လွိုင်ကော်ကၭၥလံၬဆၧအီၪကီၪ့ ထုၬထၪ့လံၬ ဘၪထွ့ၪလၧ ပကအၪ့ကံၩ့ဘၩဆိၪဖၪအ့ၪ ကယၩဆၨၩခးဒီၪ့အဂး

လၩအီၭတိၫဘၫနီၪ ကၭၥလံၬဆၧအီၪကီၪ့ဖိၪၥံၪအဂး မွဲလၧဘၪဝံဖဲၫ့ဆံၫ့ဎံၪလၩအဂဲးႇ ပဝံဖဲၫ့ဆံၫ့ဎံၪနီၪ လမွဲဘၪ ဆၧအၪ့ကံၩ့ဘၩဆိၪဖၪဆၧယိၩယိၩဖိၪတၭ မွဲလၧပနိၭဒဲပၥၭပဘၪဆုးကျိၭဘၩဆိၪဖၪဝ့ၫဒၪအဂဲး ဘၪဆၧ ကွ့ၭလၩ့ထၬဝ့ၫနီၪလီၫႉ
ပဝံဖဲၫ့ဆံၫ့ဎံၪအထီ ပကဘၪထံၭလၩ့အၪ့ဎၬလၧပၥၭလၬဖၧၩ့လဖၪနီၪ ပဝံဖဲၫ့ဆံၫ့ဎံၪအကၠီၩ့ မီၪ့ဎီၩ့လၧပစံၭ ထၪ့အၪ့အူၭ ပကဆါယွၩ အဆၧလၩဆၧဖၩ့လဖၪအဂဲးႇ ပဝံၫ့ဖဲၫ့ဆံၫ့ဎံၪအကၠီၩ့ ပနးၥၭအဂဲးဘၭဂဲၫလၧၫ့ဎွ့ၩထၪ့အဂဲးႇ လၧပဆၧၥၭမၧၫ့ဖၧၩ့ ပဒိၭန့ဘၪ နးခီၫနးၥၭဆၧၥုၪ့ဎွံၫၥၭချံၫ့ ဆၧဆီၪ့ဆၧချဲၫ့ ဒဲ ဆၧဖ့ၪဂဲးဖ့ၪဘၭအဂဲးႇ ၦလၧအဝံ ဖဲၫ့ဆံၫ့ဎံၪလဖၪနီၪ ဘၪဒၪဆၧၫ့ယၫလၧ ဆၧအၧၩ့ဆၧၥၫ့ဆၧခံၭပံၭအခံၫ့ မွဲဒိၭန့ဘၪ ကဆါယွၩဒဲ မိမၫရံၫအဆၧဝၩ့ဖီၩ့ အဂဲးႇ ဆၧဝံဖဲၫ့ဆံၫ့ဎံၪနီၪ မွဲလၧပအဲၪကွံၩ ကဆါယွၩအဆၧနဲၪ့ကမံၩ့အဂဲးႇ လကၭဘၪ မွဲဒံၭလၧအမၩဘျၪထဲၩ့ ဆၧစူၭဆၧဆၫလဖၪန့ဒံၭနီၪလီၫႉ
Louis Bertrand O.P နီၪစံၭဝ့ၫဒၪ ပဝံဖဲၫ့ဆံၫ့ဎံၪနီၪ ပဒုၭဆၧၫ့ခွံၬထဲၩ့ ဆၧအၧၩ့ဆၧၥၫ့လဖၪန့ဝ့ၫဒၪ အစီၩ့ အမၩ့အီၪ ဎိၩဒိၪအဂဲး စံၭထၬဝ့ၫအီၪနီၪလီၫႉ
ဆၧနီၪအကၠီၩ့ၥၫ့ခိၪဒိၪ ချဲလ်ဆိုဘရွှေ စံၭဘၪအၥိၪဖိၪၥံၪ ယအဲၪကွံၩဘၪ ၥၫ့မုၥၫ့ခၫလဖၪဒဲ ယၥိၪဖိၪ အအီၪလၧ လွှိုင်ကော်ဆၧအီၪကီၪ့ဖၧၩ့ထီးလူၬၥံၪဧ့ လၩအီၭတိၫဘၫအဖၧၩ့ယီၩ မွဲလၧပခးပယၩ့ဒဲ ကယၩဆၨၩခးဒီၪ့ ကန့ထၪ့ထဲၩ့ဘၪ ဆၧဎူၫဆၧဎၩ့အဂး အီၪက့ၪထၬဆၧထိစိၩနီၪဂီၩ့ ဝံးဖဲၫ့ဆံၫ့ဎံၪဒဲအၪ့ကံၩ့ဘၩဆိၪဖၪကၠၭကိၭဂၩဒ့ၭ လါဆံၭနီၪဘိၭ ယဆၫ့ထွ့ၪဘၪနၥံၪနီၪလီၫႉ
ပဝ့ၫၥံၪကိၭဂၩဒ့ၭဆ့ မွဲပကအၪ့ကံၩ့ဘၩဆိၪဖၪအ့ၪ ပခးပယၩ့ထၧၫ့ဘံၪ့ယၫဒဲ ကယၩဆၨၩခးဒီၪ့အဂး ဘဲၫၥိၭ ပကန့ထၪ့ထဲၩ့ဘၪ ဆၧဎူၫဆၧဎၩ့အဂးနီၪလါဆံၭႉ
နးအဲၪဖီၫ