ဘၪဆၧကဲၪထၪ့ Broလဖၪအဂဲး ဒဲ ဆၧထိးဆၧၫ့ဒိၭန့ယူၩဘလံၫ

နံၪ့၂၀၂၂နံၪ့ လၩအ့ၫဖြ့ၫ၇ၥၫ့လဂီၩ၇နၩရံၫနီၪ ဆၧမၩလၩမၩဖၩ့ၡီၩ့ ဆၧကဲၪထၪ့ Broအဆၧကဲၪႇ Fr.Michael ငွေဌေး အယူၩဘလံၫ ဒဲ ဆၧနုၬဆဲၭ Fr.ဝီးဖရက်မြင့်စိုး မံဆၩဆၧလုထၪ့အီၪဝ့ၫလၧ ဝံးပၥံၫ့ မယၩ့ခၠီၩ့ ယ့ၫၡူအၥၭ ဆံၫ့ဎံၪၥရိၬဖၧၩ့နီၪလီၫႉ

ၦလၧအကဲၪထၪ့ Broလဖၪနီၪ မွဲဝ့ၫဒၪ အီၪလၧၥၭဆွံခီၫ့ဆၧအီၪကီၪ့Bro.James, အီၪလၧမဒေါ့ကုန်းဆၧ အီၪကီၪ့Bro.မိုးဇယ်လပြည့် ဒဲ အီၪလၧ ဝါးခယ်မဆအီၪကီၪ့ Bro.မာတေဦး မျိုးမင်းဦးလဖၪနီၪလီၫႉ

Bro.Jamesနီၪ စံၭဝ့ၫဒၪ “လၧအဖီၩ့ခွံၬ၂၀၁၈နံၪ့အိၩ မွဲယအီၪလဆီၪ့ဘၪအကၠီၩ့ ယထဲၩ့ထဲၩ့ လၧယဂံၪ့နီၪ လီၫႉ ဂီၩ့လၧ၂၀၁၉နံၪ့နီၪယဂဲၫထဲၩ့ထဲၩ့လၧမယၩ့ခၠီၩ့ယီၩဂီၩ့ ယနုၬလၩ့စံၭဆၧၫ့လံၬနီၪလီၫႉ လါနၫ့မွဲလၧ ကဆါယွၩ အဆၧကိၭလအီၪဘၪနီၪဧၪၥ့ၪယၫအ့ၬႉ ကနံၪ့နီၪဒၪအိၩ ယဖျီၪ့အ့ၬႉ ၂၀၂၀နံၪ့ဒၪအိၩဆ့ မွဲလၧဆၧအဂဲး အမံၩ့မံၩ့ အကၠီၩ့ ယစံၭဆၧၫ့လံၬဘၭလၫ့အ့ၬႉ ကနံၪ့ယီၩ၂၀၂၂နံၪ့နီၪဘိၭ မွဲလၧကဆါယွၩအဆၧကိၭအကၠီၩ့နီၪဘိၭ ယဖျီၪ့ ဆၧမၩလိၪနီၪဂီၩ့ ဘဲၫယီၩယကဲၪထၪ့ဘၪBroကဂၩယူၭနီၪလီၫႉ ယကဲၪထၪ့Broကဂၩယူၭနီၪ ယနဲၩလၩ့ယၥၭန့ဒံၭ အ့ၬႉ ယစီၪဘၪမီၪ့ဎီၩ့ယမံၫမးဘၪလီၫႉ ထၧၩ့ယကကဲၪထၪ့ဘၪBroအဂးနီၪ ယဘၪဂဲၫထဲၩ့ကျ့ၭစၨၭထၬအၪမၬႇ ဆၧကၪဆၧဂဲၩအီၪဝ့ၫဒၪအၪမၬနီၪလီၫႉ ဘဲၫယကဖျီၪ့ဆၧဒုၭစ့ၭလံၬအဂးနီၪ ယဂဲၫထဲၩ့ဝံဖဲၫ့ဆံၫ့ဎံၫအၪမၬ ယဘၪ ဒုၭနဲၩ့ၥၭလၧ မိမၫရံၫအၪမၬႇ ဆၧစံၭဆၧၫ့လံၬစရၫ့လစဲၪ့လၩ့ဒံၭဘၪအထီနီၪ ယစံၭဘၪမိမၫရံၫ မိဧ့ အ့ၪမွဲလၧနစီၩ့နမၩ့ နီၪဘိၭ ယကဖျီၪ့ၥ့ၪ ဆၧနီၪအကၠီၩ့ ယကဝံဖဲၫ့ဆံၫ့ဎံၫကထီၫ့ဂီၩ့ ယအၪ့ကံၩ့အၪ့ယၫနဆၧမၩဆၧၩ့လီၫႉ အ့ၪမွဲ ယဖျီၪ့ စွါဘဲၫ ယကဆုးထဲၩ့လုထၪ့နၧၩလၧ ဖဲၫ့ဆံၫ့ဎံၫလခဲၫ့ကထီၫ့နီၪလီၫႉ ယစံၭဘဲၫနီၪဂီၩ့ ယအၪ့ကံၩ့ဘၩဆိၪဖၪ လၧမိ မၫရံၫအီၪနီၪလီၫႉ ကဆါယွၩနီၪဆ့ ယစံၭဘၪ ကဆါဧ့ အယီၩကကၠၪယီၩ နကကိၭယၧၩဧၪ နကိၭယၧၩအ့ၬဧၪ အ့ၪမွဲ နလၧကိၭဘၪယၧၩနီၪဘိၭ ယကစဲၪ့ထၪ့ခွံၬလၧနအီၪ အ့ၪမွဲနကိၭယၧၩနီၪဘိၭ ယကဖိၬထၪ့နခဲၫ့ ယစံၭဘၪဘဲၫ နီၪ လီၫႉ ဂီၩ့ယမိဆုးထဲၩ့လီၩဘၪ ၦဆူၩနဲၩဖိၪၥံၪနီၪဘိၭ အၪ့ကံၩ့ဘၩဆိၪဖၪအ့ၪပၧၩပဂးလါဆံၭနီၪလီၫႉ”

