မုကနွံၫအထးဖၧၩ့ ဆၧပရၧၫ့လဖၪ

ဘၫတံၫကၫ့စံၭဝ့ၫၡၩခမျၧးဆၧဆုးကျိၭလိၬၥၭဆၧပျီၩဖျ့ၭနီၪ မၩဒိၪထၪ့ထီၫထၪ့
ဒံၫမိၫကရ့ၫစံၫဒဲ ဆၧဘၪလိၬဎွ့ၪဎီၩ့အဂဲး
ဆၧထုၬထၪ့လံၬပရၧၫ့ဒဲ ၡၩခမျၧးဆၧဆုးကျိၭလိၬၥၭဆၧပျီၩဖျ့ၭနီၪ မွဲဖၧၩ့ၥၭလၧဘိၭဘၪၥ့ၪ ယၫထၪ့ ဆပရၧၫ့အတီၩအလီၩ့လဖၪ လၧဆၧဘံၪ့ၥူၫလအီၪဘၪအၥိၭႇ ၡၩခမျၧးအကျၩ ဆၧဘၪလိၬ ဎွ့ၪဎီၩ့ဒဲ ဒံၫမိၫကရ့ၫစံၫ ကဒိၪထၪ့ထီၫထၪ့အဂးဆ့ အကၧၩ့ဒိၪဝ့ၫတၡါအဂဲး လၧအဖီၩ့ခွံၬ လၩမ့ၫ၁၃ၥၫ့အိၩ အုရီၩပၭထံၫခးဖၧၩ့ ဆၧဒူၩဆၧယၪ့ဒဲ စူၭကီၪ့မၩဎိၭလၩ့ဆၧခရၧၫ့ အဂး ခရၧၫ့ဖိၪလဂၩမွဲဝ့ၫ ဘၫတံၫကၫ့ဖၧၩ့ မိၫဆံၫညီၫ Janusz Urbanczyk စံၭဝ့ၫဒၪနီၪလီၫႉ

အံၫစရ့ၩဒဲ ပၫလဲစတဲၩ့ ဆၧဘံၪဘူၪထၪ့ဒၩ
စၭထၪ့လၧ လၩမ့ၫ ၁၀ၥၫ့ အံၫစရ့ၩဒဲ ပၫလဲစတဲၩ့ ဆၧဘံၪဘူၪထၪ့ဒၩနီၪ မွဲအဂဲး ဂဲၫဆီၪ့ထၪ ့ဝ့ၫနီၪလီၫႉ ဟၩမဲနီၪခၬၡိၭစိၩ ဒိၩ့ကၠံၫလၧ အံၫစရ့ၩအီၪကကဲၩ့အိၩအကၠီၩ့ အံၫစရ့ၩထံၪ ခးဖိၪ ဖိၭဘိၭအဂၩအထီၫနီၪ ဘၪၥုၭအီၪကၠၭအၥၭ တဲၩအၫဘံဝံး ဆၧဒူၩဆၧယၪ့အီၪဝ့ၫအလး လဖၪနီၪလီၫႉ
ပြီပတံၬမုနံၩလဂီၩခီၫနီၪ အံၫစရ့ၩၥံၪ ထၪ့ဒုၭထဲၩ့ ဂၫဆၫလၧကဘၩ့ယူၩလဖၪအခၫ ၦၡၩအီၪ အလး တၨၭဖၭထီၫလၩ့ဎီးခွံၬကဖျိၪ့နီၪလီၫႉ စၭထၪ့လၧလၩမ့ၫ၁၀ၥၫ့ထီၩ့စိၩလၧ၂၀ၥၫ့နီၪ ဆၧဘံဘူၪ ထၪ့ဒၩယီၩအကၠီၩ့ အံၫစရ့ၩခးဖိၪၥံၫဝ့ၫဒၪ အၡၩထုၬ၇ဂၩဒဲ ဂၫဆၫခးဖိၪ ၥံၫဝ့ၫဒၪ အဂၩ၆၇ဂၩနီၪလီၫႉ ထံၪခး၂ခးဆၧဘံၪဘူၪထၪ့ဒၩယီၩ ကအီၪပထုၬခွံၬၥၭအဂး ဆၧအကၠီၪ့ အဖျီၩ့အီၪဝ့ၫဒၪကမံၩ့နီၪ ထံၪခး၂ခးယီၩအကျၩ အီၪက့ၪထၬ ဆၧဎူၫဆၧဎၩ့အဂး ဆၧယိလါ လဖၪနီၪ မွဲကဘၪမၩမၧၫ့ထၪ့့ဝ့ၫအဂဲး အီၪလၧယူၫက့ၫကဲၬ၁လံၬဆၧမၩဘိၪ့မၩဆၧၩ့ဆၧအ့ၫဂၠံၫစံၫ
CAFODနီၪ စံၭဘၪဝ့ၫ လီၫႉ

ဆၧဘံၪဘူၪထၪ့ဒၩဆၧ လၧစူၪဝဲၩလဖၪ ဘဲၫကအီၪပထုၬခွံၬၥၭအဂး ၥၫ့ဎွၩဖရၫ့စံၭ အၪ့ယၫထၪ့ဘၪ အံၫစရ့ၩဒဲ ပၫလဲစတဲၩ့ ထံၪခးခိၪနါလဖၪအဂဲး
လၧလးဆံၫ့ဎံၪအဖၫ့ခိၪ ထံၪခး၂ခးထၪ့ဒုၭလိၬၥၭအကၠီၩ့ ၦၡၩဘၪၥံၫဘၪဆၫဝ့ၫအၪလ့ၬ ယူၭတၭ လၧကဆါယွၩအမံၩ့ ၥၫ့ဎွၩအၪ့ယၫထၪ့ဘၪ ဘဲၫၥိၭကအီၪပထုၬခွံၬ ဆၧဒုၭဆၧခၭလဖၪ နီၪလီၫႉ
လၧၦၡၩဘၪၥံၫလဖၪအဖၧၩ့ ဖိၪၥၪဆံၭလဖၪပၫထဲးဆ့တၭ ဆၧအယီၩနီၪမီၪ့ဎီၩ့ ၦၡၩဘိၩ့ ယီၩလဖၪနီၪ လမိၥုၪ့ထၪ့ဘၪအထီလၧယၫဂီၩ့ မၩဂၭဂီၩ့ခွံၬဆၧနီၪလီၫႉ လၧခးၥဲၫ့ထၧၫ့ဘံၪ့ယၫ ဆၧမၩဆၧၩ့အဖၧၩ့ အီၪပထုၬခွံၬ စူၪဝဲၩဆၧဒုၪဒၩလိၬၥၭယီၩဂီၩ့ ၥုၪ့ထၪ့ထဲၩ့ဘၪ ဆၧဎူၫဆၧဎၩ့အဂး ၥၫ့ဎွၩ ဖရၫ့စံၭ အၪ့ယၫထၪ့ဘၪ အံၫစရ့ၩဒဲ ပၫလဲစတဲၩ့ ထံၪခးခိၪနါလဖၪနီၪလီၫႉ လကၭဒံၭဘၪ ဘဲၫ အဝ့ၫၥံၪ ကဒၪဎိၭလၩ့လိၬၥၭႇ ကကွဲၪဖျါခွံၬလိၬၥၭႇ ကဖိၭလိၭထၪ့ထဲၩ့ ဆၧဎူၫဆၧဎၩ့ဂီၩ့ အီၪထဲၩ့ဘဲၫ ထၧၫ့ဖုဝဲၥိၭကန့အဂးဆ့ အၪ့ကံၩ့ဘၩဆိၪဖၪကၠၭအဂဲး ၥၫ့ဎွၩဆုးထဲၩ့စံၭဘၪဝ့ၫ နီၪလီၫႉ
ခးအံၫ့ဒံယၭကဲၬၥလံၬဆၧဘိၪ့ဆၧဘၩဖိၪလဖၪ ထိးဆၧၫ့ဘၪ မိဆၧအီၪကီၪ့အဂး
ၦၡၩကဖီၪ့ထၪ့ဖံၭထၪ့ဆၧလဖၪအဂဲး
လၧလၩမ့ၫ၁၁ၥၫ့အိၩ ၥၫ့ဎွၩဖရၫ့စံၭ ထုၬထၪ့ဘၪ ကဲၬၥလံၬဆၧအီၪကီၪ့ဆရၫႇမုၪလဖၪ ကဖီၪ့ ထၪ့ဖံၭထၪ့ကဆါယွၩအဆၧဖံၭဆၧမၩအဂးနီၪလီၫႉ လၧဆၧအီၪကီၪ့ဆၧဖံၭဆၧမၩအဖၧၩ့ ဘဲၫၥိၭ ၦမုၪႇ ခွၫလဖၪကဂဲၫနုၬလၩ့ပၫအဂး ၥၫ့ဎွၩကိၭဖံၭၥိၭဆၧနီၪ ခးအံၫ့ဒံယၭကဲၬၥလံၬ ဆၧဘိၪ့ဆၧဘၩ ဖိၪလဖၪ ထိးဆၧၫ့ဝ့ၫအဂဲးပၥ့ၪယၫဘၪနီၪလီၫႉ
ဆၧလၧဆၧအီၪကီၪ့ဆရၫႇမုၪလဖၪနီၪ လချုၭၥၫ့မုၥၫ့ခၫလဖၪ လ့ၩစိၩလၧ ၦဆူၩနဲၩဖိၪၥံၪ အအီၪ လထီၩ့ဒံၭဘၪအထီနီၪ အဝ့ၫၥံၪယီၩလ့ၩထီၩ့ဂုစိၩလၧ ၦဆူၩနဲၩဖိၪၥံၪအအီၪဂီၩ့ လ့ၩလီၩ့ ၥီၪ့ၥၫ့ဘၪအဝ့ၫၥံၪကဆါယွၩအလူအထၫအဂဲး ဆၧအီၪကီၪ့ဆရၫမၫတံၩယၩနီၪ စံၭဝ့ၫဘဲၫနီၪ အၥိၭနီၪလီၫႉ
လၧခးပယၩ့ဖိၪၥံၪကၠၧၫ့ကၠၧၫ့ ၥၫ့ဎွၩဖရၫ့စံၭ လုထၪ့မံဆၩဆၧလုထၪ့ဂီၩ့ အၪ့ကံၩ့ဘၩဆိၪဖၪအ့ၪ ခးပယၩ့အဂဲး
လၧခးပယၩ့အဖၧၩ့ ၦလၧအဘၪဒၪဆၧၫ့ယၫ ဆၧကၪဆၧဂဲၩလဖၪကၠၧၫ့ကၠၧၫ့ မိကဲၬၥလံၬ ဆၧအီၪကီၪ့ယီၩ အီၪဝ့ၫၥုၪ့ၥၭလဖျိၪ့ဎးအဂဲး လၧအဖီၩ့ခွံၬလၩမ့ၫ၁၆ၥၫ့အိၩ ၥၫ့ဎွၩဖရၫ့စံၭ လ့ၩခိၪလ့ၩ နါဂီၩ့ လုထၪ့လၩ့ဎိၭမံဆၩဆၧလုထၪ့လၧ ဝံးရီၩမၭအိၩနီၪလီၫႉ
စၭထၪ့လၧ လၩဖ့ၫဖီၫဝၫရံၫအိၩဒဲ ထီၩ့မုဆၫကနံၩယီၩ ပယၩ့ၥုၭလဖၪ ထၪ့အၪ့ဂူၭၦဒိၪ အလး အကၠီၩ့ ၦၡၩဘၪၥံၫဒဲ ဘၪထိးဖီၪ့ၥၭႇ ဘၪထိးမၩနၧၩ့မၩစၪၥၭ အီၪထၪ့ဝ့ၫအၪလ့ၬ ယူၭနီၪလီၫႉ လၧမံဆၩဆၧလုထၪ့ ဆၧၥၭထိၬပရၧၫ့အဖၧၩ့ ၥၫ့ဎွၩစံၭဝ့ၫဒၪ ပကဘၪပၧၩ့ထၬ ဆၧဆူၩနဲၩႇ ဆၧကၧၩ့ဖျိၪ့ၥၭႇ ဒဲ ဆၧတီၩဆၧလီၩ့ အဂဲးနီၪလီၫႉ
လကၭဒံၭဘၪ ပဝ့ၫၥံၪလဖၪ ထီးၥုၪ့ၥၭလလၩ့ဖၭဘၪအဂး ပကဘၪထုၪ့ပၥၭဒဲ ဆၧအ ယီၩနီၪ အီၪဂဲၫလၧမုၪခီၩ့လဲးအီၪအကၠီၩ့ မၩကဲၪထၪ့ ဆၧၥုၪ့ခ့ၭၥၭခ့ၭလဖၪန့နီၪလီၫႉ ပကဘၪအီၪ လၧ ထၧၫ့ဖုဝဲၥုၪ့ၥၭဂီၩ့ လၧဆၧဒုၭဆၧခၭအကျၩႇ လၧဆၧမ့ၬလဲၩ့ၥၭဂဲၫ့အကျၩ ပကဘၪနၪ့ထၪ့ ဆၧၥၭထိၬပရၧၫ့အဂဲးႇ ပကဘၪကဲၪဝ့ၫဒၪ ၦလၧအမၩကဲၪထၪ့ဆၧဎူၫဆၧဎၩ့လဖၪအဂဲးႇ လၧ ဆၧကၪဆၧဂဲၩ အကျၩ ထီးပလၥၭနၪ့ဘၪယွၩအဂး ပကဘ အၪ့ကံၩ့ဘၩဆိၪဖၪအဂဲးႇ ဘဲၫပကဖီၩ့ဖျ့ၭလၧ မုၪခီၩ့လဲးအစူၪဖၧၩ့ဒဲ ဆၧနိၫ့ဆၧနါဖၧၩ့အဂး ကဆါဎြံၬအၪ့ကံၩ့ဘၩဆိၪဖၪ အ့ၪပၧၩအဂဲး ၥၫ့ဎွၩလီၩလၩ့လါ လၩ့ဝ့ၫနီၪလီၫႉ
ဘၪထွ့ၪလၧ ကိုဗစ်ဆၧဆၫအကၠီၩ့ ခးအိနိ္ဒယ ကဲၬၥလံၬဘိၪ့ခိၪၥၫ့ခၫ အဂၩ ၁၆၀ အၥၭဘၪၥံၫခွံၬအဂဲး
