ဘၪဆၧဆိၪဂ့ၩဆိၪဘွၩ ယ့ၫၡူအၥၭဆံၫ့ဎံၪၥရိၬအဂဲး

 နံၪ့၂၀၂၂နံၪ့လၩမ့ၫ၁ၥၫ့နီၪ ဆၧမၩလၩမၩဖၩ့ဆိၪဂ့ၩဆိၪဘွၩ ယ့ၫၡူအၥၭဆံၫ့ဎံၪၥရိၬကဖျိၪ့နီၪလီၫႉ ၥရိၬနီၪ အီၪဝ့ၫဒၪလၧ သာပေါင်းဝံးဒီၪ့ ဒိၩ့ပၥံၫ့ဆၧအီၪကီၪ့ ကုန်းတန်းကြီး တဝၫ့နီၪလီၫႉ

တဝၫ့နီၪအ့ၪမွဲဆၧဆၧၩ့ခၫစွါဘဲၫ ထံၫဎိၭလၩ့အကၠီၩ့ ၥရိၬနီၪၦၡၩဘၪၥုၪ့ထၬ အခၪ့ထီၫထီၫနီၪလီၫႉ ၦလၧအ လ့ၩခိၪလ့ၩနါမံဆၩဆၧလုထၪ့နီၪမွဲဝ့ၫဒၪလၧ Fr.Henry Eikhlein နီၪလီၫႉ အဝ့ၫယီၩ စံၭဝ့ၫဒၪ ဘဲၫၥရိၬယီၩ ကကဲၪ ထၪ့အဂးနီၪ တဝၫ့ဖိၪၥံၪလဖၪ ဘၪဖ့ၪလၫ့အခံၫ့ဂီၩ့ ဘၪဂဲၫထဲၩ့ခိးဂဲးခိးဘၭဝ့ၫဒၪကဆိဖိၪနီၪလီၫႉ ၦလၧထံၭလၩ့ဆၧ မၩဘိၪ့လဖၪကိၭဂၩဒ့ၭနီၪဆ့ ယစံၭခိးစံၭတၩဘၪနီၪလီၫႉ ကနံၩယီၩနီၪမွဲဒံၭလၧ ဖိၪၥၪဆံၭလဖၪကထိးဆၧၫ့ဒိၭန့ ဆၧ ဒူၩယၫ့စကရမဲၫတူၩဒံၭနီၪလီၫႉ ၥရိၬယီၩနီၪမွဲလၧအၥံၫဖီၩ့ခွံၬဒၪပၧၩ ၥၫ့ခိၪဒိၪဂၠိၫ့မၩ့ဆံၫ့ဎံၪအီၪက့ၪထးဝ့ၫဒၪအစူၪလး နီၪလီၫႉ လကၭဒံၭဘၪ မုဆၫကနံၩယီၩၦလၧကမိကဲၪၥၫ့မုၥၫ့ခၫလဖၪလၩ့ၡၩဝ့ၫဒၪအၪလ့ၬယူၭအကၠီၩ့ ပမိဆၧအီၪ ကီၪ့ယီၩဆ့ ၦလၧအဲၪဒိၭကဲၪၥၫ့မုၥၫ့ခၫလဖၪနီၪ ပအီၪခိၭထိးဆၧၫ့ဝ့ၫဒၪနီၪလီၫႉ မိဖါလဖၪဆ့ ဆၫ့ထွ့ၪဘၪဖိၪဒံၪလ ဖၪလါဆံၭႉ ပကဘၪကူၭဆၧအီၪဝ့ၫဒၪအၬမၬလါနၫ့ ၦလၧကကူၭဆၧနီၪအီၪၡၩဝ့ၫဒၪနီၪလီၫႉ ဆၧနီၪအကၠီၩ့ ၦလၧ ကမိဖိၭလၫ့ကဆါယွၩအခဲၫ့ ၥၭဘၪ့မုၪခွၫလဖၪနီၪ မွဲပအီၪခိၭထိးဆၧၫ့ဘၪနီၪလီၫႉ

လကၭဒံၭဘၪ မံဆၩဆၧလုထၪ့ကဘျၩ့ယီၩနီၪမွဲဒံၭလၧ ၦၡၩမၩလၩမၩဖၩ့ SFX Bro.ဗာလင်တိုင်း ဒိၭန့ဆၧ အုၩ့လၩ့လဆိၩယၫဂီၩ့ စံၭခိးစံၭတၩထဲၩ့ ကဆါယွၩဆၧဎိၭထံၪဎိၭဒီၪဒံၭနီၪလီၫႉ အဝ့ၫယီၩနီၪစံၭဘၪဝ့ၫ အၡါမၪနီၪ ၦၡၩ ကမၩလၩမၩဖၩ့အ့ၪယၧၩဘယီၩနီၪ ယၥ့ၪယၫထၪအ့ၬႉ ယကၠၧၩ့လၫ့ၥရိၬ ယဘၪထၩ့လၫ့လံၬဖျိၪ့အခၫမၬ ယမံၩ့ပၫနီၪ ယၥ့ၪယၫလၩ့ယၥၭႉ လၧဒိၩ့ပၥံၫ့ဆၧအီၪကီၪ့ဖၧၩ့ ပတဝၫ့ဆံၭခိၭဖိၪယီၩအဖၧၩ့ ပန့ဘၪၥရိၬဂ့ၩဂ့ၩဘၪဘၪကဖျိၪ့အကၠီၩ့ ယၥၭဎွံၪဝ့ၫဒၪအၪမၬနီၪလီၫႉ ဂီၩ့နီၪလၧပတဝၫ့အဖၧၩ့ယီၩ လၧအခီၩ့အိၩနီၪ အ့ၪမွဲဖိၪၥၪၥံၪ ကဒိၭန့ ဆၧဒူၩယၫ့စဲၭကရ မဲၫတူၩစွါဘဲၫ ဖိၪၥၪၥံၪလဖၪဘၪလ့ၩဒိၭန့ဝ့ၫဒၪလၧ ဒိၩ့ပၥံၫ့အိၩလါနၫ့ ကနံၪ့ယီၩ Fr.Henry Eikhlein ဂဲၫဖ့ၪလၫ့ အ့ၪဖိၪၥၪဆံၭဖိၪလဖၪ လၧပတဝၫ့ယီၩအကၠီၩ့ ၦလၧလဒၪယံၩယါဘၪလဖၪဆ့ မွဲဒၪယံၩယါဝ့ၫယူၭနီၪလီၫႉ

ထၧၫ့ဖုဝဲထံၩၥိၭထီးလူၬၥံၪဧ့ ဆၧမၩလၩမၩဖၩ့ဘိၪ့မုနံၩ ကဘျၩ့ယီၩအဖၧၩ့ ၥၫ့မုၥၫ့ခၫ Broႇ Srလဖၪဒဲ ၦဆူၩ နဲၩဖိၪလဖၪ ထီးလူၬဂဲၫဝ့ၫဒၪ ဖိၭဘိၭအဂၩ၅၀၀ဘျဲၪအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

2.5.2022