ဂီၩ့နီၪ Broမာတေဦး ဆုးဆဲၩ့စံၭဘၪဝ့ၫ “လၧအဖီၩ့ခွံၬ နံၪ့ကနံၪ့ဒၪအိၩ ယကဘၪစံၭဆၧၫ့ထီလံၬအခံၫ့နီၪ ယဘၪကူၭလၩ့န့ယၥွံၫအကၠီၩ့ ယဘၪထဲၩ့အီၪထဲၩ့လၧဂံၪ့နီၪလီၫႉ ယဒၪဘၪယထံၩၥိၭလဖၪကဲၪထၪ့ကၠၭBroအခၫ ယၥၭမုၬနးဆံၭအ့ၬႉ ဆၧနီၪအကၠီၩ့ယစံၭလၩ့ယၥၭ အ့ၪမွဲကဆါယွၩကကိၭထဲၩ့ယၧၩနးကၠၪဒီၭစွါဘဲၫ ယကထဲၩ့ထဲၩ့ ယစံၭလၩ့ယၥၭဘဲၫနီၪနီၪလီၫႉ လၩ့ဆၫ့ဝ့ၫဒၪနီၪ ကဆါယွၩနီၪကိၭထဲၩ့ယၧၩ လၧယထံၭၥိၭလဖၪႇ ယမိဖါဘူၭထံး လဖၪ အဆၧဆၫ့ထွ့ၪအဖၧၩ့နီၪလီၫႉ ဆၧနီၪအကၠီၩ့ ယဂဲၫထဲၩ့ထဲၩ့ဂီၩ့ ယကျ့ၭစၨၭထၪ့ထဲၩ့ ကဘျၩ့အခၫ ယဘၪအၪ့ ကံၩ့ဘၩဆိၪဖၪကဆါယွၩအၪအၪနီၪလီၫႉ ဘဲၫယကဖျီၪ့ဆၧဒုၭစ့ၭလံၬအဂးနီၪ ယဘၪအၪ့န့ယဂဲးယဘၭလၧယွၩ အီၪဒဲ မိမၫရံၫအီၪနီၪလီၫႉ ဆၧနီၪအကၠီၩ့ဆ့ ကနံၪ့ယီၩနီၪ ယဖျီၪ့ဆၧဒုၭစ့ၭလံၬယီၩဂီၩ့ ကနံၩယီၩနီၪ ယကဲၪထၪ့ဘၪ Broကဂၩနီၪလီၫႉ လါနၫ့ယကဲၪထၪ့Broကဂၩယူၭအဂဲးနီၪ ယမိနဲၩလၩ့ယၥၭထၧၩ့ယၫဒံၭအ့ၬႉ ဆၧနီၪအကၠီၩ့ယစံၭခိး စံၭတၩဘၪကဆါယွၩအၪအၪနီၪလီၫႉ ယၥိၭလၫ့ထၬဘၪ Broကဂၩအဆၧကီၩ့ဆၧၥိၭယီၩနီၪ မီၪ့ဎီၩ့ဒၪ ယဘၪယိၬထၬ ဆၧအွံၪဆၧယိၬကမံၩ့နီၪလီၫႉ ဘၪန့လဲၪနီၪဘိၭ ပဖိၬထၪ့ကဆါယွၩအခဲၫ့ယူၭစွါဘဲၫ ပကဘၪဒၪဆၧၫ့ယၫလၧ ဆၧအၪ့ထၩလဖၪႇ ဆၧကၪဆၧဂဲၩလဖၪအၪမၬနီၪလီၫႉ ဘဲၫယီၩ လၧပလးခဲၫ့ၦၡၩကကဲၪထၪ့Broအဂး အီၪဒၪဆၧမၩ လိၪဖိၪ ဖရၫ့ကိၫကဂၩဎးဒၪလီၫႉ ဆၧနီၪအကၠီၩ့ ယမုလါမိဖါလဖၪ ဆၫ့ထွ့ၪဘၪအဖိၪအဒံၪ ဘဲၫကကဲၪထၪ့ၥၫ့မု ၥၫ့ခၫလဖၪအဂးနီၪလီၫႉ  ဘဲၫအဖိၪအဒံၪၥံၪ ကမိကဲၪထၪ့ ၥၫ့မုၥၫ့ခၫအၥၭလၨကအီၪထၪ့အဂး အၪ့ကံၩ့ဘၩဆိၪ ဖၪအ့ၪဂီၩ့ ဂဲၫၥိၫ့ကၠၭဘၪနၥံၪအဖိၪအဒံၪလၧ မဲၩ့နၩယီၩလါဆံၭနီၪဘိၭ ယမိလီၩဘၪနီၪလီၫႉ ပၧၩယီၩဆ့ မွဲလၧဆၧဘၩ ဆိၪဖၪအကၠီၩ့ ပကဲၪထၪ့ဘၪBroလီၫႉ ၦဆူၩနဲၩဖိၪလဖၪဆ့ အၪ့ကံၩ့ဘၩဆိၪဖၪဆၧ အၪအၪလါဆံၭႉ နၥံၪအဂးဆ့ ပကအၪ့ကံၩ့ဘၩဆိၪဖၪအ့ၪ ပၧၩပဂးဆ့ အၪ့ကံၩ့ဘၩဆိၪဖၪအ့ၪပၧၩလါဆံၭနီၪဘိၭ ယမိလီၩဘၪနီၪလီၫႉ”