မုဆၫကနံၩယီၩ ခးအိန္ဒိယအဖၧၩ့ ဘၪထွ့ၪလၧ ကိုဗစ်ဆၧဆၫအကၠီၩ့ ကနံၩနီၪ ၦၡၩၥံၫဝ့ၫဒၪ ဖိၭဘိၭအဂၩ၄၀၀၀နီၪလီၫႉ လၧအဖီၩ့ခွံၬ မု၅နွံၫအထးဖၧၩ့ ပၥ့ၪယၫဘၪ ကဲၬၥလံၬ ဘိၪ့ခိၪၥၫ့ခၫ အဂၩ၁၆၀နီၪ ဘၪၥံၫလၧဆၧဆၫယီၩနီၪလီၫႉ လၧအဂၩ၁၆၀အဖၧၩ့နီၪ ၥၫ့ခိၪဒိၪပၫ ထဲးဒံၭ၃ဂၩဒံၭအဂဲး ခးအိန္ဒိယကဲၬၥလံၬဆၧအီၪကီၪ့မဲၭကဇံၩ့ခိၪနါဒိၪ Fr.Suresh Mathew အဆၧလီၩၥ့ၪယၫအဖၧၩ့ ပၥ့ၪယၫဘၪနီၪလီၫႉ
လၧခးအိန္ဒိယအဖၧၩ့ ကဲၬၥလံၬဘိၪ့ခိၪၥၫ့ခၫ ထီးလူၬအီၪဝ့ၫဒၪ အဂၩ၃၀၀၀၀လီၫအကၠီၩ့ ကနံၩနီၪ ၥၫ့မုၥၫ့ခၫၥံၫဝ့ၫ ဖိၭဘိၭ၄ဂၩနီၪ မွဲဆၧအၪ့ယိၪခဲၫ့ကံၭ ကဲၪထၪ့ဝ့ၫလၧဆၧအီၪကီၪ့အဂး အၪမၬနီၪလီၫႉ ၥၫ့မုၥၫ့ခၫအၪဒၪဆၧနီၪ လၧအခံၫ့ဂီၩဂီၩအဖၧၩ့ လထိးဘၠၩ့ဘၪဘၪၥၭအကၠၠီၩ့ အၥၭ ဘၪၥံၫဝ့ၫဒၪနီၪ Bishop.Gerald Almeida ယီၩ အၥၭလမုၬဘၪအဂဲး လီၩဝ့ၫနီၪလီၫႉ ၥၫ့မုၥၫ့ခၫလဖၪယီၩ ဖီၪ့ထၪ့ဖံၭထၪ့ကဆါယွၩအဆၧဖံၭဆၧမၩ လၧၡၩခမျၧးကျၩအထီ ဆၧဆၫ ဘၪဂါဝ့ၫအကၠီၩ့ ၥၫ့ခိၪဒိၪယီၩ ဝဲလၫ့ထၬအ့ၪၥၫ့မုၥၫ့ခၫႇ မံၭထၭမုၪႇ မံၭထၭခွၫလဖၪအဂး ကွၫရၫ့တံၩ့စၫ့တၫဂီၩ့ အ့ၪမွဲအဝ့ၫၥံၪ အီၪလဆီၫ့ဘၪစွါဘဲၫ အၪ့မၧၫ့ထၬအဝ့ၫၥံၪ ၥိၫ့စိၩ ဆၧပရၧၫ့ လၧစၫ့တၫအဂဲး ၥၫ့ခိၪဒိၪ ယီၩလီၩၥ့ၪ ယၫဝ့ၫဒၪဘဲၫယီၩအၥိၭနီၪလီၫႉ
နးအဲၪဖီၫဘွၩ

ပယၩ့ၥုၭဖိၪလဖၪခၭလၧ စူၪဝဲၩဖၭဒိၪအကၠီၩ့ ၦအအီၪဂူၪၥၭလၧ ကဲၬၥလံၬၥရိၬဖၧၩ့လဖၪအဖၧၩ့ ၥံၫဝ့ၫဒၪ၄ဂၩအဂဲး
စၭထၪ့လၧလၩမ့ၫ၂၃ၥၫ့နီၪ လၧကယၩဆၨၩခးဒီၪ့ႇ လွဲၫ့ကီၫဝံးဖၧၩ့ ပယၩ့ၥုၭလဖၪဒဲ PDF ၡၩ ခမျၧးၦဖီၪ့စူၪဝဲၩလဖၪအကျၩ ဆၧဒုၭဆၧခၭအဂဲးဂဲၫဆီၪ့ထၪ့နီၪလီၫႉ
ဆၧဒုၭဆၧခၭကဲၪထၪ့ဝ့ၫအကၠီၩ့ ၦလနၩ့နၩ့နီၪ အီၪကၠၭလၧအဂံၪ့အဎၫ့ လဘၧၫ့လၧၩ့ဘၪဂီၩ့ လ့ၩဎဲၪ့အီၪကၠၭလၧ ကယၩ့ၥၫယၫတဝၫ့ ကဲၬၥလံၬၥရိၬဖၧၩ့နီၪလီၫႉ အဝ့ၫၥံၪလ့ၩအီၪဂူၪၥၭအထီ လၧ လၩမ့ၫ၂၃ၥၫ့လဂီၩ၁နၩရံၩအခံၫ့နီၪ ပယၩ့ၥုၭဖိၪလဖၪ ခၭဖျိၬထၪ့စူၪဝဲၩဖၭဒိၪလဖၪတၭ ၦအီၪဂူၪၥၭ လၧၥရိၬဖၧၩ့၄ဂၩနီၪ အၥၭဘၪၥံၫဝ့ၫဒၪဂီၩ့ ၦလနၩ့နၩ့နီၪ ဘၪထံၭဘၪဆၫဝ့ၫဒၪလီၫႉ
ၥရိၬဖၧၩ့ဆၧဂၭဂီၩ့ဆိၫ့ခွံၬအီၪဝ့ၫ ဎွ့ၩပၥ့ၪလဲၪနီၪ လၥ့ၪယၫဝ့ၫဒံၭဘၪဒဲ လၧကဲၬၥလံၬၥရိၬဖၧၩ့ ပယၩ့ၥုၭဖိၪလဖၪ ခၭၡိၭဆၧဘဲၫယီၩၥိၭနီၪ ထိးဆၧၫ့ဝ့ၫလန့ဘၪအဂဲး ကဲၬၥလံၬၦဆူၩနဲၩဖိၪလနၩ့နၩ့ နီၪ ထံၭလၫ့ထၬဝ့ၫလၧအဝ့ၫၥံၪ အSocial Mediaဖၫ့ခိၪအဂဲးပဒၪဘၪနီၪလီၫႉ နးအဲၪဖီၫဘွၩ
၂နွံၫလနွံၫ
အံၫတလံၫထံၫခး က့ၫဘဲလဲၪ့ၥိၪဂၭဂီၩလၩ့ထ့ၬအကၠီၩ့ ၦၡၩၥံၪဝ့ၫဒၪ ၁၄ဂၩအဂဲး
လၧလၩမ့ၫ၂၃ၥၫ့အိၩ အံၫတလံၫထံၪခး လံၩခံၫကကဲၩ့ခီၫ Mottarone Mountain အ လးကကဲၩ့နီၪ ၦၡၩကွ့ၩထူၬအမုၬ က့ၫဘဲလဲၪ့ၥိၪ ဂၭဂီၩ့လၩ့ထ့ၬအကၠီၩ့ ၦၡၩၥံၪဝ့ၫဒၪ၁၄ဂၩနီၪ လီၫႉ
အံၫတလံၫထံၪခး ကဲၬၥလံၬၥၫ့ခိၪဒိၪလဖၪအခရၧၫ့ ခိၪနါဒိၪထုၬ Cardinal Gualtiero Bassettiနီၪ ၦအဘၪၥံၪလဖၪအဂးဒဲဂံၪ့ဒီၪ့ဖိၪၥံၪလၧအီၪထးဝ့ၫဒၪလဖၪအဂးအဝ့ၫအၥၭလမုၬ ဘၪအဂဲးႇ အၪ့ကံၩ့ဘၩဆိၪဖၪအ့ၪဝ့ၫအဂဲး စံၭဘၪဝ့ၫနီၪလီၫႉ
လၧက့ၫဘဲလဲၪ့ၥိၪလၩ့ထ့ၬဝ့ၫဒၪအလး Novaraဆၧအီၪကီၪ့အဖၧၩ့ ၥၫ့ခိၪဒိၪ Franco Guilio Brambillaနးဆ့ လၧဂံၪ့ဒီၪ့ဖိၪလဖၪအဖၫ့ခိၪ ဘဲၫၥၭမုဆံၫ့ဎံၪအဆၧဖၩ့ကလၩ့ဘၪအဂး အၪ့ကံၩ့ဘၩဆိၪဖၪအ့ၪဝ့ၫနီၪလီၫႉ
လဲၪ့ၥိၪယီၩဘၪလၩ့ထ့ၬနီၪ ဘၪန့လဲၪအဂဲး ၦၡၩမၩခွါယိဘိၩ့ဒံၭနီၪလီၫႉ လၧၦအၥံၪလဖၪ အကျၩ ဖိၪၥၪဆံၭဖိၪပၫထဲးဝ့ၫဒၪကဂၩဒဲ လခဲၫ့ဖိၪၥၪဆံၭကဂၩနီၪဘိၭ ဘၪလ့ၩထၪ့လၧဆၧဆၫ ဂံၪ့အဂဲး ပၥ့ၪယၫဘၪနီၪလီၫႉ
နးအဲၪဖီၫဘွၩ

ၦအအီၪဒုၩၥၭလၧ ဆၧဘိၪ့ဆၧဘၩအလးလဖၪနီၪ ထီးမၩနၧၩ့မၩစၪဘၪလဂ့ၩအဂး ခးပယၩ့ကဲၬၥလံၬၥၫ့ခိၪဒိၪခရၧၫ့ အၪ့ယၫထၪ့ဘၪဝ့ၫအဂဲး
လၧအဖီၩ့ခွံၬလၩမ့ၫ၂၅ၥၫ့အိၩ ခးပယၩ့ကဲၬၥလံၬၥၫ့ခိၪဒိၪခရၧၫ့ ထုၬထၪ့လံၬ ဘၪထွ့ၪလၧ ဆၧဒုၭဆၧခၬအကၠီၩ့ ၦအဘၪလ့ၩအီၪဒုၩၥၭလၧ ဆၧဘိၪ့ဆၧဘၩလးဖၧၩ့လဖၪနီၪ ထီၩ့မၩနိၫ့မၩနၬ ဘၪ လဂ့ၩအဂးနီၪလီၫႉ
အဝ့ၫၥံၪထုၬထၪ့လံၬယီၩ ဘၪထွ့ၪလၧလၩမ့ၫ၂၃ၥၫ့ မုနၩအိၩ ပယၩ့ၥုၭဖိၪလဖၪ ခၭၡိၬ စူၪဝဲၩဖၭဒိၪလၧလွဲၫ့ကီၫ ကယၩ့ၥၫယၫၥရိၬအကၠီၩ့ ၦအလ့ၩဎဲၪ့အီၪအၥၭလၧၥရိၬဖၧၩ့အကျၩ ၦၥံၫ ဝ့ၫ၄ဂၩဒဲ ၦလၧအဘၪထံၭဘၪဆၫလဖၪအဂး ထိစိၩဝ့ၫဂီၩ့ ထုၬထၪ့ဝ့ၫနီၪလီၫႉ
မွဲလၧကိၫဘံ၁၉ဆၧဆၫခီၫကမံၩ့ လၧဆၧဒုၭဆၧခၭအဂဲးခီၫကမံၩ့ အဝ့ၫၥံၪယီၩဘၪဒၪ ဆၧၫ့ယၫလၧ ဆၧကၪဆၧဂဲၩအၪမၬနီၪလီၫႉ လၧလၩမ့ၫ၂၃ၥၫ့မုနၩအိၩ ကယၩ့ၥၫယၫၥရိၬဖၧၩ့ ၦလၧအဂဲၫဎဲၪ့အီၪၥၭလဖၪနီၪ လမွဲဘၪ ပဖီၪ့စူၪဝဲၩလဖၪတၭ ဘဲၫကဖီၩ့ဖျ့ၭလၧ ဆၧမၩနၧၩ့မၩစၪ အဂးနီၪ အဝ့ၫၥံၪဂဲၫဎဲၪ့အီၪအၥၭနီၪလီၫႉ လါနၫ့ နၥံၪခိၭခွံၬယၩ့ဖီးၥၪလဖၪ နၥံၪခၭၡိၭစိၩ စူၪဝဲၩ ဖၭဒိၪလဖၪအကၠီၩ့ ၦၡၩဘၪၥံၫဝ့ၫဒၪ၄ဂၩဒဲ ဘၪထံၭဘၪဆၫဝ့ၫဒၪ၈ဂၩနီၪလီၫႉ
