၧကိၪ့တဲၩ့ဒိၪအယီၩ ထၪ့ဘၭဝ့ၫဒၪ ကနံၪ့ယူၭနီၪလီၫႉ ဆၧကိၪ့ တဲၩ့ဒိၪအယီၩအခိၪနါ Louie Bacomo နီၪစံၭဝ့ၫဒၪ ဆၧအလးယီၩ ဆၧးဎံၪဆၧးလၩဒဲ ဂၪ့ခိၪနဲၩ့ဎီၩ့ဆၧဘၪလိၬဎွ့ၪဎီၩ့နီၪ ဆၧအၪ့ထၩလဖၪအီၪ ထၪ့ဝ့ၫဒၪအကၠီၩ့ ဘဲၫပကပၧၩ့ထဲၩ့ဂၪ့ခိၪနဲၩ့ဎီၩ့ကၥ့ၪအဂးဒဲ ပကအီၪလၧဂၪ့ခိၪနဲၩ့ဎီၩ့ကၥ့ၪဂ့ၩဂ့ၩဘၪဘၪအဂး လိၪဝ့ၫဒၪနီၪလီၫႉ

အ့ၪမွဲၡိၬအီၪနီၪ တဝၫ့ဖိၪလဖၪ အီၪက့ၪထးခွံၬအဒိၩ့မုတဝၫ့ကၡၩဝ့ၫနီၪလီၫႉ ဒိၩ့မုတဝၫ့ဖိၪလဖၪနီၪ အဝ့ၫၥံၪအဆၧၥၭမၧၫ့အဂး အီၪက့ၪ ဒိၭနဲၩ့ၥၭလၧၡိၬနီၪလီၫႉ ပလီၩ့ပဒၩ့ထၬ ပလီၩ့ပၧၩ့ထၬ ၡိၬၥံၪ ၥံၪ့ထံၭၥံၪနီၪ မီၪ့ဎီၩ့လၧပယိခွါထဲၩ့ ဒိၩ့မုတဝၫ့ဖိၪလဖၪဒဲအဝ့ၫၥံၪ အဆၧးဎံၪဆၧးလၩ နီၪ လီၫႉ

ဂီၩ့နီၪ ဖျိၩ့ၥၭဘၪ့လဂၩOrnich နီၪစံၭဝ့ၫဒၪ မွဲလၧဆၧကိၪ့တဲၩ့ဒိၪယီၩအကၠီၩ့ ထံၭၥိၭလဖၪဒဲခရၧၫ့ဖၧၩ့ ၥုၪ့ၥၭအဆၧလၩ့ထံးဂဲၫအၪထၪ့ဝ့ၫဒၪ အဂဲးႇ ၥ့ၪယၫထၪ့ကဘၪယိထဲၩ့ခွါထဲၩ့ဂၪ့ခိၪနဲၩ့ဎီၩ့အဂဲးႇ ဂၪ့ခိၪနဲၩ့ဎီၩ့နီၪ မွဲၡၩအၥၭကမၧၫ့ထၪ့အဂး လကၭဘၪဒဲ မွဲကဆါယွၩအဆၧတဲၩ့လၩ့ထၬဒံၭ နီၪ ပၥ့ၪယၫထၪ့အဂဲး စံၭဝ့ၫဒၪနီၪလီၫႉ

Philippines ၥၭဘၪ့Marlon E.Apanနီၪစံၭဘၪဝ့ၫ ပၥၭဆံၭဒံၭအထီယီၩ ပကဘၪယံၩၡီၩ့နီၪလီၫႉ ဘၪန့လဲၪနီၪ ပဝ့ၫၥံၪယီၩလခဲၫ့ပက ကဲၪထၪ့ခိၪနါလဖၪနီၪလီၫႉ အ့ၪမွဲပၥၭဂဲၫၡါထၪ့အခၫ ပကဘၪဖ့ၪလၫ့ထး ပဖိၪပလံၩလဖၪဆၧန့ၥၫလဖၪယီၩအဂဲးႇ ၥၭဘၪ့လဖၪဆ့ ထီးၥံၪ့ထံၭ လဖၪ လလၩ့မါဆိၫ့ခွံၬဘၪအဂးနီၪ ၥုၪ့ထၪ့ကၠၭၥံၪ့ထံၭလဖၪအဂး အဝ့ၫအၪ့ယၫထၪ့ဝ့ၫနီၪလီၫႉ

