ဘၪဆၧကဲၪထၪ့ ကဲၬၥလံၬ Sr၈ဂၩအဂဲး ဆၧပရၧၫ့

နံၪ့၂၀၂၂နံၪ့ လၩဖ့ၫဘြူၫအ့ၫရံၫ(၁)ၥၫ့ လဂီၩ၆နၩရံၫအထီနီၪ ဆၧမၩလၩမၩဖၩ့ၡီၩ့ ဘၪဆၧကဲၪထၪ့ ကဲၬၥ လံၬSrလဖၪ ဘိၪ့မုနံၩအီၪဝ့ၫဒၪလၧ ဒိၩ့ပၥံၫ့ဆၧအီၪကီၪ့ စံၫ့ပံတၧၫ့ကၥံၪဒရဲၫ ၥရိၬလးဝၩ့ဖၧၩ့နီၪလီၫႉ

ၦလၧအလ့ၩခိၪလ့ၩနါမံဆၩဆၧလုထၪ့နီၪမွဲဝ့ၫဒၪလၧ ဝံးတခိၩ့ၥၫ့ခိၪဒိၪ Bp.John Saw Yaw Hanနီၪလီၫႉ ၦလၧအကဲၪထၪ့ Sr၈ဂၩနီၪ မွဲဝ့ၫဒၪ အီၪလၧ ပၠံၫဆၧအီၪကီၪ့ Sr.Cicilia Khin Khin Mar, Sr.Elizabeth, အီၪလၧဗန်းမော်ဆၧအီၪကီၪ့Sr.Cicilia ဂျန်မော်လုအောင်, အီၪလၧဒိၩ့ပၥံၫ့မိဆၧအီၪကီၪ့ဖၧၩ့ႇ မေရီလန်းဆၧအီၪ ကီၪ့ Sr.Josephine Yi Mon Aye, အီၪလၧ လွဲၫ့ကီၫဆၧအီၪကီၪ့ Sr.Rosa ဖော့မို, အီၪလၧဒိၩ့ပၥံၫ့မိဆၧအီၪ ကီၪ့ဖၧၩ့ မြစ်ကလေးဆၧအီၪ့ကီၪ့ Sr.Patricia Aye Aye San, အီၪလၧ မြစ်ကြီးနားဆၧအီၪ့ကီၪ့ Sr.Angela ကဝါထုဆန်, ဒဲ Sr. Marureen လခရိဆိုင်းဘူ လဖၪနီၪလီၫႉ