အီၪထးၦအဂူၪဂၩနီၪဘိၭ မုခံၭၥၫ့နၩဘၪလ့ၩအီၪၥူၫထဲၩ့ၥၭ လၧၡိၭကျၩနီၪလီၫႉ ၥွံၫထံၫလၧ အလၩ့ဆၩ့ထးၥရိၬဖၧၩ့လဖၪယီၩ လမွဲဘၪဒူၪဒၩအၥွံၫတၭ မွဲလၧပထၧၫ့ဖုဝဲလဖၪအၥွံၫထံၫလီၫႉ အဝ့ၫၥံၪဘၪၥံၫအကၠီၩ့ပဝ့ၫၥံၪလဖၪ ပၥၭအုၭဝ့ၫဒၪအၪမၬနီၪလီၫႉ ၥရိၬနီၪဂၭဂီၩ့ဝ့ၫဒၪအၪမၬအ ကၠီၩ့ ဆၧအယီၩပဒၪဘၪ ၦၡၩဘၩကၠဲၬအလးလဖၪမၬ ထၪ့ဒူၪဒၩဝ့ၫနီၪ အၧၩ့ၥၫ့ဝ့ၫနၭမၬလ့ၬယူၭ နီၪလီၫႉ လကၭဒံၭဘၪ လၧလွဲၫ့ကီၫကကဲၩ့ခီၫ ဆၧဒုၭဆၧခၭအကၠီၩ့ ၦအဘၪစဲၪ့မံၩ့ဂၭဖျိၭအီၪထၪ့ ဝ့ၫဒၪ ဖိၭဘိၭအဂၩ၂၀၀၀၀ယူၭအဂဲးႇ အဝ့ၫၥံၪအဂး ဆၧအၪ့ဆၧအီၩႇ ဆၧပိၭဆၧလၫ့ႇ ၥံၪ့ဎွံၪဖၭ စၧၩ့လဖၪ လိၫဝ့ၫဒၪအဂဲးႇ ဆၧအဂဲးလဖၪယီၩနီၪ ထံၪခးဂူၪဂၩလၥ့ၪယၫဒံၭဘၪအဂဲးႇ ဆၧလၧ ဘၩယွၩလးႇ ဆၧမၩလိၪလးဒဲ ဆၧဆၫဂံၪ့လဖၪနီၪ မွဲဆၧအလးလၧဆၧဒူၩဆၧယၪ့အီၪဝ့ၫနီၪ ကြၨၭပထုၪ့လၩ့ကၠၭ ပၥၭအဂဲးႇ ၦၡၩအၪဒၪဆၧ ဘၪၥံၫဘၪဆၫဝ့ၫဒၪဒဲ ဘၪကဲၪထၪ့ၦအဘၪစဲၪ့ မံၩ့ဂၭဖျိၭလဖၪအကၠီၩ့ ဆၧဘၪထွ့ၪ အီၪခရၧၫ့လဖၪ ဘဲၫၥိၭကအီၪပထုၬခွံၬ ဆၧတုၩ့ထၪ့တုၩ့လၩ့ ယီၩအဂဲး ကွ့ၭလၩ့အၪ့ယၫထၬဝ့ၫနီၪလီၫႉ
လကၭဒံၭဘၪ ဆုးထဲၩ့ကွ့ၭလၩ့ထၬဝ့ၫ ပအၪ့ယၫထၪ့ဆၧယီၩနီၪ လမွဲဘၪဘဲၫ ၡၩအမၩ ထံၪဂဲးခးဂဲးလဖၪတၭ မွဲဒၪဘဲၫဆၧဘိၪ့ဆၧဘၩခိၪနါလဖၪအဆၧအၪ့ယၫထၪ့လီၫအဂဲး ဒဲ ခးပယၩ့ဖၧၩ့ ဘဲၫၥိၭဆၧဎူၫဆၧဎၩ့ကအီၪထၪ့ဖျဲၪဖျဲၪအဂး အၪ့ကံၩ့ဘၩဆိၪဖၪကၠၭဝ့ၫအဂဲးႇ ဘဲၫၥိၭ ပထဲၩ့အီၪထဲၩ့ ဘဲၫထၧၫ့ဖုဝဲၥိၭကန့ထၪ့ထဲၩ့အဂး ယိလါဝ့ၫအဂဲး ၥၫ့ခိၪဒိၪခရၧၫ့ယီၩ ကွ့ၭလၩ့ ထၬဝ့ၫနီၪလီၫႉ
နးအဲၪဖီၫဘွၩ
ခးပယၩ့ဆၧဎူၫဆၧဎၩ့ကန့အဂး ခးဖံလံပဲၫ့ ကဲၬၥလံၬၥၫ့ခိၪဒိၪခရၧၫ့
အီၪက့ၪထၪ့ဘၪ ဆၧအၪ့ကံၩ့ဘၩဆိၪဖၪဆၧမုနံၩအဂဲး
ဘဲၫခးပယၩ့ကန့ထၪ့ဘၪ ဆၧဎူၫဆၧဎၩ့အဂး ခးဖံလံပဲၫ့ကဲၬၥလံၬၥၫ့ခိၪဒိၪခရၧၫ့ခိၪနါ ဒိၪနီၪ အၪ့ယၫထၪ့ အထံၫခးဖၧၩ့အီၪဝ့ၫဒၪ ဆၧအီၪကီၪ့လဖၪ ဘဲၫကလုထၪ့မံဆၩဆၧလုထၪ့ဂီၩ့ ကအၪ့ကံၩ့ဘၩဆိၪဖၪအ့ၪ ခးပယၩ့အဂးနီၪလီၫႉ
ခးဖံလံပဲၫ့ကဲၬၥလံၬၥၫ့ခိၪဒိၪခရၧၫ့ ခိၪနါဒိၪ ရိၫမူၩလိၫဘၫလဲယီၩ အီၪက့ၪထၪ့ဘၪ လၩမ့ၫ၃၀ၥၫ့နီၪ မွဲမုနံၩလၧ ခးပယၩ့အဂးႇ အကၧၩ့ဒိၪထုၬ ခးပယၩ့ကဲၬၥလံၬဆၧအီၪကီၪ့အဂး အဝ့ၫၥံၪ အထံၪခးဖိၪလဖၪ ကအၪ့ကံၩ့ဘၩဆိၪဖၪထၪ့ဆၧမုနံၩနီၪလီၫႉ
မုနံၩအနီၪ ဘၪလၩ့ဎိၭလၧ နၫ့ဆါၥၧၫ့ဂၩယွၩလဂၩဘိၪ့မုနံၩဂီၩ့ ခးပယၩ့ဖၧၩ့ ဆၧဘံၪဘူၪ ထၪ့ဒၩလဖၪ ဘဲၫကဂီၩ့ခွံၬဖျဲၪဖျဲၪအဂးဒဲ ၦလၧအလိၪဘၪ ဆၧဎူၫဆၧဎၩ့လဖၪအဂး ပကအၪ့ ကံၩ့ဘၩဆိၪဖၪကၠၭအဂဲး လၧအဖီၩ့ခွံၬပူၭတပၠါမုနံၩအိၩ ၥၫ့ခိၪဒိၪဘၫလဲယီၩ ထုၬထၪ့လံၬဂီၩ့ နၫ့ဆၫ့ထွ့ၪ အၥိၪလဖၪနီၪလီၫႉ
လၧလၩဖ့ၫဖီၫဝၫရံၫ၆ၥၫ့ဒၪအိၩဆ့ ခးဖံလံပဲၫ့ကဲၬၥလံၬၥၫ့ခိၪဒိၪခရၧၫ့နီၪ ကွ့ၭၥိၫ့စိၩလံၬ လၧကၫဒံၫနဲၫခၠၩမီၫ့ဘိၫအအီၪကဘံၪ့ဒံၭနီၪလီၫႉ လၧလံၬဖၧၩ့နီၪဘိၭ ကွ့ၭလၩ့ထၬဝ့ၫဒၪ လၧဆၧ ကၪဆၧဂဲၩဆၧၫ့ထီဖၧၩ့ယီၩ ပဝ့ၫၥံၪလဖၪ ပအီၪလၧခးပယၩ့ဖိၪလဖၪ ကကဲၩ့ဎးလီၫအဂဲးႇ ပအၪ့ကံၩ့ဘၩဆိၪဖၪန့အ့ၪ ခးပယၩ့အဂးအဂဲး ကွ့ၭလၩ့ထၬဝ့ၫဒၪနီၪလီၫႉ

၂၀၂၀နံၪ့အဖၧၩ့ ၦၡၩအၪဒၪဆၧနီၪ ဘၪထွ့ၪလၧ ဆၧဘံၪဘူၪထၪ့ဒၩဒဲ ဆၧဘၪတဲၩ့ အဆၧလၩ့အၪ့ယိၫအကၠီၩ့ ဘၪခွံၬၡိၭထး အီၪအလးအကျဲၩ့လဖၪ
(IDMC)ခရၧၫ့ လၧအယိခွါ ထံၪခးဖၧၩ့ ၦၡၩဘၪစဲၪ့မံၩ့ဂၭဖျိၭဂီၩ့ အီၪက့ၪထးအလးအကျဲၩ့ အစရၫ့အဖၧၩ့နီၪ စံၭထၬဝ့ၫ လၧ၂၀၂၀နံၪ့ကလူၬထီနီၪ ၡၩခမျၧးဖိၭဘိၭ ၅၅ခွးနီၪ ဘၪအီၪက့ၪ ထး အလးအကျဲၩ့ဂီၩ့ ဘၪစဲၪ့မံၩ့ဂၭဖျိၭအဂဲး ကွ့ၭထၬဝ့ၫနီၪလီၫႉ
စရၫ့အယီၩနီၪထုၬထၪ့ဝ့ၫဒၪလၧ လၩမ့ၫ၂၀ၥၫ့အိၩနီၪလီၫႉ ၦၡၩဖိၭဘိၭ၄၈ခွးနီၪဘၪထွ့ၪ လၧ ဆၧတုၩ့ထၪ့တုၩ့လၩ့လဖၪအကၠီၩ့ ဘၪအီၪက့ၪထးခွံၬအလးအကျဲၩ့ဂီၩ့ ဘၪစဲၪ့မံၩ့ဂၭဖျိၭဒဲ လခဲၫ့ၦၡၩ ဖိၭဘိၭ၇ခွးနီၪ မွဲလၧဆၧဘၪတဲၩ့လၩ့ထၬဆၧလၩ့အၪ့ယိၫအကၠီၩ့ ဘၪအီၪက့ၪထးအ လးအကျဲၩ့လဖၪဂီၩ့ ဘၪစဲၪ့မံၩ့ဂၭဖျိၭဝ့ၫအဂဲး ပၥ့ၪယၫဘၪနီၪလီၫႉ
လီၩဒၩတူၪဆံၩ ပလဲၭဖီၩ့အဂး ၥၫ့ဎွၩဖရၫ့စံၭ ၥိၫ့စိၩဘၪ ဆၧဂၩ့မၧၫ့ဆၧချဲၩ့
လၧလၩမ့ၫ၂၅ၥၫ့အိၩ ၦၡၩဝဲထၪ့ထဲၩ့ လီၩဒၩတူၪဆံၩ ပလဲၭဖီၩ့အဂး ၥၫ့ဎွၩဖရၫ့စံၭ ၥိၫ့စိၩ ဘၪ ဆၧချဲၩ့လၧဆၧဂၩ့မၧၫ့အဖၧၩ့နီၪလီၫႉ
လၧဆၧဂၩ့မၧၫ့ဖၧၩ့နီၪ အဝ့ၫစံၭဝ့ၫဒၪ ပကယိထဲၩ့ခွါထဲၩ့ ဂၪ့ခိၪချိၫ့ယီၩအဂး ၦလၧအၥုၪ့ဂ့ၩ ၥၭဘွၩအီၪလဖၪနီၪ ကိၭဖံၭၥိၭဝ့ၫအဂဲးႇ ဖိၪၥၪဆံၭဖိၪလဖၪဒဲ ၥၭဘၪ့ဖိၪလဖၪ အထီလၧယၫ အဂး ပၥၭၡါလဖၪအမူၩဒၩအီၪဝ့ၫဒၪအၪမၬအဂဲးႇ အဝ့ၫၥံၪအဂး ပမိအီၪက့ၪထးအ့ၪဂၪ့ခိၪချိၫ့ ယီၩဘဲၪၥ့ၪလဲၪအဂဲးႇ ပဝ့ၫၥံၪလဖၪ ပအၪ့န့မူၩဒၩလၥ့ၪဘၪႇ ပယိလၩ့ဒၪန့ပၥၭလီၫအကၠီၩ့ ကဲၪထၪ့ဘဲၫ ပမၩတုၩ့မၩဎီး ဖိၪၥၪလဖၪအထီလၧယၫနီၪလီၫႉ
ဆၧနီၪအကၠီၩ့ ပကဘၪယိထဲၩ့ခွါထဲၩ့ ပဂၪ့ခိၪချိၫ့ယီၩ ပကဘၪမၩနၧၩ့ထဲၩ့ ပယိလၩ့ဒၪန့ ပဂး လဖၪနီၪဂီၩ့ ပကအီၪက့ၪယူၭယၪ့ထဲၩ့ဘၪ ခိးတၩဎိၩဒိၪလၧပဖၫ့ခိၪ ပမိဂၪ့ခိၪချိၫ့ယီၩအဂး နီၪ ၥၫ့ဎွၩအၪ့ယၫထၪ့ဘၪ ပဝ့ၫၥံၪလဖၪ အကၧၩ့ဒိၪထုၬအၪ့ယၫထၪ့ဘၪ ဂံၪ့ဒီၪ့ဖိၪၥံၪႇ ဆၧအီၪ ကီၪ့ဖိၪၥံၪႇ ဆၧမၩလိၪလးၥံၪႇ ဘျၩ့ကိၪ့ဒိၪၥံၪႇ ဆၧဆၫဂံၪ့ၥံၪဒဲ ခရၧၫ့ဖိၪၥံၪလဖၪနီၪလီၫႉ
နးအဲၪဖီၫဘွၩ

ပယၩ့ၥုၭလဖၪအဆၧဒုၭဆၧခၭအကၠီၩ့ ကဲၬၥလံၬၥၭဘၪ့လၧအလ့ၩၥိၫ့ ဆၫအၪ့ဆၫအီၩ နံၫဂၩ အၥၭဘၪၥံၫဝ့ၫဒၪအဂဲး
လၧလၩမ့ၫ၂၆ၥၫ့ အဂၫလၩ့၆နၩရံၩအခံၫ့နီၪ ဘၪထွ့ၪလၧဆၧဒုၭဆၧခၭ ကဘျၩ့ယီၩအကၠီၩ့ ကယၩဆၨၩခးဒီၪ့ ဒံၫမီၩဆိၫဝံးဖၧၩ့ ၦအဘၪစဲၪ့မံၩ့ဂၭဖျိၭလဖၪအဂး ကဲၬၥလံၬၥၭဘၪ့နံၫဂၩနီၪ အီၪစဲၪ့ထၪ့လၧ ငူၩပလီၩဝၩ့ဒီၪ့ စံၫ့ဂၠိၩဇဲၭၥရိၭလးဝၩ့ဂီၩ့ လ့ၩၥိၫ့စိၩဆၧအၪ့ဆၧအီၩလဖၪအထီ လၧအဝ့ၫၥံၪလ့ၩဖၧၩ့ၥၭနီၪ ပယၩ့ၥုၭလဖၪအဆၧဒုၭဆၧခၭအကၠီၩ့ ၥၭဘၪ့နံၫဂၩယီၩ အၥၭဘၪၥံၫခွံၬ ဝ့ၫဒၪအဂဲး ပၥ့ၪယၫဘၪနီၪလီၫႉ ကဲၬၥလံၬၥၭဘၪ့ဖိၪ နံၫဂၩယီၩ အမံၩ့နီၪဘိၭ မွဲလၧအဲဖရဲၭလုဒူၪ ဒဲ ပဲၭထရံၭဘိၩရဲၫနီၪလီၫႉ
