မွန်ဆီညော်မောရစ်ညွန့်ဝေ ကဲၪထၪ့ဘၪ မော်လမြိုင်ကဲၬၥလံၬဆၧအီၪကီၪ့ ၥၫ့ခိၪဒိၪအဂဲး

ထၧၫ့ဖုဝံထံၩၥိၭထီးလူၬၥံၪဧ့ႇ နံၪ့ ၂၀၂၂ လၩအ့ၫဖြ့ၫ၂၄ၥၫ့နီၪ ဆၧမၩလၩမၩဖၩ့ၡီၩ့ ဘၪဆၧကဲၪထၪ့ ၥၫ့ခိၪဒိၪ ဆၧဎိၭထံၪဎိၭဒီၪအီၪဝ့ၫဒၪလၧ ဝံးမော်လမြိုင်နီၪလီၫႉ

လၧဆၧဎိၭထံၪဎိၭနီၪအဖၧၩ့ ကၫဒံၫနဲၫခၠၩဘိၫဒဲ ၥၫ့ခိၪဒိၪဂဲၫထၪ့ဝ့ၫဒၪ ဖိၭဘိၭ၁၀ဂၩနီၪလီၫႉ မော်လမြိုင် ဆၧ အီၪကီၪ့ ၥၫ့ခိၪဒိၪရေမွန်စောဖိုးရေနီၪ မွဲလၧအၥၭဂဲၫၡါထၪ့ဒဲ အဆၧဆီၪ့ဆၧချဲၫ့လဂ့ၩနၭလၧၩ့ဘၪအကၠီၩ့ လၧအဝ့ၫ အလးနီၪ ၦၡၩဘၪရွံထၪ့ထဲၩ့ဝ့ၫဒၪ ၥၫ့ခိၪဒိၪအၥၫ့လဂၩနီၪလီၫႉ လၧၦအထိးရွံထၪ့အၥၭ ဘိၪ့ခိၪၥၫ့ခၫလဖၪအကျၩ ၦလၧအဘၪထိးရွံထၪ့အၥၭနီၪ မွဲဝ့ၫဒၪလၧဒိၩ့ပၥံၫ့ဆၧအီၪကီၪ့ မွန်ဆီညော်မောရစ်ညွန့်ဝေနီၪလီၫႉ

ၥၫ့ခိၪဒိၪအၥၫ့ Bp.မောရစ်ညွန့်ဝေနီၪ စံၭဝ့ၫဒၪ အဆိၪထုၬ ယမိစံၭခိးစံၭတၩဘၪ ဖါကဆါနီၪလီၫႉ ဂီၩ့နီၪ လၧဆၧလကြၨၭဘၪအဖၧၩ့ရွံအၪ့ထုၪ့ယၧၩလၧၥၫ့ခိၪကဂၩအလး ဖိၪကဆါနီၪ ယစံၭခိးစံၭတၩဘၪနီၪလီၫႉ ၦလၧအ ဖ့ၪလၫ့ယၧၩ ဆၧကိၪ့ၥ့ၪအဆၧဖၩ့ဒဲ ဂဲးဘၭမွဲဝ့ၫ ၥၭမုဆံၫ့ဎံၪကဆါနီၪဆ့ ယစံၭခိးစံၭတၩဘၪနီၪလီၫႉ ၦလၧအအီၪ ဖျဲၪလၩ့န့ယၧၩ ယမိယဖါနံၫဂၩအခိးအတၩနီၪဆ့ ယအီၪနၪ့ထၪ့စိၩဒဲ ယစံၭခိးစံၭတၩဘၪလီၫႉ ကနံၩယီၩယမုလါ အဝ့ၫၥံၪအီၪလါနၫ့ အဝ့ၫၥံၪနီၪမွဲလအီၪလၧၩ့ဘၪနီၪလီၫႉ လါနၫ့အဝ့ၫၥံၪကအီၪယိလၩ့ယၧၩလၧ မူၭခိၪဘၩ့မုးဒဲ ကအၪ့ကံၩ့ဘၩဆိၪဖၪအ့ၪယၧၩယဂးနီၪ ယနဲၩတၡါလီၫႉ

