ဒိၩ့ပၥံၫ့ဆၧအီၪကီၪ့အဂး ၥၫ့ဎွၩဖရၫ့စံၭ ရွံထၪ့ဘၪၥၫ့ခိၪဒိၪအဂဲး

နံၪ့၂၀၂၃နံၪ့ လၩမ့ၫ၃၁ၥၫ့အဂၫလၩ့ ၄နၩရံၫခီၫအခံၫ့နီၪ ၥၫ့ဎွၩဖရၫ့စံၭဘိၭဘၪၥ့ၪယၫထၪ့ ဒိၩ့ပၥံၫ့ဆၧအီၪကီၪ့အဂး ၥၫ့ခိၪဒိၪနီၪလီၫႉ ဘိၪ့ခိၪၥၫ့ခၫလၧဘၪထိးရွံထၪ့အၥၭ ကကဲၪထၪ့ဘၪၥၫ့ခိၪဒိၪလဂၩနီၪ မွဲဝ့ၫဒၪလၧFr.Henry မၩ့အဲၪချံၫ့နီၪ လီၫႉ ပန့ထၪ့ဘၪၥၫ့ခိၪဒိၪအကၠီၩ့ ပစံၭခိးစံၭတၩဘၪကဆါယွၩဒိၪဒိၪအၪအၪလ့ၬနီၪလီၫႉ ဘဲၫယီၩယအဲၪဒိၭ ဆုးထဲၩ့လီၩၥ့ၪယၫ အ့ၪဘၪနၥံၪ ပအဲၪကွံၩယူၭယၪ့ဘၪၥၫ့ခိၪဒိၪအၥၫ့ Bp.Henry မၩ့အဲၪချံၫ့အဂဲးအဖး ကဆံၭကခ့ၭဖိၪနီၪလီၫႉ

Bp.Henry မၩ့အဲၪချံၫ့ယီၩ အီၪဖျဲၪထၪ့လၧ နံၪ့၁၉၆၀လၩယူၫ၂၃ၥၫ့နီၪလီၫႉ အဝ့ၫအဖါဖါနီၪ အမံၩ့မွဲလၧ ယောဟန် ဖူးသာဇံ ဒဲ အမိမိနီၪမွဲလၧ စီစီလျားဖီးကျင်လှနီၪလီၫႉ အဝ့ၫယီၩအီၪဖျဲၪထၪ့လၧ ချံၫ့မုၬခီၫ့ဆၧအီၪကီၪ့ ထံၫနွဲတဝၫ့နီၪလီၫႉ ၁၉၈၉နံၪ့နီၪ အဝ့ၫယီၩကဲၪထၪ့ဘၪဘိၪ့ခိၪၥၫ့ခၫလဂၩနီၪလီၫႉ

ကဲၪထၪ့ဘိၪ့ခိၪၥၫ့ခၫလဂၩအထီ အဝ့ၫဘၪဖီၪ့ထၪ့ဖံၭထၪ့ယွၩအဆၧဖံၭဆၧမၩအလးလဖၪနီၪ မွဲဝ့ၫဒၪ

၁ႉ ၁၉၈၉နံၪ့နီၪ အမူၩဒၩလၩ့ဝ့ၫဒၪလၧ ဒိၩ့ပၥံၫ့ဆၧအီၪကီၪ့ စံၫ့ပံတၧၫကၥံၫဒရဲၫၥရိၬလးဝၩ့ဖၧၩ့နီၪလီၫႉ

၂ႉ ၁၉၈၉-၁၉၉၅ နံၪ့ ဘၪလ့ၩထၪ့ဆၧမၩလိၪလၧ ခးပြင်သစ်နီၪလီၫႉ

၃. ၁၉၉၅-၁၉၉၆နံၪ့ အမူၩဒၩလၩ့ဝ့ၫဒၪလၧ မၠီၩ့မၠၭဝံးဒီၪ့ ထံၫခိၭဖံးဆၧအီၪကီၪ့ဖၧၩ့နီၪလီၫႉ

၄ႉ ၁၉၉၆-၁၉၉၇နံၪ့နီၪ အမူၩဒၩလၩ့ဝ့ၫဒၪလၧ ဒိၩ့ပၥံၫ့ဆၧအီၪကီၪ့ မယၩ့ခၠီၩ့ ၦကကဲၪထၪ့ဘိၪ့ခိၪၥၫ့ခၫဆၧမၩလိၪ လးခၪ့ထံၭ ဘဲၫကၠီးခိၪကဂၩအၥိၭနီၪလီၫႉ