နးအဲၪဖီၫဘွၩ
7.6.21
ကလုထၪ့ဘၪ မံဆၩဆၧလုထၪ့လၧ Tiananmenလးဒၩအဂး ဟီၫ့ကီၫ့ကဲၬၥလံၬဆၧအီၪကီၪ့ ကျ့ၭစၨၭထၪ့ဝ့ၫအဂဲး
လၧ၁၉၈၉နံၪ့ လၩဇိၫ့၄ၥၫ့အိၩ ၡၩခမျၧးလဖၪ စူၭကီၪ့အၥၭလၧ Tiananmenလးဒၩဂီၩ့ လထိးဆၧၫ့ဘၪ တရူၭၦဒိၪအဆၧဒၨၭလၩ့အဂဲး ထုၬဖျီၪထၪ့ကၠၭအၥၭလုအထီ ၦလနၩ့နၩ့နီၪ ဘၪထိးဖီၪ့ၥၭႇ ဘၪထိးမၩနၧၩ့မၩစၪၥၭ ဒဲ ဘၪထိးၥံၫၥၭအီၪဝ့ၫနီၪလီၫႉ
ဆၧနီၪအကၠီၩ့ ကိနံၪ့ဒ့ၭအ့ၪထီၩ့ထဲၩ့မၬလၧ လၩဇိၫ့၄ၥၫ့စွါဘဲၫ ဟီၫ့ကီၫ့ကဲၬၥလံၬ ဆၧအီၪ ကီၪ့ဖိၪလဖၪနီၪမၩဆၧနၪ့ထၪ့ဂီၩ့ စူၭကီၪ့အၪ့ကံၩ့ဘၩဆိၪဖၪန့အ့ၪ ၦလၧအဘၪၥံၫဝၫဒၪလဖၪ အဂးနီၪလီၫႉ လၧအဖီၩ့ခွံၬနံၪ့အိၩနီၪ မွဲလၧ ကိၫဘံဆၧဆၫအကၠီၩ့ မၩဆၧနၪ့ထၪ့ယီၩ လၩလၩဖၩ့ ဖၩ့လန့ဘၪလါနၫ့ ဟီၫ့ကီၫ့ဖိၪၥံၪလဖၪယီၩ လၧမုနံၩအနီၪ ထိၬလၫ့ကၠၭပနဲၫ့တၧၩ့ကိၭဂၩဂီၩ့လၧ အထီနီၪဒၪအိၩ ၦလၧအဘၪထိးၥံၫၥၭလဖၪအဂး နၪ့ထၪ့အၪ့ကံၩ့ဘၩဆိၪဖၪအ့ၪဝ့ၫဒၪနီၪလီၫႉ
လၧအဖီၩ့ခွံၬနံၪ့အိၩဆ့ ဟီၫ့ကီၫ့ထံၪခးဖိၪလဖၪနီၪ ဘၪထွ့ၪလၧ လထိးဆၧၫ့ဘၪ တရူၭ ၦဒိၪအဆၧဒၨၭလၩ့အဂဲး ဆုးထဲၩ့ထုၬဖျီၪထၪ့အၥၭလုလဖၪအထီ ၦၡၩအၪဒၪဆၧဘၪထိးဖီၪ့ အၥၭနီၪလီၫႉ လၧၦလဖၪနီၪအကျၩ ၦၡၩၥ့ၪယၫအအၪထုၬနီၪ မွဲလၧJimmy Laiဂီၩ့အဝ့ၫနီၪ မွဲလၧကဲၬၥလံၬ ဆၧဘိၪ့ဆၧဘၩဖိၪကဂၩနီၪလီၫႉ
လၧအဖီၩ့ခွံၬမုနွံၫအိၩနီၪ ၦၡၩခွံၬလၩ့အလူ အဝ့ၫယီၩကဘၪလၩ့လၧဖီၩ့ဖၧၩ့ကနံၪ့ဒဲ လၩနံၫ ဘံၪ့နီၪလီၫႉ ဘဲၫဒံၫမိၫကရ့ၫစံၫကန့အဂး ၡၩခမျၧးလဖၪအၪ့ကံၩ့ဘၪနီၪ မၩနၧၩ့မၩစၪႇ မၩၥံၫမၩ ဆၫဝ့ၫ ဘဲၫလလၩ့ဂါဘၪၦၡၩအဆၧမၩၥိၭအကၠီၩ့ အ့ၪလၩ့ဘူၭလၧ နံၪ့ဆၧၫ့လးထဲၩ့မုနံၩနီၪစွါဘဲၫ ဟီၫ့ကီၫ့ ကဲၬၥလံၬဆၧအီၪကီၪ့နီၪ စံၭဝ့ၫဒၪ လၧအဖီၩ့ခွံၬ(၃၂) နံၪ့အိၩ မွဲလၧဆၧတုၩ့ထၪ့တုၩ့လၩ့ အကၠီၩ့ လၧလးဒၩယီၩအဖၫ့ခိၪ ၦလၧအဘၪဂဲၫထဲၩ့ဖ့ၪလၫ့လၩ့ထၬအၥၭ ဆၧမၩလိၪဖိၪလဖၪဒဲ ၦဂူၪဂၩလဖၪနီၪ ကြၨၭလၥၭနၪ့ကၠၭဘၪအဂဲးဒဲ လၧလၩဇိၫ့၄ၥၫ့နီၪ ကဲၬၥလံၬဆၧအီၪကီၪ့အီၪဝ့ၫ ဆၨၩခးဒီၪ့၇ဒီၪ့အဖၧၩ့ လုထၪ့မံဆၩဆၧလုထၪ့ဂီၩ့ အၪ့ကံၩ့ဘၩဆိၪဖၪအ့ၪ ၦလၧအဘၪဂဲၫထဲၩ့ ထိးၥံၫၥၭလဖၪအဂးနီၪလီၫႉ
ကလုထၪ့ဘၪ မံဆၩဆၧလုထၪ့လၧ Tiananmenလးဒၩအဂး ဟီၫ့ကီၫ့ကဲၬၥလံၬ ဆၧအီၪကီၪ့နီၪ ကျ့ၭစၨၭထၪ့ဝ့ၫလါနၫ့ ၡၩခမျၧးကၥီၩ့လၩ့ၥၭဒဲကထိၭလၫ့ပနဲၫ့တၧၩ့ဂီၩ့ ကဂၬဖၭ အၪ့ကံၩ့ဘၩဆိၪဖၪဆၧနီၪ ၦဒိၪလဖ့ၪလၫ့ဘၪအခွးအဂဲး လၧအဖီၩ့ခွံၬပြီပတံၭမုနံၩအိၩ ထုၬထၪ့ ဝ့ၫဒၪလီၫႉ အဝ့ၫၥံၪထိးဆၧၫ့လန့ဘၪနီၪ ဘၪထွ့ၪလၧ ကိၫဘံဆၧဆၫအဂဲးႇ လါနၫ့လၧ South China morning post ဆၧပရၧၫ့အဖၧၩ့ ဘိၭဘၪၥ့ၪယၫထၬဝ့ၫနီၪ ကနံၪ့ယီၩ လၧဟီၫ့ကီၫ့ အဖၧၩ့ ကိၫဘံဆၧဆၫဆၧဘၪဂါလအီၪဘၪနးဆံၭအဂဲးႇ ဟီၫ့ကီၫ့ကဲၬၥလံၬဆၧအီၪကီၪ့ ဆၧဘၪလိၭဎွ့ၪဎီၩ့ဒဲ ဆၧဎူၫဆၧဎၩ့ခမံတံၫခိၪနါ Porson Chanနီၪ စံၭဝ့ၫဒၪ ဒူၩယၫ့ဖိၪလဖၪ အဆၧပဒၩ့နီၪ မွဲမၩထီၩ့ထၪအဝ့ၫၥံၪအဆၧဎိၭထံၪဎိၭဒီၪယီၩ လန့ဘၪအဂဲးႇ ဘၪန့လဲၪနီၪ ကဲၬၥလံၬဆၧအီၪကီၪ့အမံဆၩဆၧလုထၪ့နီၪ မွဲလၧဆၧဘိၪ့ဆၧဘၩအဆၧဎိၭထံၪဎိၭဒီၪတၭ လမွဲ ဘၪထံၪဂဲးခးဂဲးအကၠီၩ့ႇ ဆၧပဒၩ့ထၬကိၫဘံဆၧဆၫၥနိၫ့အဖၧၩ့ ၥရိၭကဖျိၪ့နီၪ ၦၡၩထၪ့ဘၩယွၩ န့ဝ့ၫဒၪအဂၩ၃၀အဂဲး လၧဆၧအဂဲး အထံၪအဆၭအဖၧၩ့ လီၩဝ့ၫဒၪနီၪလီၫႉ
နးအဲၪဖီၫဘွၩ
ကိၭနံၩဒ့ၭအဂၫလၩ့၇နၩရံၫအခံၫ့နီၪ အၪ့ကံၩ့ဘၩဆိၪဖၪအ့ၪ ၦလၧအဘၪစဲၪ့မံၩ့ဂၬဖျိၭလဖၪအဂး ကဲၬၥလံၬဘိၪ့ခိၪၥၫ့ခၫ ခၠဲၩလဆိၫဘၡွ့ၫ အၪ့ယၫထၪ့ဘၪ ၦဆူၩနဲၩဖိၪလဖၪအဂဲး
မုဆၫယနံၩယီၩလၧခးပယၩ့အဖၧၩ့ ကဲၪထၪ့ဝ့ၫဒၪ ဆၧဘံၪဘူၪထၪ့ဒၩလဖၪအကၠီၩ့ ၦခမျၧးလဖၪ ဘၪထိးမၩၥံၫၥၭတၭ ၦၡၩအၪဒၪဆၧနီၪ ၥၭမဲၪၥၭဖျဲၩ့ဆၧဂီၩ့ ဘၪအီၪက့ၪထးခွံၬ အဂံၪ့အဎၫ့လဖၪဒဲ ဘၪလ့ၩစဲၪ့အီၪဂူၪၥၭလၧ ၡိၭကျၩမွဲဂ့ၩႇ လၧအဘူၭအထံးလဖၪအအီၪမွဲဂ့ၩႇ လၧပူၭဒၭကၠီးလဖၪမွဲဂ့ၩႇ လၧၦဎြံၬဖိၪဆၧအီၪကီၪ့ကၠီးလဖၪမွဲဂ့ၩႇ ကဲၬၥလံၬဆၧအီၪကီၪ့အဖၧၩ့ ဎိၭဒီၪထၬဝ့ၫ ၦဘၪကၪဘၪဂဲၩဖိၪလဖၪ အီၪဒုၩၥၭလးလဖၪမွဲဂ့ၩႇ လၧဝံးဖၧၩ့ ဆၧဘိၪ့ဆၧဘၩလး လဖၪမွဲဂ့ၩနီၪ ပဒၪဘၪလီၫႉ
လကၭဒံၭဘၪ ပယၩ့ၥုၭလဖၪနီၪ ထၪ့ဒူၪဒၩမၩထံၬထၬ ဎြံၬဖိၪၥရိၭလဖၪဒဲ ဆၧဘိၪ့ဆၧဘၩ လးဝၩ့လဖၪ ခိၭမၬခိၭမၬဒံၭနီၪလီၫႉ လၧဆၧနီၪအကၠီၩ့ လွဲၫ့ကီၫကဲၬၥလံၬဆၧအီၪကီၪ့ Fr.ခၠဲၩဆိၫ ဘၡွ့ၫနီၪ ထုၬထၪ့လံၬကဘံၪ့ဂီၩ့ အၪ့ယၫထၪ့ဘၪ ဆၧအီၪကီၪ့ဖိၪၥံၪဘဲၫယီၩအၥိၭနီၪလီၫႉ
အီၪလၧလွဲၫ့ကီၪဆၧအီၪကီၪ့ဖၧၩ့ ကဲၬၥလံၬဆၧအီၪကီၪ့ဖိၪၥံၪထီးလူၬနီၪ ကိၭနံၩဒ့ၭအဂၫ လၩ့၇နၩရံၫအခံၫ့နီၪ ပထံၪခးဖိၪၥံၪထီးလူၬ ဘဲၫကဖီၩ့ဖျ့ၭလၧ ဆၧနိၫ့ဆၧနၭလဖၪအဂးဒဲ ပထံၪ ခးပဆၨၩခးဒီၪ့လဖၪ ဘဲၫကန့ထဲၩ့ဘၪ ဆၧဎူၫဆၧဎၩ့တၡါဖျဲၪဖျဲၪအဂး အီၪက့ၪထၬဆၧထိစိၩဂီၩ့ ဝံထၪ့ဖဲၫ့ဆံၫ့ဎံၪဒဲ အၪ့ကံၩ့ဘၩဆိၪဖၪကၠၭအဂဲး အၪ့ယၫထၪ့ဘၪၦဆူၩနဲၩဖိၪၥံၪနီၪလီၫႉ ဘဲၫၦဆူၩ နဲၩဖိၪလဖၪ ကဘၩဆိၪဖၪထၪ့ဆၧ ကထံၪဎးကန့အဂးနီၪ အ့ၪမွဲအဂၫလၩ့ ၇နၩရံၫဘၪစွါဘဲၫ ၥရိၭ လဖၪ ကဆ့ၭၥီၫထၪ့ခီၩ့လီၩ့အဂးဆ့ အၪ့ယၫထၪ့ဝ့ၫဒံၭအဂဲး ပၥ့ၪယၫဘၪနီၪလီၫႉ
နးအဲၪဖီၫဘွၩ
ခးဖံလံပဲၫ့ ၦမ့ၬဆၧဆါလဂၩ မၫ့နံၫပၭကယီၩ့အိၫနီၪ အၪ့ကံၩ့ဘၩဆိၪဖၪအ့ၪ ခးပယၩ့အဂဲး
