ဖ့ၪနဲၪထၪ့ဆၧဘိၪ့ဆၧဘၩနီၪ လၧဆၧဎူၫဆၧဎၩ့ကၠီၪ့ဖျီၩ့အဂး ကၫဆၫစတၫ့ၥၫ့ခိၪဒိၪဆၫ့ထွ့ၪဘၪဝ့ၫ

လၧခးအ့ၩၡၩ အတိၩ့ၥၭကျၩဖၧၩ့ အဂုခိၪထုၬၦလၧအကဲၪထၪ့ ၥၫ့ခိၪဒိၪခရၧၫ့မိထုၪ့ အခိၪနါဒိၪလဂၩမွဲဝ့ၫ ၥၫ့ခိၪဒိၪ Jose Luis Mumbiela Sierra နီၪဆၫ့ထွ့ၪဘၪ ပကဘၪဖ့ၪနဲၪထၪ့ ပမိဆၧအီၪကီၪ့ယီၩ ဘဲၫ ဖၧၩ့ၥၭအမၩကဲၪထၪ့ ဆၧဎူၫဆၧဎၩ့ အဂးနီၪလီၫႉ

         ဂီၩ့လၧထံၪခးဖၧၩ့ ကမၩထၪ့ဝ့ၫ ၇ဘျၩ့လဘျၩ့ ဂၪ့ခိၪဒဲ ဆၧဘိၪ့ဆၧဘၩ ခိၪနါလဖၪ ကိၩ့ကရဲၭ အဖၧၩ့ ဆၧဘိၪ့ဆၧဘၩ ထီးလူၬနီၪ မွဲမၩကဲၪထၪ့ဆၧဎူၫဆၧဎၩ့အဂဲးႇ ကဘၪမၩဆံၫ့ဖျ့ၪထဲၩ့ ဆၧဘိၪ့ဆၧဘၩအမိၡါလနၩ့နၩ့လိၫဝ့ၫဒၪအဂဲးႇ ကဘၪ ဒုၭဖျီၪထၪ့ထဲၩ့ ဆၧဘိၪ့ဆၧဘၩအခီၫပယီၫအတီၩအဘၪလဖၪလိၫဝ့ၫအဂဲးႇ ဆၧဘိၪ့ဆၧဘၩနီၪ လမွဲဘၪၦစီၩ့မၩ့ဒိၪလဖၪအဎီး အၡၩအဂဲး ၥၫ့ခိၪဒိၪယီၩစံၭဝ့ၫဒၪနီၪလီၫႉ

        ကိၩ့ကရဲၭနီၪ ၦၡၩမၩဝ့ၫဒၪလၧအဖီၩ့ခွံၬ လၩစဲၭတံၫ့ဘၧၫ၁၄-၁၅ၥၫ့အိၩ ၦၡၩမၩဝ့ၫဒၪလၧ ကၫဆၫစတၫ့ထံၪခးနီၪလီၫႉ လၧကိၩ့ကရဲၭနီၪအဖၧၩ့  ၥၫ့ဎွၩဖရၫ့စံၭ လ့ၩစိၩဝ့ၫဒၪဒံၭအဂဲးပၥ့ၪယၫဘၪလီၫႉ ၥၫ့ဎွၩလ့ၩစိၩလၧကၫဆၫစတၫ့ထံၪခး အဆၧထိ စိၩနီၪ မွဲဝ့ၫဒၪ လၧနံၪ့အဂုအိၩထံၪခးဖၧၩ့ကဲၪထၪ့ ဆၧၥၭအုၭအဂဲးအဖးလဖၪအကၠီၩ့ လ့ၩဖ့ၪဂဲးဖ့ၪဘၭထံၪခးဖိၪလဖၪႇ လၧ ထံၪခးဖိၪၥံၪကၠၧၫ့ကၠၧၫ့ မိဆၧအီၪကီၪ့ယီၩအီၪလၧအဝ့ၫၥံၪလဖျိၪ့ဎးအဂဲး ကမိဖ့ၪနဲၪထၪ့ဝ့ၫအကၠီၩ့နီၪလီၫႉ

       လၧနံၪ့၂၀၂၂နံၪ့ လၩဇၫ့နွ့ၫရံၫ၁၁ၥၫ့ဒၪအိၩ ၦၡၩကခွံၬလၩ့ခွံၬထံၪခး ခးဒိၪအဂးၦၡၩဒုၭနဲၪဖျီၪမူၭအီၪထၪ့ဝ့ၫဒၪလီၫႉ ဘၪနီၪ လၧၦၡၩဘၪဒုၭနဲၪဖျီၪမူၭလဲၪနီၪ မွဲလၧစီၩ့ဂဲးၥိၪအနံၪ့ထၪ့ဝ့ၫအၪမၬအကၠီၩ့နီၪလီၫႉ မွဲလၧဆၧဒုၭနဲၪဖျီၪမူၭနီၪအကၠီၩ့ ၦၡၩၥံၫဝ့ၫ ဒၪဖိၭဘိၭ၁၂ဂၩအကျၩဖိၪၥၪဆံၭဖိၪပၫဝ့ၫဒၪ၂ဂၩအဂဲးႇ ၦၡၩဘၪထိးဖီၪ့ၥၭကအီၪဝ့ၫအဂၩ ၁၀၀၀၀နီၪလီၫႉ ဆၧဒူၭနဲၪဖျီၪမူၭနီၪ စၭထၪ့ဝ့ၫဒၪလၧ လၩဇၫ့နွ့ၫရံၫ၂ၥၫ့နီၪလီၫႉ

       ကၫဇၫစတၫ့ထံၪခးဖၧၩ့ ဆၧဎူၫဆၧဎၩ့အဂး ကျ့ၭစၨၭထၪ့ဝ့ၫကိၭမံၩ့နီၪ ၥၫ့ဎွၩထိးဆၧၫ့ဝ့ၫဒၪအဂဲးႇ အဝ့ၫဘၪဂဲၫလၧ ထံၪခး ယီၩနီၪဆ့ ဂဲၫဖ့ၪဂဲးဖ့ၪဘၭခးဒိၪလီၫလကၭဘၪဒဲ ဂဲၫဖ့ၪဂဲးဖ့ၪဘၭထံၪခးဖိၪၥံၪထီးလူၬအဂဲး စံၭဘၪဝ့ၫနီၪလီၫႉ လၧထံၪခးနီၪ အဖၧၩ့ ၦၡၩအဆၧဝံဆၧနၬအီၪဝ့ၫဒၪ ၁၉ခွးလါနၫ့ ပကဲၭၥလံၬဆၧဘိၪ့ဆၧဘၩဖိၪၥံၪအီၪဝ့ၫဒၪ (၁) ယၩဒုၩလီၫႉ ကဲၭၥလံၬဆၧ ဘိၪ့ဆၧဘၩဖိၪၥံၪအီၪၡၩဝ့ၫဒၪလါနၫ့ ၥၫ့ဎွၩဂဲၫထီၩ့စိၩလၧထံၪခးနီၪအခၫ ဆၧဘိၪ့ဆၧဘၩဂူၫဂၩလဖၪနီၪဆ့ မွဲယူၭယၪ့အဲၪကွံၩ ဘၪ အၪ့ဂၬထိးဆၧၫ့ဘၪၥၫ့ဎွၩ ဂ့ၩဂ့ၩဘၪဘၪနီၪလီၫႉ ၥၫ့ဎွၩနးဆ့ မွဲအဲၪကွံၩထဲၩ့ဘၪၦကိၭဂၩဒ့ၭနီၪလီၫႉ

နးအဲၪဖီၫဘွၩ