ဘၫတံၫကၫ့ပဒၩ့ထၬထဲၩ့ဘိၪ့ခိၪၥၫ့ခၫလဂၩ လၧၥၫ့ခၫလဂၩအဆၧဖံၭဆၧမၩဖၧၩ့လဆိၩယၫအဂဲး

ဘၫတံၫကၫ့ပဒၩ့ထၬထဲၩ့ဘိၪ့ခိၪၥၫ့ခၫလဂၩ လၧၥၫ့ခၫလဂၩအဆၧဖံၭဆၧမၩဖၧၩ့လဆိၩယၫအဂဲး ပၥ့ၪယၫဘၪနီၪလီၫႉ ၦလၧအဘၪထိးပဒၩ့ထၬအၥၭနီၪ မွဲလၧ Fr.Frank Pavone နီၪလီၫႉ ဘၪထိးပဒၩ့ထဲၩ့ၥၭနီၪ ဘၪန့လဲၪစွါဘဲၫ အဝ့ၫယီၩ အၪဒၪဆၧၦၡၩၥ့ၪယၫ မွဲၦလၧအလီၩ့ပဒၩ့ဆၧမၩလၩ့ထ့ၬဎွံၪဖိၪၥၪဆၧမၩနီၪလီၫႉ အဝ့ၫယီၩဘၪထိးစ့ၩရၫ့ဘဲၫယီၩၥိၭနီၪ ဘၪထွ့ၪ လၧ လၧဆိၫၡဲၫမံၫဒံၫယၫဖၫ့ခိၪလီၩအၧၩ့လီၩၥၫ့ကဆါယွၩ ဒဲ အဝ့ၫအခိၪနါၥၫ့ခိၪဒိၪအဆၧၥီၪ့ဆၧၥၫ့လဖၪနီၪ မွဲလခိၭနၪဘၪဝ့ၫ အကၠီၩ့နီၪလီၫႉ

           ဘၪထွ့ၪလၧဆၧအဂဲးယီၩနီၪ လၧအဖီၩ့ခွံၬလၩဒံၫဇဲၩ့ဘၧၫ၁၃ၥၫ့ အဝ့ၫအဆၧအီၪကီၪ့ ၥၫ့ခိၪဒိၪၥိၫ့စိၩလံၬလၧ ခးအမ့ၫရံ ကၫ့ၥၫ့ခိၪဒိၪလဖၪအအီၪနီၪ CNA ဆၧပရၧၫ့န့ဘၪဝ့ၫနီၪလီၫႉ ဘၪထွ့ၪလၧလံၬပရၧၫ့ဖၧၩ့အဂဲးလဖၪနီၪ လၧအဖီၩ့ခွံၬလၩနိၫဝံၩ ဘၧၫ၉ၥၫ့ဒၪအိၩ အမ့ၫရံကၫ့ၥၫ့ခိၪဒိၪ Bp.Christopher Pierre နီၪ လီၩၥ့ၪယၫစိၩ ဘၫတံၫကၫ့ဘၪထွ့ၪလၧၥၫ့မုၥၫ့ခၫအဂဲးရိၩ့ နီၪဂီၩ့ယူၭဒဲ ထၪ့အၪ့ယၫဝ့ၫဆ့အခွးလန့ဘၪနီၪလီၫႉ

        ၥၫ့ခၫ Fr.Frank Pavone အဂး ၦၡၩမၩဆၧၩ့ပဒၩ့အဝ့ၫလၧ ကၫနၫ့ၥနိၫ့မွဲဂ့ၩႇ ဘဲၫနီၪအၥိၭ အဝ့ၫကခိၭနၪ အၥၫ့ခိၪဒိၪ အဂး ၦၡၩအၪ့ယၫအဝ့ၫခိၭမၬခိၭမၬဆ့နီၪလီၫႉ