လၧဆၧၥၭထိၬပရၧၫ့ဖၧၩ့ ၥၫ့ခိၪဒိၪBp.Justin စောမင်းသိုက် လီၩလၩ့လါလၩ့ဝ့ၫဒၪ ပဖိၬထၪ့ကဆါဎြံၬ အ ခဲၫ့အခၫ ပခၫထၪ့ဝ့ၫဒၪပခၪ့ကိၭခၫဒ့ၭနီၪ ကဘၪမွဲလၧပအဲၪကွံၩကဆါဎြံၬအဂဲးႇ ပဖိၬထၪ့ကဆါဎြံၬအခဲၫ့ဖၧၩ့ၥၭနီၪ မွဲလယီၫဘၪအဂဲးႇ ၦအရွံထၪ့ ဘိၪ့ခိၪၥၫ့ခၫႇ Bro, Sr အဆၧၥၭမၧၫ့လဖၪနီၪ ကဘၪဖီၪ့ထၪ့ဖံၭထၪ့ ကဆါယွၩအ ဆၧဖံၭဆၧမၩအဂး မွဲလယီၫဘၪဒဲ ဆၧကၪဆၧဂဲၩအီၪဝ့ၫအၪမၬအဂဲးႇ Sr လဖၪယီၩဆ့ ဆူၩနဲၩကဆါယွၩအကၠီၩ့ ဖ့ၪလၫ့လၩ့အၥၭလၧကဆါယွၩအအီၪအဂဲးႇ ပထိးဆၧၫ့ဒိၭန့ဆၧအုၩ့လၩ့ယီၩနီၪ မွဲအီၪဂဲၫလၧပၥၭခံဖၧၩ့အကၠီၩ့ ကဘၪ တီၩလီၩ့ဝ့ၫဒၪ ထၧၩ့ပၥံၫပၡါအဂဲးႇ ပကဘၪလုထၪ့ပၥၭလၧကဆါယွၩအီၪ လဆိၩယၫနီၪ မွဲကကၪဂဲၩဝ့ၫဒၪအၪမၬ အဂဲးႇ ပၥၭအဆၧအုၩ့လၩ့လၧကဆါယွၩအဖၫ့ခိၪနီၪ အ့ၪမွဲလတီၩလီၩ့ဘၪစွါဘဲၫ ပဆၧအုၩ့လၩ့လဖၪနီၪ မွဲကဂၭဂီၩ့ ဒၪခွံၬပၧၩနီၪ ထီးပလကြၨၭၥၭနၪ့ဘၪအဂဲးႇ  အ့ၪမွဲပဆၧအုၩ့လၩ့လဖၪ ဒံၩ့ခံၫ့ဒၪပၧၩယူၭနီၪဘိၭ ပကဲၪထၪ့ ကဆါယွၩ အထံၩအဖျဲလၧ ဆၧလၩဆၧဖၩ့အီၪအီၪအဖၧၩ့ မွဲန့လၥ့ၪလၧၩ့ဘၪနီၪ ပကဘၪၥ့ၪယၫထၬအဂဲး ၥၫ့ခိၪဒိၪ Bp.Justin နီၪ ဖ့ၪဘၪ ၥၫ့မုၥၫ့ခၫႇ Bro ဒဲ Srလဖၪ ဆၧထုၪ့ၥုၪ့ထုၪ့ၥၭဘဲၫနီၪအၥိၭနီၪလီၫႉ

