မၩဘိၪ့မၩဆၧၩ့ ဆၧအီၪကီၪ့ဆရၫ ဆရၫမုၪလဖၪအဂး ဆၧဘိၭဘၪၥ့ၪယၫထၪ့

လၧဒိၩ့ပၥံၫ့ဆၧအီၪကီၪ့ထၧၩ့ဒီၪ့ယၫအဖၧၩ့ အီၪဝ့ၫဒၪ ဆၧအီၪကီၪ့ဆရၫ ဆရၫမုၪလဖၪနီၪ မၩဘိၪ့မၩဆၧၩ့ကၠၭဘၪအဂး ၦလၧအဘၪဎိၭထံၪဎိၭဒီၪ ဆၧအီၪကီၪ့ယီၩ မွဲဝ့ၫFr.Henry Eikhleinနီၪ လၧလၩမ့ၫ၁၂ၥၫ့ဒၪအိၩ ထုၬထၪ့လံၬကဘံၪ့ဂီၩ့ ဆၫ့ ထွ့ၪဘၪ ၥၫ့မုၥၫ့ခၫလဖၪဒဲ ၦဆူၩနဲၩဖိၪလဖၪနီၪလီၫႉ
လၧလံၬဖၧၩ့နီၪ ကွ့ၭထၬဝ့ၫဒၪ ၦလၧအဘၪဖီၪ့ထၪ့ဖံၭထၪ့ ဆၧဖံၭဆၧမၩကၠၧၫ့ကၠၧၫ့လၧ ၥၫ့မုၥၫ့ခၫလဖၪ မွဲဝ့ၫဒၪ ဆၧ အီၪကီၪ့ဆရၫ ဆရၫမုၪ ကဂၩအဂး ၥၫ့မုၥၫ့ခၫလဖၪ ကနံၪ့နီၪ ကဘၪမၩဆၧၩ့ဝ့ၫဒၪ ဘူၪ၂၀ အ့ၪလမွဲဘၪဘိၭ ဘူၪ၂၀အဎွ့ၩ ကျိၪစ့ၩ နီၪလီၫႉ
ဂီၩ့နီၪ ဘၪထွ့ၪလၧၦဆူၩနဲၩဖိၪလဖၪအဂး အဝ့ၫဆုးထဲၩ့အၪ့ယၫနီၪ ပဖ့ၪလၫ့ ဆၧအီၪကီၪ့ၦမၩဆၧဖိၪလဖၪအဂး လၬ ဆီၪ့လဖၪ ပမၩဘိၪ့ကျိၩစ့ၩလဖၪအခၫနီၪ ပမၩဘိၪ့ဒၪကၠဲၭ ၥၫ့မုမၫ့ခၫႇ Bro, Sr လဖၪလီၫ လမွဲဘၪဒဲ ဆၧအီၪကီၪ့ဆရၫ ဆရၫ မုၪလဖၪအဂးဆ့ ထံၭလၩ့မၩဘိၪ့ထဲးအဂးနီၪ လီၩဆၫ့ထွ့ၪဘၪဝ့ၫလီၫႉ
လကၭဒံၭဘၪ လၧၥၭမုဆံၫ့ဎံၪဘိၪ့မုနံၩဖၧၩ့ န့ဝ့ၫဒၪဆၧမၩဘိၪ့လဖၪနီၪ မွဲဝ့ၫဒၪလၧ ဆၧအီၪကီၪ့ဆရၫ ဆရၫမုၪ လဖၪအဂးအဂဲး လီၩၥ့ၪယၫထၬဝ့ၫဒံၭနီၪလီၫႉ လကၭဒံၭဘၪ ဆရၫ ဆရၫမုၪလဖၪနီၪ အမူၩဒၩအီၪ ကဘၪဖီၪ့ထၪ့ဖံၭထၪ့ ယွၩအဆၧဖံၭဆၧမၩ ဘဲၫၥ့ၪလဲၪနီၪဆ့ ဆုးထဲၩ့ကွ့ၭလၩ့ထၬဝ့ၫဘဲၫယီၩအၥိၭနီၪလီၫႉ
ဆရၫ ဆရၫမုၪကဂၩနီၪ ကနံၪ့အထးဖၧၩ့ အၡၩထုၬ ကဘၪလ့ၩစိၩလၧ ၦဆူၩနဲၩဖိၪလဖၪအဂံၪ့ အဖျိၪ့ ၂၀ဂီၩ့ ကဘၪလီၩလၩ့လါလၩ့ ယွၩအဂဲးအဖးလဖၪ ဒဲ ကဘၪလီၩ့မၩဆၧၩ့ဝ့ၫဒၪနီၪလီၫႉ ဆရၫ ဆရၫမုၪလဖၪ ၥီၪ့ၥၫ့အ့ၪ ဖိၪဒံၪ ဖိၪၥၪလဖၪ ယွၩလူယွၩထၫအခၫ ဘဲၫၥိၭဖိၪၥၪလဖၪ ကမိကဲၪၥၫ့မုၥၫ့ခၫ အၥၭလုကအီၪထၪ့အဂးဆ့ ကဘၪထံၭလၩ့ ၥီၪ့ၥၫ့ဝ့ၫ ဒၪအဂဲး ထံၭလၩ့ကွ့ၭထၬဝ့ၫဒၪနီၪလီၫႉ
