ဒိၩ့ပၥံၫ့ဆၧအီၪကီၪ့ၥၭဘၪ့လဖၪ မးၥံၫထဲၩ့အဆိၪထုၬလဘျၩ့အဂဲး

နံၪ့၂၀၂၂နံၪ့လၩမ့ၫ၂၉ၥၫ့နီၪ ဒိၩ့ပၥံၫ့ဆၧအီၪကီၪ့ၥၭဘၪ့လဖၪ မးၥံၫထဲၩ့ဝ့ၫဒၪ လၧဒိၩ့ပၥံၫ့ဆၧအီၪကီၪ့ စံၫ့ပံတၧၫ့ ကၥံၫဒြဲၫလးဝၩ့ဖၧၩ့နီၪလီၫႉ မးၥံၫအယီၩနီၪ မွဲလၧကိၫဘံဒဲ ခးပယၩ့ဆၧတုၩ့ထၪ့တုၩ့လၩ့အကၠီၩ့ ၂နံၪ့အထးဖၧၩ့ ၥၭဘၪ့လဖၪမးၥံၫ ထဲၩ့ဘၪ အဆိၪထုၬကဘျၩ့နီၪလီၫႉ

ၦလၧအလ့ၩခိၪလ့ၩနါမၩကဲၪထၪ့ မးၥံၫယီၩနီၪ မွဲလၧ Fr.Robert Nyan Lin ဂီၩ့ ၦလၧအမၩဆၧၩ့အဝ့ၫနီၪ မွဲလၧၥၭဘၪ့ခိၪနါJamesနီၪလီၫႉ ဘၪမၩထၪ့ထဲၩ့အ့ၪၥၭဘၪ့လဖၪ မးၥံၫဘဲၫယီၩၥိၭနီၪ အဆၧထိစိၩအီၪဝ့ၫဒၪ ဘဲၫၥ့ၪ လဲၪအဂဲး Fr.Robert စံၭဝ့ၫဒၪ ဘဲၫယီၩအၥိၭနီၪလီၫႉ

“လၧကိၫဘံဆၧဆၫခီၫကမံၩ့ မွဲလၧခးပယၩ့ဆၧတုၩ့ထၪ့တုၩ့လၩ့ခီၫကမံၩ့ ပၥၭဘၪ့လဖၪယီၩ အၥုၪ့အၥၭ လၩ့ဆ့ၭလၩ့ယွၩဝ့ၫဒၪ အၪမၬဒ့ၭနီၪလီၫႉ ဘဲၫယီၩနီၪ အၪဒၪဆၧပဒၪဘၪၦၡၩလဖၪနီၪ ထံၪခးအဂး ကမိမၩထၪ့ဝ့ၫ ကမံၩ့မံၩ့ဒၪလူၬမၩဝ့ၫဘၧၫ့အ့ၬ ဘၪအီၪလၧ ဆၧၥၭမဲၪၥၭဖျဲၩ့ဖၧၩ့ကိဆၧၫ့ကိထီဒ့ၭလီၫႉ ပၥၭဘၪ့လဖၪယီၩဆ့ မွဲဘဲၫနီၪႉ ဆၧနီၪအကၠီၩ့ ဘဲၫယီၩလၧခးပယၩ့ဖၧၩ့ မွဲလၧဆၧဒုၭဆၧခၭလဖၪအကၠီၩ့ ၦလၧအဘၪဒၪဆၧၫ့ယၫလၧ ဆၧၡၪ့ဆၧယၬ လဖၪအဂး ပမၩထၪ့အ့ၪကန့မန့လဲၪ ဆၧထိၪတွၭအၪ့ဎၬအဂ့ၩဘဲၫယီၩၥိၭလဖၪ ဘဲၫၥိၭအဝ့ၫၥံၪ အၪ့ဎၬထၪ့ကန့ အဂးႇ ကၥ့ၪအဂးႇ ပထံၪခးအဂး ပဖ့ၪလၫ့ဆၧမၩဆၧၩ့ကန့မနီၪလဲၪနီၪ ဘဲၫအဝ့ၫၥံၪအၪ့ဎၬထၪ့ကၥ့ၪအဂး ယမိ ထံၭလၩ့အ့ၪဘၪအဝ့ၫၥံၪ အခိၪနုၬဖၧၩ့ ဆၧထိၪတွၭအၪ့ဎၬအဂ့ၩလဖၪနီၪ မွဲအကၧၩ့ဒိၪထုၬဆၧထိစိၩနီၪလီၫႉ ဂီၩ့နီၪ ၥၭဘၪ့ကနၩ့နၩ့ ဂဲၫထၪ့ဘၩယွၩလၧၩ့အ့ၬဘနီၪ မွဲအီၪဆ့တၭ ဘဲၫၥၭဘၪ့လဖၪယီၩ ကလၩ့ဘူၭထဲၩ့လၧကၠဲၬအဂးဆ့ ယဆၧထိစိၩအီၪဝ့ၫဆ့အကၠီၩ့ ယမၩထၪ့အ့ၪ မုကတဝၭအဂး မးၥံၫဘဲၫယီၩၥိၭလီၫႉ”