      ဘၪထွ့ၪလၧ အဝ့ၫအမူၭအရၭလဖၪနီၪ လမွဲဘၪအဂဲးႇ အနၫ့ဆါဒၪဝ့ၫ ဘၪထွ့ၪလၧ ဘၫတံၫကၫ့ အဆၧဘိၭဘၪၥ့ၪယၫ နီၪ လန့ဘၪဝ့ၫအဂဲး လၧအဖီၩ့ခွံၬ ၥံၭၥီၫ့မုနံၩအိၩ ၥၫ့ခၫယီၩလီၩဘၪ CANနီၪလီၫႉ လံၬပရၧၫ့ဖၧၩ့ ကွ့ၭထၬဝ့ၫ ၥၫ့ခၫယီၩ လၧ မံၫဒံၫယၫအဖၫ့ခိၪ လီၩအၧၩ့လီၩၥၫ့ကဆါယွၩလါနၫ့ လီၩအၧၩ့လီၩၥၫ့ဝ့ၫ ဘဲၫၥ့ၪလဲၪအဂဲး ထုၬဖျီၪထၪ့ထၬဝ့ၫအ့ၬႉ အဝ့ၫယီၩ လခိၭနၪဘၪ အၥၫ့ခိၪဒိၪအဂဲး ဘၪဆၧကွ့ၭထၬလါနၫ့ လခိၭနၪဘၪအၥၫ့ခိၪဒိၪဘဲၫၥ့ၪလဲၪအဂဲး ပၥ့ၪယၫဘၪအ့ၬႉ လၧဘၫ တံၫကၫ့ အဆၧဘိၭဘၪၥ့ၪယၫဖၧၩ့နီၪ မွဲလၧကိၭလၧၩ့ဘၪအဝ့ၫ Fr ဒဲ ကိၭဒၪအဝ့ၫလၧ MrႉPavone ဒၪနီၪလီၫႉ အၡါမၬ လၧအဝ့ၫဒိၭန့ ဘိၪ့ခိၪၥၫ့ခၫအဆၧကဲၪအိၩနီၪ ဘၪဆၧဖ့ၪလၫ့အ့ၪဝ့ၫ ဘိၪ့ခိၪၥၫ့ခၫလဂၩအလၩအဖၩ့လဆိၩယၫနီၪလီၫႉ လမွဲ ဘၪလၧအဝ့ၫလ့ၩခိၪလ့ၩနါကၭၥလံၬခရၧၫ့ယီၩနီၪလီၫႉ ဆၧနီၪအကၠီၩ့ လၧဆၧဖ့ၪဂဲးဖ့ၪဘၭဆၧမၩလၩ့ထ့ၬဎွံၪဖိၪၥၪခရၧၫ့နီၪ အဖၧၩ့ ၦၡၩကဆုးထဲၩ့ဖ့ၪလ့ၩခိၪလ့ၩနါအဝ့ၫနီၪ မွဲလဘၪထွ့ၪဘၪလၧ မိကၭၥလံၬဆၧအီၪကီၪ့ယီၩနီၪလီၫႉ ဘၪထွ့ၪဒၪလၧ ခရၧၫ့နီၪ လီၫအဂဲး ဘိၭဘၪၥ့ၪယၫထၬဝ့ၫနီၪလီၫႉ

       ဆၧဘိၭဘၪၥ့ၪယၫထၪ့ဆၧနီၪ စဲၪ့ထၪ့ဝ့ၫဒၪလါနၫ့ အဝ့ၫယီၩနီၪ လုထၪ့မံဆၩဆၧလုထၪ့ဘိၩ့ဒံၭႇ လၧအဖီၩ့ခွံၬ ၥံၭၥီၫ့မုနံၩ ဆၧလုထၪ့မံဆၩဆံၫ့ဎံၪ live ဖၧၩ့ မွဲၦၡၩဒၪအဝ့ၫဘိၩ့ဒံၭနီၪလီၫႉ လၧThe Priests for life ခၩ့ဒိၩ့လးဖၧၩ့ အဝ့ၫယီၩ မွဲဒၪကၭ ၥလံၬဘိၪ့ခိၪၥၫ့ခၫလဂၩအဂဲးႇ ကဆါယွၩအဆၧဖံၭဆၧမၩလဖၪနီၪ ဘဲၫကၭၥလံၬအၥနိၫ့အၥိၭ ဖီၪ့ထၪ့ဖံၭထၪ့ဝ့ၫအဂဲး အဝ့ၫယီၩစံၭထၬဝ့ၫနီၪလီၫႉ

       အဝ့ၫယီၩနီၪ အၥၭအီၪဝ့ၫဒၪ၆၃နံၪ့ဒဲ အဝ့ၫယီၩ လၧ၂၀၀၅နံၪ့အိၩ အမူၩဒၩလၩ့လၧ Texas ဆၨၩခးဒီၪ့ Amarillo ဆၧအီၪ ကီၪ့နီၪဂီၩ့ လၧ၂၀၀၉နံၪ့နီၪ ဘၫတံၫကၫ့ယီၩ အီၪက့ၪပၭကၩအဝ့ၫ ဘၪထဲၩ့ၥုၭအၥၭလၧ ဆၧအလးနီၪလီၫႉ ဘဲၫယီၩနီၪအဝ့ၫယီၩ အမူၩဒၩလၩ့လၧအလးခလဲၪအဂဲး မွဲလထုၬဖျီၪထၪ့ထၬဘၪဝ့ၫဒဲ အဝ့ၫယီၩ လၧကၭၥလံၬလူၥီၫဂၩ့ဖျီၪ EWTN ဖၧၩ့ လီၩလၩ့ လၬလၩ့ဘၪထွ့ၪလၧ ဆၧပဒၩ့ၡၩအဆၧၥၭမၧၫ့အဂဲးနီၪလီၫႉ လၧခဲၫ့နီၪ အဝ့ၫအၥၫ့ခိၪဒိၪယီၩ ဘၪအီၪပထုၬခွံၬထဲၩ့ ဆၧဎိၭထံၪ ဎိၭဒီၪနီၪအဂဲး ပန့ဘၪဆၧပရၧၫ့ယီၩလၧ CAN ဆၧပရၧၫ့ဖၧၩ့နီၪလီၫႉ

နးအဲၪဖီၫဘွၩ