ထီးမီၪ့ဘံၭခွံၬ ၡၩခမျၧးအဆၧလိၪလဖၪလဂ့ၩအဂး ၥၫ့ဎွၩအၪ့ယၫထၪ့ သီရိလင်္ကာ ထံၪခးခိၪနါလဖၪ

ၦလၧအဘၪဒၪခီၩ့ဆၧၫ့ယၫလၧ ဆၧကၪဆၧဂဲၩသီရိလင်္ကာၡၩခမျၧးလဖၪကၠၧၫ့ကၠၧၫ့ ၥၫ့ဎွၩဖရၫ့စ့ၭယီၩအီၪဝ့ၫဒၪအဂဲးႇ လၧအနံၪ့၇၀ အထးဖၧၩ့ ၦလၧအဘၪထိး အအၧၩ့ထုၬခီၫ့ၡၩအဆၧလၩ့အၪ့ယိၫ ၡၩခမျၧးလဖၪနီၪ ယိထဲၩ့ခွါထဲၩ့အဂး လၧအဖီၩ့ခွံၬလၩယူၫလဲၫ့၁၀ၥၫ့ အတုၬမုနံၩ ဒၪအိၩ ၥၫ့ဎွၩအၪ့ယၫထၪ့ဘၪ သီရိလင်္ကာ ထံၪခးခိၪနါလဖၪနီၪလီၫႉ

ၡၩခမျၧးလဖၪ လ့ၩထၪ့ဝၩ့ထၬ ခးခိၪဒိၪ Gotabay Rajapaksa အဂံၪ့ဂီၩ့အထီ ၥၫ့ဎွၩအၪ့ယၫထၪ့ဆၧဘဲၫယီၩနီၪလီၫႉ ခးခိၪဒိၪ ရာဂျာပါခဆာ နီၪ ဂဲၫထဲၩ့ပၨၩ့ထၬ သီရိလင်္ကာ ထံၪခးအီၪဝ့ၫဒၪအနံၪ့၂၀ဘျံၪ့ယူၭဂီၩ့ ကစဲၪ့လၩ့ထဲၩ့လၧ ခးခိၪဒိၪအလးအဂး မွဲလထိးဆၧၫ့ဘၪ ဝ့ၫနီၪလီၫႉ သီရိလင်္ကာ ထံၪခး ၥၫ့ခိၪဒိၪ၁၅ဂၩဆ့ၭလၩ့ထၬအစူၪမု လံၬပရၧၫ့ဖၧၩ့နီၪ အၪ့ယၫထၪ့ဘၪ ထံၪခးခိၪနါလဖၪ ဘဲၫၥိၭ ကမၩပျၩ့ခွံၬထဲၩ့ ဆၧကၪဆၧဂဲၩလၧအဂဲၫကဲၪထၪ့လဖၪ ဖျဲၪဖျဲၪအဂးနီၪလီၫႉ

ဘဲၫယီၩၡၩခမျၧးလဖၪနီၪ မွဲလၧ ဂက်စ်ႇ မ့ၪဆၫၥိၪ ဒဲ ဆၫအၪ့ဆၫအီၩလလၧၫ့ဎွ့ၩဘၪအကၠီၩ့ ဒၪဆၧၫ့ယၫလၧဆၧကၪဆၧဂဲၩအဂဲး ၥၫ့ခိၪဒိၪ Harold Antony Perera နီၪ စံၭဝ့ၫဒၪလီၫႉ မွဲလၧထံၪခးခီၫ့ၡၩဆၧကၪဆၧဂဲၩအကၠီၩ့ ၦခမျၧးလဖၪ ဘၪဒၪဆၧၫ့ယၫလၧ ဆၧကၪဆၧ ဂဲၩတၭ ခးခိၪဒိၪနီၪ ကဘၪမၩပျၩ့ခွံၬဆၧကၪဆၧဂဲၩယီၩဖျဲၪဖျဲၪအဂးလိၪဝ့ၫဒၪအဂဲး အဝ့ၫယီၩ ဆုးထဲၩ့စံၭဝ့ၫဒံၭလီၫႉ

လၧ သီရိလင်္ကာ ထံၪခးဖၧၩ့နီၪ ကဲၬၥလ့ၬဆၧဘိၪ့ဆၧဘၩဖိၪကအီၪဝ့ၫဒၪ ဖိၭဘိၭကခွးယဲကုၬအဂဲး ပန့ဘၪဆၧပရၧၫ့ ဘဲၫယီၩအၥိၭနီၪ လီၫႉ

နးအဲၪဖီၫဘွၩ