ဆၧအီၪကီၪ့ဆရၫမုၪလဂၩ အဆၧဖ့ၪလၫ့ဒဲ အဆၧအၪ့ယၫထၪ့စိၩလၧၦဆူနဲၩဖိၪၥံၪ

ဆၧအီၪကီၪ့ဆရၫမုၪလဂၩ အဆၧဖ့ၪလၫ့ဒဲ အဆၧအၪ့ယၫထၪ့စိၩလၧၦဆူနဲၩဖိၪၥံၪ

         အီၪလၧမဒေါ့ကုန်းဆၧအီၪကီၪ့ ‌ကျောင်းကုန်းတဝၫ့ ဆရၫမုၪရိုမာနား နော်ခင်ခင်ထွေး နီၪ ဂဲၫထဲၩ့ဖီၪ့ထၪ့ဖံၭထၪ့ ဆၧအီၪကီၪ့ဆရၫမုၪအမူၩဒၩ ကအီၪဝ့ၫဒၪ ဖိၭဘိၭအနံၪ့၁၀ဘျဲၪယူၭနီၪလီၫႉ အဝ့ၫယီၩ လၧအဖီၩ့ခွံၬ ၁၉၈၅နံၪ့အိၩနီၪ ဂဲၫထဲၩ့ ထၪ့ထၬ ဆၧအီၪကီၪ့ဆရၫႇမုၪ ၥဖၠးလၧ ဝံးတခိၩ့ အ့ၩစံၫ့အိၩနီၪလီၫႉ အဝ့ၫယီၩထၪ့ၥဖၠးဂီၩ့အခၫနီၪ လဖီၪ့ထၪ့ဖံၭထၪ့ဒံၭဘၪ ဆၧအီၪကီၪ့ဆရၫမုၪလဂၩအမူၩဒၩဂီၩ့ လၧဒိၩ့ပၥံၫ့ဆၧအီၪကီၪ့ဖၭဒိၪအဖၧၩ့ လိၪဝ့ၫဒၪအလးလဖၪနီၪ  လီၩ့ဖ့ၪဆၧၫ့လၩ့ၥၭ လလး ဘၪလလးနီၪလီၫႉ ဂီၩ့ လၧ၂၀၀၈နံၪ့ ခးပယၩ့ဖၧၩ့ နၫဂံလဖုၬလၩ့ဝ့ၫဂီၩ့အခၫမၬ လၧအဆၧအီၪကီၪ့ၥၫ့ခၫအဆၧကိၭ နံၫဘျၩ့ လဘျၩ့အဖၧၩ့ ဖီၪ့ထၪ့ဖံၭထၪ့ ဆၧအီၪကီၪ့ဆရၫမုၪ အဆၧဖံၭဆၧမၩလဖၪနီၪလီၫႉ

         အဝ့ၫယီၩနီၪ အၥၭအီၪ၁၂နံၪ့မၬ နုၬလၩ့ထဲၩ့လၧကၭၥလံၬဆၧဘိၪ့ဆၧဘၩဖၧၩ့နီၪလီၫႉ လၧအဝ့ၫဘၪယိထွ့ၪ ဆၧအီၪကီၪ့ ဖိၪၥံၪအလးလဖၪအဖၧၩ့ ၦဆူနဲၩဖိၪၥံၪအၪဒၪဆၧနီၪ မွဲၦအၡၪ့အယၬလဖၪနီၪလီၫႉ

