နံၪ့၂၀၂၃နံၪ့ ခးၥဲၫ့ထၧၫ့ဘံၪ့ယၫ ၥၭဘၪ့ဘိၪ့မုနံၩအဖၧၩ့ မၩလၩမၩဖၩ့ၡီၩ့ဘၪအဂး ခးအမ့ၫရံကၫ့ ၥၫ့ခိၪဒိၪလဖၪ ကိၭဖံၭၥိၭဝ့ၫအဂဲး

အီၪလၧ ခးအမ့ၫရံကၫ့ၥၫ့ခိၪဒိၪခရၧၫ့ အစူၪဖၫ့လၬ ခရၧၫ့လနၩ့နၩ့ ႇ ၥၫ့ခိၪဒိၪ Salvatore j.cordileone ဒဲ ၥၫ့ခိၪဒိၪ Eward j.Burns လဖၪနီၪ ထုၬထၪ့ဘၪ ဆၧဘိၭဘၪၥ့ၪယၫ လံၬကဘျံၭနီၪလီၫႉ

လၧလံၬနီၪအဖၧၩ့၂၀၂၃နံၪ့ကိ ကမၩလၩမၩဖၩ့ဘၪ ခးၥဲၫ့ထၧၫ့ဘံၪ့ယၫ ၥၭဘၪ့လဖၪအဘိၪ့ မုနံၩအဂဲးႇ ဘိၪ့မုနံၩကိ ခးအမ့ၫရံကၫ့ဖၧၩ့ ကဲၬၥလံၬၥၭဘၪ့လဖၪ ကနုၬလၩ့ဂဲၩဝၭဝ့ၫ ဘဲၫၥ့ၪလဲၪနီၪ ယိလါဝ့ၫဒဲ အၥၭဎွံၫဝ့ၫအဂဲးႇ ၥၭဘၪ့လဖၪနီၪ ကလ့ၩနုၬလၩ့ဂဲၩဝၭဝ့ၫဒၪ ထၧၫ့အထီၩ့စိၩလၧ ၦၡၩကမၩလၩမၩဖၩ့ၥၭဘၪ့ဘိၪ့မုနံၩအလး မွဲဝ့ၫလံစဘွၫ့ထံၫခးဧၪႇ အ့ၪလမွဲဘၪ ကနုၬလၩ့ပၫဝ့ၫဒၪလၧ Social media အဖၧၩ့ဧၪႇ အ့ၪလမွဲဘၪဘိၭ လၧပလးဒၪပၧၩ လၧဆၧအီၪကီၪ့ခိၪနါလဖၪ အဆၧဎိၭထံၪဎိၭဒီၪအဖၧၩ့ ကမၩလၩမၩဖၩ့ဘၪ ၥၭဘၪ့အဘိၪ့မုနံၩဧၪႇ  ဘဲၫဆၧလဖၪယီၩအၥိၭ ဆၧရွံထၪ့ဆၧန့အီၪဝ့ၫဒၪ အၪမၬအဂဲးႇ တခၩကပၫဝ့ၫဒၪလၧ အလးနးစီၪ့ ဆၧအလၩ့ဆၫ့လၧဆၧအီၪကီၪ့အဂး ဆၧဎိၭထံၪဎိၭဒီၪနီၪအဖၧၩ့ ၦၥၭဘၪ့လဖၪ ဘဲၫၥိၭကပၫထဲးဎုၬအဂး ကိၭဖံၭၥိၭဘၪဝ့ၫလီၫႉ

လၩအီၫဂူၭ(၆)၁ၫ့ ခးၥဲၫ့ထၧၫ့ဘံၪ့ယၫ ၥၭဘၪ့လဖၪအဘိၪ့မုနံၩ မံဆၩဆၧလုထၪ့နီၪ ၥၫ့ဎွၩကလ့ၩခိၪလ့ၩနါနီၪလီၫႉ ခးၥဲၫ့ထၧၫ့ဘံၪ့ယၫ ၥၭဘၪ့ဘိၪ့မုနံၩနီၪလခဲၫ့ထုၬ ၦၡၩမၩဝ့ၫဒၪလၧ ကိၫဘံလကဲၪထၪ့ဒံၭဘၪ ၂၀၁၉နံၪ့အိၩနီၪလီၫႉ ဘိၪ့မုနံၩအယီၩနီၪ စၭထၪ့လၧ ၁၉၈၅နံၪ့ ၥၫ့ဎွၩၦဆံၫ့ဎံၪဂၠိၫ့ပီၩ ၂ဂၩလဂၩ ဂဲၫထဲၩ့မၩကဲၪထၪ့ထၬနီၪလီၫႉ

ဘၪမၩလၩမၩဖၩ့ခးၥဲၫ့ထၧၫ့ဘံၪ့ယၫ ၥၭဘၪ့ဘိၪ့မုနံၩ ဆၧထိစိၩနီၪ ၥၭဘၪ့လဖၪဘဲၫၥိၭ ကဂၩဘၪကဂၩ ကဖံၭထံၩဖံၭၥိၭလိၬၥၭအဂးနီၪလီၫႉ ထိးဆၧၫ့ထၬဝ့ၫၥၭဘၪ့လဖၪအၥၭနီၪ မွဲဝ့ၫလၧ၁၆ နံၪ့ဒဲ ထီၩ့စိၩလၧ၃၅နံၪ့အဖၧၩ့နီၪလီၫႉ အဆိၪထုၬခးၥဲၫ့ထၧၫ့ဘံၪ့ယၫ ၥၭဘၪ့အဘိၪ့မုနံၩနီၪ မၩလၩမၩဖၩ့ဝ့ၫဒၪလၧဝံးရီၩမၬ လၧ၁၉၈၆နံၪ့အိၩနီၪလီၫႉ စၭထၪ့လၧအခံၫ့နီၪ ထီးမုဆၫကနံၩယီၩ ၂နံၪ့ကဘျၩ့ အ့ၪလမွဲဘၪဘိၭ ၃နံၪ့ကဘျၩ့ ခးၥဲၫ့ထၧၫဘံၪ့ယၫအဖၧၩ့ ဆုးထဲၩ့မၩလၩမၩဖၩ့ဘိၪ့မုနံၩအယီၩနီၪလီၫႉ

လၧခးအမ့ၫရံကၫ့ ကဲၬၥလံၬဆၧအီၪကီၪ့လဖၪအဖၧၩ့ ကနံၪ့ယီၩကမၩလၩမၩဖၩ့ဘၪ ၥၭဘၪ့ဘိၪ့မုနံၩနီၪ လၧလၩနိၫဝ့ၫဘၧၫ ၂၁ၥၫ့ ဎြံၬစဎွၩအဘိၪ့မုနံၩနီၪလီၫႉ ကိနံၪ့ဒ့ၭ ဆၧမၩလၩမၩဖၩ့ ၥၭဘၪ့ဘိၪ့မုနံၩအဂး ဆၧထိထီၫနီၪ ၥၫ့ဎွၩရွံန့ထၬလၧ “မၩဆၧ(၂၆:၁၆) ဂဲထုၪ့တၭ ဆၧၫ့ထုၪ့ဆံၭႉ အဂဲးဘဲၫယီၩ ယနဲၪဖျီၪထၪ့ယၥၭလၧနၧၩ လၧဆၧယီၩအဂဲးလီၫ” နီၪလီၫႉ

နးအဲၪဖီၫဘွၩ

၂၀ႉ၁၀ႉ၂၀၂၁