လကၭဒံၭဘၪ Bro မိုးဇယ်နီၪ စံၭဘၪဝ့ၫ “ယမိယဖါနီၪလၧအၥၭဆံၭဆံၭအဖၧၩ့ ထၪ့ၡါဂီၩ့ထိးဆၧၡၪ့ဆၧ ယၬလနၧၩ့လၧၩ့ဘၪကကၠၪ မွဲလၩ့ဖၭကၠၭလိၬၥၭနီၪလီၫႉ အနီၪအခၫယၧၩဝ့ၫ ယဘၪလ့ၩအီၪလၧ တောင်ယာကုန်း စိန်ဖရန်စစ်ဇေးဗီးယားစစ္စတာရ်လဖၪအကၠီး ဘဲၫၥိၭပဖိၪဎွ့ၪကဂၩအၥိၭနီၪလီၫႉ စၭထၪ့လၧယဆံၭဆံၭအထီ ထီးဘဲၫယီၩကကၠၪ ၦလၧအဂဲၫထဲၩ့ယိထဲၩ့ခွါထဲၩ့ယၧၩနီၪ မွဲဒၪလၧစိန်ဖရန်စစ်ဇေးဗီးယားစစ္စတာရ်လဖၪနီၪလီၫႉ လၧယအီၪဒၪ ၃ဖၨၪႇ၄ဖၨၪအထီဒၪအိၩဆ့ ၦလၧအအၪ့လုဖိၪယၧၩမိဖါလဖၪဆ့ မွဲအီၪဆ့နီၪလီၫႉ အဝ့ၫၥံၪဆ့ ထီးမုဆၫကနံၩယီၩ မွဲယိထဲၩ့ခွါထဲၩ့ယၧၩဘိၩ့ဒံၭနီၪလီၫႉ လၧယဂးကဆါယွၩအဆၧကိၭနီၪ မွဲလၩ့ဆၫ့ဝ့ၫဒၪလၧ ဆၧၥၭမၧၫ့အၪမံၩ့အၪမၠိၩအဖၧၩ့နီၪလီၫႉ ဘဲၫပဖိၪဎွ့ၪအဆၧၥၭမၧၫ့ၥိၭခီၫကမံၩ့ႇ ဘဲၫၦဘၪထိးအၪ့လုဖိၪလဂၩ အဆၧၥၭ မၧၫ့ၥိၭခီၫ့ကမံၩ့ႇ ဘဲၫဖိၪအအီၪဘၪလၧမိဖါအထံးအၥိၭခီၫ့ကမံၩ့နီၪလီၫႉ ဆၧအဂဲးလဖၪယီၩ အ့ၪမွဲပယိထၪ့ထံၫထံၫ ဆၭဆၭနီၪ ယဆါယွၩယီၩ ကမိကိၭယၧၩနီၪ ကိၭယၧၩဆၧၥၭမၧၫ့ကမံၩ့လီၫအဖၧၩ့မွဲအ့ၬ လၧဆၧၥၭမၧၫ့ကၠီၪ့ဖျီၩ့ အၪအၪ အဖၧၩ့ ၥိၫ့ယၧၩဂီၩ့ ကနံၩယီၩကိၭထဲၩ့ယၧၩဒီၭလၧBroလဂၩအဆၧၥၭမၧၫ့ဒီၭနီၪလီၫႉ ဆၧနီၪအကၠီၩ့ ၦလၧအဂဲၫထဲၩ့ အီၪဖျဲၪ့ထၪ့န့ယၧၩ ယမိဖါလဖၪနီၪဆ့ မွဲယစံၭခိးစံၭတၩဘၪႇ မိဖါလၧအဂဲၫထဲၩ့အၪ့လုဖိၪယၧၩလဖၪနီၪဆ့ မွဲယ စံၭခိးစံၭတၩဘၪႇ ၦလၧအဂဲၫထဲၩ့မၩဆၧၩ့ယၧၩ စိန်ဖရန်စစ်ဇေးဗီးယားစစ္စတာရ်လဖၪ  ဒဲ အကၧၩ့ဒိၪထုၬ Mother. Assumptaနီၪဆ့ မွဲယစံၭခိးစံၭတၩဘၪအၪအၪဆ့နီၪလီၫႉ ပကဲၪထၪ့Broကဂၩဂီၩ့အခၫ ပမွဲဝ့ၫဒၪလၧ ၦဆူၩနဲၩဖိၪ လဖၪအဂံၪ့ဒီၪ့ဖိၪကဂၩယူၭအကၠီၩ့ လၧခဲၫ့လၧယၫခီၫ အ့ၪမွဲပဘၪလီၩ့လ့ၩစိၩလၧ ဆၧအီၪကီၪ့အဆံၭလးဖၧၩ့အခၫ အွံၪၥၭဆၧၩ့ထိးဆၧၫ့ပၧၩ ဘဲၫနၥံၪအဂံၪ့ဒီၪ့ဖိၪအဘူၭအထံးကဂၩၥိၭလါဆံၭနီၪ ယမိအၪ့ကံၩ့အၪ့ယၩဘၪၦဆူၩနဲၩဖိၪ လဖၪနီၪလီၫႉ”