လၧဒိၩ့ပၥံၫ့ဆၧအီၪကီၪ့ ထၧၩ့ဒီၪ့ယၫအဖၧၩ့ ဆၧအီၪကီၪ့ဆရၫ ဆရၫမုၪလဖၪ ထီးလူၬအီၪဝ့ၫဒၪ ၈၃ဂၩနီၪ လၧ ပၥံၫ့ဇိၫ့အဖၧၩ့ အီၪဝ့ၫဒၪ ၃၄ဂၩႇ လၧမၠီၩ့မၠၭဇိၫ့အဖၧၩ့ အီၪဝ့ၫဒၪ ၂၇ဂၩ ဒဲ လၧဟၫ့ကထၬဇိၫ့ဖၧၩ့ အီၪဝ့ၫဒၪ၂၂ဂၩအဂဲး ဆရၫမုၪ နော်အယ်မာဝင်း စံၭဝ့ၫဒၪနီၪလီၫႉ ၦလၧအအီၪပွံၭခွံၬနီၪ အီၪဝ့ၫဒၪ ဆရၫမုၪ၈ဂၩအဂဲးႇ မွဲလၧကိၫဘံဆၧဆၫဒဲ ထံၪဂဲးခးဂဲးအကၠီၩ့ အဝ့ၫၥံၪယီၩ ဘၪဒၪဆၧၫ့ယၫလၧဆၧကၪဆၧဂဲၩအၪမၬအဂဲးႇ လၧဒိၩ့ပၥံၫ့ဆၧအီၪကီၪ့ဖၧၩ့ ဆၧအီၪ ကီၪ့အီၪဝ့ၫဒၪ၃၆ဒီၪ့ဖၧၩ့ ဆၧအီၪကီၪ့၆ဒီၪ့နီၪ ကိနံၪ့ဒ့ၭမၩဆၧၩ့ဘၪ ဆရၫ ဆရၫမုၪလဖၪ လၧဘူၪၥံၪဂူၪၥံၪလါနၫ့ ဆၧအီၪ ကီၪ့အဂူၪဂၩနီၪဘိၭ ဘဲၫအဝ့ၫၥံၪမၩဆၧၩ့န့အၥိၭ မၩဆၧၩ့ထၪ့ဆရၫ ဆရၫမုၪ လဖၪအဂဲးႇ အဝ့ၫၥံၪယီၩမွဲလၧ ကိၫဘံ ဆၧဆၫဒဲ ထံၪဂဲးခးဂဲးအကၠီၩ့ အလးကနၩ့နၩ့နီၪအဝ့ၫၥံၪဘၪလ့ၩဘၪထဲၩ့ယီၫဝ့ၫလါနၫ့ အလးကနၩ့နၩ့နီၪဘိၭ မွဲဘၪလ့ၩ ထဲၩ့ဝ့ၫ ကၪဂဲၩအဂဲး ဆရၫမုၪနော်အယ်မာဝင်း စံၭဝ့ၫဒၪဘဲၫနီၪအၥိၭနီၪလီၫႉ
ဆၧအီၪကီၪ့ဆရၫ ဆရၫမုၪလဖၪနီၪ ဘၪၥီၪ့အ့ၪဖိၪၥၪဆံၭလဖၪ ယွၩလူယွၩထၫႇ ဘၪၥီၪ့အ့ၪ ၦလၧကအီၪဎုၬ လဖၪ ယွၩလူယွၩထၫႇ ဒဲ ဘၪထွ့ၪလၧ ဆၧအီၪကီၪ့အဆၧဖံၭဆၧမၩအဂူၪဂၩနီၪ ဘၪဖီၪ့ထၪ့ဖံၭထၪ့ဝ့ၫ ကၠၧၫ့ကၠၧၫ့လၧ ၥၫ့မုၥၫ့ခၫႇ Bro, Sr လဖၪအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ
ၥၫ့ဎွၩဖရၫစံစံၭဝ့ၫဒၪ ဆၧအီၪကီၪ့ဆရၫ ဆရၫမုၪလဖၪနီၪ မွဲဝ့ၫဒၪလၧ ဆၧဆူၩနဲၩဖၧၩ့ ဆၧကိၪ့ဘၪကိၪ့ၥ့ၪအဂး ထုၪ့ဘီၩ့နီၪလီၫႉ
နးအဲၪဖီၫဘွၩ
24.5.2022