ဒိၩ့ပၥံၫ့ဆၧအီၪကီၪ့ထၧၫ့ဘံၪ့ယၫ မိမိခရၧၫ့လဖၪအဆၧအီၪကီၪ့ဎိၭလၩ့

နံၪ့၂၀၂၃နံၪ့ လၩအ့ၫဖြ့ၫ၂၀ၥၫ့ဒဲ ထီၩ့စိၩလၧ၂၃ၥၫ့နီၪ ဒိၩ့ပၥံၫ့ဆၧအီၪကီၪ့ ထၧၫ့ဘံၪ့ယၫ မိမိခရၧၫ့လဖၪ အဆၧအီၪကီၪ့ဎိၭလၩ့အီၪဝ့ၫ ဒၪလၧမၠီၩ့မၠၭဆၧအီၪကီၪ့နီၪလီၫႉ

ဆၧအီၪကီၪ့ဎိၭလၩ့ယီၩနီၪဘၪဆၧဝဲထၪ့ဝ့ၫဒၪလၧ လၩအ့ၫဖြ့ၫ၂၀ၥၫ့အဂၫလၩ့၆နၩရံၫအခံၫ့နီၪ ဘီၩ့လၫ့ဒိၩ့ပၥံၫ့ဆၧအီၪကီၪ့ထၧၫ့ဘံၪ့ ယၫမိမၫရံၫအဂၩ့နိၪယါလၪနီၪလီၫႉ ဂီၩ့လၧလၩအ့ၫဖြ့ၫ၂၁ၥၫ့လဂီၩ၆နၩရံၫအခံၫ့နီၪ ဒိၩ့ပၥံၫ့ဆၧအီၪကီၪ့ထၧၫ့ဘံၪ့ယၫၥၫ့ခၫဖၭဒိၪ Fr.Henry အဲၪချံၫ့လ့ၩခိၪလ့ၩနါဂီၩ့ လုထၪ့လၩ့ဎိၭမံဆၩဆၧလုထၪ့နီၪလီၫႉ

ၦအဂဲၫထၪ့ဆၧအီၪကီၪ့ဎိၭလၩ့လဘျၩ့ယီၩမိမိခရၧၫ့လဖၪအဂး ၥၫ့ခၫအဲၪချံၫ့ ဖ့ၪဂဲးဖ့ၪဘၭဝ့ၫဒၪ “လၧဒိၩ့ပၥံၫ့ဆၧအီၪကီၪ့ဖၧၩ့ယီၩ မိမိအခရၧၫ့အီၪဝ့ၫနီၪ မွဲဝ့ၫဒၪလၧ ဆၧအီၪကီၪ့အဂး ဂဲးဘၭအဎိၩအဒိၪကမံၩ့နီၪလီၫႉ ဆၧအီၪကီၪ့လၩ့ဎိၭကဘျၩ့ယီၩနီၪ  မွဲအခံၫ့လၧ အလူဒိၪ ဎွ့ၩဒိၪအီၪဝ့ၫဒၪ ဒဲ မွဲလၧဆၧမၩလဲထၪ့ဆၧဒၪၥဖၠးနီၪလီၫႉ ဘၪကဲၪထၪ့မိလဂၩအဆၧကဲၪနီၪ မွဲပအၪ့လဲၩလန့ဘၪလၧဆၧနးမံၩ့နီၪလီၫႉ ပၥိၭ လဖၪယီၩ မွဲပကဘၪအီၪကၧၩ့ဖျိၪ့ပၥၭဒဲ ပကဘၪအီၪၥုၪ့လဖျိၪ့ဎးၥၭလဖျိၪ့ဎးအဂး မိကၭၥလံၬဆၧအီၪကီၪ့ယီၩၥီၪ့ၥၫ့ထၬပၧၩနီၪလီၫႉ ၦၡၩ လဖၪယီၩနီၪ မွဲပမိအီၪဒၪပၧၩကဂၩဎးလီၫလါနၫ့ ကနံၩယီၩနီၪ မိၥံၪလဖၪဂဲၫစူၭကီၪ့လၩ့ဎိၭလိၬၥၭလယီၩနီၪ မွဲဆၧအဂ့ၩဒိၪထုၬကမံၩ့နီၪလီၫႉ လကၭဒံၭဘၪ မိလဖၪယီၩမွဲကဘၪဖ့ၪဆၧၫ့လၩ့အၥၭ လၧမိဆၧအီၪကီၪ့အဂးနီၪလီၫႉ ပဝ့ၫၥံၪလဖၪယီၩနီၪ မွဲပဒိၭန့ထၬဆၧၥူၫဝၭဆံၫ့ဎံၪဂီၩ့ထၬ ကိၭဂၩနီၪလီၫႉ ပဒိၭန့ထၬဆၧၥူၫဝၭဆံၫ့ဎံၪဂီၩ့ဝ့ၫဒၪၦလဖၪနီၪ မွဲပမူၩဒၩအီၪလၧ ပကဘၪမၩမိဆၧအီၪကီၪ့အဆၧဖံၭဆၧမၩနီၪလီၫႉ ဆၧနီၪအ ကၠီၩ့ ကၠၧၫ့ဒၪၥၫ့မုၥၫ့ခၫ Bro Sr လဖၪလီၫလကၭဘၪ ၦဆူၩနဲၩဖိၪၥံၪကိၭဂၩနီၪ ပကဘၪမၩမိဆၧအီၪကီၪ့အဆၧဖံၭဆၧမၩနီၪလီၫႉ” အဂဲး Fr.Henryစံၭဝ့ၫဒၪနီၪလီၫႉ

လၧဆၧအီၪကီၪ့ဎိၭလၩ့ကဘျၩ့ယီၩအဖၧၩ့ မိလဖၪဂဲၫထၪ့ဝ့ၫဒၪထီးလူၬကအီၪဖိၭဘိၭအဂၩ ၅၀၀ဘျဲၪအဂဲးပန့ဘၪဆၧပရၧၫ့ဘဲၫယီၩ အၥိၭနီၪလီၫႉ