၅ႉ ၁၉၉၈-၂၀၀၃နံၪ့နီၪ အလးလၩ့ဝ့ၫဒၪလၧ ဝံးတခိၩ့ဆၧကဲၪထၪ့ဘိၪ့ခိၪၥၫ့ခၫဘျၪ့ကိၪ့ဒိၪလးဖၧၩ့ ဘဲၫၦအဘၪယိ ထဲၩ့ခွါထဲၩ့နးၥၭဂဲးဘၭလဂၩအၥိၭနီၪလီၫႉ

၆ႉ ၂၀၀၃-၂၀၀၉နံၪ့နီၪ ဘၪဆုးထဲၩ့ဖီၪ့ထၪ့ဖံၭထၪ့ယွၩအဆၧဖံၭဆၧမၩလၧ ဝံးတခိၩ့ဆၧကဲၪထၪ့ဘိၪ့ခိၪၥၫ့ခၫ ဘျၪ့ကိၪ့ဒိၪလးဖၧၩ့ ဘဲၫကၠီးခိၪလဂၩအၥိၭနီၪလီၫႉ

၇ႉ ၂၀၀၉-၂၀၁၇နံၪ့နီၪ အမူၩဒၩလၩ့ဝ့ၫဒၪလၧ ဒိၩ့ပၥံၫ့ဆၧအီၪကီၪ့ ကရုနၫခရၧၫ့ဖၧၩ့ ဘဲၫကရုနၫဒါရိုက်တာ ခိၪနါဒိၪ ထုၬလဂၩအၥိၭနီၪလီၫ

၈ႉ ၂၀၁၈-၂၀၂၁နံၪ့နီၪ အမူၩဒၩလၩ့ဝ့ၫဒၪ လၧဒိၩ့ပၥံၫ့နီၪလီၫႉ

၉ႉ ၂၀၂၁-၂၀၂၃နံၪ့ဖၧၩ့ ၥၫ့ခိၪဒိၪဂျွန်မၩ့ဆံၫ့ဎံၪလအီၪလၧၩ့ဘၪအထီ အဝ့ၫဘၪဖီၪ့ထၪ့ဖံၭထၪ့ဆၧအီၪကီၪ့ထၧၫ့ဘံၪ့ ယၫ အဆၧဖံၭဆၧမၩလၧ ဒိၩ့ပၥံၫ့ဆၧအီၪကီၪ့ယီၩ ဒဲ ကနံၩယီၩ ၂၀၂၃နံၪ့ လၩမ့ၫ ၃၁ၥၫ့ ပူၬတပၠါမုနံၩ အဂၫလၩ့ ၄နၩရံၫခီၫအခံၫ့ နီၪ မွဲၥၫ့ဎွၩဘိၭဘၪၥ့ၪယၫထၪ့အဝ့ၫ ဘဲၫဒိၩ့ပၥံၫ့ဆၧအီၪကီၪ့ ၥၫ့ခိၪဒိၪ Bp.Henry မၩ့အဲၪချံၫ့အၥိၭနီၪလီၫႉ

ထၧၫ့ဖုဝဲထံၩၥိၭထီးလူၬၥံၪဧ့ႇ ဘဲၫအဝ့ၫယီၩ ကဆုးထဲၩ့ဖီၪ့ထၪ့ဖံၭထၪ့ဘၪယွၩအဆၧဖံၭဆၧမၩလၧ ဆၧဆီၪ့ဆၧချဲၫ့ဖၧၩ့ ဒဲ ဆၧၥုၪ့ဎွံၪၥၭယီၫဖၧၩ့ ကန့အဂးနီၪ ပကအၪ့ကံၩ့ဘၩဆိၪဖၪအ့ၪအဝ့ၫကိၭဒံၩကိၭဂၩဒ့ၭလါဆံၭႉ ပခးပယၩ့ယီၩဆ့ မွဲဖီၩ့ဖျ့ၭထၪ့ ဒၪဝ့ၫလၧ အအၧၩ့ထုၬဆၧၫ့ ထီဖၧၩ့ယီၩဒဲ မွဲဆၧဎူၫဆၧဎၩ့အီၪထၪ့ဒၪဝ့ၫဖျဲၪဖျဲၪလါဆံၭႉ