          လၧၦဆူၩနဲၩဖိၪၥံၪအဂး အဝ့ၫယီၩဖ့ၪလၫ့ဆၧမၩဆၧၩ့ဘဲၫၥ့ၪလဲၪအဂဲး စံၭဝ့ၫဒၪ “ယဂဲၫလၧဝံးပၥံၫ့ယီၩနီၪ မွဲယဂဲၫဖ့ၪနဲၪ ဖၪထံလဂၩအမ့ၬၥၪနီၪလီၫႉ အဝ့ၫယီၩနီၪအီၪလၧ တဲသုံးလုံး တဝၫ့ နီၪလီၫႉ လၧတဝၫ့ဖၧၩ့နီၪ ကၭၥလံၬဖိၪ အီၪဒၪအဝ့ၫကဂၩ ဎးလီၫႉ ဖၪထံယီၩနီၪအမံၩ့မွဲလၧမန်းကာရင်နီၪလီၫႉ အဝ့ၫယီၩအဖိၪအဒံၪအီၪ ၃ဂၩလါနၫ့ အဝ့ၫအၥၭၡါထၪ့ အဆၧဆီၪ့ ဆၧချဲၫ့လဂ့ၩဘၪဘယီၩအခၫ အဖိၪအဒံၪဂဲၫယိထဲၩ့ခွါထဲၩ့အဝ့ၫအီၪနးဂၩအ့ၬႉ ဆၧနီၪအကၠီၩ့ မွဲလၧ ယဆၧအီၪကီၪ့ဖိၪကဂၩဆ့ ဘိၭ ယဂဲၫကိၭန့အဝ့ၫလၧ ဝံးပဒံၫ့ယီၩဂီၩ့ ယဂဲၫဖ့ၪနဲၪအ့ၪအဝ့ၫအမ့ၬၥၪလီၫႉ အ့ၪမွဲထိးဎွ့အမ့ၬၥၪဂီၩ့အခၫဆ့ ယကဘၪထဲၩ့ ကိၭထၬလၧယဂံၪ့ဂီၩ့ ပကဘၪလီၩ့မၩအ့ၪအဝ့ၫကအၪ့ကအီၪအဂးကိၭမံၩ့နီၪလီၫႉ အ့ၪမွဲအဝ့ၫအီၪမုၬလၫ့ထဲၩ့ ဂ့ၩဂ့ၩမၬ ပထဲၩ့ ၥိၫ့ထဲၩ့အဝ့ၫလၧအဂံၪ့ကန့နီၪလီၫႉ ဖၪထံယီၩနီၪ အခၪ့မွဲလဎိၭဎၩ့ဘၪလီၫႉ အဝ့ၫယီၩ အတဝၫ့နီၪအီၪယဲၩ့လၧ ဆၧအီၪကီၪ့ အကၠီၩ့ အ့ၪမွဲအဝ့ၫကမိဒိၭန့အၪ့ ကိၪဘိၪ့ဆံၫ့ဎံၪအခၫမွဲဂ့ၩ အ့ၪမွဲအဝ့ၫ ကမိဂဲၫအုၩ့လၩ့အဆၧဒဲၩဘၭအခၫမွဲဂ့ၩ ယဘၪအၪ့မၧၫ့ ယဝၩလ့ၩကိၭအဝ့ၫ လၧစဲၭလဲၪ့ယဲးခၪ့နီၪလီၫႉ ပဘၪလ့ၩလၧအဝ့ၫ အတဝၫ့ဖၧၩ့ၥၭနီၪဆ့ မွဲဖၧၩ့ၥၭလမုၬဘၪခီၫကမံၩ့ မွဲလၧအဝ့ၫ အၥၭၡါခီၫကမံၩ့အကၠီၩ့ ပလ့ၩကိၭအဝ့ၫခိၬမၬခိၬမၬ လန့ဘၪအကၠီၩ့တၭ မွဲလၧဘိၪ့မုနံၩလဖၪနီၪဘိၭ ပဘၪလ့ၩကိၭအဝ့ၫနီၪ လီၫႉ ပကဲၪဆၧအီၪကီၪ့ဆရၫမုၪကဂၩအကၠီၩ့ ၦဆူနဲၩဖိၪလဂၩအနးၥၭ ထၧၫ့လဂၭဂီၩ့ဘၪအဂး ပကဘၪခိးဂဲးခိးဘၭ အ့ၪၦမူၩ ဒၩအီၪဝ့ၫဒၪနီၪလီၫႉ

