တဲၩဖၧၩ့နီၪ ဒူၭအီၪဝ့ၫဒၪလဆိၩယၫလီၫ

Press Note 2, 24th February 2023
ဆၧဝဲထၪ့မံဆၩဆၧလုထၪ့ ၥၭမုဆံၫ့ဎံၫယွၩဘိၪ့မုနံၩမံဆၩဆၧလုထၪ့နီၪ FABC ခရၧၫ့နဲၩရွဲၩခိၪနါဒိၪထုၬ  တိုကျို ကၭ ၥလံၬၥၫ့ခိၪဒိၪ Bp.Tarcisio Isao Kikuchi SVD နီၪ လ့ၩခိၪလ့ၩနါဂီၩ့ Diliၥၫ့ခိၪဒိၪ Bp.Virgilio Cardinal do carmo da silva SDB ဒဲ  လာအို Louis Cardinal Marie Ling Mangkhane Khoun လဖၪနီၪလုထၪ့ဆၧၩ့အဝ့ၫဒၪနီၪလီၫႉ  
 ၥၫ့ခိၪဒိၪ Kikuchiနီၪ လၧအဝ့ၫဘၪဖီၪ့ထၪ့ဖံၭထၪ့ယွၩအဆၧဖံၭဆၧမၩလၧ အၫဖရံကၭလးဝၩ့ဒၪအိၩအဖၧၩ့ ဂဲၫထဲၩ့ဒၪ ခီၩ့ခၫ့ဖျီၫ့ထၬ ဆၧဒၪခီၩ့ခၫ့ဖျီၫ့လဖၪနီၪ လီၩလၩ့လါလၩ့ဝ့ၫဒၪနီၪလီၫႉ  အဝ့ၫအဆၧဒၪခီၩ့ခၫ့ဖျီၫ့အအၧၩ့နီၪဘိၭ ပလအၪ့ဎၬထိး ဆၧၫ့ဘၪ ၦၡၩလဂၩဆၧမၩနီၪ မွဲမၩဂၭဂီၩ့ဆိၫ့ခွံၬ ၡၩအၥုၪ့ၥၭဒဲ အနးၥၭနီၪလီၫႉ ကကဲၩ့ခီၫဆ့ ဆၧယိလါဒဲ ဆၧအဲၪဆၧကွံၩ အီၪလဖျိၪ့ဎးနီၪ Ghana ဂဲၫဆိၬန့အ့ၪ ဆၧၥၭမၧၫ့ၥၭၡီၩ့ဒဲ ဆၧၥုၪ့ဎွံၪၥၭယီၫနီၪလီၫႉ 
ၦအလ့ၩခိၪလ့ၩနါခရၧၫ့လဖၪနီၪ ဂဲၫဆိၬန့ပနဲၫ့တၧၩ့လၧ စပွဲဖၫ့ခိၪနီၪလီၫႉ လၧဆၧကၩ့ကၩဎိၭလၩ့အဖၧၩ့ ထိၬခဲလၫ့ထၬ ပနဲၫ့တၧၩ့လဖၪဂီၩ့ ဆၧဖၩ့လဖၪယီၩ မွဲဖ့ၪဆၧလးလၧကဆါယွၩအဆၧဖၩ့ဒဲ ဆၧလ့ၩဎုၬဆၧကၠၧၫ့ကၠၧၫ့နီၪလီၫႉ 
လၧဆၧကၩ့ကၩဎိၭလၩ့အဖၧၩ့ ဆံၩနီၭနဲၩရွဲၩဒိၪလဂၩမွဲဝ့ၫ Mario Careinal Grech စံၭဝ့ၫဒၪ “ပဝ့ၫၥံၪလဖၪယီၩ မွဲပမၩလိၪပၥၭလၧ ဆၧလ့ၩဎုၬဆၧကၠၧၫ့ကၠၧၫ့အဂဲးနီၪလီၫႉ လၧမိဆၧအီၪကီၪ့ဖၧၩ့ဂဲၫဝ့ၫဒၪဆၧအလူလဖၪနီၪ ခိၭနၪအၪအၪအဂးႇ ဆၧလ့ၩဎုၬဆၧကၠၧၫ့ကၠၧၫ့ဆၧအီၪကီၪ့နီၪ မွဲလၧဆၧအီၪကီၪ့အခိၭနၪဆၧအဂဲးႇ လၧဆၧလ့ၩဎုၬဆၧကၠၧၫ့ကၠၧၫ့ယီၩ အနၧၩ့အစၪ အီၪထၪ့နီၪ မွဲအီၪက့ၪၥုၪ့လၩ့ထၬၥၭလၧ ၥၫ့ခိၪဒိၪလဖၪႇ ဘိၪ့ခိၪၥၫ့ခၫလဖၪ ဒဲ ဆၧအီၪကီၪ့ဖိၪၥံၪ နုၬလၩ့ဂဲၩဝၭဝ့ၫအဖၫ့ခိၪလီၫႉ ဆၧအယီၩ မွဲဖ့ၪပြၧၩ့ ဆၧအီၪကီၪ့ၦမၩဆၧဖိၪလဖၪဒဲ ဆၧအီၪကီၪ့ဖိၪၥံၪ လမွဲဘၪတၭ ကဂၩဘၪကဂၩဆုးကျိၭလိၬၥၬဘူၭဘူၭ ထံးထံးဂီၩ့ မွဲဘၪမၩလၧၫ့ဎွ့ၩထၪ့ ပမူၩဒၩယမူၩဒၩလဖၪနီၪလီၫႉ လခဲၫ့ထုၬနီၪ ကၫဒံၫနဲၫယီၩစံၭဝ့ၫဒၪ ဆၧခိၭနၪနီၪ မွဲအကၧၩ့ဒိၪ ဝ့ၫဒၪအဂဲးႇ ပကဘၪခိၭနၪ ၦလၧအချဲၩ့ဒုၪ့မိဆၧအီၪကီၪ့ယီၩ ၥၭမုဆံၫ့ဎံၪယွၩအလူအဂဲးႇ အၪ့ကံၩ့ဘၩဆိၪဖၪအ့ၪ ၦလၧအဂဲၫ ထၪ့အီၪကီၪ့ဎိၭလၩ့ဆၧလဖၪအဖၫ့ခိၪ ဘဲၫၥၭမုဆံၫ့ဎံၪယွၩအလၩအဖၩ့ကလၩ့ဘၪအဂးႇ လၧထီၫ့နံၪ့(၃ထီ) ဆၧထီဖၧၩ့ ကဆါ ယွၩဝဲထၪ့ထၬအ့ၪဖၧၩ့ၥၭယီၩ လၧဆၧဒူၩဆၧယၪ့ဖၧၩ့ ဘဲၫၥိၭဂၭဖၬဎုၬကၠၧၫ့ကၠၧၫ့ကန့အဂးနီၪလီၫႉ
 Miss Christina Kheng နီၪ အၪ့နၩ့ဖ့ၪၥ့ၪယၫလၩ့ ဘၪထွ့ၪလၧဆၧလ့ၩဎုၬကၠၧၫ့ကၠၧၫ့အဂဲးနီၪလီၫႉ ၦလၧအဂဲၫထီၩ့စိၩ လၧဆၧအလးယီၩလဖၪနီၪ လမွဲဘၪၦအဂဲၫယိဆၧဒဲ မွဲၦလၧအဘၪနုၬလၩ့ဂဲၩဝၭဆၧလဖၪနီၪလီၫႉ ဆၧအီၪကီၪ့ဎိၭလၩ့ ကဘျၩ့ယီၩ အဆၧထိစိၩနီၪ ပကဘၪအီၪက့ၪထၬပဆၧမံၫမးလဖၪႇ ပကဘၪထုၬထၪ့ ပဆၧဒၪလဖၪဒဲပဆၧထိၪတွၭလဖၪႇ ပကဖ့ၪ မၧၫ့ထၪ့ ပဆၧယိလါလဖၪႇ ပကၥုၪ့ထၪ့ဆၧဆူနဲၩလဖၪႇ ပကဘၠၩ့ခွံၬပဖၧၩ့လးလဖၪႇ ပကဘၪမၩလိၪဆၧလၧ ကဂၩ ဘၪကဂၩ အအီၪအဂဲး အဝ့ၫယီၩလီၩလၩ့လါလၩ့ဝ့ၫဒၪနီၪလီၫႉ လကၭဒံၭဘၪ ၦအဂဲၫထၪ့ဆၧလဖၪယီၩ ကထုၬထၪ့လံၬလီၫလမွဲဘၪတၭ ကဂၩဒဲကဂၩကဒၪလၩ့ဎိၭလိၬၥၭအဂးႇ ကချဲၩ့လၩ့ဎိၭဒဲ ကဖံၭထံၩဖံၭၥိၭလိၬၥၭအဂးႇ ဘဲၫၦအအီၪလၧခးအ့ၩၡၩယွၩအဖိၪအ လံၩအၥိၭ ကဂၭဖၭဎုၬကၠၧၫ့ကၠၧၫ့လၧၥၭမုဆံၫ့ဎံၪယွၩအဂးနီၪ အဝ့ၫယီၩစံၭဝ့ၫလီၫႉ
