လၧအိၫလဲၩ့ဘျၪ့ကိၪ့ဒိၪကဖျိၪ့အဖၧၩ့ အဆိၫထုၬ ထံၭလၩ့ၥီၪ့ထဲး ခးပယၩ့ဖၧၩ့ဆၨၩဆၬလဖၪအလံၬလဲအဂဲး

               လၧအဖီၩ့ခွံၬ ၂၀၂၁နံၪ့ လၩဖ့ၫဘြူၫအ့ၫရံၫ ၁ၥၫ့အထီအိၩ ခးပယၩ့ၥုၭမုနီၪ ထၪ့ပၨၩ့ခွံၬခးပယၩ့ထံၪခးဂီၩ့ ၦအဘၪဖီၪ့  ထၪ့ဖံၭထၪ့ထံၪဂဲးခးဂဲး လနၩ့နၩ့နီၪ ဖီၪ့ထၬဝ့ၫဒၪဂီၩ့ မၩနၧၩ့မၩစၪဝ့ၫ မၩၥံၫမၩဆၫဝ့ၫဒၪနီၪလီၫႉ

          ဘဲၫယီၩအဝ့ၫၥံၪ ဂဲၫထဲၩ့ပၨၩ့ထၬထံၪခးယံၬထၪ့ဝ့ၫဖိၭဘိၭကနံၪ့ဘျဲၪယူၭနီၪလီၫႉ လၧကနံၪ့ဘျဲၪယီၩအဖၧၩ့ ၥုၭခိၪဒိၪလဖၪ အဆၧအၪ့မၧၫ့အဖၧၩ့ ၦခမျၧးလၧလအဲၪဒိၭဘၪအဝ့ၫၥံၪလဖၪနီၪ ၥုၭဖိၪလဖၪယီၩ ဂဲၫထဲၩ့မၩၥံၫမၩဆၫ မၩနၧၩ့မၩစၫဝ့ၫဒၪ အၪအၪ ဂီဂီဒ့ၭယူၭနီၪလီၫႉ စၭထၪ့လၧဖိၪဒံၪဖိၪၥၪ ထီၩ့စိၩလၧၦၥုၪ့ၡါၥၭၡါလဖၪနီၪ အဝ့ၫၥံၪယီၩ ဂဲၫထဲၩ့မၩၥံၫမၩဆၫ မၩနၧၩ့မၩစၫဝ့ၫဒၪ ထီးမုဆၫကနံၩယီၩနီၪလီၫႉ လီၩ့ဎူလၫ့ဒိၩ့မုတဝၫ့လဖၪႇ လီၩ့ခွံၬလၩ့ယၩ့ဖီးၥၪလၧ ကဘၩ့ယူၩလဖၪဂီၩ့ လီၩ့မၩၥံၫမၩဆၫၦခမျၧး လဖၪဘိၩ့ဒံၭနီၪလီၫႉ

         မွဲလၧ ၥုၭမုလဖၪထၪ့ပၨၩ့ဆၧအကၠီၩ့ ၦၡၩမၩထၪ့ CDMလဖၪအီၪထၪ့ဝ့ၫအၪမၬႇ ဒဲ ၦၡၩဘၪခွံၬၡိၬထးလၩ့ကျဲၩ့လဖၪႇ ၥၭဘၪ့ၥံၪအၪဒၪဆၧ ဘၪခွံၬၡိၬထး အဆၧမံၫမးလဖၪဂီၩ့ မွဲလၧဆၧတီၩဆၧလီၩ့အဂး ဘၪဖီၪ့ထၪ့စူၪဝဲၩအီၪဝ့ၫဒၪအၪအၪဒ့ၭ နီၪ လီၫႉ

