ဆၧမၩလၩမၩဖၩ့လုဒ်မိမၫရံၫအဘိၪ့မုနံၩ

နံၪ့၂၀၂၂နံၪ့ လၩ ဖ့ၫဘြူၫအ့ၫရံၫ ၁၁ၥၫ့ နီၪ မွဲလၧ လုဒ်မိမၫရံၫ အဘိၪ့မုနံၩအကၠီၩ့ လၧဝံးပၥံၫ့ စံၫ့ပံတၧၫ့ ကၥံၪဒြဲၫ ၥရိၬလးဝၩ့ဖၧၩ့ မွဲၦၡၩမၩလၩမၩဖၩ့ဝ့ၫဒၪ မိမၫရံၫ အဘိၪ့မုနံၩကဆံၭကခ့ၭနီၪလီၫႉ
မံဆၩဆၧလုထၪ့နီၪ စၭထၪ့ဝ့ၫဒၪလၧ လဂီၩ၆နၩရံၫအခံၫ့နီၪဒဲ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲလၧ ဘိၪ့ခိၪၥၫ့ခၫ Fr.Michael ငွေဌေး နီၪလီၫႉ ကိနံၪ့ဒ့ၭ ၦၡၩမၩလၩမၩဖၩ့ဘိၪ့မုနံၩယီၩ လၧမေရီလန်းဆၧအီၪ ကီၪ့ / ပင်လယ်ဆၧအီၪကီၪ့ ဒဲ ညောင်းလေးပင် ဆၧအီၪကီၪ့လဖၪအဖၧၩ့ ဎိၩဎိၪဒိၪဒိၪလါနၫ့ မွဲလၧထံၪဂဲးခးဂဲးခီၫ ကမံၩ့ မွဲလၧကိၫဘံဆၧဆၫခီၫကမံၩ့အကၠီၩ့ ၦၡၩလ့ၩမၩလၩမၩဖၩ့ မိမၫရံၫအဘိၪ့မုနံၩ လၧဆၧအလးနီၪလဖၪ လန့ လၧၩ့ဘၪ အီၪဝ့ၫဒၪဖိၭဘိၭ ၃နံၪ့ယူၭနီၪလီၫႉ
Fr.Michael ငွေဌေး စံၭဝ့ၫဒၪ ‘လၧဘိၪ့မုနံၩကနံၩယီၩ မံဆၩဆၧလုထၪ့အဖၧၩ့ ဘဲၫၥိၭယပၫထဲးဎုၬ ကန့ဂ့ၩဂ့ၩဘၪဘၪအဂး မုနၩအိၩယအၪ့ကံၩ့ဆၧမၩဆၧၩ့ လၧမိမၫရံၫအအီၪနီၪလီၫႉ ဘၪန့လဲၪနီၪ ခီၫလၧကိၫဘံ ဘၪယၧၩဂီၩ့အိၩ လဂီၩနၪခူၬ အ့ၪမွဲယမံၫနၫ့ၥၭစွါဘဲၫ ယခိၪဎွံၪဎၧၫ့ ယခိၪဎွံၪယံၩ့ဝ့ၫဒၪ ထီးဘဲၫယီၩကကၠၪအကၠီၩ့နီၪ လီၫႉ ဆၧနီၪအကၠီၩ့ ယအၪ့ကံၩ့ဘၩဆိၪဖၪလၧ မိမၫရံၫအီၪနီၪလီၫႉ လၩ့ဆၫ့ဝ့ၫဒၪကမံၩ့နီၪ ဘဲၫယအၪ့ကံၩ့ဘၩဆိၪဖၪ အၥိၭ ကဂီၩယီၩ ယမံၫနၫ့ၥၭလဂီၩ၅နၩရံၫအခံၫ့နီၪ ယခိၪဎွံၪလယံၩ့လၧၩ့ဘၪဒဲ ဎွံၪထၪ့ပျၩ့ထၪ့ဝ့ၫဒၪနီၪယၥ့ၪယၫဘၪ လီၫႉ ဆၧနီၪအကၠီၩ့ ဘဲၫယီၩယဂဲၫလုထၪ့မံဆၩမုၬမုၬလၩလၩန့ဝ့ၫဒၪနီၪလီၫႉ ဆၧအယီၩနီၪ မွဲလၧယထိးဆၧၫ့ဒိၭန့ ဘၪ မိမၫရံၫအဆၧဘၠၩ့နီၪလီၫႉ ဆၧဝံဖဲၫ့ဆံၫ့ဎံၪနီၪ မွဲလၧဆၧဘၩဆိၪဖၪအဂ့ၩထုၬႇ အစီၩ့အမၩ့အဎိၩဒိၪထုၬ ဆၧချဲၩ့နီၪ လၧယဂးမွဲတီၩလီၩ့ဝ့ၫဒၪတၡါနီၪလီၫႉ ဝံယိဖဲၫ့ဆံၫ့ဎံၪနီၪ လၧဆၧဆူၩနဲၩအဖၧၩ့နးထံၪ နၥံၪအဂး ဆၧလၩ့ဆၫ့လၩ့မဲၩ ကကဲၪထၪ့နီၪ ယလီၩဘုၪ့တၡါလီၫႉ လၧကိၫဘံကဲၪထၪ့၃ဘျၩ့လဘျၩ့အထီအိၩ ယၧၩဆ့မွဲ ကိၫဘံဘၪဂါယၧၩဆ့ နီၪလီၫႉ အနီၪဒၪအိၩ ယနါဂၧၫ့ဘၪ အဆိၪထုၬ ၥၫ့ခိၪဒိၪ ဂၠိၫ့မၩ့ဆံၫ့ဎံၪ မံၫမၪထဲၩ့ဝ့ၫလၧ ကဆါဎြံၬႇ ဂီၩ့နီၪ ၥၫ့မုၥၫ့ခၫ ကနၩ့နၩ့ မံၫမၪထဲၩ့ဝ့ၫဒၪလၧ ကဆါဎြံၬအဂဲး ယၥ့ၪယၫဘၪကကၠၪ ယဆၧဆၫနီၪဆ့ ဂဲၫနၭထၪ့ဂီၩ့ ယစီၪလၩ့ၥၭ ဆၧၥံၫနီၪကထီၩ့လၧယအီၪနီၪလီၫႉ ယကဲၪထၪ့ဘဲၫနီၪကကၠၪ ယဒၨၭနဲၩ့ထၪ့ထဲၩ့ၥၭလၧမိမၫရံၫအအီၪ ဒိၪဒိၪဒ့ၭနီၪ လီၫႉ ဘဲၫၥိၭကကဲၪထၪ့ဘဲၫနီၪၥိၭအဂးဆ့ ၦဆူၩနဲၩဖိၪလဖၪနီၪ ကိၭချဲၩ့ဒုၪ့စိၩယၧၩလၧခွ့ၩဒိၭနါ ဖ့ၪဂဲးဖ့ၪဘၭယၧၩ ဝံအ့ၪယၧၩဖဲၫ့ဆံၫ့ဎံၪဂီၩ့ အၪ့ကံၩ့ဘၩဆိၪဖၪအ့ၪယၧၩအကၠီၩ့ ယၧၩဆ့ယဝံထဲၩ့ဖဲၫ့ဆံၫ့ဎံၪအၪအၪဘၭလၫ့ထဲၩ့နီၪလီၫႉ အနီၪအခၫယထိးဆၧၫ့ဒိၭန့ဘၪ ဆၧလၩ့ဆၫ့ကမံၩ့နီၪ မွဲလၧကိၫဘံဆၧဆၫအကၠီၩ့ အ့ၪမွဲယမံၫလန့ဘၪအခၫ ယဝံထၪ့ဖဲၫ့ဆံၫ့ဎံၪစွါဘဲၫ အီၪကဆိဖိၪ ယမံၫမၪဝ့ၫဒၪနီၪလီၫႉ ဆၧနီၪအကၠီၩ့ လၧဆၧဆူၩနဲၩအဖၧၩ့ ပဝံဖဲၫ့ဆံၫ့ဎံၪဂီၩ့ ပအၪ့ကံၩ့ဘၩဆိၪဖၪဆၧအခၫ ပဒိၭန့ထဲၩ့ဘၪ အခိးအတၩ အလၩ့ဆၫ့လၩ့မဲၩလဖၪအဂဲးႇ ပဝံဖဲၫ့ဆံၫ့ဎံၪနီၪ လၧဆၧ ဘၩဆိၪဖၪ လဖၪအဖၧၩ့ မွဲအဂ့ၩထုၬဆၧဘၩဆိၪဖၪႇ မွဲအစီၩ့အမၩ့အဎိၩဒိၪထုၬကမံၩ့အဂဲး ယမိလီၩဘၪနီၪလီၫ’’ႉ
ဆၧမၩလၩမၩဖၩ့ လုဒ်မိမၫရံၫအဘိၪ့မုနံၩ မံဆၩဆၧလုထၪ့ ဂီၩ့ဝ့ၫကကၠၪ လၧၦဆူၩနဲၩဖိၪလဖၪ အမ့ၬၥဒၧၩ့ ဖၫ့ခိၪ ၥၫ့မုၥၫ့ခၫလဖၪ ဂူၪအ့ၪဝ့ၫ မိမၫရံၫအဆၧဆီၪ့ဆၧချဲၫ့ၥိၪနီၪလီၫႉ
နးအဲၪဖီၫဘွၩ
11.2.22