မွဲလၧကိၫဘံဆၧဆၫဒဲ ထံၪခးဖၧၩ့ ဆၧတုၩ့ထၪ့တုၩ့လၩ့လဖၪအကၠီၩ့ Broလဖၪနီၪ ဝဲထၪ့ဘၪ ၥဖၠးလဖၪအဂဲး

မွဲလၧကိၫဘံဆၧဆၫဒဲ ထံၪခးဖၧၩ့ ဆၧတုၩ့ထၪ့တုၩ့လၩ့လဖၪအကၠီၩ့ Broလဖၪနီၪ ဝဲထၪ့ဘၪ ၥဖၠးလဖၪအဂဲး

မွဲလၧကိၫဘံဆၧဆၫခီၫကမံၩ့ႇ မွဲလၧဆၧဒုၭဆၧခၭခီၫကမံၩ့အကၠီၩ့ ဆၧကဲၪထၪ့ဘိၪ့ခိၪၥၫ့ခၫဆၧမၩလိၪ လးလဖၪနီၪ ဘၪဖိၭဘံၭထၬအၥၭအကၠီၩ့ Broလဖၪနီၪ ဘၪထဲၩ့အီၪထဲၩ့ဒၪလၧ အဂံၪ့အဎၫ့ အီၪထၪ့ဘၭဝ့ၫဒၪ ဖိၭ ဘိၭကနံၪ့ယူၭနီၪလီၫႉ

လၧBroလဖၪအကျၩ Broနံၫဂၩယီၩနီၪ ၥၭဘၪ့လၧအၥၭဆုးလီၩ့ ခိၪလၩဘွၩဆၧချဲၩ့လဖၪအဂး အဝ့ၫၥံၪ ချုၭခီၫအခံၫ့နီၪ အလံၩ့အလဲၫ့လအီၪဘၪအဖၧၩ့ ၥီၪ့အ့ၪဘၪ ၥၭဘၪ့လဖၪ ခိၪလၩဘွၩဆၧချဲၩ့နီၪလီၫႉ Broလဖၪနီၪ အီၪလၧအ့ၫယၫဝတံၫခးဒီၪ့ ပၪ့လဲၪဆၧအီၪကီၪ့ဒဲ ပံၩ့နဲၫကိၩ့ဆၧအီၪကီၪ့ဖၧၩ့ Bro ဂၠိၫ့နယူၩမၩ့ဒဲ Br. George အဲၫတၫ လဖၪနီၪလီၫႉ လၧၥဖၠးအဖၧၩ့ ၥၭဘၪ့လဖၪထီးလူၬထၪ့ဝ့ၫဒၪ ဖိၭဘိၭအဂၩ၇၀ဘျဲၪဂီၩ့ ၦပူၬတၭ ဆၧဘိၪ့ဆၧဘၩဖိၪ လဖၪဆ့ မွဲပၫဆ့နီၪလီၫႉ

Broနံၫဂၩယီၩနီၪ ထၪ့ထၬဆၧမၩလိၪလၧပြင်ဦးလွင်ဂီၩ့ဝ့ၫယူၭဒဲ ကဘၪဆုးထဲၩ့လ့ၩထၪ့ဆၧမၩလိၪလၧ တောင်ကြီးနီၪလီၫႉ လါနၫ့မွဲလၧ ကိၫဘံဆၧဆၫအကၠီၩ့ ဆၧမၩလိၪလဝဲထၪ့ဒံၭဘၪအကၠီၩ ဆုးထဲၩ့ထၪ့ဆၧမၩလိၪ လန့ဒံၭဘၪနီၪလီၫႉ ဘဲၫယီၩအဝ့ၫၥံၪယီၩ ၥီၪ့အ့ၪၥၭဘၪ့လဖၪခိၪလၩဘွၩနီၪလီၫႉ ၦအဂဲၫထၪ့ခိၪလၩဘွၩဆၧချဲၩ့ၥဖၠး လဖၪနီၪ အၥုၪ့လုၥၭလုအီၪဝ့ၫဒၪအၪမၬအဂဲးႇ ၥၭလိၭဖၬအီၪဝ့ၫဒၪအဂဲးႇ ၦအဂဲၫထၪ့လဖၪနီၪ အၥၭဎိၩဆံၭဝ့ၫဒၪ အၪမၬဒ့ၭအကၠီၩ့ ကဂၩဒဲကဂၩထီးနဲၪ့ထၬဆၧ န့လမီၪ့ဎီၩ့ဘၪအဂဲးႇ ခိၪနူၬလမီၪ့ဎီၩ့ဘၪၦလဖၪနီၪ ဘၪစူၭကီၪ့ၥီၪ့အ့ၪ ဝ့ၫဒၪအကၠီၩ့ ဆၧကၪဆၧဂဲၩအီၪအၪမၬအဂဲးႇ အဝ့ၫၥံၪယီၩအီၪက့ၪထၬဆၧမၩလိၪအဖၨၪ နံၫဖၨၪအဂဲးႇ အဝ့ၫၥံၪအဂး န့ဘၪအခွးအယၬဘဲၫယီၩၥိၭနီၪ လၩ့ဆၫ့ဝ့ၫဒၪအဂဲးႇ ဆၧမၩလိၪကမံၩ့နီၪ မွဲအထုၬလအီၪဘၪအဂဲးႇ အဝ့ၫၥံၪယီၩ ၥီၪ့အ့ၪၦၡၩခိၪလၩဘွၩအကၠီၩ့ အဝ့ၫၥံၪဆ့ အဆၧၫ့ထ့ၬလၧခိၪလၩဘွၩဆၧချဲၩ့လၧၩ့အ့ၬအဂဲး ဖ့ၪလၫ့ဘၪၦၡၩဆၧကိၪ့ၥ့ၪ ကိၪ့ဘၪအကၠီၩ့ အဝ့ၫၥံၪဆ့ မွဲန့ဘၪထဲၩ့ဆၧကိၪ့ဘၪကိၪ့ၥ့ၪလဖၪအဂဲးႇ ဘဲၫယီၩအၥိၭအ့ၪမွဲ ဆၧဖံၭဆၧမၩလအီၪဘၪ နးမံၩ့စွါဘဲၫအဝ့ၫၥံၪအၥုၪ့အၥၭအၪ့လဲၩ့ထၪ့ၥၭၥ့ၪအဂဲးႇ Bro.George အဲၫတၫနီၪဆ့ စံၭဘၪဝ့ၫ အဂုအိၩနီၪမွဲလၧ ဆၧဆီၪ့ဆၧချဲၫ့အဂးခီၫကမံၩ့ႇ လၥီၪ့ယံၩယါဘၪလံၬအကၠီၩ့ အၥၭခိလၧကဘၪၥီၪ့လံၬအဂးခီၫကမံၩ့အကၠီၩ့ ကဘၪ လ့ၩစိၩလၧ ပၪ့လဲၪဆၧအီၪကီၪ့နီၪ အၪ့ယိၪခဲၫ့ကံၭဝ့ၫလါနၫ့ ဘဲၫယီၩနီၪ မွဲဆၧၥီၪ့လံၬ ဆၧမၩဒၪမ့ၬအီၪထၪ့ယူၭအကၠီၩ့ ဂဲၫအီၪဘၪလၫ့ကိၭမံၩ့ယူၭအဂဲးႇ အဆၧၥၭခိလဖၪဆ့ မွဲလၩ့ၡၩခွံၬယူၭအဂဲး စံၭဘၪဝ့ၫနီၪလီၫႉ