        မွဲလၧ ၦဘဲၫယီၩၥိၭလဖၪ အဆၧကၪဆၧဂဲၩ ကဎွံၫလၩ့ထဲၩ့ ကဆံၭကခ့ၭအဂးနီၪ Spring University Myanmar (SUM)(နွေဦးတက္ကသိုလ်)အဖၧၩ့ ထံၭလၩ့ၥီၪ့ထဲး ဆၨၩဆၬလံၬလဲလဖၪဒဲ ဆၧဆၧးဎံၫဆၧးလၩအဂဲးလဖၪနီၪလီၫႉ လၧဘျၪ့ ကိၪ့ဒိၪလဖၪအဖၧၩ့ အထံၭလၩ့ၥီၪ့ၥၫ့ဘၪ ခးပယၩ့ဖၧၩ့ဆၨၩဆၬလဖၪအလံၬလဲနီၪ အဝ့ၫယီၩ မွဲအဆိၪထုၬဘျၪ့ကိၪ့ဒိၪ ကဖျိၪ့ နီၪလီၫႉ ဘျၪ့ကိၪ့ဒိၪယီၩအဖၧၩ့ ၥီၪ့ၥၫ့ဘၪ ဘၪထွ့ၪလၧၥနိၫ့အဂဲးလဖၪႇ ခီၫ့ၡၩဆၧကိၪ့ဘၪကိၪ့ၥ့ၪလဖၪႇ ၡၩခံးဂးဆၧကိၪ့ဘၪ ကိၪ့ၥ့ၪလဖၪႇ ထံၪယဲၩ့ခးယဲၩ့ဆၨၩဂူၫဂၩအဆၧချဲၩ့အဂဲးလဖၪႇ ဒံၫမိၫကရ့ၫစံၫအဂဲး ဆၧကိၪ့ဘၪကိၪ့ၥ့ၪလဖၪႇ လုၫဎံၫလါၥ့ၪ ဆၧကိၪ့ဘၪကိၪ့ၥ့ၪအဂဲးလဖၪႇ ထံၪခးဖၧၩ့ဆၨၩဆၬလံၬလဲဆၧချဲၩ့လဖၪ ဒဲ ဆၧကိၪ့ဘၪကိၪၥ့ၪဂူၫဂၩ အဂဲးလဖၪနီၪလီၫႉ  ၥုၭခိၪ လဖၪ ထၪ့ပၨၩ့ထံၪခးဂီၩ့ ကအီၪဖိၭဘိၭ လၩ၄ဘံၪ့အထီ ၂၀၂၁နံၪ့ လၩမ့ၫ၂၄ၥၫ့နီၪ ဘျၪ့ကိၪ့ဒိၪယီၩ စၭထၪ့ကဲၪထၪ့ဝ့ၫနီၪလီၫႉ 

        ဘျၪ့ကိၪ့ဒိၪယီၩ အဆၧထိစိၩနီၪ ဆၧၥီၪ့လံၬလၧအိၫလဲၩ့ဖၫ့ခိၪအဖၧၩ့ န့ဝ့ၫဒၪကျိၪစ့ၩလဖၪနီၪ ကမၩဆၧၩ့ထဲၩ့ ၦအမၩ ထၬCDMလဖၪႇ ၦအဘၪစဲၪ့မံၩ့ဂၭဖျိၭလဖၪႇ ဒဲ ၦဘၪကၪဘၪဂဲၩဖိၪလဖၪအဂးနီၪလီၫႉ ဆၧၥီၪ့ဆၨၩဆၬလံၬလဲဆၧချဲၩ့ၥဖၠး လဖၪအဖၧၩ့န့ဝ့ၫဒၪ ကျိၪစ့ၩ(၇၀) ယၩဒူၩနီၪ မၩဆၧၩ့ထၪ့ထဲၩ့ ၦလၧ အမၩထၬ CDM လဖၪႇ မွဲလၧဆၧဒုၭဆၧခၭအကၠီၩ့ ၦအဘၪ စဲၪ့မံၩ့ဂၭဖျိၬလဖၪ ဒဲ ၦဘၪကၪဘၪဂဲၩဖိၪလဖၪအဂဲး ၦလၧအဘၪအၪ့န့ထၬ ဆၨၩဆၬလံၬလဲဆၧချဲၩ့အနိၫ့ ၦမူၩဒၩအီၪဝ့ၫဒၪ နးစ့ၩဘွၩ (အၪ့လဲၩ့ထၬအမံၩ့)နီၪ စံၭဘၪဝ့ၫနီၪလီၫႉ ဘျၪ့ကိၪ့ဒိၪယီၩနီၪ မွဲဘျၪ့ကိၪ့ဒိၪလၧ အခိးဂဲးခိးဘၭအ့ၪ ထံၪခးဆၧကၪ ဆၧဂဲၩ လနၩ့နၩ့အဂးနီၪလီၫႉ လၧဘျၪ့ကိၪ့ဒိၪနီၪအဖၧၩ့ ထံၭလၩ့ၥီၪ့ဝ့ၫဒၪ ဆၨၩဆၬလံၬလဲအဆၧလူဆၧချဲၩ့လဖၪနီၪ မွဲဝ့ၫဒၪ ကခၠၫ့ဆၨၩဆၬလံၬလဲဆၧချဲၩ့ႇ ဖျိၩ့ၡိဆၨၩဆၬလံၬလဲဆၧချဲၩ့ႇ ဖျိၩ့ၡၩ့ဆၨၩဆၬလံၬလဲဆၧချဲၩ့ႇ ၥဲၫ့ဆၨၩဆၬလံၬလဲဆၧချဲၩ့ႇ လခုၫ့ ဆၨၩဆၬလံၬလဲဆၧချဲၩ့ ဒဲ ယိၩခရိဆၨၩဆၬလံၬလဲဆၧချဲၩ့လဖၪနီၪလီၫႉ