        မန်းကာရင်နီဆ့ ၥ့ၪယၫဘၪဝ့ၫလၧ ကၭၥလံၬဆၧအီၪကီၪ့ဒဲဆရၫမုၪယီၩ ကမၩဆၧၩ့အဝ့ၫဘဲၫနီၪ အခၫအၥၭဎွံၪထၪ့ ဝ့ၫဒၪအၪမၬအဂဲးႇ လါနၫ့ ဆရၫမုၪယီၩကဘၪလီၩ့မၩအ့ၪအဝ့ၫ ဆၧကိၭမံၩ့ကိၭစံၩ့အကၠီၩ့ဆ့ ညၩၡၫဆရၫမုၪအဂဲး စံၭဘၪဝ့ၫ နီၪလီၫႉ

         ပအၪ့စၪ့ဘၪ ဆရၫမုၪယီၩ ဘၪထွ့ၪလၧ အဆၧအီၪကီၪ့ဖိၪၥံၪအဂဲးအဖးကကၠၪ အဝ့ၫစံၭဆၧၫ့ထဲၩ့ပၧၩ “လၧယဆၧအီၪ ကီၪ့ဖၧၩ့ ဆၧအီၪကီၪ့ဖိၪလနၩ့နၩ့နီၪ ဘၪအီၪလၧ ဆၧဘိၪ့ဆၧဘၩဂူၫဂၩအကၠီၩ့ ထၪ့ၡါလၩ့ဖၩဘၪလၧ ဆၧဘိၪ့ဆၧဘၩဂူၫဂၩဖိၪ လဖၪစွါဘဲၫ အီၪက့ၪထးခွံၬကၭၥလံၬဆၧအီၪကီၪ့ဘနီၪအီၪဝ့ၫဒၪအၪအၪဒ့ၭယူၭႉ ကနၩ့နၩ့ဒီၭ လီၩ့ဖိၬကျိၪစ့ၩအခဲၫ့ဂီၩ့ လ့ၩနုၬလၩ့ ထဲၩ့လၧ ဆၧဘိၪ့ဆၧဘၩလၧအလီၩ့မၩဆၧၩ့အ့ၪအဝ့ၫၥံၪ ကျိၪစ့ၩန့လဖၪအအီၪနီၪလီၫႉ ၦအအီၪက့ၪထးခွံၬ ပကၭၥလံၬ ဆၧအီၪ ကီၪ့လဖၪနီၪဆ့ ယလခွံၬၡိၬထၬဘၪဂီၩ့ လၧအဝ့ၫၥံၪလိၪ ယဆၧမၩဆၧၩ့အခံၫ့နီၪ ယမၩဆၧၩ့အဝ့ၫၥံၪ ယအီၪလၧအဝ့ၫၥံၪ ဘူၭ ဘူၭထံးထံးဂီၩ့တၭ  ဘဲၫအဝ့ၫၥံၪအၥၭကဆုးလီၩ့ထဲၩ့ ကၭၥလံၬဆၧအီၪကီၪ့အဂး ပဘၪကၠူၭထဲၩ့အဝ့ၫၥံၪကဆံၭဆံၭနီၪလီၫႉ