မၫ့နံၫပၭကယီၩ့အိၫယီၩနီၪ လၧခးအ့ၩၡၩဖၧၩ့ ၦမ့ၬဆၧဆါလဖၪအကျၩ အမံၩ့ဎိၩဝ့ၫဒိၪဒိၪ ဒ့ၭ ၦလဂၩဂီၩ့ လၧခးအ့ၩၡၩဖၧၩ့ ၦၡၩလၥ့ၪယၫဘၪအဝ့ၫ အီၪဒၪၡၩၡၩနီၪလီၫႉ
လၧခးဖံလံပဲၫ့ဖၧၩ့ ဖံၭလၩ့ဎီးအဖၧၩ့ ၦလၧအဘၪၥံၫဝ့ၫဒၪ FEUဘျၪ့ကိၪ့ဒိၪ ၦထုၪ့ဆၧဖံၭ ဖျိၪ့ဆါလဂၩမွဲဝ့ၫ အၥၭအီၪ၂၁နံၪ့ Kieth Absalon အဂးမွဲဂ့ၩႇ ထံၪခးဖၧၩ့ဆၧဒုၭဆၧခၭအကၠီၩ့ ၦၡၩဘၪၥံၫဘၪဆၫအၪဝ့ၫဒၪ ခးပယၩ့အဂးမွဲဂ့ၩႇ လၧအဝ့ၫၥံၪအဂံၪ့ဒီၪ့ဖိၪလဖၪ စူၭကီၪ့ဘၩဎိၭ လၩ့ အဂၫလၩ့ဆၧဘၩဆိၪဖၪလဖၪအထီ အဝ့ၫၥံၪအၪ့ကံၩ့ဘၩဆိၪဖၪအ့ၪ ဂၪ့ခိၪချိၫ့ထၧၫ့ဘံၪ့ယၫ အဂး အဂဲး အဝ့ၫယီၩ ကွ့ၭထံၭလၫ့ထၬဝ့ၫလၧ Fbဖၫ့ခိၪနီၪလီၫႉ
လကၭဒံၭဘၪ လၧဂၪ့ခိၪထၧၫ့ဘံၪ့ယၫအဖၧၩ့ ပၥၭဘၪ့လဖၪ ဘၪထိးၥံၫၥၭပျီၩပျီၩနီၪ လၩ့ ၥၭအုၭဝ့ၫနၭမၬဒ့ၭအဂဲးႇ အဝ့ၫဆီၫ့မီၪ့ထၪ့ဘၪ ၦၡၩထီးလူၬ အ့ၪမွဲကအီၪဘၪလၧ ဆၧ ဎူၫဆၧဎၩ့ ဖၧၩ့စွါဘဲၫ ကအီၪဘၪထဲဎွ့ၩပၥ့ၪလဲၪအဂဲးႇ ဂၪ့ခိၪချိၫ့ထၧၫ့ဘံၪ့ယၫ ဘဲၫၥိၭဆၧဎူၫဆၧဎၩ့က အီၪထၪ့အဂး အၪ့ကံၩ့ဘၩဆိၪဖၪကၠၭ ဘဲၫယၧၩအၥိၭအဂဲး မၫ့နံၫပၭကယီၩ့အိၫယီၩ ဆုးထဲၩ့အၪ့ ယၫထၪ့ဘၪ ပဝ့ၫၥံၪလဖၪအဂဲး ပၥ့ၪယၫဘၪနီၪလီၫႉ
နးအဲၪဖီၫဘွၩ
ခးပၠ့ၫၥ့ၭကဲၬၥလံၬအဲၩ့ၥဲၭလဖၪ ကမၩဆၧၩ့ထၪ့ စဘံၭၥၪ ၦမၩဆၧဖိၪလဖၪအဂး ကလီၩ့ဎွါထၪ့ကျိၪစ့ၩအဂဲး
စံၫ့ဘဲၭနဒ့ၭ အဲၩ့ၥဲၭဘိၪ့ခိၪၥၫ့ခၫလဖၪဒဲ စံၫစတၧၫလဖၪနီၪ ကမၩဆၧၩ့ထၪ့ဘၪ စဘံၭၥၪ ၦမၩဆၧဖိၪလဖၪအဂး ကထံၭလၫ့အၪ့ဆၫ စဘံၭထံၫဝဲၫ့လဖၪ လၧဖၠၫဖၧၩ့နီၪလီၫႉ
လၧအဲၩ့ၥဲၭလဖၪယီၩအအီၪနီၪ ပကိၭဝ့ၫအမံၩ့လၧ (ၥၫ့ဎွၩအစဘံၭဎုၬလး)ဘနီၪ စဘံၭဎုၬ လး အီၪဝ့ၫကဎုၬနီၪလီၫႉ ဘၪဖ့ၪလၫ့ထၬ စဘံၭဎုၬယီၩ အမံၩ့ဘဲၫယီၩၥိၭနီၪ ဘၪန့လဲၪစွါဘဲၫ လၧအဖီၩ့ခွံၬ ၁၃၀၉နံၪ့အိၩ ၦလၧအဂဲၫထဲၩ့ မၩကဲၪထၪ့ထၬ စဘံၭဎုၬယီၩနီၪ မွဲလၧၥၫ့ဎွၩကလဲၩမ့ၩ ၅ဂၩလဂၩအကၠီၩ့ ဖိၭလိၭထၬဝ့ၫအမံၩ့ဘဲၫယီၩအၥိၭနီၪလီၫႉ စဘံၭထံၫဝဲၫ့လဖၪအဂး အီၪမၩန့ဝ့ၫ စဘံၭၥၪလဖၪ လၧဎုၬလးဖၧၩ့နီၪလီၫႉ စဘံၭထံၫဝဲၫ့ယီၩနီၪ ဖ့ၪလၫ့ထၬဝ့ၫအမံၩ့လၧ Via Caritatis ဂီၩ့ အၪ့ဆၫလၩ့ ဝ့ၫကန့ဖိၭဘိၭ အဖျိၪ့၁၅၀၀၀အဂးနီၪ အဲၩ့ၥဲၭလဖၪယီၩယိလါထၬ ဝ့ၫနီၪလီၫႉ အၪ့ဆၫလၩ့ဝ့ၫဂီၩ့ န့ဝ့ၫဒၪ ထီးလဖၪနီၪ အဝ့ၫၥံၪယီၩကမၩဆၧၩ့ထဲၩ့ ဘၪထွ့ၪလၧကိၫ ဘံဆၧဆၫအကၠီၩ့ ၦလၧဘၪအီၪ ပထုၬထၬဆၧဖံၭဆၧမၩဒဲ ဆၧအၪ့ဆၧအီၩအဂး ဆၧကၪဆၧဂဲၩ အီၪထၪ့ဝ့ၫဒၪ ၦလၧအမၩစဘံၭၥၪ ၦမၩဆၧဖိၪၥံၪ အဂံၪ့ဒီၪ့လဖၪနီၪလီၫႉ
ဂံၪ့ဒီၪ့ဖိၪအဘၪဒုၭနဲၩ့ၥၭလၧ စဘံၭဎုၬလးယီၩကအီၪဝ့ၫဒၪဖိၭဘိၭ ဂံၪ့ဒီၪ့(၈၀)ဂီၩ့ အဝ့ၫၥံၪ ယီၩ ကျ့ၭစၨၭမၩဆၧမၩလါနၫ ့စဘံၭၥၪလဖၪနီၪ ကထံၭလၫ့အၪ့ဆၫဝ့ၫလၧဖၠၫဖၧၩ့အဂး မွဲအခံအ လဲၫ့လဂ့ၩဘၪအကၠီၩ့ ထံၭလၫ့အၪ့ဆၫဝ့ၫလန့ဘၪနီၪလီၫႉ ဆၧနီၪအကၠီၩ့ ဘဲၫယီၩနီၪ စံၫ့ဘဲနဒ့ၭ အဲၩ့ၥဲၭလဖၪယီၩ ကလ့ၩခိၪလ့ၩနါထဲၩ စဘံၭဎုၬလးယီၩနီၪလီၫႉ အ့ၪလမွဲဘၪဘဲၫယီၩနီၪ ဎိၭဎဲၫ့ လၩ့ဆၧကၪဆၧဂဲၩယီၩ မွဲကန့လၥ့ၪဘၪနီၪလီၫႉ
အဝ့ၫၥံၪကထုၬထၪ့စဘံၭထံၫလၧ အခံအလဲၫ့လၧၫ့လၧၫ့ဎွ့ၩဎွ့ၩအဖၧၩ့ ကန့အဂးနီၪ ကိၭ ထၬဘၪ ၦကိၪ့ၥ့ၪလၧအမံၩ့ဎိၩဝ့ၫနၭမၬလဂၩမွဲဝ့ၫ Philippe Cambieနီၪလီၫႉ အဲၩ့ၥဲၭလဖၪ ကထုၬထၪ့ဝ့ၫ စဘံၭထံၫဝဲၫ့လဖၪနီၪ အအွံၪအဆၧၫ့ကအီၪဝ့ၫအၪမံၩ့ဂီၩ့ အနံၪ့ကဘၪဆ့အဂဲးႇ ပဎွ့ၩအဝ့ၫၥံၪ အဝဲၫ့လဖၪနီၪ မီၪ့ဎီၩ့ဒၪပမၩဆၧၩ့ထၪ့ စဘံၭၥၪၦမၩဆၧဖိၪလဖၪလီၫအဂဲးႇ စဘံၭ ထံၫဝဲၫ့လဖၪယီၩ အလွ့ကအီၪဝ့ၫ အဝီၩဒဲ အဘွၩဂီၩ့ ဖီၫဆၧဆူၪဝဲၫ့လဖၪဆ့ မွဲကထုၬထၪ့ဝ့ၫ ဆ့အဂဲးႇ အဝ့ၫၥံၪ ကထုၬထၪ့ဝဲၫ့လဖၪယီၩနီၪ ကၥိၫ့စိၩဝ့ၫလၧ အမ့ၫရံကၫ့ဒဲ အုရီပၭ ထံၫခး လဖၪဂီၩ့ ကထံၭလၫ့အၪ့ ဆၫဝ့ၫအဂဲး ပၥ့ၪယၫဘၪနီၪလီၫႉ အဝ့ၫၥံၪအၪ့ဆၫဝဲၫ့ယီၩနီၪ လမွဲဘၪ ခီၫ့ၡၩအဂးတၭ မွဲလၧကမၩ ဆၧၩ့ထၪ့ စဘံၭၥၪၦမၩဆၧဖိၪလဖၪအဂးနီၪလီၫႉ
နးအဲၪဖီၫဘွၩ

ကမၩလၩမၩဖၩ့ဘၪ ရီၩမၭကဲၬၥလံၬဆၧအီၪကီၪ့ (၂၀၂၅) နံၪ့ထၪ့ဘၭ ယူၩဘလံၫအဂး ၥၫ့ဎွၩဖရၫ့စံၭ ဎိၭဒီၪဆိၫထၬဆၧအဂဲး
လၧကဲၬၥလံၬဆၧအီၪကီၪ့လဖၪအကျၩ ရီၩမၭဆၧအီၪကီၪ့နီၪ မွဲဆၧအီၪကီၪ့ကဘံၪ့ဆ့နီၪ လီၫႉ အ့ၪမွဲထီၩ့စိၩလၧ၂၀၂၅နံၪ့ကိနီၪ ရီၩမၭဆၧအီၪကီၪ့ယီၩဆ့ ဂဲၫထဲၩ့အီၪၥုၪ့လၩ့ထၬအၥၭ ကထၪ့ဘၭ အနံၪ့၂၀၂၅နံၪ့နီၪလီၫႉ
ရီၩမၭဆၧအီၪကီၪ့ယီၩနီၪ လၧဆၧအီၪကီၪ့ထီးလူၬဖၧၩ့ မွဲဆၧအီၪကီၪ့အဂုထုၬနီၪလီၫႉ ဆၧမၩ လၩမၩဖၩ့ဘိၪ့ဖၭဒိၪယီၩအထီ မၩလၩမၩဖၩ့ဝ့ၫလၧ ဆၧပျၩ့ပျၩ့ဖၧၩ့ကန့အဂးနီၪ ၥၫ့ဎွၩအၪ့ ယၫထၪ့ဘၪဝ့ၫနီၪလီၫႉ
လကၭဒံၭဘၪ ဘဲၫဘိၪ့ဖၭဒိၪယီၩ ကကဲၪထၪ့အဂး ၥၫ့ဎွၩဖ့ၪလၫ့ထၬမူၩဒၩ ၦလဂၩလၧ အမံၩ့ မွဲဝ့ၫ Alessandro Cassinis Righini နီၪဆ့ ၥၫ့ဎွၩမၪလူၬထၬ ကဎိၭထံၪဎိၭဒီၪဆၧ ဂ့ၩဂ့ၩ ဘၪဘၪအဂးဒဲ ကၥိၩ့ကျိၪစ့ၩလၧ ဆၧကြၨၭကြၨၭဘၪဘၪဖၧၩ့အဂးနီၪလီၫႉ ဆၧဎိၭထံၪဎိၭဒီၪအ ယီၩနီၪ လၩ့ဆၫ့ဝ့ၫဒၪနၭမၬနီၪလီၫႉ
ဘၪန့လဲၪနီၪဘိၭ ဆၧအီၪကီၪ့ဂဲၫထဲၩ့ၥုၪ့လၩ့ဖျါလၩ့ထၬဆၧလဖၪႇ ဆၧအီၪကီၪ့ဂဲၫထဲၩ့ပၧၩ့ ထၬ ဘၪဆၧလဖၪဒဲ ၡၩခရၧၫ့အဆၧဝံဆၧနၬလဖၪနီၪ ကဎိၭဒီၪထၪ့ဝ့ၫ ဘဲၫၥ့ၪလဲၪနီၪ ပကဒၪ ဘၪအကၠီၩ့နီၪလီၫႉ ရီၩမၭဆၧအီၪကီၪ့ယီၩနီၪ ဘၪဎိၭဒီၪဆၧအီၪကီၪ့အဆံၭ(၃၃၀)ဒီၪ့ဂီၩ့ ဘၪယိ ထွ့ၪထၬဘၩယွၩ ၥရိၭလဖၪအဖျိၪ့(၅၀၀)ဘျဲၪနီၪလီၫႉ ဆၧအလးထီးလူၬယီၩနီၪ အ့ၪထီၩ့စိၩလၧ ၂၀၂၅နံၪ့ ယူၩဘလံၫ ဘိၪ့ဖၭဒိၪကိ ခးၥဲၫ့ထၧၫ့ဘံၪ့ယၫအဖၧၩ့ ၦလၧကလ့ၩမၩလၩမၩဖၩ့ၡီၩ့ ဘိၪ့လဖၪ ဘဲၫၥိၭအီၪထုၪ့ကန့အဂးနီၪ စၭထၪ့လၧအထီဘဲၫယီၩ ကဘၪတဲၩ့ဝဲၩဆိၫထၬဝ့ၫ နီၪလီၫႉ
