ဆၧမၩလၩမၩဖၩ့ၡီၩ့ ယူၩဘလံၫ၃မံၩ့နီၪ လၧဝံးပၥံၫ့မယၩ့ခၠီၩ့အဂဲး

နံၪ့၂၀၂၂နံၪ့ လၩနိၫဝံၩဘၧၫ ၁၇ၥၫ့လဂီၩခီၫနီၪ ဆၧမၩလၩမၩဖၩ့ၡီၩ့ SFX မံၭထၭမုၪလဖၪ အယူၩဘလံၫ လၧဝံး ပၥံၫ့မယၩ့ခၠီၩ့ SFX မံၭထၭမုၪလဖၪ အကၠီးဝးဖၧၩ့နီၪလီၫႉ

ၦလၧအလ့ၩခိၪလ့ၩနါ မံၩဆၩဆၧလုထၪ့နီၪ မွဲဝ့ၫဒၪလၧ Fr.Henry အဲၪချံၫ့နီၪလီၫႉ ၦလၧအဒိၭန့ဘၪ ယူၩဘလံၫ အီၪဝ့ၫဒၪ၃မံၩ့နီၪလီၫႉ ယူၩဘလံၫလဖၪနီၪ မွဲဝ့ၫဒၪ လိးဘွၩယူၩဘလံၫႇ ထီၫ့ယူၩဘလံၫဒဲ စ့ၭဘျံၭယူၩဘလံၫလဖၪနီၪလီၫႉ ၦလၧအဒိၭန့ဘၪလိးဘွၩယူၩဘလံၫလဖၪနီၪ မွဲဝ့ၫဒၪ Sr.Mary Judith, Sr.Mary Bernard, Sr.Mary Lilia, Sr.Mary James, Sr.Mary Patricia လဖၪနီၪလီၫႉ ၦလၧအဒိၭန့ဘၪ ထီၫ့ယူၩဘလံၫလဖၪနီၪ မွဲဝ့ၫဒၪ Sr.Mary Genevieve, Sr.Philomena Ida, Sr.Rita Mary Ah Chaw, Sr.Judith Mary, Sr.Joan Particia & Sr.Amy Cecilia လဖၪနီၪ လီၫႉ ဂီၩ့ ၦလၧအထိးဆၧၫ့ဒိၭန့ဘၪ စ့ၩဘျံၭယူၩဘလံၫလဖၪနီၪ မွဲဝ့ၫဒၪ Sr.Anastasia Than Than Aye, Sr.Marie Peter, Sr.Matha Ah Paing, Sr. Marina Chit Chit Khaing, Sr.Mary Moe Moe Wai, Sr.Joanetta ဒဲ Sr. Patricia May Oo Khaing  နီၪလီၫႉ