ပၪ့လဲၪဆၧအီၪကီၪ့ Fr.ပက်ထရိတ်ဇော်လင်းသန့်ဆ့ စံၭဝ့ၫဒၪ ၥၭဘၪ့လဖၪနီၪ အခံအလဲၫ့ အီၪထၬဝဲၩ အဂဲးႇ ခိၪလၩဘွၩဆၧချဲၩ့ၥဖၠးယီၩဆ့ မွဲအဝ့ၫစၭထၪ့မၩအ့ၪ ၥၭဘၪ့လဖၪအဂဲးႇ ၥၭဘၪ့လဖၪအဆၧခိးဂဲးခိးဘၭ လဖၪနီၪဆ့ မွဲန့ဂဲးန့ဘၭဝ့ၫဒၪအဂဲး စံၭဝ့ၫဒၪနီၪလီၫႉ

လကၭဒံၭဘၪ Fr.ဆေဗက်စတယ်နီၪဆ့ ဆုးထဲၩ့စံၭဝ့ၫဒၪ ဆၧၫ့ထီအယီၩနီၪ ၥၭဘၪ့လဖၪ မၩလိၪခိၪ လၩဘွၩဆၧချဲၩ့အဂး မွဲအခွးအယၬအဂ့ၩထုၬအဂဲးႇ ၥၭဘၪ့အမံၩ့မွဲဝ့ၫလၧ ယောင်ရွှေသိန်းနီၪစံၭဝ့ၫဒၪ ထၪ့ဘၪၥဖၠး ယီၩအကၠီၩ့ ဆၧမုၬအၥၭဒိၪဒိၪဒ့ၭအဂဲးႇ အဝ့ၫအဂးအခိးအတၩအီၪဝ့ၫအၪမၬအဂဲးႇ ပစီၪဒီၩ့လၧအခီၩ့အိၩနီၪ ဘဲၫယီၩ အဝ့ၫ ကွ့ၭဖီချဲၩ့ ခိၪလၩဘွၩဂဲၫဘၪထၪ့ အၪလ့ၬယူၭအဂဲးႇ မိဂါပက်ထရေးရှာနီၪဒီၭ ဆုးထဲၩ့စံၭဘၪဝ့ၫ ဘဲၫၥဖၠးယီၩ ကကဲၪထၪ့အဂး ၦလၧအခိးဂဲးခိးဘၭဝ့ၫဒၪ ဘိၪ့ခိၪၥၫ့ခၫလဖၪဒဲ Broလဖၪနီၪ စံၭခိးစံၭတၩဘၪဝ့ၫအဂဲးႇ လါနၫ့ အဖိၪမုၪနီၪ ဘၪအၪ့ဆၫဆၧအကၠီၩ့ ဂဲၫထၪ့ၥဖၠးယီၩလချုၭဘၪနီၪ အဝ့ၫအၥၭလမုၬဘၪအဂဲးစံၭဘၪဝ့ၫနီၪလီၫႉ

နးအဲၪဖီၫဘွၩ

11.3.2022