ၦလၧအဖ့ၪလၫ့ယၧၩမူၩဒၩအဎိၩလမံၩ့ယီၩမွဲဝ့ၫ ၥၫ့ဎွၩဖရၫ့စံၭ နီၪဆ့ ယစံၭခိးစံၭတၩဘၪနီၪလီၫႉ ၦလၧအဂဲၫဖ့ၪလၫ့ယၧၩ ၥၫ့ခိၪဒိၪအဆၧကဲၪလဖၪမွဲဝ့ၫ ကၫဒံၫနဲၫခၠၩဘိၫႇ ၥၫ့ခိၪဒိၪ မာကုတင်ဝင်း ဒဲ ၥၫ့ခိၪဒိၪ ဂၠိၫ့စီၩယီၩဟၫ့ ၥံၪနီၪ ယစံၭခိးစံၭတၩဘၪနီၪလီၫႉ ၦလၧအဂဲၫဖ့ၪလၩဖ့ၪဖၩ့ ဘိၪ့မုနံၩယီၩ လဖၪမွဲဝ့ၫ ၥၫ့ခိၪဒိၪလဖၪႇ ဘိၪ့ခိၪၥၫ့ခၫလဖၪႇ Sr, Bro လဖၪႇ Pastor လဖၪဒဲ ၦဆူၩနဲၩဖိၪၥံၪထီးအလူၬနီၪ ယစံၭခိးစံၭတၩဘၪဒဲ ၦလၧဂဲၫလထီၩ့ဘၪဂီၩ့ အၪ့ကံၩ့ဘၩဆိၪဖၪအ့ၪယၧၩယဂးလဖၪနီၪဆ့ ယအီၪစံၭခိးစံၭတၩဘၪ လၧအလးထယီၩနီၪလီၫႉ

ဂီၩ့နီၪ ၥၫ့ခိၪဒိၪ ရေမွန်စောဖိုးရေ စံၭဘၪဝ့ၫ ဆၧဘိၪ့ဆၧဘၩအဂးမွဲဂ့ၩႇ ထံၪဂဲးခးဂဲးမွဲဂ့ၩႇ ၡၩခံးဂးမွဲဂ့ၩနီၪ ပဝ့ၫၥံၪယီၩ ပကဘၪဝၩ့မၩဎိၭလၩ့ယံၩယံၩၡီၩ့ၡီၩ့နီၪလီၫႉ ဂီၩ့နီၪယမိဆုးထဲၩ့အၪ့ကံၩ့ဘၩဆိၪဖၪ ခးပယၩဖၧၩ့ယီၩ ဆၨၩဒီၪ့ လဖၪဘဲၫၥိၭကအီၪကၧၩ့ဖျိၪ့ထၪ့ၥၭကဖျိၪ့ဎးအဂးႇ ဘဲၫထံၪခးကအီၪထဲၩ့ဎူၫဎူၫဎၩ့ဎၩ့အဂးနီၪလီၫႉ ဂီၩ့ယမိဆုးထဲၩ့ အၪ့ကံၩ့အၪ့ယၫဘၪ ကၫဒံၫနဲၫ ဒဲ ၥၫ့ခိၪဒိၪလဖၪႇ ၥၫ့မုၥၫ့ခၫလဖၪႇ Bro, Sr လဖၪဒဲ ၦဆူၩနဲၩဖိၪလဖၪထီးလူၬ မွဲလၧထံၫဂဲးခးဂဲးႇ ဆၧဘိၪ့ဆၧဘၩအဂဲး ဒဲ ၡၩခံးဂးအဂဲးလဖၪနီၪ ပကကၧၩ့ဖျိၪ့ထၪ့ပၥၭ ကဖျိၪ့ဎးလီၫဂီၩ့ ပကဝၩ့ ခိးဂဲးခိးဘၭကၠၭကၠၧၫ့ကၠၧၫ့လါဆံၭႉ

လၧဆၧထံၪလၩ့ဒီၪလၩ့ကဘျၩ့နီၪအဖၧၩ့ ၦအဂဲၫမၩလၩမၩဖၩ့ဝ့ၫဒၪ ကအီၪဖိၭဘိၭအဂၩ ၇၀၀အဂဲး ပန့ဘၪ ဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

2.5.2022