မော်လမြိုင်ဆၧအီၪကီၪ့ ၥၫ့ခိၪဒိၪရေမွန်စောဖိုးရေကအီၪပွံၩအဂဲး ဘၫတံၫကၫ့ဘိၭဘၪၥ့ၪယၫထၪ့ဝ့ၫဒၪ

မွဲလၧကာနန်ၥနိၫ့အကၠီၩ့ ၥၫ့ခိၪဒိၪရေမွန်စောဖိုးရေနီၪ ကဘၪအီၪပွံၩလၧၥၫ့ခိၪဒိၪလးလၩအဂး အၥၭအီၪထၪ့ဘၭ ယူၭနီၪလီၫႉ  ဆၧနီၪအကၠီၩ့အဝ့ၫယီၩ ကမိအီၪပွံၩအဂဲး ၡိၬထၪ့စိၩလၧလံၬလၧ ဘၫတံၫကၫ့အိၩနီၪလီၫႉ ဘဲၫအဝ့ၫၡိၬထၪ့ထၬ လံၬအၥိၭ ၥၫ့ဎွၩဖရၫ့စံၭ ထိးဆၧၫ့ဝ့ၫဒၪဒဲ Bpယီၩအီၪပွံၩန့ယူၭအဂဲး ဘၫတံၫကၫ့ဘိၭဘၪၥ့ၪယၫထၪ့စိၩထဲၩ့လၧ အဖီၩ့ခွံၬလၩ မ့ၫ၃၁ အဂၫလၩ့၄ နၩရံၫခီၫ မိမၫရံၫလ့ၩဂၬကွ့ၩစိၩလၧအ့ၫလံဇဘဲၭအီၪ ဘိၪ့မုနံၩဖၧၩ့နီၪလီၫႉ ၥၫ့ခိၪဒိၪရေမွန်စောဖိုးရေယီၩဆ့ အၥၭဂဲၫဎိၩထၪ့အကၠီၩ့ အဆၧဆီၪ့ဆၧချဲၫ့လဂ့ၩနၭလၧၩ့ဘၪဒဲ ဖီၪ့ထၪ့ဖံၭထၪ့ဆၧအီၪကီၪ့အဆၧဖံၭဆၧမၩလန့လၧၩ့ဘၪယံၬယူၭ အဂဲး ပၥ့ၪယၫဘၪနီၪလီၫႉ ဆၧနီၪအကၠီၩ့ လၧအဖီၩ့ခွံၬ ၂၀၂၂အိၩ မော်လမြိုင်ဆၧအီၪကီၪ့အဂး ၦၡၩရွံထၪ့ဆိၫထၬဝဲၩ ၥၫ့ခိၪဒိၪအၥၫ့လဂၩနီၪလီၫႉ

အဝ့ၫကအီၪပွံၩအဂဲး ၥၫ့ဎွၩထိးဆၧၫ့ဝ့ၫဂီၩ့ကကၠၪ  လၧအဝ့ၫအလးနီၪ မွဲၥၫ့ခိၪဒိၪအၥၫ့မောရစ်ညွန့်ဝေ ကဘၪနုၬ လၩ့ဖီၪ့ထၪ့ဖံၭထၪ့ဆၧအီၪကီၪ့အဆၧဖံၭဆၧမၩလဖၪအဂဲး ဘၪထွ့ၫလၧခးပယၩ့ဘၫတံၫကၫ့အၥီၫ့ရိၩ့နီၪ လၧအဖီၩ့ခွံၬ၂၀၂၃နံၪ့ လၩမ့ၫ၃၁ၥၫ့အဂၫလၩ့ ၄နၩရံၫခီၫအခံၫ့အိၩ ဘိၭဘၪၥ့ၪယၫထၪ့စိၩဝ့ၫဒၪနီၪလီၫႉ ၥၫ့ခိၪဒိၪ မောရစ်ညွန့်ဝေယီၩနီၪ  လၧအဖီၩ့ ခွံၬ၂၀၂၂ နံၪ့ အထီအိၩ မွဲဘၪထိးရွံထၪ့ထၬအၥၭ ဘဲၫမော်လမြိုင်ဆၧအီၪကီၪ့ၥၫ့ခိၪဒိၪကဂၩအၥိၭနီၪလီၫႉ  စၭထၪ့လၧဘၪကဲၪ ထၪ့ ၥၫ့ခိၪဒိၪအထီအိၩ ဘၪထွ့ၫလၧမော်လမြိုင်ဆၧအီၪကီၪ့အဂးနီၪ အဝ့ၫယီၩမွဲဂဲၫထဲၩ့ ဖီၪ့ထၪ့ဖံၭထၪ့ထၬဝ့ၫဆ့နီၪလီၫႉ ၥၫ့ခိၪဒိၪယီၩနီၪ လမွဲဘၪမော်လမြိုင်ဆၧအီၪကီၪ့ဖိၪဒဲ မွဲလၧဒိၩ့ပၥံၫ့ဆၧအီၪကီၪ့ဖိၪကဂၩတၭ အဝ့ၫယီၩအီၪဖျဲၪထၪ့ဝ့ၫဒၪလၧ မၠီၩ့မၠၭဆၧအီၪကီၪ့နီၪလီၫႉ