 ၦလၧအဂဲၫထၪ့မးၥံၫကဘျၩ့ယီၩအဖၧၩ့ ၥၭဘၪ့ခွၫ စအဲၪဆၨၩနီၪ စံၭဘၪဝ့ၫ “ဘၪထွ့ၪလၧ ၥၭဘၪ့လဖၪယဲၩ ထၪ့လၧကၠဲၬနီၪ မန့လဲၪဂဲၫပၨၩဆုၭထၬပၧၩလဲၪႇ ဘဲၫၥိၭပကလၩ့ဘူၭထဲၩ့လၧယွၩအဂး ပကမၩထၪ့ကၠၭပၥ့ၪလဲၪနီၪ ပၥိၭလဖၪ ပဘၪကၩ့ကၩဎိၭလၩ့ကၠၭဆၧနီၪလီၫႉ ပကၩ့ကၩဎိၭလၩ့ကၠၭဆၧအခၫနီၪ ပဘၪဘၩယွၩပကၠၧၫ့အကၠီၩ့ ပယဲၩထၪ့လၧယွၩႇ ဆၧယံၩယါလအီၪဘၪအကၠီၩ့ ပယဲၩထၪ့လၧယွၩႇ မိဖါအဆၧဆၫ့ထွ့ၪလအီၪဘၪအကၠီၩ့ ပၥၭဘၪ့ လဖၪယဲၩထၪ့လၧယွၩအဂဲး ပအၪ့နၩ့ဖ့ၪၥ့ၪယၫလိၬၥၭနီၪလီၫႉ ဂီၩ့ ဘဲၫပကလၩ့ဘူၭထဲၩ့လၧယွၩအဂး ပၥၭဘၪလၩ့ဎိၭ လၧ လဂီၩခီၫပမံၫနၫ့ၥၭအထီ ပလဖီၪ့ဒံၭဘၪ ခွ့ၩဒိၭနါအထီ အဆိၪထုၬပကဘၩဆိၪဖၪ လဂီၩဆၧဘၩဆိၪဖၪကိ ဂီၩဒ့ၭႇ ဂီၩ့နီၪ လၧလဂၫခီၫဆ့ လချုၭပလဖီၪ့ဒံၭဘၪ ခွ့ၩဒိၭနါအခၫနီၪ ပကဝံကၠၬဖဲၫ့ဆံၫ့ဎံၪ ပကဘၩဆိၪဖၪကၠၭ လဂၫဆၧဘၩဆိၪဖၪလီၫႉ ဂီၩ့နီၪ ဘဲၫၥိၭၥၭဘၪ့ခရၧၫ့အကျိၪစ့ၩ ကဂုထၪ့အၪထၪ့အဂးနီၪ မုကနွ့ၫအဂး ၥၭဘၪ့က ဂၩနီၪ ကဘၪထံၭလၩ့ဆၧဘၩဘိၪ့ ၅ယၩအဂဲးႇ လခဲၫ့ခီၫလၩကိၭဘံၪ့ဆ့ ၥၭဘၪ့လဖၪကဒၪဎိၭလၩ့လိၬၥၭဒဲ ပကမး ၥံၫကၠၭနီၪလီၫႉ”

လၧမးၥံၫကဘျၩ့ယီၩအဖၧၩ့ ၥၭဘၪ့လဖၪထီးလူၬဂဲၫထၪ့ဝ့ၫဖိၭဘိၭအဂၩ(၇၀ဘျဲၪ)အဂဲး ပန့ဘၪဆၧပရၧၫ့ ဘဲၫယီၩ အၥိၭနီၪလီၫႉ

နးအဲၪဖီၫဘွၩ

29.5.2022