ၦလၧအထိဆၧၫ့ဒိၭန့ဘၪ ဆၧအုၩ့လၩ့အဆိၪထုၬလဆုၪ့မွဲဝ့ၫဒၪ Sr.ပက်ထရေးရှာအေးအေးစန်းနီၪ စံၭ ဝ့ၫဒၪ ‘ ယဂးFormation ဆၧၫ့ထီနီၪ ယဘၪဖ့ၪလၫ့အခံၫ့၁၁နံၪ့လါနၫ့ ကနံၩယီၩယထိးဆၧၫ့ဒိၭန့ဘၪ ဆၧအုၩ့လၩ့ အဆိၪထုၬလဘျၩ့ဒဲSrအဝိၬလိၫ့အခၫနီၪ အကၧၩ့ဒိၪထုၬ ယစံၭခိးစံၭတၩဘၪကဆါယွၩႇ ပကဲၪထၪ့ဘၪ Srဘိၪ့မု နံၩယီၩနီၪ မွဲလၧထံၪခးလမုၬဘၪအကၠီၩ့ ပလုထၪ့မံဆၩအထီ လချူၭပလၥိၭလၫ့ဒံၭဘၪ Srအဆၧကီၩ့ဆၧၥိၭနီၪ ယအၪ့ယိၪခဲၫ့ကံၭဆၧ အီၪဝ့ၫဒၪအၪမၬႇ ပလုထၪ့မံဆၩဆၧလုထၪ့အထီ ယအၪ့ယိၫခဲၫ့ကံၭလၧယၩ့ၥၪကဖီးဖၭႇ ဆၧ ကဂဲၫလီၩ့ဎွါပၧၩဆၧမၪကမံၩ့မံၩ့အဂးႇ လါနၫ့စၭထၪ့လၧ ယၥိၭထၪ့ဘၪ Srအဆၧကီၩ့ဆၧၥိၭဂီၩ့အခၫနီၪ ယဆၧၥၭမဲၪ လဖၪလၩ့မါဒၪခွံၬယၧၩထီးလူၬ ဆၧအနီၪလၧယဂးလၩ့ဆၫ့လၩ့မဲၩဝ့ၫဒၪအၪမၬႇ လၧဆၧကၪဆၧဂဲၩ အၪမံၩ့အၪမၠိၩ အကျၩ ကဆါယွၩအဆၧကိၭဒဲ အဆၧဖ့ၪဂဲးဖ့ၪဘၭ မိမၫရံၫအဆၧမၩဆၧၩ့အကၠီၩ့ ကနံၩယီၩနီၪ ယကဲၪထၪ့ဘၪ Srကဂၩယူၭႉ စၭထၪ့လၧမုကနံၩယီၩ ဆၧကီၩ့ဆၧၥိၭအယီၩ ယဘျူၭလၩ့နးဆိၭလၧၩ့အ့ၬဒဲ ယကထဲၩ့ၥိၭထၧၩ့ ယၥံၫ ကကၠၪႇ Srအဆၧၥၭမၧၫ့ယီၩနီၪ ကၪဂဲၩနၭမၬအ့ၬႇ ယီၫအၪမၬဆ့အ့ၬႇ ဆၧနီၪအကၠီၩ့ ယမိလီၩဘၪၥၭဘၪ့လဖၪ ထီးၥၭမဲၪဘၪဘိၪ့ခိၪၥၫ့ခၫႇ Bro, Sr အဆၧၥၭမၧၫ့နီၪလဂ့ၩႇ ကနံၩယီၩပဒိၭန့ဆၧအုၩ့လၩ့အဆိၪထုၬကဘျၩ့ ပၥိၭ ၈ဂၩအဖၧၩ့ ပထံၩၥိၭမုၪကဂၩ အမိအဖါအထၧၫ့ဖုထၧၫ့ဝဲလဖၪနီၪ မွဲလၧဆၧဒုၭဆၧခၭအကၠီၩ့ ဘၪလီၩ့စဲၪ့အီၪဂူၪၥၭလၧ ၡိၭကျၩၡၩ့ကျၩအကၠီၩ့ အဝ့ၫအဘူၭအထံးလဖၪ ဂဲၫမၩလၩမၩဖၩ့အဝ့ၫ လန့ဘၪနးဂၩနီၪဆ့ ယၥၭလမုၬဘၪနီၪလီၫႉ အကၧၩ့ဒိၪထုၬ လၧခးပယၩ့အဖၧၩ့ မွဲလၧဆၧဒုၭဆၧခၭအကၠီၩ့ ၦလၧအဘၪစဲၪ့မံၩ့ဂၭဖျိၭလဖၪအဂး ယအၪ့ကံၩ့ဘၩ ဆိၪဖၪအ့ၪ ဒိၪဒိၪအၪအၪဒ့ၭအဂဲး’’ Sr ပက်ထရေးရှာယီၩ စံၭဝ့ၫဒၪ ဘဲၫယီၩအၥိၭနီၪလီၫႉ

လၧဆၧမၩလၩမၩဖၩ့ၡီၩ့ ဆၧကဲၪထၪ့Srဘိၪ့မုနံၩကဘျၩ့ယီၩအဖၧၩ့ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ လအီၪဒံၭဘၪ အကၠီၩ့ ဆၧအီၪကီၪ့အဂူၪဂၩၥၫ့ခိၪဒိၪလဖၪ မွဲဝ့ၫဒၪ Bp.Joha Saw Yaw Han, Bp.စောနောဧ, Bp.Justin စောမင်းသိုက်, ဒဲ Bp.Alexandar ပြုံးချို လဖၪ ဂဲၫဖ့ၪဂဲးဖ့ၪဘၭ မၩလၩမၩဖၩ့ကၠၭဝ့ၫအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ

၁ႉ၂ႉ၂၂