လၧခးယိၩဒယၩဖၧၩ့ ၥီၪ့ၥၫ့အ့ၪဆၧမၩလိၪဖိၪလဖၪ ဆၧယိထဲၩ့ခွါထဲၩ့ဂၪ့ခိၪနဲၩ့ဎီၩ့အဂဲး

       အီၪလၧခးယိၩဒယၩ Malasawan Pitthaya ဆၧမၩလိၪလးဖၧၩ့နီၪ ဘၪထွ့ၪလၧ ၥၫ့ဎွၩထုၬထၪ့ထၬ ဆၧယိထဲၩ့ခွါ ထဲၩ့ဂၪ့ခိၪနဲၩ့ဎီၩ့ Laudato Si အဂဲးနီၪ ၦၡၩဖ့ၪၥ့ၪယၪထၪ့ ဆၧမၩလိၪဖိၪလဖၪနီၪလီၫႉ

       လၧအဖီၩ့ခွံၬ၂၀၁၅နံၪ့ဒၪအိၩ ၥၫ့ဎွၩထုၬထၪ့ထၬလံၬပရၧၫ့ယီၩနီၪလီၫႉ မွဲလၧလံၬပရၧၫ့ယီၩအကၠီၩ့ အီၪလၧထဲၩ့ထံၪခး ကဲၭၥလံၬဆၧမၩလိၪလးလဖၪနီၪ မွဲလၧဆရၫႇမုၪလဖၪအဆၧလ့ၩခိၪလ့ၩနါအဖၧၩ့ မၩထၪ့ကၠၭဝ့ၫဒၪဆၧယိထဲၩ့ခွါထဲၩ့ဂၪ့ခိၪ နဲၩ့ဎီၩ့ ဆၧထံၪလၩ့ဒီၪလၩ့လဖၪနီၪလီၫႉ

       ကဲၭၥလံၬဆၧဘိၪ့ဆၧဘၩဖိၪမၫ့န့ၫဂၠၫလဖၪနီၪ အီၪကၠၧၩ့ကျ့ၭစၨၭမၩထၪ့ကၠၭ ခီၫ့ၡၩလီၫအကၠီၩ့ ကဘၪယိထဲၩ့ခွါထဲၩ့ဂၪ့ ခိၪနဲၩ့ဎီၩ့မွဲလိၪဝ့ၫဒၪအဂဲးၥ့ၪယၫထၪ့ဝ့ၫနီၪလီၫႉ စၭထၪ့လၧအဖီၩ့ခွံၬ အနံၪ့အၪဆံၪအဖၧၩ့ ထဲၩ့ထံၪခးခီၫ့ၡၩနီၪ မွဲလ့ၩထၪ့လ့ၩ ထီၫဝ့ၫနၭလ့ၬလါနၫ့ ကကဲၩ့ခီၫနီၪ ဂၪ့ခိၪနဲၩ့ဎီၩ့ဘၪထံၭဘၪနဲၪ့ အီၪအၪထၪ့ဝ့ၫဒၪအၪမၬနီၪလီၫႉ

        လၧထံၪခးဖၧၩ့စဲၭရိၩ့ဖၭဒိၪလဖၪနီၪမၩၥၭလိၪဘၪလံၩလဖၪႇ လၧလယိဘၪဂၪ့ခိၪနဲၩ့ဎီၩ့အဆၧဎံၪဆၧလၩအဖၧၩ့ ၥုၪ့ထၪ့ ဆၧၥုၪ့ဆၧဒီၩ့ဖၭဒိၪလဖၪနီၪ ဆၧဘၪထံၭဘၪနဲၪ့အီၪလၧ ဂၪ့ခိၪနဲၩ့ဎီၩ့အၪမၬနီၪလီၫႉ ၦလၧအၥ့ၪယၫထၪ့ဆၧအဂဲးယီၩ ကဲၭ ၥလံၬဆၧမၩလိၪလးလဖၪနီၪ ဘဲၫဖိၪၥၪလဖၪ ကၥ့ၪယၫယိထဲၩ့ခွါထဲၩ့ဂၪ့ခိၪနဲၩ့ဎီၩ့ကၥ့ၪအဂး မၩထၪ့အ့ၪဝ့ၫဆၧမၩလိၪဖိၪ လဖၪၥဖၠးနီၪလီၫႉ