ဆၧနီၪအကၠီၩ့ လၧခးပယၩ့အဖၧၩ့ အီၪဝ့ၫဒၪ ကဲၬၥလံၬဆၧအီၪကီၪ့ဖိၪလဖၪဆ့ ဘဲၫလ့ၩ မၩ လၩမၩဖၩ့ၡီၩ့ ယူၩဘလံၫဘိၪ့ဖၭဒိၪယီၩကန့အဂး စၭထၪ့လၧအထီဘဲၫယီၩ မွဲကဘၪတဲၩ့ဝဲၩ ဆိၫထၬ ကျိၪစ့ၩလဖၪႇ ဒဲ ဆၧဆီၪ့ဆၧချဲၫ့အဂးလဖၪ ကဘၪယူၭအဂဲး ပဘိၭဘၪၥ့ၪယၫထၪ့စိၩ နၥံၪနီၪလီၫႉ

ကဒၪခီၩ့လၧ ၥၫ့ဎွၩဖရၫ့စံၭအဂး အမ့ၫရံကၫ့ ခးဒိၪဂၠိၩဘဲၫ့ဒၫ့ လ့ၩစဲၪ့လၫ့အဂဲး
ကဒၪခီၩ့လၧၥၫ့ဎွၩဖရၫ့စံၭအဂး အမ့ၫရံကၫ့ခးဒိၪ ဂၠိၩဘဲၫ့ဒၫ့နီၪ စၭထၪ့လၧ လၩဇိၫ့၁၅ၥၫ့ လဂီၩခီၫနီၪ အီၪစဲၪ့ထၪ့လၧဘဲၫလဂၠံၫယၫ့ထံၫခး ဘရူၫဆဲၩနီၪလီၫႉ
အဝ့ၫယီၩလ့ၩထၪ့(G7)ဆၧအီၪကီၪ့လၧ အုရီၩပၭထံၫခးအထီ ဆုးထဲၩ့လ့ၩဒၪစိၩၥၫ့ဎွၩနီၪ လီၫႉ အဝ့ၫယီၩဒၪဎိၭလၩ့လိၬၥၭလၧ ၥၫ့ဎွၩဂီၩ့အထီ လၩဇိၫ့၁၆ၥၫ့နီၪ ဆုးထဲၩ့လ့ၩဒၪဎိၭလၩ့လိၬ ၥၭလၧ ရၭၡၩထံၫခးခးဒိၪ Vladimir Putin နီၪလီၫႉ
ခးဒိၪဂၠိၩဘဲၫ့ဒၫ့ယီၩနီၪ လၧအဖီၩ့ခွံၬ၂၀၁၅နံၪ့အိၩ ဒၪဎိၭလၩ့ဘၪလိၬၥၭလၧ ၥၫ့ဎွၩဖရၫ့စံၭ အဆိၪထုၬကဘျၩ့နီၪလီၫႉ အခံၫ့အနီၪဒၪအိၩ ၥၫ့ဎွၩယီၩနီၪလ့ၩထၪ့ ဂၪ့ခိၪချိၫ့ထၧၫ့ဘံၪ့ယၫ ဂံၪ့ဒီၪ့ လဖၪဆၧအီၪကီၪ့ လၧဖံၫလၫဒဲဖံၩယၩအထီနီၪလီၫႉ လၧအနီၪဒၪအိၩ ခးဒီၪဂၠိၩဘဲၫ့ဒၫ့အဖိၪခွၫ လဂၩနီၪ အၥၭအီၪဝ့ၫဒၪ၄၆နံၪ့အထီ ဘၪၥံၪဝ့ၫလၧခိၪနူၬခဲၩ့ဆၧၫ့အကၠီၩ့ ၥၫ့ဎွၩယီၩဖ့ၪဂဲးဖ့ၪဘၭ ဒံၭအဝ့ၫဒံၭအဂဲး ခးအမ့ၫရံကၫ့ခးဒိၪယီၩလီၩဝ့ၫဒၪ အဂဲးပၥ့ၪယၫဘၪနီၪလီၫႉ
နးအဲၪဖီၫဘွၩ
ကၫ့ပဲၭလဲၭဝံး စံၫ့မဲၫကဲၫကဲၬၥလံၬၥရိၭဖၧၩ့ ၦလၧမူၩဒၩလၩ့ဝ့ၫဒၪ ဘိၪ့ခိၪၥၫ့ခၫ Fr.Michael Aung Ling ဘၪထိးဖီၪ့ၥၭဂီၩ့ ဂဲၫထဲၩ့ဖျ့ၭထၪ့ထဲၩ့အဂဲး
လၧအဖီၩ့ခွံၬလၩဇိၫ့၁၆ၥၫ့ လဂီၩ၈နၩရံၩအခံၫ့နီၪ ပယၩ့ၥုၭလဖၪနီၪ လ့ၩဖီၪ့ၥၫ့ခၫ Fr.Michael Aung Ling ဒဲ ၥၭဘၪ့လဂၩ လၧခၠ့ၩဆၨၩခးဒီၪ့ ကၫ့ပဲၭလဲၭဝံးႇ စံၫ့မဲၫကဲၫၥရိၭ လးဝၩ့ဖၧၩ့နီၪလီၫႉ
ၥုၭလဖၪနီၪ စံၭဝ့ၫလၧ အဝ့ၫၥံၪနါဂၧၫ့ ဘိၪ့ခိၪၥၫ့ခၫယီၩ မၩဆၧၩ့ၥၭဘၪ့လၧ လထိးဆၧၫ့ ဘၪအဝ့ၫၥံၪအၥုၭမုလဖၪအကၠီၩ့ဂဲၫဖီၪ့ဝ့ၫအဂဲးစံၭဝ့ၫနီၪလီၫႉ လါနၫ့အဝ့ၫၥံၪထဲၩ့ဖီၪ့န့ ဘိၪ့ခိၪ ၥၫ့ခၫဒဲ ၁ၭဘၪ့နီၪလါနၫ့ အဆၧမၪလထၪ့ဖျီၪဘၪနးမံၩ့အကၠီၩ့ လၩဇိၫ့၁၆ၥၫ့ အဂၫလၩ့ ၇နၩရံၩ အခံၫ့နီၪ ဘိၪ့ခိၪၥၫ့ခၫၥံၪယီၩ ဂဲၫထဲၩ့စဲၪ့လၫ့ထဲၩ့ဘၪအဂဲး ပၥ့ၪယၫဘၪနီၪလီၫႉ
ဂၠိၩ့ဘဲၫ့ဒၫ့ဒဲ ပူၫတ့ၫ အဆၧဒၪဎိၭလၩ့နီၪ ဘဲၫကကဲၪထၪ့ဆၧဎူၫဆၧဎၩ့အဂး ခးၥဲၪ့ထၧၫ့ဘံၪ့ယၫ ၦဎြံၬဖိၪ ကီၫ့စဲၫလဖၪ ယိလါဝ့ၫဒၪအဂဲး
ခးအမ့ၫရံကၫ့ ခးဒိၪ ဂၠိၩ့ဘဲၫ့ဒၫ့ဒဲ ရၭၡၩခးဒိၪပူၫတ့ၫ အဆၧဒၪဎိၭလၩ့နီ ဘဲၫကမွဲဝ့ၫလၧ ဆၧဎူၫဆၧဎၩ့အဂး ခးၥဲၪ့ထၧၫ့ဘံၪ့ယၫ ၦဎြံၬဖိၪကီၫ့စဲၫလဖၪ ဆၧအၪ့ကံၩ့ဘၩဆိၪဖၪအဖၧၩ့ ယိ လါဝ့ၫနီၪလီၫႉ
ခးဒိၪနံၫဂၩယီၩနီၪ အဆၧဒၪဎိၭလၩ့ဖၧၩ့ အအၪထုၬချဲၩ့လၩ့ဎိၭကၠၭဝ့ၫ ဘၪထွ့ၪလၧ ၦဎြံၬဖိၪ ကီၫစဲၫခရၧၫ့ ဆၧအီၪကီၪ့ ၃၅၀ဒီၪ့အဂဲးနီၪလီၫႉ ခးဒိၪနံၫဂၩယီၩ လကၭဘၪ အီၪလၧ ခးၥဲၪ့ဖၧၩ့ ခိၪနါဒိၪလဖၪနီၪ ဆၧဎူၫဆၧဎၩ့အဂးဒဲ ဆၧဘၪလိၬဎွ့ၪဎီၩ့ ကအီၪထၪ့အဂးနီၪ ဘဲၫၥိၭစူၭကီၪ့ မၩ ဎိၭလၩ့ကၠၭဝ့ၫကန့အဂး လိၪဘၪဆၧကိၪ့ဘၪကိၪ့ၥ့ၪလဖၪဒဲ ဆၧအကၠီၪ့အဖျီၩ့လၧ အဂ့ၩထုၬလ ဖၪ ဘဲၫအဝ့ၫၥံၪ ကဒိၭန့ထၪ့ဘၪအဂး ခးၥဲၪ့ထၧၫ့ဘံၪ့ယၫ ၦဎြံၬဖိၪကီၫစဲၫWCCနီၪ အၪ့ကံၩ့ ဘၩဆိၪဖၪဝ့ၫနီၪလီၫႉ
အဲၫ့ယၫလၫ့ထံၫခး ကဲၬၥလံၬၥၫ့ခိၪဒိၪလဖၪ အၪ့ယၫထၪ့ဘၪ ဘဲၫဆၧဎူၫဆၧဎၩ့ကအီၪထၪ့လၧ ခးပယၩ့ဒဲ အဲၫ့ယၫလၫ့ထံၫခးဖၧၩ့အဂး အဂဲး
လၧအဖီၩ့ခွံၬ ၂၀၂၁နံၪ့ လၩဂၠိၫ့၁၆ၥၫ့အိၩ အီၪလၧအဲၫ့ယၫလၫ့ထံၫခးဖၧၩ့ ကဲၬၥလံၬၥၫ့ ခိၪဒိၪလဖၪ စူၭကီၪ့မၩဎိၭလၩ့ ဆၧဒၪလၩ့ဎိၭဖၭဒိၪနီၪလီၫႉ အဝ့ၫၥံၪ ဒၪလၩ့ဎိၭလိၬၥၭဂီၩ့ဝ့ၫအခၫ ခးပယၩ့ဆၧဎူၫဆၧဎၩ့ကန့အဂးဒဲ အဲၫ့ယၫလၫ့ထံၪခး လံၩခံၫကကဲၩ့ခီၫ ဆၧဎူၫဆၧဎၩ့ ကန့အ ဂး ထုၬထၪ့လံၬကဘံၪ့နီၪလီၫႉ
လၧအဝ့ၫၥံၪအဆၧဒၪဎိၭလၩ့အဖၧၩ့ အဝ့ၫၥံၪကၩ့ကၩဎိၭလၩ့ကၠၭ မုဆၫကနံၩယီၩ ဆၧတုၩ့ ထၪ့တုၩ့လၩ့ကဲၪထၪ့ဝ့ၫဒၪ ခးပယၩ့အဂဲးႇ စၭထၪ့လၧ လၩဖ့ၫဖီၫဝၫရံၫအိၩ ခးပယၩ့ၥုၭဖိၪလဖၪ နီၪဂဲၫထဲၩ့မၩနၧၩ့မၩစၪ မၩၥံၫမၩဆၫၦခမျၧးလဖၪ အၪလ့ၬယူၭနီၪ အဝ့ၫၥံၪနါဂၧၫ့ဘၪ ၥ့ၪယၫဘၪ အဂဲးႇ ဆၧနီၪအကၠီၩ့ ၥုၭဖိၪလဖၪဘဲၫၥိၭကအီၪက့ၪဒိၪဘၪ ၦခမျၧးလဖၪအလူဒဲ အၥၭလုလဖၪ အဂး ဆၧမၩၥံၫမၩဆၫဆၧလဖၪနီၪ ဘဲၫကအီၪပထုၬခွံၬအဂး ၥၫ့ခိၪဒိၪလဖၪယီၩ အၪ့ကံၩ့ အၪ့ယၪထၪ့စိၩဝ့ၫနီၪလီၫႉ
လကၭဒံၭဘၪ လၧအ့ၫစရ့ၩဒဲ ပၫလဲၭစတဲၩ့အဖၧၩ့ ကဲၪထၪ့ဝ့ၫဒၪ ဆၧဘံၪ့ဘူၪထၪ့ဒၩ လဖၪ ဘဲၫၥိၭကအီၪပထုၬခွံၬအဂးႇ အဲၫ့ယၫလၫ့ထံၪခးကကဲၩ့ခီၫ ဆၧတုၩ့ထၪ့တုၩ့လၩ့ လဖၪ ကအီၪပထုၬၥၭ လဆိၩၡၩအဂး ထီးရၧးစၧးကၠၭဘၪ လၧၦမၩၡၩခံးဂးခိၪနါလဖၪအဖၫ့ခိၪလဂ့ၩ ဂီၩ့ ၡၩကိၭဂၩယိလါဝ့ၫန့ ဆၧဎူၫဆၧဎၩ့အဖၧၩ့ ပကချဲၩ့လၩ့ဎိၭကၠၭအဂဲး ၥၫ့ခိၪဒိၪလဖၪယီၩ အၪ့ယၫထၪ့ဝ့ၫနီၪလီၫႉ
လကၭဒံၭဘၪ ဘဲၫၥိၭကပဒၩ့လၩ့ၥၭဒဲ ၦဂူၪဂၩအဂး ဆ့ၭကၠၭဘၪ ဆၧပဒၩ့ထၬ ကိၫဘံ ဆၧဆၫၥံၪ့ဎွံၪလဖၪအဂးဆ့ ၥၫ့ခိၪဒိၪလဖၪယီၩ အၪ့ယၫထၪ့ဘၪ အဲၫ့ယၫလၫ့ထံၪခး ကဲၬၥလံၬ ဆၧဘိၪ့ဆၧဘၩဖိၪလဖၪအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ
နးအဲၪဖီၫဘွၩ

၅နွံၫလနွံၫဆၧပရၧၫ့
ဂၠၫမနံၫကဲၬၥလံၬကၥံၪဒရဲၫလး အၥၭအီၪထၪ့ဘၭဝ့ၫဒၪအနံၪ့၁၀၀၀ခွဲၫ့ယၧၫ့ခရၧၫ့ဖၧၩ့ ကထံၭလၩ့ထဲး ၦမုၪလဖၪအဂဲး
လၧဂၠၫမနံၫထံၪခးဖၧၩ့ ကဲၭၥလံၬကၥံၪဒရဲၫ ဝဲထၪ့ထၬ ဆၧမၩလိၪလးဖၧၩ့ ဆၧမၩလိၪဖိၪ ၦခွၫလဖၪပၫဝ့ၫဒၪဆၧအူၪဆၧဒံၩ့ဒဲ ဆၧၥၭအွံၪခွဲၫယၧၫ့ အၥၭအီၪထၪ့ဘၭဝ့ၫဒၪအနံၪ့၁၀၀၀ အမံၩ့ မွဲလၧ Regensburger Domospatzenခွဲၫယၧၫ့ အီၪဝ့ၫကဖုၫနီၪလီၫႉ
လၧခွဲၫယၧၫ့ယီၩအဖၧၩ့နီၪ အဂုအိၩၦၡၩပၫန့ၫ ၦခွၫလဖၪနီၪလီၫႉ လါနၫ့ဂ့ၩ ဘဲၫယီၩနီၪ လၧခွဲၫယၧၫ့ခရၧၫ့ယီၩအဖၧၩ့ ကထံၭလၩ့ထဲး ဆၧမၩလိၪဖိၪ ၦမုၪလဖၪအဂဲး ဘိၭဘၪၥ့ၪယၫထၬ ဝ့ၫနီၪလီၫႉ စၭထၪ့လၧ ၂၀၂၂နံၪ့နီၪ လၧခွဲၫယၧၫ့ယီၩအဖၧၩ့ ကထံၭလၩ့ထဲး ၦမုၪလဖၪအဂဲး ဒဲ Regensburg ဝံးလံၫထံၭကကဲၩ့ခီၫနီၪ ကစၭထၪ့ဖ့ၪလၫ့ဘၪ ဆၧမၩလိၪမုၪဖိၪၥံၪ ၥဖၠးလီၫအ ဂဲး လီၩၥ့ၪယၫဘၪ ဂၠၫမနံၫဆၧထုၬထၪ့ဆၧပရၧၫ့ ဆၧမၩလးလဖၪအဂဲးပၥ့ၪယၫဘၪနီၪလီၫႉ
လၧအဖီၩ့ခွံၬ ၁၉၆၄-၁၉၉၄နံၪ့အထီအိၩ ၥၫ့ဎွၩဒိၪ ဘဲၭနဒံ၁၆ဂၩလဂၩ အဝဲခွၫ မိၫဆံၫ ညီၫGeorge Ratzingerနီၪ ဂဲၫထဲၩ့လ့ၩခိၪလ့ၩနါ ခွဲၫယၧၫ့ခရၧၫ့ယီၩ ဖိၭဘိၭအနံၪ့၃၀အဂဲး ပၥ့ၪ ယၫဘၪနီၪလီၫႉ
နးအဲၪဖီၫဘွၩ

ဘရၫဇံၩထံၪခးဖၧၩ့ ကိၫဘံဆၧဆၫဆါဂဲၫအၪထၪ့ ဖိၭဘိၭ ခွးဖိၭဖၫ့အကၠီၩ့ ကဲၬၥလံၬဆၧအီၪကီၪ့ အီၪက့ၪထၬဘၪ ဆၧအၪ့ကံၩ့ဘၩဆိၪဖၪဆၧ မုနံၩအဂဲး
လၧဘရၫဇံၩထံၪခးဖၧၩ့ ကိၫဘံဆၧဆၫဆါဂဲၫအၪထၪ့ဝ့ၫ ဒိၪဒိၪဒ့ၭအကၠီၩ့ ကအၪ့ကံၩ့ဘၩ ဆိၪဖၪအ့ၪ ဘဲၫၥိၭဆၧဆၫအၧၩ့ယီၩ ကလၩ့မါခွံၬအဂးဒဲ ၦလၧအဘၪၥံၫဝ့ၫ လၧဆၧဆၫယီၩ လဖၪအနးၥၭအဂး ဘရၫဇံၩၥၫ့ခိၪဒိၪလဖၪခရၧၫ့နီၪ အီၪက့ၪထၬလၩဂၠိၫ့၁၉ၥၫ့နီၪ အဝ့ၫၥံၪအ ထံၪခးထၧၫ့ဘံၪ့ယၫ ကအၪ့ကံၩ့ဘၩဆိၪဖၪဆၧမုနံၩနီၪလီၫႉ
မုနံၩနီၪအဖၧၩ့ ၦလၧအဘၪၥံၫဝ့ၫဒၪလဖၪ အနးၥၭအဂး လၧဆၧအီၪကီၪ့ကိၭဒီၪ့ဒ့ၭအဖၧၩ့ မွဲအၪ့ကံၩ့ဘၩဆိၪဖၪအ့ၪဝ့ၫ လၧမံဆၩဆၧလုထၪ့ဖၧၩ့နီၪလီၫႉ လကၭဒံၭဘၪ ကဲၬၥလံၬဆၧပရၧၫ့ ဆၧမၩလးလဖၪနီၪဆ့ လၩဂၠိၫ့၁၉ၥၫ့ အဂၫလၩ့ ၃နၩရံၫအခံၫ့နီၪ မွဲရၩလၩ့စိၩဘၪ ဆၧဘၩဆိၪဖၪ အလၩ့ဆၫ့နီၪလီၫႉ
ဘၪမၩဝ့ၫဘဲၫယီၩၥိၭဆၧထိစိၩနီ ဆၧဆၫဆါလဖၪဒဲ ၦအဘၪၥံၫလဖၪအဂံၪ့ဒီၪ့ဖိၪလၧ အီၪထးဝ့ၫလဖၪကၠၧၫ့ကၠၧၫ့ ဆၧအီၪကီၪ့ယီၩအီၪဝ့ၫ ဘူၭဘူၭထံးထံးအဂဲးႇ ဘရၫဇံၩထံၪခး ဘဲၫကလ့ၩထၪ့လ့ၩထီၫအဂးႇ ၦလၧအဘၪထဲၩ့ၥံၫအဂၩ၅၀၀၀နီၪ နၪ့ထၪ့စိၩဂီၩ့ ၦၡၩၥံၫဆၧဝံ ဆၧနၬအၪထၪ့နီၪ မွဲလၩ့ၥၭမဲၪဝ့ၫဒိၪဒိၪဒ့ၭအဂဲးႇ ပနၫ့ဆၫ့ထွ့ၪၦၡၩလၧ ဆၧဘၩဆိၪဖၪနီၪ မီၪ့ဎီၩ့ ပမၩၡူၪမၩဘၩအ့ၪဂံၪ့ဒီၪ့ဖိၪအအီၪထးလဖၪအၥၭအကၠီၩ့ ၦၡၩဘၪၥံၫဆၧဝံဆၧနၬအၪထၪ့နီၪ ဘၪထွ့ၪလၧ လခိၭနၪဘၪဆၧဆီၫ့ဆၧချဲၫ့ အဆၧဘိၭဘၪၥ့ၪယၫလဖၪအဂဲးႇ ဆ့ၭဆၧပဒၩ့ထၬ ကိၫဘံဆၧဆၫၥံၪ့ဎွံၪအခံၫ့စွံအကၠီၩ့ ဘၪကဲၪထၪ့ဝ့ၫဘဲၫယီၩၥိၭနီၪလီၫႉ
ဆၧထုၬထၪ့ထၬ ထံၪခးထၧၫ့ဘံၪ့ယၫ ဆၧအၪ့ကံၩ့ဘၩဆိၪဖၪဆၧ မုနံၩအကၠီၩ့ ဘၪထွ့ၪ လၧဆၧဘၩဆိၪဖၪအစီၩ့အမၩ့နီၪ နဲၩဂ့ၩ လနဲၩဂ့ၩ မွဲဒၪဆၧဖ့ၪလၫ့ ဆၧထုၪ့ၥုၪ့ထုၪ့ၥၭအဂဲး ၥၫ့ခိၪ လဖၪနီၪ စံၭဝ့ၫနီၪလီၫႉ
ဘၪထွ့ၪလၧ ဆၧဆၫယီၩအဂးနီၪ ထံၪခးခိၪနါၥံၪဎိၭဒီၪဆၧဘၪမၪအဂဲး ၥၫ့ခိၪဒိၪလဖၪ ယီၩ စံၭဝ့ၫနီၪလီၫႉ ဘၪန့လဲၪနီၪ ဆၧဆၫအၧၩ့ယီၩ လနၬထၪ့ဒံၭဘၪ ဘဲၫယီၩၥိၭအခံၫ့ဒၪအိၩ မူၩဒၩအီၪၦလဖၪ ဘဲၫကဎိၭဎဲၫ့ဝ့ၫဂ့ၩဂ့ၩဘၪဘၪအဂး ၥၫ့ခိၪဒိၪခရၧၫ့ယီၩ ကွ့ၭထံၭလၫ့စိၩလံၬ အ ဂဲး ၥၫ့ခိၪဒိၪ Joel Portella Amado နီၪ စံၭဘၪဝ့ၫလီၫႉ
ဘရၫဇံၩခးဒိၪ Jair Bolsonaroဆ့ ခိၭဒုၭဆၧၫ့ထဲၩ့ ဆၧဆၫအၧၩ့ယီၩလါနၫ့ ကမၩဆၧၫ့ ထၪ့ထဲၩ့ ၥနိၫ့လၧကပဒၩ့ထၬဆၧဆၫအဂးနီၪ မွဲလထိးဆၧၫ့ဒံၭဘၪဝ့ၫအဂဲးပၥ့ၪယၫဘၪနီၪလီၫႉ
နးအဲၪဖီၫဘွၩ

ခးပယၩ့ၦဘၪကၪဘၪဂဲၩဖိၪလဖၪနီၪ ဘဲၫၡၩကမၩဆၧၩ့ကၠၭဘၪအဂး ၥၫ့ဎွၩဖရၫ့စံၭ အၪ့ယၫထၪ့ဘၪအဂဲး
ခးပယၩ့ဆၧဘံၪဘူၪထၪ့ဒၩယီၩအဖၧၩ့ ၦလၧဘၪဒၪဆၧၫ့ယၫဆၧကၪဆၧဂဲၩလဖၪနီၪ ဘဲၫ ၡၩကဝၩ့မၩဆၧၩ့ကၠၭဘၪအဂး ၥၫ့ဎွၩဖရၫ့စံၭယီၩ လၧခးပယၩ့ၥၫ့ခိၪဒိၪလဖၪကၠၧၫ့ကၠၧၫ့ အၪ့ယၫ ထၪ့စိၩဘၪဝ့ၫနီၪလီၫႉ
မွဲလၧဆၧဒုၭဆၧခၭယီၩအကၠီၩ့ ၡၩခမျၧးအၪဒၪဆၧ ဘၪအီၪက့ၪထးခွံၬ အဂံၪ့အဎၫ့ဂီၩ့ ဘၪ လီၩ့စဲၪ့အီၪဂူၪအၥၭလၧၡိၭကျၩၡၩ့ကျၩဒဲ ဆၫအၪ့ဆၫအီၩလဖၪဆ့ မွဲလအီၪလၧၩ့ဘၪနီၪလီၫႉ ခးပယၩ့ၥၫ့ခိၪဒိၪလဖၪဆ့ ဆၧဒုၭဆၧခၭအကၠီၩ့ ၦလၧအဘၪဒၪဆၧၫ့ယၫ ဆၧကၪဆၧဂဲၩလဖၪ အဂး ဘဲၫဆၧမၩဆၧၩ့ကအီၪထၪ့အၥိၭ ကိၭနံၪ့ဒ့ၭ အဝ့ၫၥံၪအဆၧအီၪကီၪ့လၩ့ဎိၭအဖၧၩ့ အၪ့ယၫ ထၪ့ဝ့ၫနီၪလီၫႉ
လကၭဒံၭဘၪ ဆၧဘိၪ့ဆၧဘၩလးလဖၪႇ ကျီၩ့လးဝၩ့လဖၪႇ ၥၫ့ခၫကၠီးလဖၪႇ ဘလံၫ လဖၪႇ ဆၧမၩလိၪလးကၠီးလဖၪႇ ဆၧဆၫဂံၪ့လဖၪနီၪ မွဲလၧၦဘၪကၪဘၪဂဲၩဖိၪလဖၪ ဘၪဂဲၫ အီၪဒုၩၥၭလးလဖၪအကၠီၩ့ ထီးမၩဘၪထံၭဘၪနဲၪ့ဘၪ ဆၧအလးလဖၪယီၩလဂ့ၩအဂးဆ့ အၪ့ယၫထၪ့ထၬဝ့ၫအီၪဆ့နီၪလီၫႉ
ၥၫ့ဎွၩဖရၫ့စံၭ စံၭဘၪဝ့ၫ ယ့ၫၡူအၥၭဆံၫ့ဎံၫနီၪ လ့ၩထိၭဘုၭဘၪ ၦၡၩကိၭဂၩဒ့ၭ အၥၭဂီၩ့ မွဲဂဲၫဆိၬန့ဒၪဝ့ၫ ဆၧဎူၫဆၧဎၩ့ဖျဲၪဖျဲၪအဂးႇ ကနံၪ့ယီၩအဂး ဆၧထိထီၫနီၪ မွဲလၧ ပကဘၠၩ့ကၠၭ ကၠၧၫ့ကၠၧၫ့ႇ ပကၥီၪ့လိၪကၠၧၫ့ကၠၧၫ့ႇ ပကပျၩ့ထၪ့ကၠၧၫ့ကၠၧၫ့နီၪလီၫႉ ဆၧနီၪအကၠီၩ့ ပကယိၭဆၧၩ့ ကၠၭအ့ၪ ၦဘၪကၪဘၪဂဲၩဖိၪလဖၪ အဆၧကၪဆၧဂဲၩကၠၧၫ့ကၠၧၫ့ဂီၩ့ ပကၥီၪ့လိၪထၪ့ပၥၭ လၧပက ၥုၪ့ထၪ့ ၡၩခံးဂးဂံၪ့ဒီၪ့ကဖျိၪ့အဂးနီၪ ၥၫ့ဎွၩယီၩ နၪ့ဆၫ့ထွ့ၪဘၪ ပဝ့ၫၥံၪလဖၪနီၪလီၫႉ