“မုကနံၩယီၩ ပၧၩဝ့ၫ ပစူၭကီၪ့လၩ့ဎိၭဘိၪ့ထၪ့ဘၩထၪ့ဒဲ ပစံၭခိးစံၭတၩထဲၩ့ ကဆါယွၩလၧ ဆၧမုၬဆၧၡူၪဖၧၩ့န့ဝ့ၫ ဒၪလါနၫ့ ၦလနၩ့နၩ့နီၪ ဘၪစဲၪ့မံၩ့ဂၭဖျိၭႇ အဂံၪ့အဎၫ့လဖၪ ဘၪထိးဎူလၫ့ၥၭလၧမ့ၪႇ ဂံၪ့ဒီၪ့ဖိၪၥံၪလနၩ့နၩ့ ဘၪထိးဖီၪ့ၥၭဒဲ ဘၪထိးမၩနၧၩ့မၩစၪၥၭ ဘၪထိးမၩၥံၫၥၭႇ ၦလနၩ့နၩ့ ဘၪစဲၪ့အီၪဂူၪၥၭလၧ ၡိၭကျၩၡၩ့ကျၩနီၪလီၫႉ ပယိထၪ့ဆၧ အဂဲးလဖၪ ယီၩအခၫ ပၥုၪ့လၩ့ပၥၭလၩ့ခိၬမၬခိၬမၬႉ ပစီၪဒီၩ့ဘၪဎီၩ့အဝ့ၫၥံၪဘဲၫပၥၭနီၪ မွဲဝ့ၫဒၪလၧ ပလၩ့ဂၬၡၩလဂၩနီၪလီၫႉ အ့ၪမွဲ ပလလၩ့ဂၬဘၪၡၩလဂၩစွါဘဲၫပကဲၪထၪ့ ၥၫ့မုၥၫ့ခၫ မံၭထၭမုၪ မံၭထၭခွၫလဖၪ လန့ဘၪနီၪလီၫႉ ပဝ့ၫၥံၪယီၩ ပလမွဲဘၪ မူၭခိၪအၥီၫ့လဖၪနီၪလီၫႉ ပမွဲလၧၦၡၩလဖၪနီၪလီၫႉ ပဂဲၫထဲၩ့ဖီၪ့ထၪ့ဖံၭထၪ့ဘၪ ယွၩအဆၧဖံၭဆၧမၩန့လၧ အနံၪ့၂၅ႇ အနံၪ့ ၅၀နီၪ မွဲဝ့ၫဒၪလၧ ဆၧလၩ့ဆၫ့လၩ့မဲၩ ယွၩအခိးအတၩလီၫႉ ထီးမုကနံၩယီၩ ပဂဲၫထဲၩ့အီၪတီၩလီၩ့ လၧပဆၧအုၩ့လၩ့ အဖၫ့ခိၪန့ဝ့ၫနီၪ မွဲလၧပဆၧခိးဂဲးခိးဘၭဒဲ ယွၩအခိးအတၩလီၫႉ ဆၧကိၭမံၩ့နီၪ မွဲယွၩမၩဆၧၩ့ပၧၩအဂဲး” Fr.Henry အဲၪချံၫ့ စံၭဝ့ၫဒၪနီၪလီၫႉ

 “ၦအဂဲၫမၩလၩမၩဖၩ့ၡီၩ့ ယူၩဘလံၫလဖၪထီးလူၬနီၪ ပစံၭခိးစံၭတၩဝ့ၫလီၫႉ မုကနံၩယီၩ မွဲပအီၪနၪ့ထၪ့ဘၪ ၦလၧအထိးဆၧၫ့ဒိၭန့ဘၪယူၩဘလံၫလဖၪအမိအဖါၥံၪနီၪလီၫႉ အဝ့ၫၥံၪလုထၪ့ထၬ အဖိၪမုၪလဖၪယီၩ လၧယွၩအဂး အကၠီၩ့ဆ့ ပစံၭခိးစံၭတၩဘၪလီၫႉ ထီးမုဆၫကနံၩယီၩ ဂဲၫထဲၩ့ဖ့ၪလၫ့လၩ့အၥၭလၧ SFXခရၧၫ့ဖၧၩ့ယီၩဒဲ ဂဲၫထဲၩ့လီၩ့ဖိၬထွ့ၪ ကဆါယွၩအလူအကၠီၩ့ မွဲလၧခရၧၫ့အကိၫစၩ ပစံၭခိးစံၭတၩဘၪ ယူၩဘလံၫဆါလဖၪ ကိၭဂၩဒ့ၭနီၪလီၫႉ ဘဲၫကထီၩ့စိၩ လၧမုကနံၩယီၩအဂး အဝ့ၫၥံၪယီၩ လၧအဆၧဂဲးဆါဘၭဆါဖၧၩ့ ဘၪဂဲၫထဲၩ့ခိးဂဲးခိးဘၭဝ့ၫနီၪလီၫႉ အဝ့ၫၥံၪယီၩ အ့ၪမွဲ အၥုၪ့ၥၭလၩ့ဆါအခၫ ဘၪဂဲၫထဲၩ့ဒိၭနဲၩ့အၥၭလၧ ကဆါယွၩ ဘဲၫအဝ့ၫၥံၪအဆၧဆၫဆါအၥိၭနီၪလီၫႉ ကယဲဘၪဂဲၫထဲၩ့ ဒၪ ဆၧၫ့ယၫလၧဆၧကၪဆၧဂဲၩနးမံၩ့နီၪ ဂဲၫထဲၩ့ခၫ့ဂၭခွံၬဝ့ၫဂီၩ့ ဂဲၫထဲၩ့ဖ့ၪဆၧၫ့လၩ့အၥၭထီးကနံၩယီၩ ဒိၭန့ထၪ့ဘၪ၂၅နံၪ့ထၪ့ ဘၭယူၩဘလံၫဒဲ အနံၪ့၅၀အီၪထၪ့ဘၭ ယူၩဘလံၫယူၭအကၠီၩ့ မွဲလၧSFXခရၧၫ့ဖိၪၥံၪအကိၫစၩ ပစံၭခိးစံၭတၩဘၪ ယူၩဘ လံၫဆါလဖၪယီၩအဂဲး”  Sr.Philip နန်းနွယ်ပြုံးနီၪ စံၭဘၪဝ့ၫလီၫႉ

