ပကဘၪချဲၩပျၩ့ပျၩ့ဒဲ ပကဘၪအၪ့ လုထၧၫ့ဖုဝဲၥုၪ့ၥၭ

လၧအဖီၩ့ခွံၬမုနွံၫ ပူၬတပၠါမုနံၩ ဆၧဒိၭန့ဖံၫ့ချၫဆံၫ့ဎံၪမုနံၩအိၩ ဘရၫဇံၩထံၫခးဖၧၩ့အီၪဝ့ၫဒၪကဲၬၥလံၬၥၫ့ခိၪဒိၪလဖၪဒဲ ထၧၫ့ဖုၦဆူၩနဲၩဎြံၬဆၧဘိၪ့ဆၧဘၩဖိၪဂူၪဂၩလဖၪနီၪ စၭထၪ့မၩဝ့ၫ ဝီအဆၧၫ့အထီဆၧကမံၩ့နီၪလီၫႉ

            ကဲၬၥလံၬၥၫ့ခိၪဒိၪခရၧၫ့လဖၪနီၪ မၩထၪ့ဝီအဆၧၫ့အထီဆၧမၩယူၩယါလဖၪ ကိၭနံၪ့လါနၫ့ စူၭကီၪ့မၩထၪ့ဝ့ၫလၧ ထၧၫ့ဖုဝဲဎြံၭဆၧဘိၪ့ဆၧဘၩဖိၪလဖၪနီၪ ယဲနံၪ့ကကၠၪနီၪလီၫႉ ဆၧၫ့ထီနီၪအဖၧၩ့ ၥၫ့ဎွၩဖရၫ့စံၭစံၭဝံၫဒၪဘဲၫယီၩအၥိၭနီၪလီၫႉ

            “လၧဆၧၫ့ထီယီၩအဖၧၩ့ ပကဘၪကၩ့ကၩဎိၭလၩ့ဆၧ ဘဲၫထၧၫ့ဖုဝဲအထံးလဖၪအၥိၭ ပကဘၪဖ့ၪဆၧၫ့လၩ့ပၥၭလၧဆၧအဲၪဆၧကွံၩအဂးနီၪလီၫႉ ကဆါဎြံၬနီၪ ၦဝ့ၫလဖၪအဂးမွဆၧဎူၫဆၧဎၩ့နီၪလီၫႉ ဆၧနံၫမံၩ့နီၪဘဲၫကကဲၪလၫ့ကမံၩ့အဂး ကဆါယွၩမၩၥ့ၪ အ့ၪဆၧဘၪထီးထၬအီၪဝ့ၫဆ့ အဝ့ၫမၩပျၩခွံၬဒဲကၧၩ့ဖျိၪ့ထၪ့ထဲၩ့ဝ့ၫလၧအၥွံၫအယၫနီၪလီၫႉ ဝ့အဆၧၫ့အထီယီၩမွဲပကဘၪဒုၭဆၧၫ့ထဲၩ့ဆၧဆၫဆၧၩ့ ယီၩဂီၩ့အၪ့ကံၩ့ဘၩဆိၪဖၪအ့ၪ ၦလၧအဘၪၥံၪခွံၭလၫဆၧဆၫအၧၩ့ယီၩလဖၪ အနးၥၭအဂး အၪ့ကံၩ့ဘၩဆိၪဖၪအ့ၪၦလၧကဂဲၫမၩဆၧၩ့ဆၧလဖၪနီၪ အီၪခိၭထိးဆၧၫ့ဘၪ ဂ့ၩဂ့ၩဘၪဘၪအဂဲးၥၫ့ဎွၩစံၭဝ့ၫနီၪလီၫႉ

လကၭဒံၭဘၪ ၦဎြံၬဖိၪလဖၪယီၩ ဒၪလၩ့ဎိၭလိၬၥၭဘယီၩအခၫနီၪ မွဲပကဘၪဝဲလၫ့ထၬပၥၭ ပျၩ့ပျၩ့လဲလဲလၧဆၧၥၭမဲၪလအီၪဘၪအဖၧၩ့နီၪလီၫႉ ၦဎြံၬဖိၪလဖၪပလီၩ့ဎွါကၠၭ ဆၧကမံၩ့နီၪ မွဲဒၪလၧ “ပလီၩ့ဎွါဆၧဎူၫဆၧဎၩ့လၧဖါကဆါယွၩလဂၩဎးအမ့ၬယၫနီၪလီၫႉ ၦဎြံၬဖိၪလဖၪလအီၪကၧၩ့ဖျိၪ့ထၪ့ၥၭ အကၠီၩ့ ထၧၫ့ဖုဝဲၥုၪ့ၥၭလဖၪဂဲၫအီၪဖျဲၪထၪ့ လၧၡၩခရၧၫ့ဖၧၩ့ မၩထၪ့ထီၫဆၧဘၪလိၬဎွ့ၪဎီၩ့လဖၪန့ဝ့ၫဒၪ ဆၧၥူၫဆၧၥၫဘဲၫနီၪၥိၭလဖၪ အီၪဖျီၪထၪ့ဝ့ၫလီၫႉ

လခဲၫ့ထုၬၥၫ့ဎွၩဖရၫ့စံၭ နၫ့ဆၫ့ထွ့ၪဘၪအဝ့ၫၥံၪ လၧဝီအဆၧၫ့အထီဖၧၩ့ယီၩ အကၧၩ့ဒိၪထုၬ ပကဘၪမၩဝ့ၫဒၪဆၧဘိၪ့ထၪ့ဘၩထၪ့ယွၩ ဆၧအီၪပဲၩ့ခွံၬၥၭလုလဖၪ ဒဲ ဆၧမၩဘိၪ့မၩဆၧၩ့ၦဂူၪဂၩ ဆၧမၩၥၧၫ့မံၩ့ယီၩ မၩလၧၫ့ဎွ့ၩထၪ့ကၠၭဘၪအဂး စံၭဘၪဝ့ၫနီၪလီၫႉ

နးအဲၪဖီၫဘွၩ