နီပါရာဂွာ ခးဒိၪနၪ့စဲၪ့ထၪ့ မာသာရ်ထရေဇား စစ္စတာရ်လဖၪ လၧအထံၪခးဖၧၩ့အဂဲး

နီပါရာဂွာ ခးဒိၪ Daniel Ortega နီၪ လၧအဖီၩ့ခွံၬလၩယူၫလဲၫ့ ၆ၥၫ့ဒၪအိၩ ထုၬထၪ့လံၬဘၪထွ့ၪလၧ နၪ့စဲၪ့ထၪ့ မာသာရ်ထရေဇား စစ္စတာရ်လဖၪ လၧအထံၪခးဖၧၩ့အဂဲးနီၪလီၫႉ ခးဒိၪယီၩစံၭထၬဝ့ၫဒၪနီၪ မာသာရ်ထရေဇား စစ္စတာရ် ၁၈ဂၩယီၩ အ့ၪမွဲအဝ့ၫၥံၪအဆၧဖံၭဆၧမၩလဖၪဂီၩ့ဝ့ၫနီၪ ကဘၪစဲၪ့ထၪ့လၧထံၪခးဖၧၩ့အဂဲးနီၪလီၫႉ
မာသာရ်ထရေဇား စစ္စတာရ်လဖၪယီၩနီၪ မွဲယိထဲၩ့ခွါထဲၩ့ ၦလၧအဆၧၥၭမၧၫ့လဘံၪ့ဘၪလဖၪႇ ၦလၧအၡၪ့ အယၬလဖၪႇ ဖိၪၥၪဆံၭလၧအဆၧဆီၪ့ဆၧချဲၫ့လဂ့ၩဘၪလဖၪႇ ဒဲ ဖံၫဖူၫၥၭၡါလဖၪနီၪလီၫႉ ၦလၧအဘၪထိးနၪ့စဲၪ့လၫ့ၥၭ မာသာရ်ထရေဇား စစ္စတာရ်၁၈ဂၩနီၪ မွဲအံၫ့ဒံယၭထံၪခးဖိၪ(၇)ဂၩႇ မက်ကဆီကိုထံၪခးဖိၪ(၂) ဂၩႇ စပိန်ထံၪခးဖိၪ(၁) ဂၩႇ ဂွာတီမာလာထံၪခးဖိၪ(၂) ဂၩႇ အီကွေဒေါထံၪခးဖိၪ(၁) ဂၩႇ ဗီယက်နမ်ထံၪခးဖိၪ(၁) ဂၩႇ ဖိလစ်ပိုင် ထံၪခးဖိၪ(၂) ဂၩ ဒဲ နီပါရာဂွာ ထံၪခးဖိၪ(၂) ဂၩနီၪလီၫႉ
မာသာရ်ထရေဇား စစ္စတာရ်လဖၪနီၪ ဘၪဆၧၥိၫ့စိၩဝ့ၫလၧ Costa Rica ထံၪခးအဆၧၫ့နီၪဂီၩ့ အဝ့ၫၥံၪယီၩ အီၪ ဒုၩၥၭလၧ Tilaran-Liberia ဆၧအီၪကီၪ့ဖၧၩ့နီၪလီၫႉ Costa Rica ထံၪခးTilaran-Liberia ဆၧအီၪကီၪ့ ၥၫ့ခိၪဒိၪနီၪ အၪ့ဂၬ ထိးဆၧၫ့အဝ့ၫၥံၪဂ့ၩဂ့ၩဘၪဘၪဂီၩ့ လၧအဝ့ၫထုၬထၪ့ထၬလံၬဖၧၩ့နီၪ အၪ့ကံၩ့ဘၩဆိၪဖၪအ့ၪ နီပါရာဂွာၥၫ့ခိၪဒိၪလဖၪႇ ၥၫ့မုၥၫ့ ခၫလဖၪႇ စစ္စတာရ်လဖၪအဂး ဒဲ ၦဆူၩနဲၩဖိၪလဖၪအဂးအကၠီၩ့ႇ စစ္စတာရ်လဖၪ ဂဲၫထဲၩ့ဖ့ၪလၫ့လၩ့ၥၭလၧ ၦၡၩခမျၧးလဖၪ အဂးနီၪဆ့ အဝ့ၫယီၩအၪ့အူၭဝ့ၫအဂဲးႇ အဝ့ၫဆ့အၪ့ကံၩ့အၪ့ယၫထၪ့ မာသာရ်ထရေဇားအဆၧအၪ့ကံၩ့ဘၩဆိၪဖၪအဂဲး စံၭထၬဝ့ၫနီၪလီၫႉ လၧနီပါရာဂွာထံၪခးအဖၧၩ့ NGO ခရၧၫ့လဖၪ အီၪဝ့ၫဒၪ ခရၧၫ့၁၀၀ဘျဲၪနီၪဆ့ လၧလယံၬလမီဒံၭဘၪအိၩ ခးဒိၪယီၩဖိၭဘံၭခွံၬနီၪလီၫႉ
မာသာရ်ထရေဇား စစ္စတာရ်လဖၪယီၩ ဂဲၫထဲၩ့မၩထၪ့ ဆၧအီၪကီၪ့အဆၧဖံၭဆၧမၩလၧထံၪခးနီၪအဖၧၩ့ အီၪထၪ့ဘၭ ဝ့ၫအနံၪ့ ၄၀ယူၭနီၪလီၫႉ အဝ့ၫၥံၪယီၩနီၪ မွဲယိထဲၩ့ခွါထဲၩ့ ၦမုၪလၧဘၪထိးမၩနီၩ့ၥၭဂီၩ့ ဘၪဒၧၩ့ထၪ့န့အဖိၪလဖၪႇ ၦမုၪလၧဘၪ ထိးခွံၬၡိၬထၬၥၭလဖၪႇ ၦမုၪလၧအဂဲၫလူၫဘီၩ့လၫ့ၥၫ့လဖၪနီၪလီၫႉ ဖိၪဒံၪဖိၪၥၪလၧမိဖါၡၪ့ယၬလဖၪအဂး ဝဲလၫ့ထၬ ဆၧမၩ လိၪ(မူကြို)ကၠီးကဖျိၪ့ ဒဲ ၦၥၭၡါလဖၪအီၪဒုၩၥၭလး(ဘိုးဘွားရိပ်သာ)ကဖျိၪ့နီၪလီၫႉ
ဘၪထွ့ၪလၧ မာသာရ်ထရေဇား စစ္စတာရ်လဖၪ ဘၪထိးနၪ့စဲၪ့လၫ့ၥၭနီၪ ခီၫ့ရးလဂၩမွဲဝ့ၫ Martha patricia Molina Montenegroနီၪ စံၭဝ့ၫဒၪ ဆၧအယီၩနီၪမွဲလၧ လနုၬဘၪၥနိၪ ခးဒိၪအဆၧမၩလခဲၫ့ကမံၩ့အဂဲးႇ ဘၪန့လဲၪနီၪ မာသာရ်ထရေဇား စစ္စတာရ်လဖၪယီၩနီၪ လၧနုၬၥနိၪအဖၧၩ့ဂဲၫနုၬလၩ့အီၪလၧထံၪခးဖၧၩ့အကၠီၩ့နီၪလီၫႉ ထံၪခးဖိၪလဖၪဒဲ ခရၧၫ့လဖၪဆ့ စံၭဝ့ၫဒၪ ဆၧအဂဲးယီၩနီၪ မွဲလလၩ့ဎိၭဘၪလၧ ၥနိၪခၪ့ထံၭအဂဲးနီၪလီၫႉ
နးအဲၪဖီၫဘွၩ
14.7.2022