“မုကနံၩယီၩ ၦလၧအဂဲၫမၩလၩမၩဖၩ့အ့ၪပၧၩ ယူၩဘလံၫမံဆၩဆၧလုထၪ့ ၥၫ့မုၥၫ့ခၫလဖၪနီၪ ပစံၭခိးစံၭတၩဘၪ လီၫႉ လကၩဒံၭဘၪ ၦလၧအမၩအ့ၪပၧၩ ယူၩဘလံၫဘိၪ့မုနံၩယီၩ မွဲဝ့ၫ Mother Ann Teresa ဒဲ ပထၧၫ့ဖုဝဲမုၪလဖၪနီၪ ဆ့ ပစံၭခိးစံၭတၩဘၪနီၪလီၫႉ ဂီၩ့ ယမိအၪ့ယၫထၪ့ဘၪ ဆုးထဲၩ့အၪ့ကံၩ့ဘၩဆိၪဖၪ့အၪပၧၩပဂးခလူၬအဂဲး” ၦလၧအထိးဆၧၫ့ ဒိၭန့ဘၪထီၫ့ယူၩဘလံၫလဂၩမွဲဝ့ၫ Sr.Rita Mary Ah Chaw နီၪစံၭဘၪဝ့ၫလီၫႉ

လကၭဒံၭဘၪ “စံၭခိးစံၭတၩဘၪ ခရၧၫ့ခိၪနါလဖၪႇ အဝ့ၫၥံၪအဆရၫလဖၪ ဒဲ ၦလၧအဂဲၫထၪ့မၩလၩမၩဖၩ့ အဝ့ၫ ၥံၪအယူၩဘလံၫကိၭဂၩဒ့ၭအဂဲး” ၦလၧအထိးဆၧၫ့ဒိၭန့ဘၪ စ့ၩဘျံၭယူၩဘလံၫလဂၩမွဲဝ့ၫ Sr.Mary Moe Moe Wai နီၪ  စံၭဝ့ၫဒၪလီၫ.

SFXမံၭထၭမုၪခရၧၫ့ယီၩနီၪ ဂဲၫထဲၩ့အီၪၥုၪ့လၩ့ထၬအၥၭ အနံၪ့အီၪထၪ့ဘၭဝ့ၫဒၪ ၁၂၅နံၪ့ယူၭဒဲ ထီးမုဆၫကနံၩ ယီၩနီၪ အဝ့ၫၥံၪအခရၧၫ့ဖိၪထီးလူၬ အီၪဝ့ၫဒၪ အဂၩ၄၀၀ ဘျဲၪယူၭအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