        လၧဘျၪ့ကိၪ့ဒိၪဖၧၩ့ ၦအၥီၪ့ဖျိၩ့ၡိလံၬလဲဆၧချဲၩ့ ဆရၫမုၪ နးဘွၩချံၫ့(အၪ့လဲၩထၬအမံၩ့)နီၪ စံၭဝ့ၫဒၪ “ဆၧလယိလါဘၪ အဖၧၩ့ လၧဘျၪ့ကိၪ့ဒိၪကဖျိၪ့ဖၧၩ့ ယနုၬလၩ့ကဲၪဘၪဆၧရၫမုၪ ယနုၬလၩ့ၥီၪ့ဘၪလံၬဖျိၩ့ယီၩအကၠီၩ့ ကကဲၩ့ခီၫနီၪ ယၥၭဎွံၫ အၪမၬလီၫႉ   ဘၪန့လဲၪနီၪ လၧခးပယၩ့ဆၧဘံၪဘူၪထၪ့ဒၩကဲၪထၪ့အထီယီၩ ယကဲၪထံၪခးဖိၪကဂၩလါနၫ့ ထံၪခးယီၩ ဒၪထၪ့ လၧ ဆၧကၪဆၧဂဲၩအခၫ ယမၩဆၧၩ့ထၪ့လမိန့ဘၪနးမံၩ့နီၪလီၫႉ ဆၧနီၪအကၠီၩ့ ဘျၪ့ကိၪ့ဒိၪဖၧၩ့ ၦမူၩဒၩအီၪလဂၩ ဂဲၫဆုးကျိၭ ယၧၩဂီၩ့ အၪ့ကံၩ့ယၧၩဆၧမၩဆၧၩ့ လၧယကလ့ၩနုၬလၩ့ၥီၪ့အ့ၪ ဖျိၩ့ၡိလံၬလဲအဂးအခၫ ယဆီၫ့မီၪ့လၧ ယထံၪခးအဂး ဘဲၫ မ့ၬကဖိၪ ထံၫကဖျိၪ့ အၥိၭ ယဖ့ၪဆၧၫ့လၩ့ယၥၭကန့အခၫနီၪ ယထိးဆၧၫ့ဘၪအဝ့ၫအဆၧအၪ့ယၫဂီၩ့ ယနုၬလၩ့ၥီၪ့လံၬဖျိၩ့လၧ ဘျၪ့ကိၪ့ဒိၪယီၩအဖၧၩ့နီၪလီၫႉ ယနုၬလၩ့ၥီၪ့ဘၪလံၬဖျိၩ့အကၠီၩ့ ကကဲၩ့နီၪ ယၥၭဎွံၫဒၪလါနၫ့ ကကဲၩ့ခီၫနီၪဘိၭ မွဲယၥၭမဲၪဆၧဆ့ႉ ဘၪနီၪလဲၪနီၪ စၭထၪ့လၧၥုၭမုလဖၪ ပၧၩ့ထၬထံၪခးယီၩဂီၩ့နီၪ ၦအခိးဂဲးခိးဘၭလၧထံၪခးဂးလဖၪနီၪ အဝ့ၫၥံၪယီၩ လီၩ့ဖီၪ့ဝ့ၫဒၪ အကၠီၩ့နီၪလီၫႉ ဘျၪ့ကိၪ့ဒိၪယီၩနီၪ မွဲခိးဂဲးခိးဘၭထၪ့ လၧထံၪခးဂးအကၠီၩ့ ၦအနုၬလၩ့ၥီၪ့လံၬဆရၫႇမုၪလဖၪ အဆၧဒူၩဆၧ ယၪ့အဂး ဆၧအၪ့ယိၫခဲၫ့ကံၭ မိအီၪဝ့ၫဒၪအကၠီၩ့နီၪလီၫႉ ဆရၫႇမုၪ ၥံၪ အဆၧဒူၩဆၧယၪ့အဂး ဘျၪ့ကိၪ့ဒိၪယီၩနီၪ ကျ့ၭစၨၭ ခိးဂဲးခိးဘၭထၬဝ့ၫ ဂ့ၩဘၪစဲၪဆ့နီၪ ပၥ့ၪယၫဘၪလီၫႉ လါနၫ့ဂ့ၩနီၪ ပလိၪဘၪကဆါယွၩအဆၧမၩဆၧၩ့ ကဆါယွၩအဆၧဝၩ့ဖီၩ့ ဒံၭနီၪလီၫႉ”  

        SUM ဘျၪ့ကိၪ့ဒိၪယီၩ ဂဲၫထဲၩ့အီၪၥုၪ့လၩ့ထၬအၥၭ အီၪထၪ့ဘၭဝ့ၫဒၪ ကနံၪ့ဘျဲၪယူၭအဂဲး ပန့ဘၪဆၧပရၧၫ့ဘဲၫယီၩ အ ၥိၭနီၪလီၫႉ

နးအဲၪဖီၫဘွၩ