       လၧၥဖၠးနီၪအဖၧၩ့ ထံၭလၩ့ၥီၪ့ၥၫ့အ့ၪဝ့ၫဒၪ ဘၪထွ့ၪလၧဆၧယူၭယၪ့ဂၪ့ခိၪနဲၩ့ဎီၩ့အဂဲးႇ ဂၪ့ခိၪနဲၩ့ဎီၩ့ဂဲၫဂၭဂီၩ့ထၪ့အဂဲးႇ ကအၪ့လဲၩထၪ့ထဲၩ့ဂၪ့ခိၪနဲၩ့ဎီၩ့ဒဲ ကၥိၩ့ထဲၩ့ဂၪ့ခိၪနဲၩ့ဎီၩ့အဂဲး ဆၧလဖၪနီၪလီၫႉ လၧၥဖၠးကဘျၩ့နီၪအဖၧၩ့ ၦအဂဲၫထၪ့ ကအီၪဝ့ၫဒၪဖိၭဘိၭအဂၩ၁၀၀နီၪလီၫႉ ဆၧထံၪလၩ့ဒီၪလၩ့အယီၩ အဆၧထိစိၩနီၪ ၦအမၩဆၧဖံၭဆၧမၩလၧ ဆၧမၩလိၪလး ဖၧၩ့လဖၪနီၪ ကဘၪထုၪ့ၥုၪ့ထုၪ့ၥၭ လၧဂၪ့ခိၪနဲၩ့ဎီၩ့အဂး အရ့ၩဒိၪဝ့ၫဒၪဒဲ ဆၧမၩလိၪဖိၪလဖၪ ဘဲၫကယူၭယၪ့ကဆါယွၩ အဆၧတဲၩ့လၩ့လဖၪကၥ့ၪအဂးနီၪလီၫႉ

       ၦအဂဲၫထၪ့ၥဖၠးလဖၪနီၪဆ့ ထၪ့ဘၪၥဖၠးယီၩအကၠီၩ့ ၥ့ၪယၫထၪ့ဘၪ ကထိးယံၬယံၬၡၩအဆၧအီၪမၧၫ့အီၪဂဲၩအဂဲးႇ ပကမၩထၪ့တၡါအဂး ဆၧအၪ့ယၫနီၪမွဲကၪဂဲၩဝ့ၫဒၪလါနၫ့ ဆၧကဲၪထၪ့လန့ဘၪမွဲလအီၪဘၪအဂဲးႇ ဆၧဖ့ၪဆၧၫ့ဆၧ ဆံၭ ခိၭဖိၪလါနၫ့ ကဲၪထၪ့ဆၧအခိးအတၩဎိၩဎိၩဒိၪဒိၪန့နီၪ ၥ့ၪယၫထၪ့ကၠၭဝ့ၫအဂဲး စံၭကၠၭဘၪဝ့ၫလီၫႉ

      ဘဲၫယီၩထဲၩ့ထံၪခးဖၧၩ့ဂၪ့ခိၪနဲၩ့ဎီၩ့လဖၪနီၪ ဂၭဂီၩ့ဆိၫ့ခွံၬအဂဲးႇ ဆၧယိထဲၩ့ခွါထဲၩ့လအီၪဘၪအဂဲးႇ ဂၪ့ခိၪအခံအလဲၫ လဖၪနီၪဆ့ ၦၡၩၥိၩ့ထၪ့ဘဲၫခီၫ့ၡၩကလ့ၩထၪ့လ့ၩထီၫအဂးလီၫအဂဲးႇ ၥံၪ့ထံၭဝၪထံၭလဖၪဆ့ မွဲလမိအီၪလၧၩ့ဘၪအဂဲးႇ ဖံၭလဖၪဆ့ ၥုၪ့ဆၧကဲၪထၪ့လန့လၧၩ့ဘၪအဂဲးႇ ထံၫလၩ့ၡၩအဂဲးႇ ဆၧအဂဲးလဖၪယီၩ ကဲၪထၪ့ဆၧအၪ့ထၩ ဖၭဒိၪကမံၩ့ ယူၭနီၪလီၫႉ

နးအဲၪဖီၫဘွၩ