နးအဲၪဖီၫဘွၩ
ၥၫ့ဎွၩဖရၫ့စံၭ လ့ၩဒၪခီၩ့ ၦလၧဘၪလၩ့ဖီၩ့ဖၧၩ့လဖၪအဂဲး
လၧအဖီၩ့ခွံၬ လၩဂၠိၫ့၂၁ၥၫ့ဒၪအိၩ ၥၫ့ဎွၩဖရၫ့စံၭလ့ၩဒၪ ရိၩမၭဆၧဒုၭဎၬလးဖၧၩ့ ၦလၧအဘၪ ထိးဖီၪ့ၥၭလဖၪအဂဲး ဘၫတံၫကၫ့ဆၧပရၧၫ့အဖၧၩ့ ဘိၭဘၪၥ့ၪယၫထၬဝ့ၫနီၪလီၫႉ
လၧဝံးရီၩမၭ အဎိၩထုၬဆၧဒုၭဎၬလးဖၧၩ့ ၦလၧအဘၪလၩ့ဖီၩ့ဖၧၩ့လဖၪယီၩ လ့ၩဂၬကွ့ၩစိၩ လၧ ဘၫတံၫကၫ့ဆၧဖ့ၪနဲၪဆၧလးအထီ လ့ၩဒၪခီၩဘၪလၧၥၫ့ဎွၩနီၪလီၫႉ အဝ့ၫၥံၪစဲၪ့ထၪ့လ့ၩ လၧခီၫအထီ ဆၧဒုၭဎၬလးအဖၧၩ့ အီၪဝ့ၫဒၪၥရိၭဖိၪအဖၧၩ့ ၦလၧအမူၩဒၩအီၪဝ့ၫဒၪ ဘိၪ့ခိၪၥၫ့ခၫ ကၠၧၫ့ကၠၧၫ့ ဆၧဒုၭဎၬလးခိၪနါဒဲ ဆၧဒုၭဎၬလးဖၧၩ့ ၦမၩဆၧဖိၪလဖၪ ဘၪလ့ၩၥိၫ့အဝ့ၫၥံၪနီၪလီၫႉ
လကၭဒံၭဘၪ လၧလၩဂၠိၫ့၂၉ၥၫ့ စံၫ့ပံၫတၧၫစံၫ့ပီၩဘိၪ့မုနံၩကိနီၪဆ့ ၥၫ့ခိၪဒိၪလဖၪအဂး ဆၧနဲၪ့လၩဖၩ့ဖျုၩ ပကိၭဝ့ၫလၧ ပၩလံၫအွၩ့နီၪ ၥၫ့ဎွၩယီၩ ကဆိၪဂ့ၩဆိၪဘွၩ ကမၩဆံၫ့ဎံၪထၪ့ဝ့ၫ လၧစံၫ့ပံၫတၧၫဘၫစံၩလံၫကၫၥရိၭဖၧၩ့ လၧမံဆၩဆၧလုထၪ့အဂဲး ဘၫတံၫကၫ့ဆၧပရၧၫ့ ဘိၭဘၪ ၥ့ၪယၫထၬဝ့ၫနီၪလီၫႉ
နးအဲၪဖီၫဘွၩ
ၥၫ့ဎွၩဖရၫ့စံၭဖ့ၪလၫ့ဘၪ ဆၧမၩဆၧၩ့လဖၪနီၪ ၥိၫ့စိၩဝ့ၫလၧ ကိၫဘံဆၧဆၫ ဘၪဂါအနၭထုၬထံၪခးလဖၪအဂဲး
စၭထၪ့လၧ ကိၫဘံဆၧဆၫကဲၪထၪ့အိၩ ထီးမုဆၫကနံၩယီၩ ဂၪ့ခိၪထၧၫ့ဖျိၪယၫအဖၧၩ့ ဆၧဆၫဘၪဂါၦၡၩအီၪဝ့ၫဒၪ ဖိၭဘိၭ၁၇၈ခွးဂီၩ့ ၃ခွးဘျဲၪနီၪ ၦၡၩၥံၪဝ့ၫဒၪနီၪလီၫႉ ဆၧနီၪအ ကၠီၩ့ ခီၫ့ၡၩမွဲဂ့ၩႇ ၡၩခံးဂးမွဲဂ့ၩ လၩ့ဆ့ၭလၩ့ယွၩဝ့ၫဒၪ အၪမၬနီၪလီၫႉ
ထံၪခးလၧ အကဲၪဒိၪလဖၪနီၪ ဆ့ၭဆၧပဒၩ့ထၬကိၫဘံဆၧဆၫၥံၪ့ဎွံၪန့ ဂ့ၩဂ့ၩဘၪဘၪ လါနၫ့ ထံၪခးလၧအၡၪ့အယၬလဖၪနီၪ ကဆ့ၭဘၪၥံၪ့ဎွံၪယီၩအဂး ဆၧလၧၫ့ဆၧဎွ့ၩလအီၪဘၪ နီၪလီၫႉ ဆၧနီၪအကၠီၩ့ ထံၪခးအၡၪ့အယၬလဖၪ ဘဲၫကဆ့ၭဘၪ ဆၧပဒၩ့ထၬကိၫဘံဆၧဆၫ ၥံၪ့ဎွံၪအဂး ၥၫ့ဎွၩကျ့ၭစၨၭထၪ့ထဲၩ့ လခဲၫ့ကဘျၩ့နီၪလီၫႉ
ၥၫ့ဎွၩဖရၫ့စံၭယီၩ ကမၩဘိၪ့ထၪ့ ပၥၪအဂးစဲၭလဖၪ ဒဲ ၥံၪ့ဎွံၪဖၭစၧၩ့လဖၪနီၪလီၫႉ အဝ့ၫ ကမၩဘိၪ့ဝ့ၫဒၪထံၪခး (၉) ခးဂီၩ့ ထံၪခးလဖၪနီၪ မွဲဝ့ၫဒၪ ဘရၫဇံၩႇ ကိၫလၫ့ဘံၫယၫႇ အၫဂၠံၫ တံၩနၩႇ အံၫ့ဒံယၬႇ ခၠံၫလံၫႇ တီၫ့အၫဖရံကၭႇ ဘိၫလံၩဘံၫယၫႇ ဆံၩရံၩယၩ ဒဲ ပၫပူၫဝၫနယူၩဂံၫ နံၫ ထံၪခးလဖၪနီၪလီၫႉ မုဆၫကနံၩယီၩ ထံၪခးလၧ အဘၪထိး ကိၫဘံဆၧဆၫအနၭထုၬနီၪ မွဲလၧဘရၫဇံၩဒဲ အံၫ့ဒံယၬအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ
နးအဲၪဖီၫဘွၩ
Spider man လ့ၩဒၪလၩ့ဎိၭလၧ ၥၫ့ဎွၩဖရၫ့စံၭအဂဲး
လၧအဖီၩ့ခွံၬပူၬတပၠါမုနံၩအိၩ ၥၫ့ဎွၩဒၪလၩ့ဎိၭလိၬၥၭလၧ ၦခမျၧးလဖၪဂီၩ့ဝ့ၫအထီနီၪ ၦလၧအဂဲၫဘိၪ့ထၪ့ဘၩထၪ့ၡီၩ့ယွၩလဖၪ ဒၪဘၪ နယူၩယီၭ Spider man အကၠီၩ့ ဖးထၪ့ကၠၭဝ့ၫ နီၪလီၫႉ
အမံၩ့ဎိၩဝ့ၫဒၪ Spider man ယီၩနီၪ လ့ၩဒၪခီၩ့လၧ ၥၫ့ဎွၩဖရၫ့စံၭဂီၩ့ ဖ့ၪလၫ့ထးအ့ၪၥၫ့ဎွၩ လၬဆီၪ့ လၧအဝ့ၫအMaskဒံၭနီၪလီၫႉ ဖိၪၥၪဆံၭဖိၪအၪဒၪဆၧနီၪ မိဒၪဘၪလၧ Spider man အကၠီၩ့ ၥၫ့ဎွၩအၪ့မၧၫ့လ့ၩဒၪစိၩလၧ ဖိၪၥၪလဖၪအခၫ စံၭခိးစံၭတၩဘၪၥၫ့ဎွၩအဂဲးႇ အဝ့ၫအမံၩ့ တၡါနီၪ မွဲဝ့ၫဒၪလၧ မၫၥံၩယၩနီၪလီၫႉ အီၪလၧအံၫတလံၫထံၪခး ဖိၪၥၪဆံၭအဆၧဆၫဂံၪ့လဖၪ အဖၧၩ့ ၦလၧဘၪထၪ့ဆၧဆၫဂံၪ့ဖိၪၥၪဆံၭဖိၪလဖၪ ဘဲၫဆၧကမုၬၥၭအဂး အဝ့ၫလီၩ့လ့ၩဂၬကွ့ၩ စိၩဂီၩ့ဝ့ၫယူၭအဂဲး ႇ လၧကိၫဘံအထီယီၩ ဖိၪၥၪလဖၪနီၪ ဘၪအီၪဒၪလၧဂံၪ့ဖၧၩ့အကၠီၩ့ အဝ့ၫယီၩ ချဲၩ့ဒုၪ့ဂၧၩ့ဖိၪၥၪလဖၪ လၧVideo call အီၪဝ့ၫဒၪ အဘျၩ့ ၁၄၀၀ယူၭအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ
နးအဲၪဖီၫဘွၩ

ခးအမ့ၫရံကၫ့ခးဒိၪ ဂၠိၩဘဲၫ့ဒၫ့ ဘဲၫကထိးဆၧၫ့ဒိၭန့အၪ့ထဲၩ့ဘၪ ကိၪဘိၪ့ဆံၫ့ဎံၫအဂး ယိလါဝ့ၫအဂဲး
အမ့ၫရံကၫ့ထံၪခး ခးဒိၪဂၠိၩဘဲၫ့ဒၫ့နီၪ မွဲလၧကဲၬၥလံၬဆၧဘိၪ့ဆၧဘၩဖိၪကဂၩနီၪလီၫႉ အဝ့ၫယီၩနီၪ မွဲအီၪဂဲၫလၧ ပၫတံၫအဖ့ၪဂဲးဖ့ၪဘၭ ဆၧမၩလၩ့ထ့ၬဎွံၪဖိၪၥၪနီၪလီၫႉ ဆၧနီၪအကၠီၩ့ အဝ့ၫယီၩဆ့ မွဲခးဒိၪလၧအဖ့ၪဂဲးဖ့ၪဘၭ ဆၧမၩလၩ့ထ့ၬဎွံၪဖိၪၥၪ ခးဒိၪကဂၩနီၪလီၫႉ
မိကဲၬၥလံၬဆၧအီၪကီၪ့ယီၩနီၪ ဘၪထွ့ၪလၧဆၧပဒၩ့ထၬဖိၪၥၪႇ ဆၧမၩလၩ့ထ့ၬဎွံၪဖိၪၥၪ ဆၧမၩယီၩနီၪ မွဲလထိးဆၧၫ့ဘၪဝ့ၫနးဆံၭနီၪလီၫႉ ဆၧနီၪအကၠီၩ့ ၦလၧအဖ့ၪဂဲးဖ့ၪဘၭဆၧမၩယီၩ ထံၪခးခိၪနါလဖၪဒဲ အလးအလၩထီၫဝ့ၫဒၪ ခိၪနါလဖၪနီၪ လဖ့ၪလၫ့လၧၩ့ဘၪဝ့ၫ ကိၪ့ဘိၪ့ဆံၫ့ ဎံၪအဂဲး ဘိၭဘၪၥ့ၪယၫထၬဝ့ၫနီၪလီၫႉ လကၭဒံၭဘၪ ၥၫ့ခိၪဒိၪလဖၪနီၪ နၫ့ဆၫ့ထွ့ၪထၬဘၪ ၦလၧအဘၪဖီၪ့ထၪ့ဖံၭထၪ့ ထံၪခးခိၪနါလဖၪဒဲ ၦမၩဆၧဖိၪ ကဲၬၥလံၬဆၧဘိၪ့ဆၧဘၩဖိၪလဖၪ ဘဲၫၥိၭကလီၩ့ဖိၬခိၭနၪဘၪ မိကံၬၥလံၬဆၧအီၪကီၪ့ အဆၧၥီၪ့ဆၧၥၫ့လဖၪအဂးနီၪလီၫႉ
ခးဒိၪဂၠိၩဘဲၫ့ဒၫ့ယီၩနီၪ ဖ့ၪဂဲးဖ့ၪဘၭ ဆၧမၩလၩ့ထ့ၬဎွံၪဖိၪၥၪဆၧမၩနီၪ လကၭဘၪ ဖ့ၪလၫ့ မၩဆၧၩ့ဝ့ၫဒၪ လၧကျိၪစ့ၩဒံၭနီၪလီၫႉ ကဲၬၥလံၬဆၧဘိၪ့ဆၧဘၩဖိၪလဖၪနီၪ အ့ၪမွဲဖ့ၪဂဲးဖ့ၪဘၭ ဆၧမၩလၩ့ထ့ၬဎွံၪဖိၪၥၪဆၧမၩ ဒဲ ဘဲၫၦၡၩကမၩလၩ့ထ့ၬဎွံၪအၥိၭလီၩ့အၪ့မၧၫ့ၦၡၩ ၦလဖၪနီၪ မိ ဆၧအီၪကီၪ့ယီၩ မွဲလဖ့ၪလၫ့လၧၩဘၪ ကိၪဘိၪ့ဆံၫ့ဎံၪအဂဲး ပန့ဘၪဆၧပရၧၫ့ ဘဲၫယီၩအၥိၭနီၪ လီၫႉ
နးအဲၪဖီၫဘွၩ