       လၧယဘၪဖီၪ့ထၪ့ဖံၭထၪ့ ဆၧအီၪကီၪ့ ဆၧဖံၭဆၧမၩအလးလဖၪနီၪ ၦဆူနဲၩဖိၪၥံၪနီၪၡၪ့ယၬဝ့ၫဒၪအကၠီၩ့ ယလီၩတီၩတီၩ နီၪ ယမိကဲၪဒိၪကဲၪမုဂီၩ့ ယမိလီၩ့မၩဆၧၩ့အဝ့ၫၥံၪကိၭမံၩ့ဒ့ၭႉ ယဒၪဘၪအဝ့ၫၥံၪ အဆၧကၪဆၧဂဲၩအခၫနီၪ ယမိမၩဆၧၩ့အ့ၪ အဝ့ၫၥံၪလါနၫ့ ယကမၩဆၧၩ့အဂး ယဂဲးဘၭလအီၪဘၪအကၠီၩ့ ယၥၭလမုၬဘၪလီၫ. ယမိလီၩဘၪၦဆူနဲၩဖိၪလဖၪနီၪဘိၭ ပကၭၥလံၬဆၧအီၪကီၪ့ယီၩ ကဲၪဒိၪမွဲဂ့ၩ ၡၪ့မွဲဂ့ၩ အကၧၩ့ဒိၪထုၬနီၪ ဆၧဆူနဲၩကဆါယွၩဒဲ လၧမိဆၧအီၪကီၪ့အဖၫ့ခိၪ အီၪက့ၪ ထၬကၠၭၥီၪကၠဲၪလါဆံၭႉ တခၩကမွဲဆၧဘိၪ့ဆၧဘၩနးမံၩ့နီၪ ကဲၪဒိၪမွဲကအီၪ ၡၪ့မွဲကအီၪ ဆၧဒံၩ့ခိၭဒံၩ့ခံၫ့ကအီၪဝ့ၫဒၪကိၭမံၩ့ နီၪလီၫႉ ဆၧလဖၪယီၩနီၪ အီၪက့ၪထၬ အရ့ၩဒိၪထုၬလဂ့ၩႉ ကၭၥလံၬလဖၪယီၩ တခၩပဘၪဒၪဆၧၫ့ယၫလၧ ဆၧကၪဆၧဂဲၩ နးမံၩ့နီၪ အီၪက့ၪထၬကၠၭဆၧဆူနဲၩလၧယွၩအဖၫ့ခိၪ ဂုးဂုးခၧၫ့ခၧၫ့လါဆံၭႉ ကဆါယွၩအဆၧမၪလူၬ၁၀ထံၪဒဲ ဆၧအီၪကီၪ့ အဆၧၥီၫ့ဆၧၥၪ့၆ထံၪလဖၪနီၪ ဖီၪ့ခၧၫ့ထၬဂ့ၩဂ့ၩဂီၩ့ လၧလိၪဝ့ၫဒၪအလးလဖၪနီၪ နုၬလၩ့ဂဲၩဝၭဂ့ၩဂ့ၩလါဆံၭႉ လီၩ့စီၪဒီၩ့ဘၪ ဎီၩ့မိဆၧအီၪကီၪ့ အဆၧဂဲးဆါဘၭဆါလဖၪလၧ ဆၧဘိၪ့ဆၧဘၩဂူၫဂၩလဂ့ၩဂီၩ့ အီၪက့ၪထၬဆၧဆူနဲၩ တီၩတီၩလါဆံၭနီၪ ယမိအၪ့ယၫဘၪၦဆူနဲၩဖိၪလဖၪနီၪလီၫႉ”

           လၧမိဆၧအီၪကီၪ့အဖၧၩ့ ဆၧအီၪကီၪ့ဆရၫႇမုၪလဖၪ အနိၫ့နီၪဆ့ မွဲအရ့ၩဎိၩဝ့ၫအၪမၬဆ့နီၪလီၫႉ အဝ့ၫၥံၪယီၩ အလံၩ့ အလဲၪ့လအီၪဘၪအဖၧၩ့ ဘၪဖီၪ့ထၪ့ဖံၭထၪ့ဆၧအီၪကီၪ့အဆၧဖံၭဆၧမၩလဖၪနီၪလီၫႉ အဝ့ၫၥံၪယီၩအၪဒၪဆၧနီၪ လမွဲဘၪ ၦကဲၪဒိၪကဲၪမုဖိၪလဖၪတၭ မွဲဒၪဎွ့ၩၦအအၪ့နၧၩ့အီၩနၧၩ့လဖၪနီၪလီၫႉ ကနၩ့နၩ့နီၪမွဲလၧ ၦအၡၪ့အယၬဖိၪ လဖၪနီၪလီၫႉ ဆၧနီၪအကၠီၩ့ ၦဆူနဲၩဖိၪလဖၪဆ့ ပကဘၪဖ့ၪဆၧၫ့ထဲၩ့အဝ့ၫၥံၪ ဆၧမၩဘိၪ့မၩဆၧၩ့လဖၪအဂး ၦမူၩဒၩအီၪဝ့ၫဒၪကိၭဂၩနီၪလီၫႉ အဝ့ၫၥံၪယီၩ ကနံၪ့မၬ န့ဘၪဆၧမၩဆၧၩ့ ၁ကုၬႇ ၁ကုၬခီၫ လီၫအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