လကၭဒံၭဘၪ ၦလၧအထိးဆၧၫ့ဒိၭန့ထၪ့ဘၪ ၂၅နံၪ့စ့ၩဘျံၩ့ယူၩဘလံၫလဂၩမွဲဝ့ၫဒၪ Fr.Michael ငွေဌေး နီၪ စံၭဝ့ၫဒၪ “လၧအဝ့ၫကဲၪ့ထၪ့ဒၪBroအခံၫ့ဒၪအိၩ အဝ့ၫအဆၧကီၩ့ဆၧၥိၭအီၪဝ့ၫဒၪ ၃ဘံၪ့လီၫအဂဲးႇ လၧဆၧၡၪ့ ဆၧယၬအဖၧၩ့အဝ့ၫယီၩဘၪဂဲၫထဲၩ့ကျ့ၭစၨၭကဲၪထၪ့ၥၫ့ခၫကဂၩအဂဲးႇ မွဲလၧ ကဆါယွၩအဆၧရွံထၪ့အကၠီၩ့ ဘဲၫ ယီၩနီၪ ယဂဲၫထဲၩ့ကဲၪထၪ့ၥၫ့ခၫလဂၩအနံၪ့အီၪထၪ့ဘၭဝ့ၫဒၪ၂၅နံၪ့ယူၭနီၪ စံၭခိးစံၭတၩဘၪကဆါယွၩအဂဲး” စံၭဝ့ၫဒၪနီၪလီၫႉ လၧဆၧထံၪလၩ့ဒီၪလၩ့ကဘျၩ့ယီၩအဖၧၩ့ ၦလၧအလ့ၩခိၪလ့ၩနါမံဆၩဆၧလုထၪ့နီၪမွဲဝ့ၫဒၪလၧ Fr.Henry အဲၪချံၫ့အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

7.4.22