လၧထိုင်းထံၪခးလံၩထံၭကကဲၩ့ခီၫနီၪ ၦဘၪကၪဘၪဂဲၩဖိၪအဂၩ ၉၃၀၀၀ နီၪ ဘၪဂဲၫအီၪဒုၩၥၭဂီၩ့ အဝ့ၫၥံၪနီၪ မွဲလၧၦဖျိၩ့ဆၨၩဒဲဖျိၩ့ဝီၩ လဖၪနီၪလီၫႉ လၧဆၧအလးနီၪ ၦဘၪကၪဘၪဂဲၩဖိၪၥံၪအီၪဒုၩၥၭအလးအီၪဝ့ၫဒၪ၆ဒီၪ့ဂီၩ့ ခၠ့ၩမဲၫ့ဆၧအီၪကီၪ့ဖၧၩ့ခရၧၫ့၁၅ခရၧၫ့နီၪ ၥုၪ့ထၪ့ၥံၪ့ထံၭ ၇၄၀၀နီၪလီၫႉ အဝ့ၫၥံၪယီၩလချုၭၥုၪ့ဒံၭဘၪ ၥံၪ့ထံၭနီၪ ဘဲၫၥၫ့ဎွၩဖရၫ့စံအလံၬပရၧၫ့(ပကယိထဲၩ့ခွါထဲၩ့ပဂၪ့ခိၪချိၫ့ယီၩ) အဆၧဎိၭထံၪဎိၭဒီၪအၥိၭ အဝ့ၫၥံၪဖ့ၪလၫ့ဘၪဆၧကိၪ့ဘၪကိၪ့ၥ့ၪလဖၪနီၪလီၫႉ

လၧခးပယၩ့ဖၧၩ့ ဗန်းမော် ဆၧအီၪကီၪ့ နားလိုင် စိန်မိုင်ကယ် ဆၧအီၪကီၪ့နီၪဆ့ ဂဲၫနုၬလၩ့ပၫထဲးလၧ ဆၧဎိၭထံၪဎိၭဒီၪဖၧၩ့ယီၩ အဆိၪ ထုၬလဘျၩ့နီၪလီၫႉ ကယၩဆၨၩခးဒီၪ့ဆ့ မွဲနုၬလၩ့ပၫဝ့ၫဒၪလၧ ဆၧကိၪ့တဲၩ့ဒိၪဖၧၩ့ယီၩဆ့ဂီၩ့ ကယၩဆၨၩခးဒီၪ့ႇ ဒီမောဆိုဝံး ၥၭဘၪ့လဂၩနီၪစံၭဝ့ၫ ဒၪ ပၥုၪ့ၥံၪ့ထံၭနီၪ မွဲလၧဆၧအဂ့ၩအဂဲးႇ ဆၧအယီၩမၩဘၪလိၬဎွ့ၪဎီၩ့အ့ၪပၧၩ ခိဆၧၩ့ချံၫ့လကၭဘၪဒဲ မၩဘၪလိၬအိၭလိၬထဲၩ့ ခရၧၫ့ၥုၪ့ၥၭဒဲ ဆၧဎူၫဆၧဎၩ့အဂဲးႇ လၧပဝ့ၫၥံၪအကျၩ မၩမၧၫ့ထၪ့ထဲၩ့ ဆၧဆုးကျိၭလိၭၥၭထံးထံးအဂဲး စံၭဝ့ၫဒၪနီၪလီၫႉ

နးအဲၪဖီၫဘွၩ

28.6.2022