Kirgyzstan ထံၪခးမူၩဒၩအီၪဘိၪ့ခိၪၥၫ့ခၫ Fr.Antony James Corcoran SJ နီၪ စံၭဝ့ၫဒၪ ၦအဂဲၫထၪ့လဖၪယီၩ ပဂၭဖၭကၠၧၫ့ကၠၧၫ့နီၪ မွဲၥၭမုဆံၫ့ဎံၪယွၩအဂၭဖၭလၧပၧၩကၠၧၫ့ကၠၧၫ့အဆၧဖ့ၪနဲၪဂီၩ့ ပလဖ့ၪဆိၫလၧၩ့ဘၪ ပဆၧကိၪ့ဆၧတဲၩ့လဖၪ တၭ ပကဖ့ၪလၫ့ၥၭမုဆံၫ့ဎံၪယွၩအခွး လၧပဆၧၥၭမၧၫ့အၥၫ့ဖၧၩ့အဂး အဝ့ၫယီၩစံၭဝ့ၫလီၫႉ
 Fr.Clarence devadass ဆ့ လၧအဝ့ၫအဆၧလီၩလၩ့လါလၩ့ဖၧၩ့ စံၭဝ့ၫဒၪ အဝ့ၫၥံၪဂဲၫဒၪဎိၭလၩ့လိၬၥၭယီၩနီၪ မွဲဝ့ၫဒၪလၧ ကထုၬထၪ့လံၬဘျံၭကန့အဂးနီၪလီၫႉ လံၬလဲလဖၪယီၩ ဘဲၫကဖ့ၪလၫ့ ၦအဂဲၫထၪ့လဖၪယီၩဆၧမၩဆၧၩ့ကန့ လၧ ကဂၭဖၬကၠၧၫ့ကၠၧၫ့အဂးနီၪလီၫႉ လခဲၫ့ထုၬအ့ၪမွဲလံၬဘျံၭယီၩအီၪထၪ့အခၫ လံၬယီၩကဘၪကဲၪထၪ့ ၦအအီၪလၧခးအ့ၩၡၩဖၧၩ့ လဖၪ အဆၧဂၪ့အုၩဂၪ့ထိၬလဖၪႇ အဆၧယိလါ ဒဲ အဆၧမံၫမးလဖၪႇ အဆၧထိၪတွၭအၪ့ဎၬဒဲအဆၧဒၪလဖၪ နီၪလီၫႉ 
ၦလၧအလ့ၩခိၪလ့ၩနါလဖၪလၩဖ့ၫဘြူၫအ့ၫရံၫ၂၄ၥၫ့ဆၧကၩ့ကၩဎိၭလၩ့နီၪ  မွဲဝ့ၫဒၪ ဟီၫ့ကီၪ့ၥၫ့ခိၪဒိၪ Bp.Stephen Chow SJ , Miss Susan Pascoe, ဆံၩနီၭခရၧၫ့ဖိၪလဂၩမွဲဝ့ၫ ခးဖံလံပဲၫ့ၥၫ့ခိၪဒိၪခရၧၫ့ ကၭၥလံၬဆၧအီၪကီၪ့ဖိၪမွဲဝ့ၫ Joy candelario နီၪလီၫႉ
ၦလၧအဂဲၫထၪ့လဖၪယီၩ ဘၪထိးကိၭဖံၭၥိၭလၧ ကစီၪဆီၫ့မီၪ့ထၪ့ ဆၧအၪ့စၪ့၃မံၩ့အဖၫ့ခိၪ လၧအၪ့ကံၩ့ဘၩဆိၪဖၪအဖၧၩ့နီၪလီၫႉ 
•    လၧဆၧလ့ၩဎုၬဆၧကၠၧၫ့ကၠၧၫ့အဖၧၩ့ အဝ့ၫၥံၪအဆၧဒၪခီၩ့ခၫ့ဖျီၪ့နီၪအီၪဝ့ၫဘဲၫၥ့ၪလဲၪႉ 
•    လၧဆၧအီၪကီၪ့ဎိၭလၩ့ယီၩအဖၧၩ့ အဝ့ၫၥံၪဒၪထၪ့ အဝ့ၫၥံၪအမူၩဒၩနီၪ ဘဲၫၥ့ၪလဲၪႉ 
•    "ဘၪထွ့ၪလၧ နးၥၭအဂးဆၧချဲၩ့ဎိၭလၩ့"နီၪ  အဝ့ၫၥံၪစီၪဘၪဘဲၫၥ့ၪလဲၪႉ
အၪ့မုဆၫဆၧအၪ့ဂီၩ့နီၪ ၦအဂဲၫထၪ့ဆၧအီၪကီၪ့ဎိၭလၩ့လဖၪယီၩ ကခရၧၫ့ဘၪကခရၧၫ့ ချဲၩ့လၩ့ဎိၭကၠၭလိၬၥၭႇ ကထုၬ ထၪ့လံၬဘျံၭအဂး အဆိၪထုၬအဝ့ၫၥံၪ ဒၪထၪ့ဆၧအဂဲးအဖးလဖၪနီၪ အဝ့ၫၥံၪအၪ့နၩ့ဖ့ၪၥ့ၪလၩ့ဝ့ၫဒၪနီၪလီၫႉ